li Jesukristo naxye’ li ruq’ re jun ixq

A’an tixk’am aab’e chi uq’ej, xb’aan li xSandra Rast

24 febrero–1 marzo

2 Nefi 26–30

“Jun li sachb’a-ch’oolejil k’anjel ut jun li eetalil”

Naq maji’ nakatikib’ xk’uub’ankil ruheb’ li kok’ k’anjel re naq te’tzoloq li kok’al sa’ laa tzoleb’aal, il ru 2 Nefi 26─30. Li xb’aanunkil a’an tixb’oq li Santil Musiq’ej chixb’eresinkil li nakak’uub’.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Chap chi kutankil jun lix Hu laj Mormon ut ch’olob’ naq laj Nefi kixye chaq naq lix Hu laj Mormon jwal aajelaq ru sa’eb’ li qakutan. Kanab’eb’ li kok’al chixwotzb’al k’a’ruhaq xe’xtzol chirix lix hu laj Mormon chiru li chihab’ a’in.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

2 Nefi 26:22 .

Li Jesukristo naraj naq chixjunileb’ te’chalq rik’in a’an.

Laj Nefi kixch’olob’ xyaalal naq li Kolonel chixjunil naxraheb’, maak’a’ naraj re ani, ut naq a’an naxb’oqeb’ chixjunil chi “tz’aqonk sa’ lix chaab’ilal.”

Kok’ k’anjel naru chi b’aanumank

• K’uteb’ xjalam-uuch kristiaan jalan jalanqeb’ xxe’toonileb’ ut xwanjikeb’ (naru nakataweb’ junjunq sa’eb’ li kok’ hu re li Iglees). Kanab’eb’ li kok’al chixch’olob’ankil li neke’ril sa’eb’ li jalam-uuch. Teheb’ li loq’laj hu sa’ 2 Nefi 26:33 ut yaab’asi, “Li Jesukristo naxb’oqeb’ chixjunil chi chalk rik’in.” Yaab’asi wi’chik li ch’ol aatin a’an rik’ineb’ li kok’al naq yooqat chixk’utb’al li junjunq chi jalam-uuch. Chirix a’an k’uteb’ chawuq’ li junjunq chi kok’al ut ye, “Li Jesukristo nakatxb’oq chi chalk rik’in a’an.” K’a’ru naru naqab’aanu re chalk rik’in li Kolonel?

• B’icha rik’ineb’ li kok’al jun li b’ich li na’aatinak chirix xraab’aleb’ chixjunil li kristiaan, jo’ “Li rahok cherib’il eerib’ ” malaj “Aawik’in tinb’eeq laa’in” (B’ichleb’aal choq’ reheb’ li Kok’al, 74, 78). K’uteb’ li aatin malaj ch’ol aatin re li b’ich li nakak’oxla naq neke’aatinak chirix li na’leb’ wan sa’ 2 Nefi 26:33.

2 Nefi 28:230:6

Lix Hu laj Mormon a’an jun li osob’tesink.

K’oxla chan ru taatenq’aheb’ li kok’al sa’ laa tzoleb’aal chireek’ankil naq lix Hu laj Mormon a’an jun li osob’tesink ke’xk’ul sa’ ruq’ li Dios” (2 Nefi 30:6).

Kok’ k’anjel naru chi b’aanumank

• Kut chiruheb’ li kok’al jun lix Hu laj Mormon lanb’il rix jo’ jun maatan ut ye reheb’ naq wan jun k’a’aq re ru jwal nim xloq’al chi sa’. Kanab’eb’ chixchapb’al li maatan ut tenq’aheb’ chixq’ehinkil k’a’ru a’an; qayehaq, li Qaawa’ xk’ehok chaq qe a’an, nokoxtenq’a chixpaab’ankil li Jesukristo, ut wan chik xkomon. Il ru li ch’ol aatin a’in wan sa’ 2 Nefi 30:6: “A’an jun li osob’tesink ke’xk’ul sa’ ruq’ li Dios.” Kanab’eb’ li kok’al chixteeb’al li maatan, ut chirix a’an ch’olob’ naq tento taqate lix Hu laj Mormon ut taqil ru re xk’ulb’aleb’ li osob’tesink wankeb’ chi sa’.

• Il ru 2 Nefi 28:2 choq’ reheb’ li kok’al. Ch’olob’ naq laj Nefi kiril naq lix Hu laj Mormon “nimaq xloq’al” choq’ qe laa’o, li naraj naxye naq tooxtenq’a ut toorosob’tesi. Ye reheb’ li kok’al k’a’ut naq lix Hu laj Mormon jwal nim xloq’al choq’ aawe. Wotz li raqal malaj li esil jwal nawulak chawu sa’ lix Hu laj Mormon, ut kanab’eb’ li kok’al chixwotzb’aleb’ li re. K’uteb’ jalam-uuch re li Libro de obras de arte del Evangelio re xk’eeb’aleb’ xna’leb’.

2 Nefi 28:30

Lin Choxahil Yuwa’ nikinixtzol chi b’ayatq.

Maare laa’at naru nakak’oxla junaq li ch’ina k’anjel malaj ch’ina k’utb’esink li tixtenq’aheb’ li kok’al chirilb’al li naraj naxye tzolok “chi junjunqil li raqal.” Eb’ li na’leb’ wankeb’ arin naru neke’xk’e xkomoneb’ li na’leb’.

Kok’ k’anjel naru chi b’aanumank

• Tenq’aheb’ li kok’al chixyiib’ankil jun li jorb’a-k’a’uxlej malaj chixyiib’ankil k’a’ruhaq rik’ineb’ kok’ kaaxukuut. K’e reheb’ jun xcha’alil li jorb’a-k’a’uxlej malaj jun li kaaxukuut ut, naq yooqeb’ chixtusub’ankil, ch’olob’ naq chi jo’kan naq li qaChoxahil Yuwa’ nokoxtzol: jun ajwi’ li yaal chiru jun sut. K’a’ raj ru taak’ulmanq wi ta taqayal xk’eeb’al chixjunil lix cha’alileb’ chi jun xikik?

• K’ut chiruheb’ li kok’al jun li seeb’al chi timil timil, jo’ chanru xyiib’ankil jun utz’u’uj malaj junaq jalam-uuch. Il ru a’in sa’ 2 Nefi 28:30: “Laa’in tink’e reheb’ li ralal xk’ajoleb’ li winq chi junjunqil li raqal… b’ab’ay arin ut b’ab’ay aran.” K’a’ut naq li Dios nokoxtzol chi b’ab’ayatq?

reetalil li k‘utuk

Xk’utb’al li tzol’leb’: Kok’al ak ninqeb’

2 Nefi 26:23–28, 33

Li Jesukristo naraj naq chixjunil taaxik rik’in a’an.

Tenq’aheb’ li kok’al chireek’ankil naq li b’oqom re xik rik’in li Kristo wan choq’ reheb’ a’an ut reheb’ ajwi’ chixjunil li kristiaan.

Kok’ k’anjel naru chi b’aanumank

• Aatinan rik’ineb’ li kok’al chirixeb’ hoonal b’ar wi’ xe’xb’oqeb’ li ramiiw malaj komon sa’ lix junkab’aleb’ chi xik sa’ junaq ch’utam, jo’ jun xninq’ehinkil xyu’am junaq. K’a’ru xe’xb’aanu re xwaklesinkileb’ xch’ool li kristiaan a’an chi xik? Il ru rik’ineb’ li kok’al 2 Nefi 26:23─28, 33 ut tenq’aheb’ chixtawb’al k’a’ru nokoxb’oq li Qaawa’ chixb’aanunkil. Kanab’eb’ li kok’al chixyiib’ankil junaq li b’oqleb’ hu malaj junaq li hu re xb’oqb’al anihaq chi chalk rik’in li Jesukristo. Waklesiheb’ xch’ool chiroksinkil li ch’ol aatin reheb’ li raqal a’an sa’eb’ lix b’oqleb’ hu (wi na’ajman ru, tz’iib’a junjunqeb’ li ch’ol aatin chiru li pizarron re xtenq’ankileb’).

• Il ru 2 Nefi 26:33 rik’ineb’ li kok’al ut tenq’aheb’ chixyiib’ankil jun xtusulal ani b’oqb’ileb’ chi “tz’aqonk sa’ lix chaab’ilal li Qaawa’,” jo’ naxye li raqal. (Maare aajelaq ru xch’olob’ankil naq “li maak’a’eb’ xnawom” a’aneb’ li ink’a’ neke’xpaab’ li Dios). Kanab’eb’ chixtz’iib’ankil lix k’ab’a’eb’ ajwi’ a’an. Chan ru nokotz’aqon sa’ lix chaab’ilal li Qaawa’?

• Aatinan rik’ineb’ li kok’al chirix naq chixjunileb’ li kok’al sa’ xb’een li ruchich’och’ jalan jalanqeb’, ut ch’olob’ xyaalal naq li Qaawa’ naxraheb’ chixjunil (chi’ilmanq 2 Nefi 26:24, 33). Kanab’eb’ li kok’al chixyiib’ankil jun xjalam-uuch li Jesus rik’ineb’ naab’aleb’ li kok’al jalan jalanqeb’.

2 Nefi 28:27–30

Li qaChoxhail Yuwa’ naxk’utb’esi li yaal “chi junjunqil li raqal.”

Laj Nefi kiq’usuk rik’in li xk’oxlankil naq ink’a’ chik aajel ru choq’ qe naq li Dios tixk’e xkomon li yaal. Tenq’aheb’ li kok’al chirilb’al lix tzolb’al li evangelio jo’ jun yalok-q’e chi timil timil ut chiru chixjunil li yu’am.

Kok’ k’anjel naru chi b’aanumank

• Sik’ ru junaq li ch’ol aatin sa’ 2 Nefi 28:30 ut kanab’ jun li ch’ina al chixtz’iib’ankil li xb’een aatin chiru li pizarron. Chirix a’an kanab’ jun chik li ch’ina al chixtz’iib’ankil jun chik li aatin, ut chi jo’kan toj reetal naq tz’iib’anb’ilaq chixjunil li ch’ol aatin. Chan ru naq li ch’ina k’anjel a’in chanchan naq li Dios naxk’e qe li yaal?

• Tenq’aheb’ li kok’al chirilb’al ru ut chixtawb’al ru 2 Nefi 28:27─30, re xsik’b’aleb’ xsumenkil li patz’om jo’ a’in: K’a’ru neke’xk’ut chiqu li raqal a’an chirixeb’ li kristiaan neke’xk’oxla naq wan chixjunil li yaal rik’ineb’ ut ink’a’ chik neke’raj ru xkomon? Kanab’eb’ chixyeeb’al chan ru naru naqak’ut chiru li Qaawa’ naq naqaj xk’ulb’al xkomon li yaal rik’in a’an.

2 Nefi 29:7–11

Lix Hu laj Mormon ut li Santil Hu neke’k’anjelak sa’ junajil.

Sa’ xk’ab’a’ naq wan qik’in li Santil Hu, junjunqeb’ li kristiaan neke’xk’oxla naq lix Hu laj Mormon moko aajel ta ru. Eb’ li raqal a’an naru naxtenq’aheb’ li kok’al chixtawb’al ru, ut chixch’olob’ankil chiruheb’ jalaneb’ chik kristiaan, k’a’ut naq nokob’antioxin chirixeb’ li wiib’ chi tasal loq’laj hu.

Kok’ k’anjel naru chi b’aanumank

• K’e re junaq li ch’ina al jun lix Hu laj Mormon ut jun li Santil Hu. Patz’ reheb’ chan ru naq eb’ li hu a’an juntaq’eeteb’ ut chan ru naq jalaneb’. K’ut chiruheb’ li kok’al jun li reetalil ch’och’ re chixjunil li ruchich’och’ ut tenq’aheb’ chixk’ulinkil rib’eb’ li junjunq chi tasal hu rik’ineb’ li na’ajej neke’chal wi’. Ilomaq ru ut aatinanqex chirix 2 Nefi 29:8. K’a’ut naq li Dios kixk’e chaq qe wiib’ “aj ch’olob’anel” malaj tasal hu reheb’ li loq’laj hu li neke’k’utuk chirix a’an?

• Kanab’eb’ li kok’al chixk’oxlankil naq jun li ramiiweb’ kixye reheb’, “Moko aajel ta ru lix Hu laj Mormon choq’ we. Ak xwil ru li Santil Hu.” Ilomaq ru sa’ komonil 2 Nefi 29:7─11 ut ch’olob’eb’ li ch’ol aatin ut li ch’olob’ahom aajel ru. Chirix a’an kanab’eb’ chixwotzb’al lix na’leb’eb’ chirix li naru neke’xye re li ramiiweb’.

reetalil li tzolok

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chixch’olob’ankil chiruheb’ lix junkab’al chan ru naq li Santil Hu ut lix Hu laj Mormon neke’k’anjelak sa’ junajil re ch’olob’ank chirix li Jesukristo.

Xchaab’ilob’resinkil li qak’utum

Jayali aawib’ rik’ineb’ li kristiaan, ink’a’ rik’ineb’ li nakak’ut. Eb’ li na’leb’ sa’ li tusleb’ aatin a’in yal tenq’eb’ a’an. Naru nakajaleb’ a’ yaal li neke’raj ru li kok’al nakatzoleb’, ut a’ yaal jo’ lix seeb’aleb’.

perel re kok’ k’anjel: eb’ li esil sa’ lix Hu laj Mormon neke’k’utuk chirix li Kristo