li Jesukristo waklijenaq chi yo’yo rochb’eeneb’ lix apostol

Li Kristo ut eb’ li apostol, xb’aan laj Del Parson

30 marzo–12 abril

Li Paswa

“Taawakliiq chaq … chi wanq li k’irtesink sa’ xxik’ ”

Naq yooqat chirilb’al ruheb’ li raqal reheb’ li loq’laj hu li yeeb’ileb’ arin ut sa’ Kim, Taaqehin—Choq’ reheb’ li komon ut li junkab’al, li Musiq’ej tatxtenq’a chixnawb’al k’a’ru taajayali wi’ aawib’ re xtenq’ankileb’ li kok’al chireek’ankil lix rahom li Kolonel sa’ li domingo re Paswa.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Aatinan rik’ineb’ li kok’al chirix li k’a’ru nakab’aanu laa’at re xjultikankil li Kolonel chiru li Paswa. Kanab’eb’ chixwotzb’al li k’a’ru neke’xb’aanu a’an.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

1 Nefi 11:27; Mosiah 3:5; 15:7; Helaman 14:16─17

Eb’ li profeet re lix Hu laj Mormon ke’xnaw naq li Jesukristo taak’ulunq.

Li xtzolb’al li ke’xk’ut li profeet sa’ lix Hu laj Mormon chirix lix k’anjel li Jesukristo sa’ ruchich’och’ naru natenq’an chixkawob’resinkil lix paab’aaleb’ li kok’al chirix a’an.

Kok’ k’anjel naru chi b’aanumank

• K’eheb’ chi kutankil xjalam-uuch li Kolonel naq kikub’siik xha’, naq kik’irtesin, naq kik’ehe’ chiru li krus, ut naq kiwakli chi yo’yo (chi’ilmanq li perel re kok’ k’anjel re li xamaan a’in malaj li Libro de obras de arte del Evangelio, ajl 35, 41, 57, 59). Kanab’eb’ li kok’al chixyeeb’al aawe k’a’ru yoo chi k’ulmank sa’ li junjunq chi jalam-uuch. Ch’olob’ naq naab’al chihab’ chaq rub’elaj naq li Jesus kik’ulun sa’ li ruchich’och’, li Dios kixk’utb’esi chiruheb’ li profeet re lix Hu laj Mormon naq a’an tixb’aanuheb’ li k’a’aq re ru a’an. Il ru 1 Nefi 11:27; Mosiah 3:5; 15:7 ut Helaman 14:16─17, ut tenq’aheb’ li kok’al chixk’ulinkileb’ rib’ li raqal reheb’ li loq’laj hu rik’ineb’ li jalam-uuch.

• Naq eb’ li kok’al yooqeb’ chi k’anjelak sa’ li perel re kok’ k’anjel re li xamaan a’in, aatinan chirixeb’ li profeet wankeb’ sa’ li jalam-uuch ut li k’a’ru ke’xk’ut chirix li Jesukristo. Wotz rik’ineb’ li kok’al junjunqeb’ re li k’a’aq re ru k’a’jo’ xninqal ru xb’aanuhom li Jesus choq’ qe.

1 Nefi 11:1–17

Li Jesukristo kiwakli chi yo’yo.

K’ut chiruheb’ li kok’al naq moko ka’ajwi’ ta li kristiaan aran Jerusalen ke’ilok re li Kolonel naq ak waklijenaq chik chi yo’yo, naab’al mil ajwi’ ke’ilok re naq kixk’ut rib’ sa’ li ch’och’ America.

Kok’ k’anjel naru chi b’aanumank

• K’uteb’ xjalam-uuch lix kamik ut lix waklijik chi yo’yo li Kolonel. Patz’ reheb’ li kok’al k’a’ru neke’xnaw chirix li kik’ulman. Wi aajel ru, oksi “Ch’ol 53: Nak’ehe’ chiru krus li Jesus” ut “Ch’ol 54: Nawakli wi’chik chi yo’yo li Jesus” (Eb’ li Esilal sa’ li Ak’ Chaq’rab’, 136─138, 139─144, malaj eb’ li video sa’ ChurchofJesusChrist.org) re xseraq’inkil reheb’ li kok’al eb’ li esil a’an.

• Rik’in roksinkileb’ li jalam-uuch wankeb’ sa’ li Libro de obras de arte del Evangelio malaj sa’ Kim, Taaqehin—Choq’ reheb’ li komon ut li junkab’al, seraq’i reheb’ li kok’al chirix li rula’anihom li Kolonel waklijenaq chi yo’yo sa’ li ch’och’ America, jo’ nayeeman sa’ 3 Nefi 11:1─17. Yaab’asi li seraq’ naab’al sut ut kanab’eb’ li kok’al chatenq’ankil. Aatinan chirix li k’a’ru taaweek’a naq wanq xyaalal choq’ reheb’ li kok’al. Ch’olob’ chi us naq xb’aan naq li Jesus kikam chiru li krus, li kristiaan ke’ru chirilb’al naq ak waklijenaq chik chi yo’yo. Kanab’eb’ li kok’al chixk’eeb’aleb’ xhoonal xseraq’inkil wi’chik li esil rik’ineb’ li raatin a’an.

• B’ichahomaq sa’ komonil “Ma yaal naq li Jesus xwakli” (B’ichleb’aal choq’ reheb’ li Kok’al, 45) malaj lix raqik li b’ich “Lix Hu laj Mormon naxk’ut” (B’ichleb’aal choq’ reheb’ li Kok’al, 62─63). Kanab’eb’ li kok’al chixyiib’ankileb’ xjalam-uuch k’a’ruhaq naxch’olob’ li b’ich. Chirix a’an kanab’eb’ chixwotzb’al lix jalam-uucheb’ ut k’a’ raj ru xe’reek’a naq neke’xk’oxla wi ke’wan raj aran naq li Jesus kirula’aniheb’ laj Nefita.

Mosiah 3:7; Alma 7:11–12

Li Jesukristo naxnaw chan ru xk’ojob’ankil inch’ool.

Sa’ xk’ab’a’ naq li Jesukristo kixk’ul sa’ xb’een “lix rahileb’ ut lix yajeleb’ lix tenamit” (Alma 7:11), a’an naxnaw k’a’ru naqeek’a, us ta maa’ani chik nanawok re.

Kok’ k’anjel naru chi b’aanumank

• Il ru rik’ineb’ li kok’al junjunq reheb’ li raqal sa’ Mosiah 3:7 ut kanab’eb’ chixk’oxlankil naq yookeb’ chireek’ankil “xrahil li tz’ejwalej … , tz’okaak, chaqi-eel, ut tawaak.” Kanab’eb’ chixwotzb’al resil hoonal b’ar wi’ xe’reek’a li k’a’aq re ru a’an. Ye reheb’ li kok’al naq li raqal a’an naxch’olob’ junjunqeb’ li k’a’aq re ru kireek’a li Jesukristo naq kixnumsi rahilal sa’ li awimq Getsemani. Sa’ xk’ab’a’ a’an, a’an naxnaw chan ru qatenq’ankil naq naqeek’a li k’a’aq re ru a’an.

• Il ru Alma 7:11 chi kaw xyaab’ aakux ut patz’ reheb’ li kok’al ma neke’xnaw ru anihaq yaj malaj wan xrahilal. Ch’olob’ xyaalal naq li Jesukristo kireek’a chixjunil li rahilal ut qayajel re naq tixnaw chan ru tixk’ojob’ qach’ool (Alma 7:12).

reetalil li k‘utuk

Xk’utb’al li tzol’leb’: Kok’al ak ninqeb’

2 Nefi 9:10–15; Alma 11:41–45; 40:21–23

Sa’ xk’ab’a’ naq li Jesukristo kiwakli chi yo’yo, laa’in ajwi’ tinwakliiq chi yo’yo.

Lix Hu laj Mormon naxch’olob’ chi saqen ru k’a’ru naraj naxye li wakliik chi yo’yo ut ani te’wakliiq chi yo’yo. Chan ru naru nakatenq’aheb’ li kok’al chixk’eeb’aleb’ reetal li yaal a’an?

Kok’ k’anjel naru chi b’aanumank

• Kanab’eb’ li kok’al chixyeeb’al aawe k’a’ru neke’xnaw chirix lix kamik ut lix waklijik chi yo’yo li Jesukristo. Tz’iib’aheb’ chiru li pizarron li patz’om jo’ K’a’ru naraj naxye wakliik chi yo’yo? ut Ani te’wakliiq chi yo’yo? Tenq’aheb’ li kok’al chixtawb’aleb’ xsumenkil sa’ 2 Nefi 9:10─15; Alma 11:41─45 ut Alma 40:21─23, ut chixwotzb’al sa’ li tzoleb’aal li xe’xtaw.

• Aatinan rik’ineb’ li kok’al chirix anihaq nakanaw ru li xkam. K’e xb’oqb’aleb’ chixk’oxlankil naq laa’at maak’a’ nakanaw chirix li wakliik chi yo’yo. Chan raj ru tate’xtenq’a chixtawb’al ru k’a’ru a’an? Waklesiheb’ xch’ool chiroksinkil 2 Nefi 9:10─15; Alma 11:41─45 malaj Alma 40:21─23 re xk’utb’al chawu chirix li wakliik chi yo’yo. Kanab’eb’ ajwi’ chixch’olob’ankil xyaalal lix waklijik chi yo’yo li Jesukristo jo’ xtz’aqob’ lix sumenkil laa patz’om.

li Kristo natijok sa’ li awimq Getsemani

Getsemani, xb’aan laj Michael T. Malm

Enos 1:2–8; Mosiah 27:8–24; Alma 13:11–12; 24:7–19

Lix tojb’al rix li maak xb’aan li Jesukristo nikinixsaqob’resi ut nikinixjal.

Lix Hu laj Mormon naxk’e k’iila eetalil reheb’ kristiaan ke’jale’ sa’ xk’ab’a’ lix tojb’al rix li maak xb’aan li Kolonel. K’e reetal chan ru naq eb’ li numsihom a’an naru neke’xmusiq’aheb’ li kok’al chixjalb’al xk’a’uxleb’ ut chi sutq’iik rik’in li Kolonel.

Kok’ k’anjel naru chi b’aanumank

• K’ut chiruheb’ li kok’al jun li saqi kamiis saq ru ut jun li saqi kamiis tz’aj ru. Ilomaq ru sa’ komonil Alma 13:11─12. Chan ru naq ke’saqob’resiik ru li kristiaan chiru lix maakeb’? K’a’ru kixk’e a’an chireek’ankileb’ li kristiaan chirix li maak? Aatinan chirix k’a’ru nakaweek’a laa’at naq nakajal aak’a’uxl ut nakak’ul xkuyb’al aamaak, ut ch’olob’ xyaalal lix wankil li Kolonel re qasaqob’resinkil chiru li maak.

• Kanab’eb’ li kok’al chixsik’b’al ru jun reheb’ li kristiaan a’in re tzolok chirix a’an: laj Enos (chi’ilmanq Enos 1:2─8), laj Alma li alalb’ej (chi’ilmanq Mosiah 27:8─24) malaj eb’ laj Anti-Nefi-Lehi (chi’ilmanq Alma 24:7─19). Naq yooqex chirilb’al ru li esil sa’ komonil, kanab’eb’ li kok’al chixk’eeb’al reetal chan ru naq li kristiaan malaj li ch’uut a’an kijala sa’ xk’ab’a’ lix tojb’al rix li maak xb’aan li Jesukristo. Chan ru naru naqataaqe lix b’aanuhomeb’ li kristiaan a’an?

Mosiah 3:7; 15:5; Alma 7:11

Li Jesukristo kixk’uleb’ sa’ xb’een a’an lin maak, eb’ lin rahilal, ut eb’ lin yajel.

Li Kolonel ink’a’ ka’ajwi’ kixk’ul rahilal xb’aaneb’ li qamaak, kixk’ul ajwi’ rahilal xb’aaneb’ li qarahilal, li qayajel, ut wankeb’ chik xkomon xq’unal qametz’ew, re xnawb’al chan ru tixk’ojob’ qach’ool.

Kok’ k’anjel naru chi b’aanumank

• Kanab’eb’ li junjunq chi kok’al chixsik’b’al sa’ jun reheb’ li raqal a’in li rahilal kixk’ul li Jesukristo: Mosiah 3:7; Mosiah 15:5; malaj Alma 7:11. Kanab’eb’ chixtz’iib’ankil chiru li pizarron li k’a’ru xe’xtaw ut chixk’oxlankil li hoonal b’ar wi’ reek’ahomeb’ junjunqeb’ re li k’a’aq re ru a’an. Jo’ naxye Alma 7:12, k’a’ut naq li Jesus kixk’ul chixjunil li rahilal a’an? K’a’ut naq aajel ru xnawb’al naq kixnumsi chixjunil li rahilal a’an sa’ qak’ab’a’ laa’o?

• B’ichahomaq sa’ komonil jun li b’ich na’aatinak chirix li Kolonel, jo’ “Ninnaw naq yo’yo inKolonel” (Eb’ li B’ich, 77). Kanab’eb’ li kok’al chixsik’b’aleb’ ch’ol aatin sa’ li b’ich li neke’aatinak chirix chan ru naq li Kolonel naxk’ojob’ qach’ool, ut aatinanqex chirix k’a’ut naq eb’ li ch’ol aatin a’an wan xyaalal choq’ reheb’ a’an. Wotz laa week’ahom chirix li Jesukristo, ut kanab’eb’ li kok’al chixwotzb’al li reek’ahomeb’ a’an.

reetalil li tzolok

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chixsik’b’al anihaq chiru li xamaan a’in li naraj ru xk’ojob’ankil xch’ool. Waklesiheb’ xch’ool chixwotzb’al rik’in li kristiaan a’an li xe’xtzol chirix naq li Kolonel kixk’ul sa’ xb’een a’an li qarahilal re naq tixk’ojob’ qach’ool.

Xchaab’ilob’resinkil li qak’utum

Kanab’eb’ chi wotzok. Patz’ reheb’ li kok’al chirix lix k’a’uxleb’, li reek’ahomeb’, ut li k’a’ru xe’xk’ul. Taak’e reetal naq lix na’leb’eb’ moko ch’a’aj ta xtawb’al ru a’b’an cham ajwi’ xyaalal.

perel re kok’ k’anjel: eb’ li profeet sa’ lix Hu laj Mormon ke’xch’olob’ xyaalal li Jesukristo