“13–19 abril. Mosiah 1–3: “Taanumtaaq rik’ineb’ li rahok choq’ re li Dios ut chixjunileb’ li winq,” ” Kim, Taaqehin—Choq’ re li Tzoleb’aal reheb’ li Kok’al: Lix Hu laj Mormon 2020 (2020)
“13–19 abril. Mosiah 1–3,” Kim, Taaqehin—Choq’ re li Tzoleb’aal reheb’ li Kok’al: 2020
Lix chaq’rab’ihom li rey aj Benjamin, xb’aan li xMinerva Teichert
13–19 abril
Mosiah 1–3
“Taanumtaaq rik’ineb’ li rahok choq’ re li Dios ut chixjunileb’ li winq”
Naq yooqat chirilb’al ru Mosiah 1─3, tijon re xnawb’al chan ru naru nakatenq’aheb’ li kok’al nakatzoleb’ chixtawb’aleb’ ru li aajel ruhil yaal kixk’ut li rey aj Benjamin. Tz’iib’aheb’ li na’leb’ taak’ul rik’in li Santil Musiq’ej.
Xtz’iib’ankil li nakak’oxla
Xkanab’ankileb’ chi wotzok
K’ut li jalam-uuch b’ar wi’ li rey aj Benjamin yoo chi k’utuk, li natawman sa’ li tusleb’ aatin re li xamaan a’in re Kim, Taaqehin—Choq’ reheb’ li komon ut li junkab’al. Kanab’eb’ li kok’al chixwotzb’al k’a’ru neke’xnaw chirix li jalam-uuch a’an.
Xk’utb’al li tzol’leb’: Kok’al toj ka’ch’ineb’ xyu’am
Naq nink’anjelak chiruheb’ li was wiitz’in, yookin ajwi’ chi k’anjelak chiru li Dios.
K’a’ru taab’aanu re xtenq’ankileb’ li kok’al chixtawb’al ru naq li k’anjelak chiruheb’ li qas qiitz’in a’an ajwi’ k’anjelak chiru li Dios?
Kok’ k’anjel naru chi b’aanumank
-
Kanab’eb’ li kok’al chixk’eeb’aleb’ xhoonal re xk’eeb’al sa’ xjolomeb’ jun li koroon (sa’ li perel re kok’ k’anjel re li xamaan a’in wan jun eetalil) ut xaqliik sa’ xb’een jun li ch’unleb’aal re xk’oxlankil naq a’aneb’ li rey aj Benjamin. Naru te’xb’aanu a’an naq laa’at yooqat chixwotzb’al junjunq reheb’ li k’a’aq re ru kixk’ut li rey aj Benjamin chiru lix tenamit, li neke’tawman sa’ Mosiah 2─3. Chi’ilmanq ajwi’ “Ch’ol 12: Li rey aj Benjamin” (Eb’ li Esilal sa’ lix Hu laj Mormon, 32─35, malaj li video sa’ ChurchofJesusChrist.org).
-
Kanab’eb’ li kok’al chixka’sutinkil li ch’ol aatin a’in aawik’in ut te’xpoq’ xsa’eb’ li ruq’ rik’in li junjunq aatin nekeyaab’asi: “Naq jo’q’e wankex chi k’anjelak chiru lee rech winqilal ka’ajwi’ wankex chi k’anjelak chiru lee Dios” (Mosiah 2:17). Yaab’asi naab’al sut toj reetal naq eb’ li kok’al te’xtzol junjunqeb’ li aatin malaj chixjunileb’ li aatin. Ch’olob’ naq rik’in naq naqatenq’aheb’ li qas qiitz’in, yooko ajwi’ chixtenq’ankil li qaChoxahil Yuwa’ ut li Jesus ut naqak’e xsahileb’ xch’ool. Kanab’eb’ li kok’al chixwotzb’al chan ru naru neke’xtenq’a li ras riitz’ineb’.
-
Tenq’aheb’ li kok’al chixyiib’ankil xjalam-uuch li ruq’eb’ chiru jun perel li hu malaj chixyiib’ankil xjalam-uuch k’a’ruhaq naru neke’xb’aanu choq’ reheb’ lix junkab’al. B’ichahomaq sa’ komonil jun li b’ich na’aatinak chirix li k’anjelak chiru qas qiitz’in, jo’ “Naq yooko chi tenq’ank” (B’ichleb’aal choq’ reheb’ li Kok’al, 108).
Li rey aj Benjamin kixk’ut naq naru nokok’anjelak chiru li Dios rik’in k’anjelak chiruheb’ li qas qiitz’in.
Chixjunileb’ li wosob’tesinkil nachal chaq rik’in lin Choxahil Yuwa’.
Naq eb’ li kok’al te’xk’e reetal naq li Dios nak’ehok chaq re chixjunil li osob’tesihom, te’tuulano’q xch’ool ut te’b’antioxinq.
Kok’ k’anjel naru chi b’aanumank
-
Ch’olob’ naq li rey aj Benjamin kixk’ut naq chixjunileb’ li qosob’tesinkil neke’chal chaq rik’in li qaChoxahil Yuwa’. K’e xb’oqb’aleb’ li kok’al chi ab’ink chi us, naq yooqat chirilb’al ru Mosiah 2:21, re xtawb’al jun li osob’tesihom xk’ehom chaq qe li qaChoxahil Yuwa’. K’a’ru chik junaq osob’tesihom xk’ehom chaq qe li qaChoxahil Yuwa’? Chan ru naru naqak’ut naq naqab’antioxiheb’ li k’a’aq re ru a’an? (chi’ilmanq Mosiah 2:22).
-
B’aanuhomaq jun li b’atz’unk b’ar wi’ naq eb’ li kok’al te’xnumsi chirib’ileb’ rib’ jun k’a’aq re ru naq yooqex chixb’ichankil junaq li b’ich malaj naq yooqex chirab’inkil jun li b’ich na’aatinak chirix li b’antioxink (chi’ilmanq “B’antioxink” sa’ li tusleb’aal na’leb’ re li B’ichleb’aal choq’ reheb’ li Kok’al). Kanab’omaq b’ichank malaj xaqab’omaq li b’ich kok’ aj xsa’, ut a’ yaal ani aj-ik’in nakana li k’a’aq re ru, a’an tixwotz jun li osob’tesihom li nab’antioxin wi’.
Laa’in ninpaab’ li Jesukristo
Jun li anjel kixye re li rey aj Benjamin eb’ li yaal aajeleb’ ru chirix lix yu’am ut lix k’anjel li Jesukristo. Sik’eb’ sa’eb’ li raqal li yaal a’an chirix li Jesus li nakaweek’a naq aajelaq ru re naq eb’ li kok’al te’xtzol.
Kok’ k’anjel naru chi b’aanumank
-
K’e chi kutankil junjunqeb’ li jalam-uuch re li kik’ulman sa’ Mosiah 3:5–10 (chi’ilmanq, jo’ eetalil, Libro de obras de arte del Evangelio, ajl 30, 41, 42, 57, 29). Patz’ reheb’ li kok’al k’a’ru yoo chi k’ulmank sa’eb’ li jalam-uuch ut tenq’aheb’ wi na’ajman ru. Il ru chi timil Mosiah 3:5─10 ut kanab’eb’ li kok’al chixtaqsinkil li ruq’eb’ naq taawil ru k’a’ruhaq k’utb’il sa’eb’ li jalam-uuch. Kanab’eb’ li kok’al chixwotzb’al k’a’ruhaq chik neke’xnaw chirix k’a’ru kixb’aanu li Jesus naq kiwan sa’ li ruchich’och’.
-
Yiib’ xjalam-uuch li saq’e chiru li pizarron re xk’utb’esinkil li choxa. Yiib’ naab’aleb’ li b’e li taaxik a’ yaal b’ar re li pizarron, a’b’an jun ajwi’ li b’e li nak’amok sa’ choxa. Kanab’eb’ li kok’al chixsik’b’al li b’e a’an ut chixk’eeb’al jun xjalam-uuch li Jesus chiru. Il ru Mosiah 3:17 ut ch’olob’ xyaalal naq ka’ajwi’ rik’in xtaaqenkil li Jesus naru nokoq’aj rik’in li qaChoxahil Yuwa’.
Xk’utb’al li tzol’leb’: Kok’al ak ninqeb’
Naq nink’anjelak chiruheb’ li was wiitz’in, yookin ajwi’ chi k’anjelak chiru li Dios.
Chan ru naru nakatenq’aheb’ li kok’al chi tzolok rik’in lix k’anjel li rey aj Benjamin chiruheb’ li ras riitz’in?
Kok’ k’anjel naru chi b’aanumank
-
K’ut chiruheb’ li kok’al jun jalam-uuch b’ar wi’ li rey aj Benjamin yoo chixtzolb’aleb’ lix tenamit (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al malaj li Libro de obras de arte del Evangelio, ajl 74). Tenq’aheb’ li kok’al chixsik’b’al sa’ Mosiah 2:11─18 k’a’ru kixb’aanu li rey aj Benjamin re k’anjelak chiruheb’ li ras riitz’in. K’a’ut naq kik’anjelak chiru lix tenamit? K’a’ut naq took’anjelaq chiqu chiqib’il qib’?
-
Tz’iib’aheb’ chiru li pizarron ch’ol aatin wankeb’ sa’ Mosiah 2:16─17, ut moko taatz’iib’a ta junjunqeb’ li aatin. Kanab’eb’ li kok’al chixsik’b’aleb’ sa’ li loq’laj hu li aatin moko tz’iib’anb’ileb’ ta. Kanab’eb’ chixch’olob’ankil k’a’ru neke’xye li raqal a’an choq’ reheb’. Kanab’eb’ chixwotzb’aleb’ numsihom b’ar wi’ jalaneb’ chik kristiaan xe’k’anjelak chiruheb’ a’an, malaj b’ar wi’ xe’k’anjelak chiru anihaq. K’a’ru xe’reek’a rik’in li xe’xb’aanu?
-
K’e reheb’ li kok’al kok’ setb’il hu re xtz’iib’ankil chan ru naru neke’k’anjelak chiruheb’ li komon sa’ lix junkab’aleb’, ut k’e reheb’ li kok’al jun li b’oolx re te’xk’e li kok’ hu chi sa’. Waklesiheb’ xch’ool li kok’al chixsik’b’al ru jun reheb’ li kok’ hu rajlal kutan ut chixb’aanunkil li k’a’ru naxye choq’ re anihaq.
Ink’a’ us naq tinnima wib’ xb’aan li k’anjel ninb’aanu choq’ re was wiitz’in ut lin chaab’il b’aanuhom.
K’oxla chan ru naru nakatenq’aheb’ li kok’al nakatzoleb’ re naq te’xtaw ru naq li k’anjelak chiruheb’ qas qiitz’in tento musiq’anb’ilaq xb’aan li qarahom choq’ reheb’ li qas qiitz’in ut choq’ re li Dios.
Kok’ k’anjel naru chi b’aanumank
-
Kanab’eb’ li kok’al chixwotzb’al chan raj ru te’xch’olob’ li aatin nimank-ib’, malaj tenq’aheb’ chixtawb’al xch’olob’ankil sa’ jun tusleb’ aatin. Tenq’aheb’ chixsik’b’al sa’ Mosiah 2:15─24 k’a’ut naq li rey aj Benjamin moko kixnima ta rib’ xb’aan lix k’anjel chiruheb’ li ras riitz’in. K’a’ut naq tento took’anjelaq chiruheb’ li qas qiitz’in? Chirix naq eb’ li kok’al te’xwotz lix na’leb’eb’, tenq’aheb’ chixtawb’al ru naq tento taqayal qaq’e chi k’anjelak chiruheb’ li qas qiitz’in xb’aan naq neke’qara ut naqara li Dios, ut ink’a’ re naq chaab’il too’ile’q.
-
Kanab’eb’ li kok’al chixwotzb’aleb’ resil hoonal b’ar wi’ anihaq naru naxnima rib’ malaj naxye resil k’a’ru xb’aanu. K’a’ut naq moko us ta li nimank-ib’ sa’eb’ li hoonal a’an? Kanab’eb’ chiroksinkil li na’leb’ kixk’e li rey aj Benjamin natawman sa’ Mosiah 2:15─24 re xtenq’ankileb’ xtawb’al xsumenkil li patz’om.
Li Jesukristo naxsaqob’resi wu chiru li maak ut nikinixtenq’a chi ok jo’ jun aj santil paab’anel.
Re wulak jo’ li qaChoxahil Yuwa’, moko tz’aqal ta naq yal toosaqob’resiiq chiru li qamaak—li qaam tento taajalaaq. Jo’ kixk’ut li rey aj Benjamin, aajel ru naq taqaq’axeb’ ru li ink’a’ us naqarahin ut toowulaq jo’ jun aj santil paab’anel rik’in lix tojb’al rix li maak xb’aan li Kolonel.
Kok’ k’anjel naru chi b’aanumank
-
Yiib’ xjalam-uucheb’ wiib’ li kristiaan—jun taareetali li “ruchich’och’il winq” ut li jun chik taareetali jun “aj santil paab’anel.” (Maare aajelaq ru xch’olob’ankileb’ li aatin a’an.) Ilomaq ru sa’ komonil Mosiah 3:19 ut kanab’eb’ li kok’al chixtawb’aleb’ li jalaak tento tixb’aanu li ruchich’och’il winq re naq taa’ok jo’ jun aj santil paab’anel. K’a’ru chik li aatin malaj ch’ol aatin aajelaq ru re xtenq’ankileb’ li kok’al chixtawb’al ru?
-
Eb’ li kok’al nakatzoleb’, ma xtenq’ahomeb’ lix na’ xyuwa’ chixk’uub’ankil junaq xtib’el wa rik’in rilb’al xtusulal chi tz’iib’anb’il? Wi jo’kan, naru nakakanab’eb’ chiroksinkil Mosiah 3:19 re xyiib’ankil “xtusulal” chan ru wulak jo’ li Jesukristo. K’a’ut naq lix tojb’al rix li maak xb’aan li Jesukristo a’an tz’aqal li jwal aajel ru?
Xb’oqb’aleb’ chi tzolok sa’ kab’l
Kanab’eb’ li kok’al chiroksinkil li perel re kok’ k’anjel re li xamaan a’in re xwotzb’al rik’ineb’ lix junkab’al malaj li ramiiweb’ chan ru te’xtaaqe li kixb’aanu li rey aj Benjamin ut te’k’anjelaq chiruheb’ li ras riitz’in.
Xchaab’ilob’resinkil li qak’utum
Eb’ li kok’al neke’xtaw ru chi us naq neke’ka’sutiman li nak’ute’. Matxuwak chixb’aanunkileb’ li kok’ k’anjel naab’al sut, a’ tz’aqal rik’ineb’ li kok’al toj k’a’ch’ineb’ xyu’am. Li ka’sutink tixtenq’aheb’ li kok’al chixjultikankil li neke’xtzol.