“23–29 marzo. Enos–Li Raatin laj Mormon: Nak’anjelak wik’in re xb’aanunkil li rajom xch’ool,” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“23–29 marzo. Enos–Li Raatin laj Mormon,” Kim, Taaqehin—Choq’ reheb’ li komon ut li junkab’al: 2020
Laj Jakob ut laj Enos, xb’aan laj Scott Snow
23–29 marzo
Enos–Li Raatin laj Mormon
Nak’anjelak wik’in re xb’aanunkil li rajom xch’ool
Naq nakawil ru Enos toj Li Raatin li Mormon, sik’eb’ li esil li mas te’k’anjelaq choq’ re laa junkab’al.
Xtz’iib’ankil li nakak’oxla
Laj Enos xko’o chixyoob’aleb’ li xul sa’eb’ li k’iche’, a’b’an kikana aran re tijok “chiru chixjunil li kutan … ut naq ki’ok q’ojyin” (Enos 1:3–4). Xb’aan naq yoo xtz’okajik sa’ raam re xk’ulb’al xkuyb’al lix maak, kiwan xch’ool laj Enos chi tijok jo’ najtil taa’ajmanq raj ru ut toj reetal chi ok “yalok-u” chiru li Dios (Enos 1:2). A’an tz’aqal li tijok chi anchal ch’oolej: ink’a’ yal xpatz’b’al yalaq k’a’ru naqaj, a’ut jun xyalb’al qaq’e chi maak’a’ qab’alaq’ re aatinak rik’in li Dios ut xjayalinkil li rajom qach’ool rik’in li rajom xch’ool a’an. Naq nakattijok chi jo’kan, naq “toj sa’ choxa nawulak” lix yaab’ aakux, taataw, jo’ kixtaw laj Enos, naq li Dios nakatrab’i, ut naq nakatxra chi yaal laa’at, eb’ li raarookeb’ aab’aan, ut eb’ ajwi’ li xik’ neke’ilok aawe (chi’ilmanq Enos 1:4–17). Sa’eb’ li hoonal a’an, li Dios naru tixk’e chanaw li rajom xch’ool, ut wanq chik aach’ool ut aaseeb’al chixb’aanunkil li rajom xch’ool a’an xb’aan naq wankat sa’ junajil rik’in a’an. Jo’ laj Mormon, maare “ink’a’ nakanaw chixjunil li k’a’aq re ru; a’b’an li Qaawa’ nanawok re chixjunil li k’a’aq re ru … ut nak’anjelak aawik’in re xb’aanunkil jo’ chanru li rajom xch’ool” (Li Raatin laj Mormon 1:7).
Li na’leb’ re xtzolb’aleb’ li loq’laj hu aajunes
Li raatin jun yuwa’b’ej malaj na’b’ej naru taawanq xwankil li ink’a’ na’oso’.
K’a’ruheb’ li esil li neke’tawman sa’eb’ li raqal a’in choq’ reheb’ li na’b’ej yuwa’b’ej malaj li alalb’ej k’ajolb’ej?
Naq nintijok chi anchal inch’ool, taasumeeq intij.
Lix numsihom laj Enos chirix li tijok, a’an jun reheb’ li mas nawb’il ru sa’eb’ li loq’laj hu. Maare ink’a’ jwal nim li xak’ul laa’at chiru jo’ li kixk’ul laj Enos, a’b’an toj naru taawanq xwankil. Lix numsihom laj Enos naru tixk’ut chawu chan ru xchaab’ilob’resinkileb’ laa tij. Wahe’ junjunq li patz’om naru taak’oxla:
-
K’a’ruheb’ li aatin li neke’xch’olob’ lix yalb’al xq’e laj Enos chi tijok?
-
K’a’ru kixtz’aama laj Enos sa’ li xb’een xtij? (chi’ilmanq Enos 1:4). K’a’ru naru taatzol rik’in li kixb’aanu laj Enos chirix naq kixk’ul lix sumenkil? (chi’ilmanq Enos 1:5–7).
-
K’a’ru kixb’aanu laj Enos re xk’anjelankileb’ li sumehom kixk’ul?
-
K’a’ru naru taatzol rik’in laj Enos chirix chan ru taawanq laa paab’aal li “ink’a’ chik na’eekan” chirix li Qaawa’? (Enos 1:11).
Li Dios tinrosob’tesi naq tin’ab’inq chiruheb’ lix chaq’rab’.
Jun reheb’ lix yeechi’ihom li Dios li jwal k’iilasutinb’il sa’ lix Hu laj Mormon, a’an naq wi eb’ laj Nefita te’ab’inq chiruheb’ li taqlahom, te’usaaq (chi’ilmanq 2 Nefi 1:20; Jarom 1:9–12; Omni 1:6). Eb’ li hu Jarom ut Omni neke’xk’ut chan ru naq kitz’aqob’resiik ru li yeechi’ihom a’an. K’a’ru nakatzol sa’eb’ li esil a’an li naru tatxtenq’a “chi usaak sa’ li ch’och’ ”?
Aniheb’ lix tenamit laj Tzarahemla?
Chirix naq eb’ laj Nefita ke’eelelik chaq sa’ li ch’och’ Nefi, ke’xtaweb’ li k’iila tenamit sa’ jun na’ajej Tzarahemla yeeb’il re. Eb’ laj Tzarahemla a’aneb’ ralal xk’ajol jun teep aj Israelita li ke’el chaq Jerusalen jo’ lix junkab’al laj Lehi, ut ke’wulak sa’ li yeechi’inb’il ch’och’. Sa’ xyanqeb’ a’an kiwan laj Mulek, jun reheb’ li ralal laj Sedekias, li rey sa’ xb’een Juda, li kik’ame’ choq’ preex xb’aaneb’ laj Babilonia 578 chihab’ ma nayo’la li Kristo (chi’ilmanq Jeremias 52:1–11; Mosiah 25:2; Helaman 8:21).
Chirix naq lix tenamit laj Tzarahemla ke’wulak sa’ li yeechi’inb’il ch’och’, ke’xtaw laj Koriantumr (chi’ilmanq Omni 1:21), li roso’jik aj Jaredita, li yeeb’il resil sa’ li hu Eter.
K’a’ru Li Raatin laj Mormon?
Li Raatin laj Mormon nachal sa’ xyanqeb’ li wiib’ tasal chi perel ch’iich’ li wankeb’ sa’ lix Hu laj Mormon. Arin laj Mormon naxch’olob’eb’ li wiib’ chi tz’iib’anb’il esil, ut li raatin naxk’ut jun xnimal ru esil chirix xkanab’ankil qib’ chiru li Qaawa’, us ta ink’a’ naqataw ru chi tz’aqal lix b’eresihom.
Naq laj Nefi yoo chixtz’iib’ankil li resil lix tenamit, li Dios kixtaqla naq tixyiib’ wiib’ tasal chi perel ch’iich’, a’aneb’ li perel ch’iich’ li kok’ ru ut lix perel ch’iich’ laj Nefi li ninq ru. Laj Nefi ink’a’ kixnaw k’a’ut naq taqlanb’il chixyiib’ankil wiib’ tasal chi perel ch’iich’, a’b’an a’an kixpaab’ naq li Qaawa’ wan “jun chaab’il ajom … , li moko nawb’il ta inb’aan” (1 Nefi 9:5; chi’ilmanq ajwi’ “Jun Ch’ina Ch’olob’anb’il Aatin chirix lix Hu laj Mormon”).
K’iila cient chihab’ chirix a’an, naq laj Mormon yoo chixk’osb’al ru lix perel ch’iich’ laj Nefi li ninq ru, a’an kixtaweb’ li perel ch’iich’ li kok’ ru. Chiruheb’ li perel ch’iich’ li kok’ ru, tz’iib’anb’il naab’al li ch’olob’anb’il ajwi’ sa’eb’ li perel ch’iich’ li ninq ru ut li ak k’osb’il ru xb’aan laj Mormon, a’b’an eb’ li perel ch’iich’ li kok’ ru mas wi’chik neke’aatinak chirix li k’a’ru re li musiq’ej ut lix k’anjeleb’ ut xyehomeb’ li profeet. Li Dios kixmusiq’a laj Mormon chixk’eeb’aleb’ lix perel ch’iich’ laj Nefi li kok’ ru sa’ li resil rochb’eeneb’ li perel ch’iich’ li ninq ru. Jo’ laj Nefi, laj Mormon ink’a’ kixtaw ru li rajom li Dios naq li wiib’ chi perel ch’iich’ te’oksimanq, a’b’an kixpaab’ naq a’an “jun chaab’il ajom” (Li Raatin laj Mormon 1:7).
Anajwan naqanaw k’a’ru aj-e li ajom a’an. Sa’ li chihab’ 1828, chirix naq laj Jose Smith ak kixjaltesi ru jun raqal reheb’ lix perel ch’iich’ laj Nefi li ninq jo’ k’osb’il ru xb’aan laj Mormon (116 chi perel), ke’sach li perel a’an chiru laj Martin Harris. Li Dios kixtaqla laj Jose naq ink’a’ chik tixjaltesi wi’chik ru li raqal a’an xb’aan naq eb’ li maa’us aj winq te’xjalb’ehiheb’ li aatin ut te’xyal xsachb’al xwankil laj Jose (chi’ilmanq Tzol’leb’ ut Sumwank 10, xtiklajik li tasal; Tzol’leb’ ut Sumwank 10:14–19, 30–45). A’ut li Dios ak kixnaw chi rub’elaj naq taak’ulmanq a’in, ut kixk’eheb’ li perel ch’iich’ li kok’ ru, tz’iib’anb’il wi’ li esil li kisachman rik’ineb’ li 116 chi perel. Eb’ li hu li neke’tawman chi rub’elaj li hu Li Raatin laj Mormon neke’chal chaq sa’eb’ li perel ch’iich’ li kok’ ru, ut lix k’osb’al ruheb’ li perel ch’iich’ li ninq xb’aan laj Mormon natikla chirix li hu Li Raatin laj Mormon.
Laj Mormon naxk’oseb’ ru li perel ch’iich’, xb’aan laj Jorge Cocco
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Enos 1:1–17
Laa junkab’al naru taaril jun xjalam-uuch laj Enos naq kitijok ut taasik’ sa’ Enos 1:1–17 re xtawb’aleb’ li ch’ol aatin li naru te’k’anjelaq choq’ xk’ab’a’ li jalam-uuch. Naru ajwi’ taapatz’ reheb’ li komon sa’ laa junkab’al naq te’xyiib’ xjalam-uuch lix numsihom laj Enos. K’a’ru naqatzol rik’in laj Enos chirix xsik’b’al lix kuyb’al qamaak?
Jarom 1:2
Chan ru naq xtzolb’al lix Hu laj Mormon “naxk’utb’esi li k’uub’anb’il na’leb’ re li kolb’a-ib’ ” chiqu?
Omni 1:12–22
K’a’ru neke’xk’ut li raqal a’in chirix lix aajelil ru naq wan li raatin li Dios sa’ li qayu’am?
Li Raatin laj Mormon 1:3–9
Chan ru too’osob’tesiiq naq naqatz’iib’a resil li qayu’am ut li qajunkab’al? Chan ru naq taqak’e chi jayalimank li qatz’iib’ahom mas wi’chik rik’in li Kristo?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Ch’utub’omaq eerib’ chi kok’ aj xsa’. Li Awa’b’ej Henry B. Eyring kixk’ut, “Maakanab’ chi nume’k li hoonal taaruuq wi’ taach’utub’eb’ li kok’al re te’xtzol li tzol’leb’ chirix li Jesukristo. Moko k’iheb’ ta li hoonal a’an, ut k’a’jo’ naq k’eek’o xch’ool li xik’ na’ilok qe” (El poder del enseñar la doctrina,” Liahona, julio 1999, 87).
Laj Enos natijok, xb’aan laj Robert T. Barrett