laj Enos jo’ ch’ajom rochb’een lix yuwa’, laj Jakob, ut lix na’

Laj Jakob ut laj Enos, xb’aan laj Scott Snow

23–29 marzo

Enos–Li Raatin laj Mormon

Nak’anjelak wik’in re xb’aanunkil li rajom xch’ool

Enos, Jarom, Omni ut Li Raatin laj Mormon a’aneb’ kok’ huheb’ li wankeb’ wi’ li na’leb’ aajeleb’ ru choq’ reheb’ li kok’al nakatzoleb’. Sik’eb’ li na’leb’ a’an ut k’oxla chan ru naru nakatenq’aheb’ li kok’al chixtzolb’aleb’. Eb’ li na’leb’ sa’ li tusleb’ aatin a’in naru nakate’xtenq’a.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Tenq’aheb’ li kok’al chixjultikankil li xex’tzol sa’ li xamaan xnume’. Ma xe’xwotz li k’a’ru xe’xtzol rik’ineb’ lix junkab’al malaj jalaneb’ chik kristiaan?

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Enos 1:1–19

Naru nin’aatinak rik’in lin Choxahil Yuwa’ rik’in li tijok.

Lix numsihom laj Enos naxk’ut naab’aleb’ li yaal chirix li tijok. Chan ru taawaklesi xch’ooleb’ li kok’al chixtaaqenkil lix b’aanuhom laj Enos naq te’tijoq?

Kok’ k’anjel naru chi b’aanumank

• K’ut jun xjalam-uuch laj Enos; qayehaq, chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, malaj oksi li jalam-uuch La oración de Enós (Libro de obras de arte del Evangelio, ajl 72). Kanab’eb’ li kok’al chi aatinak chirix li yoo chi k’ulmank sa’ li jalam-uuch, ut chirix a’an wotz lix numsihom laj Enos rik’ineb. Naru nakawoksi “Ch’ol 11: Laj Enos” (Eb’ li Esilal sa’ lix Hu laj Mormon, 30─31, malaj li video sa’ ChurchofJesusChrist.org).

• Kanab’eb’ li kok’al chixyeeb’al k’a’ru nawulak chiruheb’ xseraq’inkil rik’ineb’ lix na’ xyuwa’. Ch’olob’ naq rik’in li tijok chiru li qaChoxahil Yuwa’ naru noko’aatinak rik’in a’an. Naq yooqat chirilb’al ru Enos 1:1─4 rik’ineb’ li kok’al, kanab’eb’ chixk’oxlankil naq a’aneb’ laj Enos; re xb’aanunkil a’an, kanab’eb’ chixk’utb’esinkil naq yookeb’ chi yohob’k, yookeb’ chi wiq’lak chi tijok, ut wan chik xkomon. Ch’olob’ naq li qaChoxahil Yuwa’ kirab’i lix tij laj Enos ut kixkuy lix maak.

• B’ichahomaq sa’ komonil jun li b’ich na’aatinak chirix li tijok, jo’ “Natijok jun ch’ina al” (B’ichleb’aal choq’ reheb’ li Kok’al, 6─7). Kanab’eb’ li kok’al chixtaqsinkil li ruq’eb’ rajlal sut naq te’rab’i li aatin “tijok” malaj junaq chik li aatin naka’sutiman. Ch’olob’ xyaalal lix wankilal li tijok sa’ laa yu’am.

jun junkab’al natijok

Jo’ ralal xk’ajol li Dios, naru nokotijok chiru li qaChoxahil Yuwa’.

Li Raatin laj Mormon 1:3─8

Naru nawosob’tesiheb’ li was wiitz’in naq nawab’i li Santil Musiq’ej.

Naq yoo chaq chixch’utub’ankil ru lix Hu laj Mormon, laj Mormon kimusiq’aak re xk’eeb’aleb’ ajwi’ lix perel ch’iich’ laj Nefi li kok’eb’ ru. Moko kixnaw ta k’a’ut naq aajeleb’ ru li perel ch’iich’ li kok’eb’ ru, a’b’an osob’tesinb’ilo sa’eb’ li kutan a’in xb’aan naq kixtaaqe li musiq’aak a’an. Li eetalil a’an naru naxmusiq’aheb’ li kok’al chixtaaqenkil li Musiq’ej.

Kok’ k’anjel naru chi b’aanumank

• Kanab’eb’ li kok’al chixwotzb’aleb’ esil xtzolomeb’ sa’ lix Hu laj Mormon chiru li chihab’ a’in (eb’ li jalam-uuch sa’ Kim, Taaqehin—Choq’ reheb’ li komon ut li junkab’al malaj sa’ li Libro de obras de arte del Evangelio naru naxtenq’aheb’ chixjultikankil). Ch’olob’ naq wankeb’ qik’in li esil a’an sa’ lix Hu laj Mormon xb’aan naq laj Mormon ki’ab’in naq li Santil Musiq’ej kixye re naq tixk’eheb’ ajwi’ chi sa’. K’a’ut naq li qaChoxahil Yuwa’ kiraj naq te’wanq qik’in li esil a’an?

• Wotz jun esil wankeb’ sa’ li kok’ hu re li Iglees malaj jun li esil re li jolomil ch’utub’aj-ib’ chirix anihaq kixtaaqe li Santil Musiq’ej. Malaj wotz jun aanumsihom laa’at. Kanab’eb’ li kok’al chixyiib’ankileb’ jalam-uuch wankeb’ rilom rik’in li esil. Chan ru naq ke’osob’tesiik li kristiaan sa’ li esil a’an xb’aan naq ke’xtaaqe li Santil Musiq’ej?

• K’e xb’oqb’al jun li komon re li teep re taawulaq sa’ li tzoleb’aal ut tixwotz jun xnumsihom b’ar wi’ a’an xtaaqe lix musiq’ahom li Santil Musiq’ej. Chan ru ke’osob’tesiik li ras riitz’ineb’ xb’aan li xb’aanu? Ch’olob’ naq li qaChoxahil Yuwa’ naraj naq te’qatenq’a ut te’qosob’tesi li qas qiitz’in, jo’kan naq naxtaqla chaq li Santil Musiq’ej chixk’amb’al qab’e.

• B’ichahomaq sa’ komonil jun li b’ich na’aatinak chirix li Santil Musiq’ej, jo’ “Li Santil Musiq’ej” (B’ichleb’aal choq’ reheb’ li Kok’al, 56). B’ichahomaq naab’al sut chi jar paay ru, jo’ sa’ junpaat, chi timil malaj sa’ hasb’. Naq te’xhasb’a li b’ich, te li loq’laj hu sa’ Li Raatin laj Mormon 1:7 ut k’ut naq laj Mormon kixch’olob’ li Santil Musiq’ej jo’ jun li hasb’.

reetalil li k‘utuk

Xk’utb’al li tzol’leb’: Kok’al ak ninqeb’

Enos 1:1–19

Li qaChoxahil Yuwa’ narab’iheb’ ut naxsumeheb’ li tij b’aanunb’ileb’ chi anchal ch’oolej.

Moko ch’a’aj ta naq li qatij te’kanaaq jo’ yal nab’aanuman chi jo’kan malaj yal pak’axinb’il. Li kixk’ul laj Enos a’an jun xjultikankil qe naq re xk’ulb’aleb’ xsumenkileb’ li qatij wan naq naraj ru li “yalok-u” ut “k’iila yalok metz’ew” (Enos 1:2, 11).

Kok’ k’anjel naru chi b’aanumank

• Kanab’eb’ li kok’al chixmutz’b’aleb’ li ru ut chixk’oxlankil naq yookeb’ chi aatinak rik’in li qaChoxahil Yuwa’ tz’aqal sa’ kristiaanil. K’a’ raj ru teeraj xyeeb’al re? K’e xb’oqb’aleb’ li kok’al chixk’oxlankil naq te’aatinaq tz’aqal sa’ kristiaanil rik’in li qaChoxahil Yuwa’ rajlal naq neke’tijok.

• Kanab’eb’ li kok’al chi k’anjelak sa’ ka’kab’il ut te’ril ru Enos 1:1─15. Ye reheb’ naq te’xsik’ sa’eb’ li raqal a’an jun li aatin malaj ch’ol aatin li tixch’olob’ lix tij laj Enos ut chirix a’an te’xwotz sa’ li tzoleb’aal li xe’xtaw. K’a’ru neke’xye li aatin a’an chirix laj Enos ut li k’a’ru kixk’ul? Kanab’eb’ li kok’al chixwotzb’al a’ yaal k’a’ru chik nawulak chiruheb’ chirixeb’ lix tij laj Enos. Wotz jun aanumsihom laa’at b’ar wi’ laa waam “kitz’okaak” ut “kat-elajin” chiru li Qaawa’ (Enos 1:4). Kanab’eb’ li kok’al chixk’oxlankil k’a’ru naru neke’xb’aanu re naq te’tijoq chi anchal xch’ooleb’.

• Kanab’eb’ li kok’al chixyiib’ankil jun xtusulal li k’a’aq re ru li neke’tijok wi’ chiru li pizarron malaj sa’ li perel re kok’ k’anjel re li xamaan a’in. Chirix a’an kanab’eb’ chixsik’b’al sa’ Enos 1:2, 9, 13─14, ut 16 li k’a’ru kitijok wi’ laj Enos, ut k’eheb’ li k’a’aq re ru a’an sa’ li tusulal xayiib’. Aatinanqex chirix chan ru naq eb’ li kok’al naru neke’xtaaqe li kixb’aanu laj Enos sa’eb’ lix tij; qayehaq, naru nakat-aatinak chirix k’a’ut naq laj Enos kiwan rajom re tijok chirixeb’ laj Lamanita—li xik’ neke’ilok re—ut k’e xb’oqb’aleb’ li kok’al chi tijok chirix anihaq maak’a’ mas xrahom rik’ineb’.

Li Raatin laj Mormon 1:3─8

Naru nawosob’tesiheb’ li was wiitz’in naq nawab’i li Santil Musiq’ej.

Li Qaawa’ kixnaw naq eb’ li 116 chi perel jaltesinb’ileb’ ru re lix Hu laj Mormon te’sachq (chi’ilmanq Tzol’leb’ ut Sumwank 10; Santos, tasal hu 1, ch’ol 5). Re xk’eeb’al ruuchil li ke’tz’eqe’, kixmusiq’a laj Mormon rik’in li Musiq’ej chixk’eeb’aleb’ lix perel ch’iich’ laj Nefi li kok’eb’ ru sa’ lix Hu laj Mormon. Chan ru naru nakawaklesi xch’ooleb’ li kok’al chixtaaqenkil lix b’aanuhom laj Mormon ut chirab’inkil li Musiq’ej?

Kok’ k’anjel naru chi b’aanumank

• Kanab’eb’ li kok’al chixk’eeb’aleb’ xhoonal re rilb’aleb’ ru li raqal sa’ Li Raatin laj Mormon 1:3─8 chi junjunq, ut chirix a’an tenq’aheb’ chixk’osb’al ru li neke’xtzol sa’ li junjunq chi raqal. Ch’olob’ chiruheb’ naq laj Mormon kixtaaqe li Musiq’ej naq kixk’eheb’ lix perel ch’iich’ laj Nefi li kok’eb’ ru (li wan anajwan jo’ 1  Nefi toj Omni) sa’ lix Hu laj Mormon. Chan ru naq noko’osob’tesiik sa’ xk’ab’a’ naq laj Mormon kirab’i li Musiq’ej? Chan raj ru naq jalan lix Hu laj Mormon wi ta ink’a’ kirab’i li Musiq’ej? Wotz jun aanumsihom b’ar wi’ xak’ul xmusiq’ahom li Santil Musiq’ej re xb’aanunkil k’a’ruhaq li xrosob’tesi anihaq. Kanab’eb’ li kok’al chixwotzb’al junaq xnumsihomeb’ chanchan ajwi’ a’an.

• Kanab’ jun li ch’ina al chirilb’al ru Li Raatin laj Mormon 1:7, ut jun chik taaril ru Tzol’leb’ ut Sumwank 8:2─3. K’a’ru neke’xk’ut chiqu li raqal a’an chirix chan ru naq li Santil Musiq’ej nokoraatina? Tenq’aheb’ li kok’al chixk’eeb’aleb’ reetal li hoonal b’ar wi’ reek’ahomeb’ lix musiq’ahom li Santil Musiq’ej. Oksi Moroni 7:12 re xch’olob’ankil naq wi li k’a’ru nak’oxlaman chaab’il ut nokoxmusiq’a chixb’aanunkil li k’a’ru us, nachal chaq rik’in li qaChoxahil Yuwa’. Qayehaq, naru nakak’ut li video “La preparación de Thomas S. Monson: Siempre seguir la inspiración del Espíritu” (ChurchofJesusChrist.org). K’e xb’oqb’aleb’ li kok’al chirab’inkileb’ li musiq’ahom neke’chal re xb’aanunkil li us ut xtaaqenkileb’ ajwi’.

reetalil li tzolok

Xb’oqb’aleb’ chi tzolok sa’ kab’l

Waklesiheb’ xch’ool li kok’al chixpatz’b’al reheb’ li komon sa’ lix junkab’aleb’ naq te’xwotz junaq xnumsihomeb’ kiwan rik’in li tijok malaj rik’in li Santil Musiq’ej.

Xchaab’ilob’resinkil li qak’utum

Oksiheb’ li b’ich. Eb’ li b’ich reheb’ li kok’al ut sa’ li b’ichleb’aal naru neke’xtenq’aheb’ li kok’al a’ yaal jarub’ chihab’ wan reheb’ chixtawb’al ru ut chixjultikankileb’ li yaal re li evangelio. Li b’ichank naru ajwi’ naxtenq’aheb’ li kok’al chi tz’aqonk sa’eb’ li tzolok. (Chi’ilmanq Li k’utuk jo’ li Kolonel, 22.)

perel re kok’ k’anjel: naru nintijok chiru li qaChoxahil Yuwa’