“13–19 abril. Mosiah 1–3: “Taanumtaaq rik’ineb’ li rahok choq’ re li Dios ut chixjunileb’ li winq,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“13–19 abril. Mosiah 1–3,” Kim, Taaqehin—Choq’ reheb’ li komon ut li junkab’al: 2020
Li xMinerva K. Teichert (1888–1976), Lix chaq’rab’ihom li rey aj Benjamin, 1935, óleo en masonite, 36 x 48 pulgadas. Museo de Arte, Universidad de Brigham Young
13–19 abril
Mosiah 1–3
“Taanumtaaq rik’ineb’ li rahok choq’ re li Dios ut chixjunileb’ li winq”
Li rey aj Benjamin kixye jun na’leb’ chirix k’a’ut naq us xtz’iib’ankileb’ li musiq’anb’il na’leb’ naqak’ul: : “Ink’a’ raj kiru naq li qayuwa’, aj Lehi, kijuktiko’ ta raj re chixjunil li k’a’aq re ru a’in, re tixk’ut chiruheb’ li ralal, ka’ajwi’ wi tenq’anb’il xb’aaneb’ li perel ch’iich’ a’in” (Mosiah 1:4).
Xtz‘iib‘ankil li nakak‘oxla
Naq nakawab’i li aatin rey, maare nakak’oxlaheb’ li koroon, li ninqi kab’l, naab’aleb’ li moos, ut li k’ojarib’aal. Sa’ Mosiah 1–3, taawil resil jun li rey jalan wi’ rik’in chixjunil a’an. Li rey aj Benjamin, ruuchil xk’ulb’al li k’a’ru naraj rik’in xk’anjeleb’ lix tenamit, “kik’anjelak rik’in tz’aqal ruq’ ” (chi’ilmanq Mosiah 2:14). Ruuchil relajinkil naq jalaneb’ te’k’anjelaq chiru, a’an kik’anjelak chiru lix tenamit “chi anchal li metz’ew, li k’a’uxl ut li kawilal li k’eeb’il re” (Mosiah 2:11). Li rey a’in ink’a’ kiraj naq lix tenamit te’xloq’oni; kixk’ut b’an chiruheb’ naq te’xloq’oni jun li Rey li nim wi’chik xwankil chiru a’an, xb’aan naq a’an kixtaw ru naq a’an tz’aqal “li Qaawa’ Q’axal Nim Xwankil li na’awa’b’ejin” (Mosiah 3:5). Jo’ chixjunileb’ li xninqal ru aj jolominel sa’ lix awa’b’ejihom li Dios, li raatin ut lix b’aanuhom li rey aj Benjamin nokoxjayali rik’in li Choxahil Rey, a’an ajwi’ li Kolonel Jesukristo. Li rey aj Benjamin kixch’olob’ xyaalal naq li Jesus kichal “chaq sa’ choxa” ut kox’el “sa’ xyanqeb’ li winq, rik’in xk’anjelankil xninqal ru sachb’a-ch’oolej. … Ab’i ut, nachal rikʼinebʼ li re, re naq taachalq li kolbʼa-ibʼ rikʼinebʼ li ralal xkʼajolebʼ li winq rikʼin xpaabʼankil lix kʼabʼaʼ ” (Mosiah 3:5, 9).
Li na’leb’ re xtzolb’aleb’ li loq’laj hu aajunes
Re xk’ulb’al li raatin li Dios, tento taqakawresi qib’.
Naq li rey aj Benjamin kixtaqla resil naq kiraj aatinak rik’ineb’ lix tenamit, k’a’jo’ xk’ihaleb’ li ke’chal, jo’kan naq “ink’a’ ke’rajla xk’ihaleb’ ” (Mosiah 2:2). Ke’chal xb’aan lix b’antioxihomeb’ ut lix rahomeb’ choq’ re laj jolominel reheb’. A’b’an, jo’kan ajwi’ ke’chal re taak’utmanq li raatin li Dios chiruheb’.
Naq nakawil ru Mosiah 2:1–9, sik’ li k’a’ru ke’xb’aanu li tenamit re xk’utb’al naq nim xloq’al li raatin li Dios choq’ reheb’. K’a’ru kixpatz’ li rey aj Benjamin naq te’xb’aanu li tenamit re xkawresinkil rib’ re rab’inkil li raatin li Dios? (chi’ilmanq li raqal 9). Chan ru naq naru taakawresi aawib’ chi chaab’ilaq chik re xk’ulb’al li raatin li Dios sa’ xtzolb’aleb’ li loq’laj hu aajunes ut jo’ junkab’al ut naq wanqat sa’eb’ lix ch’utam li Iglees?
Chi’ilmanq ajwi’ Mateo 13:18–23; Alma 16:16–17.
Naq nink’anjelak chiruheb’ li was wiitz’in, yookin ajwi’ chi k’anjelak chiru li Dios.
Ma ch’a’aj chawu xtawb’al aahoonal re k’anjelak chiru aawas aawiitz’in, malaj ma taawaj raj naq nimaq chik xsahil aach’ool naq nakatk’anjelak chiruheb’? K’a’ru nakak’oxla naq tixye raj li rey aj Benjamin wi ta taapatz’ re k’a’ut naq kik’anjelak “chi anchal li metz’ew, li k’a’uxl ut li kawilal”? (Mosiah 2:11). Naq nakawil ru Mosiah 2:10–26k’e reetaleb’ li yaalil na’leb’ kixk’ut li rey aj Benjamin chirix li k’anjelak chiruheb’ li qas qiitz’in ut k’oxla chan raj ru naru taawoksiheb’ sa’ laa yu’am. Qayehaq, k’a’ru xyaalalil choq’ aawe xnawb’al naq wi nakatk’anjelak chiru laa was aawiitz’in, yookat ajwi’ chi k’anjelak chiru li Dios? (chi’ilmanq Mosiah 2:17). K’oxla chan raj ru naq tatruuq chi k’anjelak chiru anihaq chiru li xamaan a’in!
Chi’ilmanq ajwi’ Matthew 25:40.
Naq nink’anjelak chiruheb’ li was wiitz’in, yookin ajwi’ chi k’anjelak chiru li Dios.
Naru tinnumtaaq sa’ xb’een li ruchich’och’il winq ut tin’ok choq’ aj santil paab’anel sa’ xk’ab’a’ lix tojb’al rix li maak xb’aan li Jesukristo.
Li rey aj Benjamin, jo’ chixjunileb’ li profeet, kixch’olob’ xyaalal li Jesukristo re naq lix tenamit “te’ruuq chixk’ulb’al li risinkil lix maakeb’, ut te’saho’q xch’ool rik’in sahil ch’oolejil q’axal nim” (Mosiah 3:13). A’an kixk’ut ajwi’ naq li Kolonel, sa’ xk’ab’a’ lix tojb’al rix li maak kixb’aanu, ink’a’ ka’ajwi’ nokoxch’ajob’resi, naxk’e aj b’an wi’ qe wankilal re risinkil li “ruchich’och’il winq” ut chi ok choq’ “aj santil paab’anel” (Mosiah 3:19; chi’ilmanq ajwi’ li K’utul Raqal reheb’ li Loq’laj Hu, “Ruchich’och’il Winq”).
Elder David A. Bednar kixye: “A’an lix tojb’al rix li maak xb’aan li Jesukristo li nak’ehok jun wankilal aj saqob’resinel ut aj tojol-ix li nokoxtenq’a chi numtaak sa’ xb’een li maak, ut jun li wankilal aj santob’resinel ut aj kawob’resinel li nokoxtenq’a chi chaab’ilo’k chi k’a’jo’ wi’chik chiru li tooruhanq raj rik’in junes li qametz’ew laa’o. Lix tojb’al rix li maak li maak’a’ roso’jik wan choq’ re laj maak ut laj santil paab’anel li wan sa’ xch’ool li junjunq” (“Limpios de manos y puros de corazón,” Liahona, noviembre 2007, 82).
A’in junjunq li patz’om naru taak’oxla naq nakawil ru lix nawom xch’ool li rey aj Benjamin chirix li Kolonel sa’ Mosiah 3:1–20:
-
K’a’ru nintzol sa’eb’ li raqal a’in chirix li Kolonel ut lix k’anjel?
-
Chan ru naq li Kolonel kinixtenq’a chi numtaak sa’ xb’een li maak? Chan ru naq kinixtenq’a chixjalb’al li waam ut chi ok choq’ aj santil paab’anel?
-
K’a’ru nintzol chirix li ok choq’ aj santil paab’anel sa’ Mosiah 3:19?
K’a’ut naq li rey aj Benjamin kixye naq li Jesus a’an “lix Yuwa’il li choxa ut ch’och’ ”?
Li Awa’b’ej Joseph F. Smith kixye: “Li Jesukristo, li naqanaw ru jo’ li Jehova, a’an li kib’aanunk re li k’anjel re yo’ob’tesink chi taqlanb’il xb’aan li Yuwa’b’ej, li Elohim. … Li Jesukristo, jo’ aj Yo’ob’tesinel, rajlal nak’ab’a’iman lix Yuwa’il li choxa ut ch’och’ … ; ut rik’in naq maak’a’ roso’jik lix yo’ob’tesihom, tz’aqal naq a’an lix Junelik Yuwa’il li choxa ut ch’och’ ” (Enseñanzas de los Presidentes de la Iglesia: Joseph F. Smith [1998], 383).
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Mosiah 1:1–7
Chan ru naq ke’osob’tesiik lix tenamit li rey aj Benjamin xb’aaneb’ li perel ch’iich’ bronce ut lix perel ch’iich’ laj Nefi? Chan ru naq na’osob’tesiik li qajunkab’al xb’aaneb’ li loq’laj hu?
Mosiah 2–3
Maare taawulaq chiru laa junkab’al xkawresinkil jun na’ajej choq’ re li raatin li rey aj Benjamin. Taaruuq raj taakab’la jun ch’ina najt xteramil kab’l ut taak’e xhoonal li junjunq komon sa’ laa junkab’al chixyaab’asinkil li raatin li rey aj Benjamin chi xaqxo sa’ xb’een li najt xteramil kab’l. Lix komoneb’ laa junkab’al te’ruuq chirab’inkil chaq sa’ jun muheb’aal t’ikr.
Mosiah 2:9–19
K’a’ru naqatzol rik’in lix k’utum ut lix b’aanuhom li rey aj Benjamin chirix li k’anjelak chiruheb’ li qas qiitz’in? K’a’ru naqeek’a naq tento taqab’aanu?
Mosiah 2:15–25
Ma taak’anjelaq choq’ re laa junkab’al aatinak chirix li tuulanil ch’oolej? K’a’ut naq ink’a’ kixterq’usi rib’ li rey aj Benjamin chirix chixjunil lix b’aanuhom? K’a’ru naru taqatzol rik’in lix k’utum chirix chan ru naq wanko rik’in li Dios?
Mosiah 2:36–41
K’a’ru kixk’ut li rey aj Benjamin chirix li nak’ulman wi naqanaw li yaal ut ink’a’ naqayu’ami? K’a’ru kixk’ut chirix chan ru xtawb’al li tz’aqal sahil ch’oolejil?
Mosiah 3:19
K’a’ru tento tawab’aanu re ok choq’ aj santil paab’anel? B’arwan li na’leb’ sa’ li raqal a’in li mas naru taqajayali qib’ chixk’anjelankil jo’ junkab’al?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
K’eheb’ li jayalihom li nakatru chixb’aanunkil. Xnumsinkil yal junjunq k’asal wulaj wulaj re xtzolb’aleb’ li loq’laj hu, taaruuq chirosob’tesinkil laa yu’am. K’e aach’ool chi tzolok wulaj wulaj, ut k’oxla k’a’ru taab’aanu re taajultiko’q aawe.
Lix yehom li rey aj Benjamin, xb’aan laj Jeremy Winborg