“2–8 marzo. 2 Nefi 31–33: “A’in li b’e,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“2–8 marzo. 2 Nefi 31–33,” Kim, Taaqehin—Choq’ reheb’ li komon ut li junkab’al: 2020
Li Kristo nak’utuk chiruheb’ lix tzolom, xb’aan laj Justin Kunz
2–8 marzo
2 Nefi 31–33
“A’in li b’e”
Li tusleb’ aatin a’in naxk’uteb’ li na’leb’ li maare te’xtoch’ aach’ool sa’ 2 Nefi 31–33. A’b’an, eb’ li na’leb’ mas xninqaleb’ ru taatzol sa’ li tzolok, te’chalq rik’in xhasb’ li Musiq’ej. Sik’ li b’eresihom a’an, ut tz’iib’a li musiq’anb’il na’leb’ nakak’ul.
Xtz’iib’ankil li nakak’oxla
Sa’eb’ li roso’jik aatin kixtz’iib’a laj Nefi, naqataw li ch’ol aatin a’in: “Jo’ka’in kinixtaqla li Qaawa’, ut tento tin’ab’inq chiru” (2 Nefi 33:15). A’in naxch’olob’ chi us chan ru kiwan laj Nefi sa’ xyu’am. A’an kixsik’ li rajom li Qaawa’ ut chi kaw xch’ool kixyal xq’e chixpaab’ankil—maak’a’ naxye naq haye’ kikamsiik naq kixsik’ xk’ulb’aleb’ li perel ch’iich’ rik’in laj Laban, naq kixyiib’ jun jukub’ ut kixq’ax ru li nimla palaw, malaj naq chi tiik xch’ool kixk’ut lix tzol’leb’ li Kristo chi saqen ru ut rik’in wankilal. Laj Nefi kiru chi aatinak rik’in wankilal re q’unb’esink ch’oolej chirix lix aajelil ru “xtiikisinkil qib’ chi uub’ej chi xaqxooko junelik rik’in li Kristo,” chirix x’aajelil ru xtaaqenkil “li laatz’ ut ka’ch’in ruhil b’e li nak’amok sa’ li junelik yu’am” (2 Nefi 31:20, 18), xb’aan naq a’an ajwi’ li b’e kixtaaqe a’an. A’an kixnaw rik’in li k’a’ru kixk’ul naq li b’e a’in, us ta ch’a’aj jo’q’ehaq, naxk’e li sahil ch’oolejil, ut naq “maajun chik k’ab’a’ej wan chi k’eeb’il rub’el choxa li taaruuq taakole’q wi’ li winq sa’ li rawa’b’ejihom li Dios” (2 Nefi 31:21).
Li na’leb’ re xtzolb’aleb’ li loq’laj hu aajunes
Li Jesukristo ut li tzol’leb’ a’aneb’ li junaj chi b’e re xk’ulb’al li junelik yu’am.
Wi ta tento taach’olob’ k’a’ru li b’e li nak’amok sa’ li junelik yu’am rik’in yal wiib’ oxib’ li aatin, k’a’ raj ru taaye? Laj Nefi, rik’in li saqen ruhil aatin, kixb’aanu chi jo’ka’in: li paab’aal chirix li Kristo, li jalb’a’-k’a’uxlej, li kub’iha’, xk’ulb’al li maatan re li Santil Musiq’ej, ut li kuyuk toj sa’ roso’jik. Chirix naq nakatzol li raatin laj Nefi sa’ 2 Nefi 31–32, k’oxla chan ru naq taach’olob’ a’an chiru anihaq chik rik’in tz’aqal aawaatin laa’at. K’oxla chan ru naq osob’tesinb’ilat xb’aan xyu’aminkileb’ li aatin a’an. Naru tatk’oxlaq chirix lix raatin laj Nefi sa’ 2 Nefi 31:18–20 ut taatz’il rix lix yalb’al aaq’e sa’ “xtiikisinkil aawib’ chi uub’ej” sa’ xb’ehil li evangelio.
Chi’ilmanq ajwi’ 3 Nefi 11:32–39; 27:13–22; D. Todd Christofferson, “La doctrina de Cristo,” Liahona, mayo 2012, 86–90; Brian K. Ashton, “Lix tzol’leb’ li Kristo,” Jolomil ch’utub’aj-ib’ re octubre 2016.
Xtaaqenkil lix k’utum li Jesukristo naxk’am qab’e sa’ li junelik yu’am.
Li Jesukristo kixk’ut chi tz’aqal re ru chan ru too’ab’inq chiru li Dios naq a’an kikub’e xha’.
Maak’a’ naxye ma xkub’e aaha’ ewer malaj 80 chihab’ chaq, a’an jun xnimal ru hoonal—xat-ok sa’ jun sumwank chiru xnajtil aayu’am chixtaaqenkil li Jesukristo. K’oxla lix kub’ik aaha’ laa’at naq nakawil ru resil lix kub’iha li Kolonel sa’ 2 Nefi 31:4–13. K’a’ut naq kikub’e xha’ li Kolonel? Chan ru naq li ajom naq kikub’e xha’ chanchan li ajom naq xkub’e aaha’ laa’at? K’a’ru yookat chixb’aanunkil anajwan re naq ink’a’ taakanab’ xtaaqenkil lix b’aanuhom li Kristo sa’ ab’ink chiru li Dios?
Li k’ojob’anb’il k’anjel re li loq’laj wa’ak a’an jun hoonal nakak’ul rajlal xamaan re x’ak’ob’resinkil li rajom aach’ool chixtaaqenkil li Jesukristo. Naq yooqat chi tz’aqonk sa’ li loq’laj wa’ak, k’oxla rilb’al ru 2 Nefi 31:13 ut xtz’ilb’al rix li rajom aach’ool “chixtaaqenkil li K’ajolb’ej chi anchal li rajom aach’ool” ut li rajom aach’ool “chixk’ulb’al sa’ aab’een lix k’ab’a’ li Kristo.”
Li Santil Musiq’ej tixk’ut chiwu li tento tinb’aanu.
Wi li kub’iha’ ut li k’ojob’aak a’aneb’ “li okeb’aal li tento too’ok wi’ ” sa’ li laatz’ ut ka’ch’in ruhil b’e (2 Nefi 31:17), k’a’ru naqab’aanu naq ak wanko sa’ li b’e? A’an lix patz’om lix tenamit laj Nefi (chi’ilmanq 2 Nefi 32:1). K’a’ruheb’ li sumehom kixk’e laj Nefi sa’ 2 Nefi 31:19–20 ut li ch’ol 32? K’a’ruheb’ li sumehom nakataw laa’at?
Chi’ilmanq ajwi’ David A. Bednar, “Recibe el Espíritu Santo,” Liahona, noviembre 2010, 94–97; “Santil Musiq’ej,” K’utul Raqal reheb’ li Loq’laj Hu.
Lix Hu laj Mormon naxq’unb’esi xch’ooleb’ chixjunil chixpaab’ankil li Kristo.
Sa’ 2 Nefi 33, naq laj Nefi yoo chixraqb’al lix tz’iib’ahom, a’an kixch’olob’ k’a’ut naq yoo chi tz’iib’ak. K’a’ru nakataw chirix a’an sa’ li ch’ol a’in? K’oxla li k’a’ru ak xawil ru sa’ 1 Nefi ut 2 Nefi jo’ ajwi’ li na’leb’ maare ak xatz’iib’a. Chan ru naq eb’ li seraq’ ut k’utum xe’xtz’aqob’resi ru li rajom laj Nefi choq’ aawe? Qayehaq, chan ru naq xe’xq’unb’esi aach’ool “chixpaab’ankil li Jesukristo, ut chi kuyuk toj sa’ li roso’jik”? (raqal 4). K’oxla xtz’iib’ankil li k’a’ru xak’ul malaj xwotzb’al rik’in jun komon re laa junkab’al malaj jun laa wamiiw.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
2 Nefi 31:5–13
Ma wan ani sa’ laa junkab’al li yoo chixkawresinkil rib’ choq’ re li kub’iha’, malaj ma wan ani toje’ xkub’e xha’? Maare naru tixwotz k’a’ut naq xraj kub’eek xha’? Jo’ naxye li raatin laj Nefi, k’a’ut naq tento taakub’eeq qaha’? K’a’ru junjunq li osob’tesink naqak’ul naq nakub’e qaha’?
2 Nefi 31:17–21
Chan ru naru taatenq’a laa junkab’al chixtawb’al ru lix jaljookil ru aatin laj Nefi chirix li “laatz’ ut ka’ch’in ruhil b’e”? (2 Nefhi 31:18). Qayehaq, naru texk’anjelaq sa’ komonil re xyiib’ankil xjalam-uuch li b’e li ch’olob’anb’il xb’aan laj Nefi sa’ 2 Nefi 31:17–21, ut teetz’iib’a chiru li junjunq k’anjel tento taqab’aanu re ok sa’ li b’e ut xik chi uub’ej. Chan ru nokoxtenq’a li Kolonel chi xik chi uub’ej sa’ li b’e?
2 Nefi 31:20
Wi taawaj xtenq’ankil laa junkab’al chixtawb’al ru chi us chan ru naq nokokuyuk toj sa’ roso’jik, sa’ li perel 6 re Predicad mi Evangelio natawman jun chaab’il xch’olob’ankil; naru xtawb’al ajwi’ sa’ li esil xb’aan li Elder Dale G. Renlund “Eb’ laj Santil Paab’anel toj neke’xyal xq’e” (Jolomil ch’utub’aj-ib’ re abril 2015).
2 Nefi 32:8–9
Re xtenq’ankileb’ li komon sa’ laa junkab’al chixtawb’al ru naq naru naq “junelik tootijoq,” naru taatz’iib’a jun xtusulal chixjunil li na’ajej ut hoonal naru wi’ tootijoq (malaj taayiib’eb’ xjalam-uuch). Toja’ naq laa junkab’al naru tixb’icha jun li b’ich li nak’utuk chirix li tijok, jo’ “Ma tijok xayal?” (Eb’ li B’ich, 81), ut teeroksi junjunq reheb’ li aatin sa’ li tusulal sa’ xna’ajeb’ junjunq li aatin sa’ li b’ich. Chan ru naq nokorosob’tesi li Qaawa’ naq junelik nokotijok?
2 Nefi 33:1–2
K’a’ru naru nak’amok reheb’ li kristiaan “chixkawob’resinkil li raameb’ chiru li Loq’laj Musiq’ej”? K’a’ru naru taqab’aanu re naq li Santil Musiq’ej wan “xna’aj qik’in”?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
B’aanu li kixb’aanu li Kolonel. Us xtzolb’al chan ru naq kik’utuk li Kolonel—li k’a’ru kiroksi ut li k’a’ru kixye. A’b’an lix wankil li Jesukristo re k’utuk ut re xwaklesinkil xch’ooleb’ li ras riitz’in kichal xb’aan ani a’an ut chan ru naq kixb’eresi rib’ sa’ xyu’am. A’ yaal jo’ nakayal aaq’e chi wank jo’ li Kolonel ut chixkanab’ankil aawib’ chiru lix wankilal chixtojb’al rix li maak, taawanq wi’chik aawankil re tatk’utuq jo’ kik’utuk a’an.
Re xtz’aqob’resinkil ru chixjunil li tiikilal, xb’aan li xLiz Lemon Swindle