laj Isaias yoo chi tz’iib’ak chiru b’otb’ookil hu

17–23 febrero

2 Nefi 11–25

“Nasaho’ sa’ qach’ool rik’in li Kristo”

Lix kawresinkil aawib’ re k’utuk natikla naq nakawil ru 2 Nefi 11–25. Kim, Taaqehin—Choq’ reheb’ li komon ut li junkab’all naru nakatxtenq’a chixtawb’aleb’ ru li ch’ol a’an, ut li tusleb’ aatin a’in naru naxk’e aana’leb’ re li k’utuk.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Jultika rik’ineb’ li kok’al li k’a’ru xe’xtzol sa’ li xamaan xnume’ chirix li Jesukristo ut lix tojb’al rix li maak kixb’aanu. Wi xe’xwotz li xe’xtzol rik’ineb’ lix junkab’al, k’e xb’oqb’aleb’ chi aatinak chirix a’an.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

2 Nefi 12:2–3

Li santil ochoch a’an rochoch li Qaawa’.

Lix profeetil aatin laj Isaias chirix “li tzuul re li rochoch li Qaawa’ ” naru nakawoksi jo’ jun na’leb’ re xtzolb’aleb’ li kok’al chirix li santil ochoch ut xtenq’ankileb’ chixtawb’al rajomeb’ re xik aran sa’ jun kutan.

Kok’ k’anjel naru chi b’aanumank

• Kanab’ jun li ch’ina al chixchapb’al chi kutankil jun jalam-uuch re jun li santil ochoch (wan jun sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al), ut kanab’eb’ chixwotzb’al li neke’xnaw chirix li santil ochoch. Il ru 2 Nefi 12:3, ut ch’olob’ naq sa’ li raqal a’an jun profeet aj Isaias xk’ab’a’ kixjultika naq te’wanq santil ochoch sa’ roso’jikeb’ li kutan. Il wi’chik ru li raqal ut ch’olob’ naq xb’aan naq nokoxik sa’ li santil ochoch, li Qaawa’ “tooxtzol chirix lix b’e” ut tooxtenq’a chi “b’eek chiru li ruq’ xb’e.”

• Yiib’ jun li ruq’ b’e chiru li tz’ak, ut sa’ xraqik li b’e k’e jun xjalam-uuch li santil ochoch chi ramb’il ru. Kanab’eb’ li kok’al chi b’eek chiru li b’e ut, naq te’xb’aanu, tenq’aheb’ chixka’sutinkil li ch’ol aatin “b’eek chiru li ruq’ xb’e.” Naq eb’ li kok’al te’wulaq sa’ xraqik li b’e, kanab’eb’ chixteeb’al ru li jalam-uuch. K’a’ru naraj naxye b’eek chiru li ruq’ xb’e li Qaawa’?

• B’icha rik’ineb’ li kok’al jun li b’ich chirix li santil ochoch, jo’ “Sa’ li santil ochoch” (B’ichleb’aal choq’ reheb’ li Kok’al, 99). Tenq’aheb’ chixtawb’aleb’ aatin ut ch’ol aatin sa’ li b’ich li neke’xk’ut k’a’ru li santil ochoch ut k’a’ru nab’aanuman aran.

2 Nefi 19:6; 25:26

“Nasaho’ sa’ qach’ool rik’in li Kristo.”

Laj Nefi ut laj Isaias ke’wan xnawom xch’ooleb’ chirix li Kolonel ut lix nawom xch’ooleb’ kinujob’resink reheb’ rik’in sahil ch’oolejil. Tenq’aheb’ li kok’al chirilb’al naq laa’at “nasaho’ sa’ aach’ool rik’in li Kristo.”

Kok’ k’anjel naru chi b’aanumank

• Kanab’ jun li ch’ina al chixchapb’al chi kutankil jun xjalam-uuch lix yo’lajik li Jesukristo (jo’ Libro de obras de arte del Evangelio, ajl 30), ut tenq’aheb’ li kok’al chixtawb’al li k’uula’al Jesus sa’ li jalam-uuch. Il ru 2 Nefi 19:6 malaj k’ut li video “Ha nacido un Salvador—Video de Navidad” (ChurchofJesusChrist.org), ut kanab’eb’ li kok’al chixk’utb’al chiruq’eb’ li Jesus naq te’rab’i li aatin k’uula’al ut alalb’ej. Ch’olob’ naq li profeet aj Isaias, li kitz’iib’ank re li aatin sa’ 2 Nefi 19:6, kixnaw chirix lix yo’lajik li Jesus k’iila chihab’ chaq rub’elaj naq kik’ulman a’an.

• Seraq’i li esil naq li Jesukristo kixk’e xsahileb’ xch’ool li ras riitz’in, malaj k’ut li video jo’ “Jesús sana a un hombre ciego de nacimiento” malaj “Dejad a los niños venir a mí” (ChurchofJesusChrist.org). K’uteb’ li hoonal re sahil ch’oolejil sa’ li esil malaj sa’ li video. Il ru 2 Nefi 25:26 ut aatinan chirix li rajb’al naq laa’at “nasaho’ aach’ool rik’in li Kristo.” Kanab’eb’ li kok’al chi aatinak chirix chan ru naq li Jesus naxk’e li sahil ch’oolejil.

2 Nefi 21:6–9; 22

Li jun mil chihab’ a’anaq jun hoonal re tuqtuukilal ut sahil ch’oolejil.

Chirix li xkab’ xk’ulunik, li Jesukristo taawanq rik’in lix tenamit chiru jun hoonal re tuqtuukilal nak’ab’a’iman li Jun Mil Chihab’.

Kok’ k’anjel naru chi b’aanumank

• K’ut chiruheb’ li kok’al xjalam-uucheb’ li xul yeeb’ileb’ resil sa’ 2 Nefi 21:6─7, ut kanab’eb’ li kok’al chixk’eeb’aleb’ xk’ab’a’. Ch’olob’ naq eb’ li xul a’an xik’ neke’ril rib’, a’b’an laj Isaias kixk’ut naq chirix naq li Jesukristo taak’ulunq wi’chik, taawanq jun hoonal re tuqtuukilal, nak’ab’a’iman li Jun Mil Chihab’, b’ar wi’ eb’ li xul moko te’xch’e’i ta rib’. Chan ru naru naqataaqe lix b’aanuhomeb’ li xul a’an rik’in chan ru nokowan rik’ineb’ li qas qiitz’in? Kanab’eb’ li kok’al chixyiib’ankileb’ xjalam-uucheb’ li xul a’an naq wankeb’ sa’ komonil sa’ tuqtuukilal.

• Il ru 2 Nefi 22:5 ut kanab’eb’ li kok’al chatenq’ankil chixtawb’al jun li b’ich li tixch’olob’ li k’a’aq re ru “q’axal chaab’il” xb’aanuhom li Qaawa’. A’ineb’ junjunqeb’ li eetalil: “Raab’ilin xb’aan li Dios sa’ choxa” B’ichleb’aal choq’ reheb’ li Kok’al, 16─17) malaj “Jwal nim aawu” (Eb’ li B’ich, 46). B’ichahomaq jun li b’ich sa’ komonil. Ch’olob’ naq chiru li Jun Mil Chihab’ chixjunil li kristiaan te’xnaw chirixeb’ li k’a’aq re ru “q’axal chaab’il” xb’aanuhom li Qaawa’.

reetalil li k‘utuk

Xk’utb’al li tzol’leb’: Kok’al ak ninqeb’

2 Nefi 12:2–3

Li santil ochoch a’an rochoch li Qaawa’.

Chan ru naru nakawoksiheb’ li raqal a’an re xtenq’ankileb’ li kok’al chixtawb’al rajomeb’ re xik sa’ li santil ochoch sa’ jun kutan?

Kok’ k’anjel naru chi b’aanumank

• K’ut xjalam-uuch jun li santil ochoch (wan jun sa’ li tusleb’ aatin re li xamaan a’in re Kim, Taaqehin—Choq’ reheb’ li komon ut li junkab’al). Kanab’ jun li ch’ina al chirilb’al ru 2 Nefi 12:2─3 ut k’e xb’oqb’aleb’ xkomoneb’ li kok’al chi ab’ink chi us re xk’eeb’al reetal k’a’ut naq laj Isaias kixye naq naqajeb’ ru li santil ochoch. Naru nakach’olob’ naq laj Isaias kixk’ab’a’in li santil ochoch “li tzuul re li rochoch li Qaawa’.” K’a’ut naq li tzuul a’an jun chaab’il eetalil choq’ re li santil ochoch?

• Kanab’eb’ li kok’al chixyiib’ankil xjalam-uucheb’ naq yookeb’ chi xik sa’ li santil ochoch. Wi naru, patz’ re jun reheb’ li saaj winq malaj jun li saaj ixq re li teep naq te’xye reheb’ li kok’al chan ru li numsihom naq neke’xb’aanu li kub’iha’ choq’ reheb’ li kamenaq sa’ li santil ochoch. Li saaj kristiaan a’an malaj anihaq chik li komon re li teep naru naxk’ut chiruheb’ li kok’al chan ru xtawb’aleb’ xk’ab’a’ lix xe’toonileb’ li neke’raj ru li k’ojob’anb’il k’anjel re li santil ochoch.

2 Nefi 15:20 .

Laj Satanas naxyal xsachb’al inna’leb’ chirix li k’a’ru us ut li k’a’ru ink’a’ us.

Wanko sa’ jun ruchich’och’ b’ar wi’, jo’ kixch’olob’ laj Isaias, li kristiaan neke’xk’ab’a’in li k’a’ru ink’a’ us jo’ us, ut li k’a’ru us jo’ ink’a’ us. Chan ru naru nakatenq’aheb’ li kok’al chixk’eeb’al reetal li b’alaq’ a’an?

Kok’ k’anjel naru chi b’aanumank

• K’ut chiruheb’ li kok’al k’a’ruhaq k’a malaj ra re, jo’ jun li anx malaj jun lamuux, ramb’il rix rik’in xramb’al li kab’. Ilomaq ru sa’ komonil 2 Nefi 15:20 ut ch’olob’ naq laj Satanas naxyal xk’utb’al li k’a’ru ink’a’ us jo’ li k’a’ru us. Tenq’aheb’ li kok’al chixk’oxlankil chan ru naq laj Satanas naxb’aanu a’an. Chan ru naru naqak’eheb’ reetal lix b’alaq’?

• K’ut jun k’asal rik’in meer re li video “Serán libres” (ChurchofJesusChrist.org). K’a’ut naq laj kar naxjal rilb’al li chapleb’ kar? K’a’ut naq laj Satanas naxjal rilb’al li maak?

2 Nefi 17:14; 19:6; 25:23–26

“Nasaho’ sa’ qach’ool rik’in li Kristo.”

Aajel ru naq eb’ li kok’al te’xnaw naq lix evangelio li Jesukristo nanujob’resin rik’in sahil ch’oolejil. Chan ru te’tenq’aaq xb’aan “xsahob’resinkileb’ xch’ool rik’in li Kristo”?

Kok’ k’anjel naru chi b’aanumank

• Tenq’aheb’ li kok’al chixtawb’aleb’ xk’ab’a’ li Jesukristo sa’ 2 Nefi 17:14 ut 19:6. Maare aajelaq ru naq taach’olob’ naq “Emanuel” a’an jun reheb’ li k’ab’a’ej a’an, ut naraj naxye “li Dios qik’in.” K’a’ru neke’xk’ut li junjunq chi k’ab’a’ej a’an chirix li Jesukristo?

• K’e jun xjalam-uuch li Kolonel chiru li pizarron ut ilomaq ru sa’ komonil 2 Nefi 25:26. K’a’ut naq laj Nefi ki’aatinak ut kitz’iib’ak chi naab’al chirix li Jesukristo? Kanab’eb’ li junjunq chi kok’al chixtz’iib’ankil chiru li pizarron, chixk’atq lix jalam-uuch li Jesus, jun na’leb’ chirix li Kolonel li naxk’e xsahileb’ xch’ool.

• Kanab’eb’ li kok’al chixk’oxlankil anihaq li te’raj “xq’unb’esinkil xch’ool … naq tixpaab’ li Kristo” (2 Nefi 25:23). Chan ru naru naqach’olob’ chiruheb’ li qas qiitz’in li sahil ch’oolejil naxk’am chaq li Kolonel sa’ li qayu’am? Kanab’eb’ li kok’al chixtz’iib’ankil malaj chixk’utb’esinkil junjunqeb’ li k’a’aq re ru naru neke’xb’aanu re xtenq’ankil li kristiaan xe’xk’oxla chixpaab’ankil li Jesukristo.

reetalil li tzolok

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chixk’oxlankil jun na’leb’ naru neke’xb’aanu re xk’utb’al chiruheb’ lix junkab’al naq “neke’saho’ sa’ xch’ooleb’ rik’in li Kristo.”

Xchaab’ilob’resinkil li qak’utum

Kanab’eb’ li kok’al chiroksinkil xseeb’aleb’ xch’ool. “Naq nakatzoleb’ li kok’al, k’anab’eb’ chi yiib’ank, chi b’onok, chi tz’iib’ak, ut chi yo’ob’tesink. Eb’ li k’a’aq re ru a’in maawa’ ka’ajwi’ re sahob’resink ch’oolej—aajeleb’ b’an ru choq’ re li tzolok” (chi’ilmanq Li k’utuk jo’ li Kolonel, 25).

perel re kok’ k’anjel: li santil ochoch a’an li rochoch li Qaawa’