li Jesukristo waklijenaq chi yo’yo rochb’eeneb’ lix apostol

Li Kristo ut eb’ li Apostol, xb’aan laj Del Parson

30 marzo–12 abril

Li Paswa

“Taawakliiq chaq … chi wanq li k’irtesink sa’ xxik’ ”

Chiruheb’ li kutan rub’elaj li domingo re Paswa, k’oxla xjayalinkil li tzolok sa’eb’ li loq’laj hu nakab’aanu sa’ junesal ut jo’ junkab’al rik’in li xnimal ru xch’olob’ahom lix Hu laj Mormon chirix lix yu’am, lix kamik, lix waklijik chi yo’yo, ut lix wankilal aj tojol-ix li Jesukristo.

Xtz’iib’ankil li nakak’oxla

Eb’ li najteril apostol kaweb’ xch’ool sa’ xch’olob’ankil xyaalal li Jesukristo ut lix waklijik chi yo’yo. K’iila millon chi kristiaan neke’xpaab’ li Jesukristo ut neke’xyal xq’e chixtaaqenkil a’an, xb’aan li raatineb’ li tz’iib’anb’il sa’ li Santil Hu. A’ut maare toj wankeb’ li neke’k’oxlank re, wi li Jesukristo a’an aj Kolol re chixjunil li ruchich’och’, k’a’ut naq moko k’iheb’ ta li ke’ilok re ut k’a’ut naq ka’ajwi’ sa’ jun ch’ina tenamit kik’ulman chixjunil a’an?

Lix Hu laj Mormon wan choq’ jun chik ch’olob’anb’il esil naq li Jesukristo a’an ajwi’ laj Kolol re li ruchich’och’, “li naxk’utb’esi rib’ chiruheb’ chixjunil li tenamit” (perel re xjolomil li aatin saʼ lix Hu laj Mormon) ut li naxyeechi’i li kolb’a-ib’ re chixjunileb’ li te’chalq rik’in. Jo’kan ajwi’, li xkab’ aj yehol esil a’an naxch’olob’ ajwi’ chi saqen ru k’a’ru xyaalal li kolb’a-ib’. Xb’aan a’in naq laj Nefi, laj Jakob, laj Mormon, ut chixjunileb’ li profeet ke’k’anjelak chi yalb’ileb’ xq’e “re xtz’iib’ankil li aatin a’in chiruheb’ li perel ch’iich’ ”—re xyaab’asinkil reheb’ li tasal tenamit li toj te’chalq naq “kiqanaw chirix li Kristo, ut … ak qayo’on chaq lix loq’al” (Jakob 4:3–4). Sa’ xq’ehil li Paswa a’in, k’oxlaheb’ li ch’olob’ahom sa’ lix Hu laj Mormon chirix naq lix wankil lix tojb’al rix li maak xb’aan li Kristo wan choq’ re chixjunileb’ jo’ ajwi’ choq’ re li junjunq—chixtojb’al rix chixjunil li ruchich’och’ ut chixtojb’al aawix laa’at.

reetalil li tzolok aajunes

Li na’leb’ re xtzolb’aleb’ li loq’laj hu aajunes

2 Nefi 9:6–15, 22; Alma 11:41–45; 40:21–23; 3 Nefi 26:4–5

Sa’ xk’ab’a’ lix waklijik chi yo’yo li Jesukristo, chixjunil li kristiaan te’wakliiq chi yo’yo.

Chiru li Paswa, k’aynaqo chixk’oxlankil lix waklijik chi yo’yo li Jesukristo, a’ut k’a’ru tz’aqal xyaalal li wakliik chi yo’yo? K’a’ruheb’ li na’leb’ neke’tawman sa’ lix Hu laj Mormon chirix li wakliik chi yo’yo? Maare sa’ xninq’ehinkil li Paswa, naru taatz’iib’a xtusulal li yaalil na’leb’ chirix li wakliik chi yo’yo li nakataw sa’ 2 Nefi 9:6–15, 22; Alma 11:41–45; 40:21–23; ut 3 Nefi 26:4–5. Naru ajwi’ taatz’iib’a laa k’oxlahom chirix k’a’ut naq aajel ru xnawb’aleb’ ru li junjunq chi yaalil na’leb’ a’an.

Maare taak’e reetal naq li yaalil na’leb’ chirix li wakliik chi yo’yo k’utb’ileb’ chi kok’ aj xsa’ rochb’een li yaalil na’leb’ chirix li raqb’a-aatin sa’ roso’jik. K’oxla li k’a’ru naxk’ut li na’leb’ a’an chawu chirix lix aajelil ru li wakliik chi yo’yo sa’ li k’uub’anb’il na’leb’ re li kolb’a-ib’.

Chi’ilmanq ajwi’ Lukas 24:36–43; Hechos 24:15; 1 Korintios 15:12–23.

Mosiah 3:7; 15:5–9; Alma 7:11–13

Li Jesukristo kixk’ul sa’ xb’een a’an lin maak, lin rahilal, ut lin yajel.

Li Santil Hu naxk’ut chi saqen ru naq li Jesukristo kixtoj rix li qamaak. A’b’anan, lix Hu laj Mormon, naxnimob’resi li qanawom chirix lix mayej ut li rahilal kixk’ul li Jesukristo. Naru taataw junjunq reheb’ li k’utum a’an sa’ Mosiah 3:7; 15:5–9; ut Alma 7:11–13. Chirix naq nakawil ruheb’ li raqal a’an, k’oxla xtz’iib’ankil li nakataw sa’ jun kaaxukuut jo’ a’in:

K’a’ru li rahilal kixk’ul li Kolonel?	K’a’ut naq kixk’ul li rahilal?	K’a’ru naraj naxye a’an choq’ we laa’in?
K’a’ru li rahilal kixk’ul li Kolonel?	K’a’ut naq kixk’ul li rahilal?	K’a’ru naraj naxye a’an choq’ we laa’in?

Chi’ilmanq ajwi’ Isaias 53; Hebreos 4:14–16.

li Kristo natijok sa’ li awimq Getsemani

Getsemani, xb’aan laj Michael T. Malm

Mosiah 5:1–2; 27:8–28; Alma 15:3–12; 24:7–19

Lix tojb’al rix li maak xb’aan li Jesukristo nikinixsaqob’resi ut nikinixtenq’a chi wank chi tz’aqal we wu.

Naru nayeeman naq lix k’ihal lix Hu laj Mormon, a’an jun esil chirixeb’ li kristiaan li ke’jalaak xb’aan lix tojb’al rix li maak kixb’aanu li Jesukristo. Relik chi yaal, junjunq reheb’ li kristiaan a’an q’axal ninq lix maakeb’ ut xik’ ke’ilok re lix tenamit li Dios rub’elaj naq lix wankil li Kolonel kixk’anjela jun nimla jalaak sa’ xch’ooleb’, jo’ chanru lix paab’aaleb’ chirix a’an. Naru taawil resil junjunq reheb’ a’an sa’ Mosiah 5:1–2; 27:8–28; ut Alma 15:3–12; 24:7–19; naru taak’oxla xkomoneb’ chik li naru ajwi’ taatzol. K’a’ru nakak’e reetal li nak’ulman sa’ chixjunileb’ li esil a’an? K’a’ru li jalan li nakak’e reetal? K’a’ru neke’xk’ut li esil a’an chawu chirix chan ru naq lix tojb’al rix li maak xb’aan li Kolonel naru chajalb’al?

Chi’ilmanq ajwi’ Alma 5:6–14; 13:11–12; 18; 19:1–16; 22:1–26; 36:16–21; Eter 12:27; Moroni 10:32–33.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Naq nakaninq’ehi li Paswa aawochb’een laa junkab’al, sik’ chan ru naru textzoloq sa’ komonil chirix li Kolonel ut lix tojb’al rix li maak, jo’ ajwi’ li wakliik chi yo’yo. Aʼin junjunq li naʼlebʼ naru taabʼaanu.

3 Nefi 11; 17

Wankeb’ li junkab’al li neke’xk’e reetal naq k’a’jo’ nawulak chiruheb’ xtzolb’al li resil lix k’ulunik li Kolonel waklijenaq chi yo’yo sa’ li ch’och’ America sa’ xq’ehil li Paswa. Waklesi xch’ooleb’ li komon sa’ laa junkab’al chixk’oxlankil k’a’ raj ru xe’reek’a wi ta xe’xch’e’ xk’ob’olal li Jesukristo (chi’ilmanq 3 Nefi 11:14–15) malaj wi ta xe’wan sa’ xyanqeb’ li kok’al li kirosob’tesi (chi’ilmanq 3 Nefi 17:21). Chan ru naq a’in naxnimob’resi li qab’antioxihom xb’aan lix waklijik chi yo’yo li Kolonel? Jun b’onb’il jalam-uuch li naxk’utb’esi li esil a’an natawman sa’ li tusleb’ aatin a’in; jalaneb’ chik naru neke’tawman sa’ ChurchofJesusChrist.org. Maare taawulaq ajwi’ chiruheb’ li komon sa’ laa junkab’al xyiib’ankil xjalam-uucheb’ chirix li neke’ril ru.

Eb’ li esil re li jolomil ch’utub’aj-ib’

Sa’ naab’al na’ajej chiru li ruchich’och’, li jolomil ch’utub’aj-ib’ re li abril a’in nak’ulman jun xamaan rub’elaj li Paswa. Maare rab’inkileb’ li esil re li jolomil ch’utub’aj-ib’ naru taak’anjelaq choq’ re laa junkab’al re teek’oxla li Kolonel chiru li Paswa a’in. Qayehaq, naru taab’oqeb’ li komon sa’ laa junkab’al chirab’inkileb’ li esil re li jolomil ch’utub’aj-ib’ li neke’xch’olob’ xyaalal li Jesukristo ut lix waklijik chi yo’yo—q’axal wi’chik sa’ raatineb’ li apostol, li wankeb’ choq’ aj yehol nawom chirix li Jesukristo. Toja’ naq naru teetz’il rixeb’ li esil a’an sa’ komonil ut teetaweb’ li k’utum li neke’xkawob’resi lix nawom eech’ool chirix li Jesukristo.

“Li Yo’yookil Kristo: Lix Ch’olob’ahomeb’ li Apostol”

Jo’ junkab’al, ilomaq ru “Li Yo’yookil Kristo: Lix Ch’olob’ahomeb’ li Apostol” (ChurchofJesusChrist.org) ut tz’aama re li junjunq chi komon sa’ li junkab’al naq tixtaw junaq esil chirix li Paswa sa’ li ch’olob’ank a’in re xwotzb’al rik’ineb’ chik li kristiaan. Qayehaq, taaruuq raj taak’uub’ jun li k’utleb’ aatin re xk’eeb’al chiru li redes sociales, chiru rokeb’aal laa wochoch, malaj sa’ rilob’aal laa wochoch.

Eb’ li video: Testigos especiales de Cristo

Sa’ ChurchofJesusChrist.org ut li aplicación Biblioteca del Evangelio wankeb’ li video li k’ab’a’inb’ileb’ Testigos especiales de Cristo . Wan lix video li junjunq komon re li Xb’eenil Awa’b’ejil ut lix Molameb’ li Kab’laju chi Apostol li neke’xch’olob’ wi’ xyaalal li Jesukristo. Laa junkab’al naru taaril jun malaj wiib’ oxib’ reheb’ li video a’an ut tex’aatinaq chirix li neke’xk’ut chiqu chirix li kixb’aanu choq’ qe li Kolonel.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Xchaab’ilob’resinkil li qak’utum

Yu’ami lix evangelio li Jesukristo. Jo’ na’b’ej malaj yuwa’b’ej, li k’a’ru q’axal aajel ru naru taab’aanu, a’an xyu’aminkil li evangelio chi anchal aach’ool. A’an a’in li tz’aqal b’e re taaruuq taawanq aawik’in li Santil Musiq’ej. Ink’a’ na’ajman ru naq tz’aqalaq aawe aawu, ka’ajwi’ naq k’eek’o aach’ool chixb’aanunkil li us ut chixsik’b’al xkuyb’al aamaak sa’ xk’ab’a’ lix tojb’al rix li maak xb’aan li Kolonel. (Chi’ilmanq Li k’utuk jo’ li Kolonel, 13–14.)

li Kristo naxk’e xsahileb’ xch’ool laj Nefita

Jalam-uuch re li Kristo rik’ineb’ laj Nefita xb’aan laj Ben Sowards