“16–22 marzo. Jakob 5–7: “Li Qaawa’ qochb’een nak’anjelak,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“16–22 marzo. Jakob 5–7,” Kim, Taaqehin—Choq’ reheb’ li komon ut li junkab’al: 2020
Li jaljookil ru aatin chirix lix toonal li che’ olivo, xb’aan laj Brad Teare
16–22 marzo
Jakob 5–7
Li Qaawa’ qochb’een nak’anjelak
Rilb’aleb’ ru li loq’laj hu naxb’oq li k’utb’esinb’il na’leb’. Jo’kan ut, naq nakawil ru Jakob 5–7, sik’ aab’eresinkil rik’in li Musiq’ej re tatxtenq’a laa’at ut laa junkab’al. K’a’ruheb’ li esil li naraj xk’eeb’al aawe li Qaawa’?
Xtz’iib’ankil li nakak’oxla
Wankeb’ naab’aleb’ li kristiaan li maji’ rab’ihomeb’ resil lix evangelio li Jesukristo. Wi chi jo’q’ehaq nakaweek’a naq luktajenaqat xb’aan lix nimal li k’anjel re xch’utub’ankileb’ sa’ lix Iglees li Qaawa’, sa’ li jaljookil ru aatin chirix lix toonal li che’ olivo sa’ Jakob 5 wan jun na’leb’ li naru nak’ojob’aak wi’ aach’ool: li Qaawa’ a’an laj eechal re li awimq. A’an kixk’e qe chiqajunjunqal jun ch’ina na’ajej re xtenq’ankil a’an sa’ lix k’anjel—li qajunkab’al, eb’ li qamiiw, ut li kristiaan li wankeb’ sa’ li qayu’am. Ut wan naq li xb’een kristiaan li naqatenq’a chixch’utub’ankil, a’ano ajwi’ laa’o qajunes qib’. A’b’anan maajo’q’e wanko qajunes sa’ li k’anjel a’in, xb’aan naq laj Eechal re li awimq nak’anjelak rochb’eeneb’ lix moos (chi’ilmanq Jakob 5:72). Li Dios naxnaweb’ ru ut naxraheb’ li ralal xk’ajol, ut a’an tixkawresi jun b’e re naq li junjunq taarab’i lix evangelio, jo’kaneb’ ajwi’ li ak xe’xtz’eqtaana junxil (chi’ilmanq Jakob 4:15–18). Ut naq choyb’il li k’anjel, chixjunileb’ li “yalb’ileb’ xq’e chi k’anjelak rochb’een a’an … taawanq xsahil xch’ooleb’ rik’in sa’ xk’ab’a’ li ru li rawimq” (Jakob 5:75).
Li na’leb’ re xtzolb’aleb’ li loq’laj hu aajunes
K’a’ru jun li jaljookil ru aatin?
Jun li jaljookil ru aatin, a’an jun li seraq’ li naxk’ut li musiq’ejil yaal rik’ineb’ eetalil. Sa’ li jaljookil ru aatin chirix lix toonal li che’ olivo, jo’ eetalil, jun awimq nareetali li ruchich’och’, jun lix toonal li che’ olivo awb’il nareetali Israel (eb’ li ani okenaqeb’ sa’ sumwank rik’in li Dios), ut lix toonal li che’ olivo re k’iche’ nareetaliheb’ lix tenamiteb’ laj Gentil (eb’ li ani ink’a’ okenaqeb’ sa’ sumwank rik’in li Dios).
Naq nakatzol li jaljookil ru aatin sa’ Jakob 5, sik’ xkomoneb’ chik li eetalil ut k’oxlan chirix li k’a’ru neke’reetali. Qayehaq, jo’ nakak’oxla, k’a’ru nareetali li chaab’il ru che’? K’a’ru nareetali li ink’a’ usil ru che’?
Li Jesukristo a’an laj Eechal re li awimq.
Rub’elaj naq nakat-ok chixtzolb’al li jaljookil ru aatin chirix lix toonal li che’ olivo sa’ Jakob 5, maare chaab’ilaq xtz’ilb’al rix sa’ junpaat Jakob 4:10–18 re xtzolb’al k’a’ut naq laj Jakob kimusiq’aak chixwotzb’al li jaljookil ru aatin a’an rik’in lix tenamit. Sa’ Jakob 6:3–5, naru taataw xkomoneb’ chik li esil li kiraj laj Jakob xka’jultikankil; sik’eb’ li esil a’an sa’ li jaljookil ru aatin. K’a’ru li na’leb’ nakatzol li taak’anjelaq choq’ aawe laa’at sa’ Jakob 5?
Jakob 5 a’an jun nimla ch’ol—q’axal nim wi’chik chiru chixjunileb’ chik li ch’ol sa’ lix Hu laj Mormon. Maare us xjachb’al ru chi jachal, ut li junjunq jachal a’anaq reetalil jun q’ehil sa’ li ruchich’och’:
-
Eb’ li raqal 3–14:Lix jek’inkil laj Israel rub’elaj lix k’ulunik li Kristo
-
Eb’ li raqal 15–28:Lix k’anjel li Kristo ut eb’ li apostol
-
Eb’ li raqal 29–49:Li Nimla Q’etok Paab’ank
-
Eb’ li raqal 50–76:Lix ch’utub’ankileb’ laj Israel sa’ roso’jikeb’ li kutan
-
Eb’ li raqal 76–77:Li Jun Mil Chihab’ ut lix raqik li ruchich’och’
Re xtawb’al xkomoneb’ chik li na’leb’ chirix li jalajookil ru aatin, sik’ li jalam-uuch li nachal rik’in li tusleb’ aatin a’in.
Chiqajunil naru took’anjelaq chiru li Dios rik’in xtenq’ankil chixch’utub’ankileb’ li ralal xk’ajol.
Li Dios nikinxb’oq chixtenq’ankil a’an chixch’utub’ankileb’ li ralal xk’ajol.
Li “xkomoneb’ li moos” (Jakob 5:70) li ke’b’oqe’ sa’ li rawimq li Qaawa’, a’aneb’ li kristiaan jo’ laa’at—jo’ komon sa’ li Iglees, teneb’anb’ilo chixtenq’ankil li Dios sa’ xch’utub’ankileb’ li ralal xk’ajol. K’a’ruheb’ li na’leb’ nakataw sa’ Jakob 5, ut mas wi’chik sa’eb’ li raqal 61–62 ut 70–75, chirix k’anjelak sa’ li rawimq li Qaawa’? Chan ru naq xaweek’a naq a’an xb’oqok aawe chi k’anjelak sa’ li rawimq? K’a’ru aanumsihom naq yookat chi tz’aqonk sa’ li k’anjel a’an?
Chi’ilmanq ajwi’ “Obra misional,” Temas del Evangelio, topics.ChurchofJesusChrist.org; “La viña del Antiguo Testamento” (video, ChurchofJesusChrist.org).
Naru naq xaxqooqin chi kaw naq li jun ch’ol chik neke’reetz’u lin paab’aal.
Li ke’xk’ul laj Nefita rik’in laj Xerem nak’ulman chi kok’ aj xsa’ sa’ li kutan a’in: wankeb’ li ani tzolb’ileb’ ut sa neke’aatinak, li neke’xsik’ xsachb’al laa paab’aal. A’b’an “ink’a’ kiru inchiq’b’al” chan laj Jakob (Jakob 7:5). K’a’ru kixb’aanu laj Jakob naq kiyale’ rix lix paab’aal? K’a’ru nakatzol rik’in lix sumehom? K’a’ru naru taab’aanu anajwan re xkawresinkil aawib’ choq’ re xhoonalil naq yalb’ilaq rix laa paab’aal?
Chi’ilmanq ajwi’ “Respondiendo a preguntas acerca del Evangelio,” Temas del Evangelio, topics.ChurchofJesusChrist.org; Jeffrey R. Holland, “Li tojok tz’aq—ut li osob’tesink—re wank choq’ tzolom,” Jolomil ch’utub’aj-ib’ re abril 2014.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Jakob 5
Wankeb’ li junkab’al li xe’tenq’aak rik’in xyiib’ankileb’ xjalam-uuch li eetalil sa’ li jaljookil ru aatin chirix lix toonal li che’ olivo naq xe’ril ru. Maare laa junkab’al taawulaq chiru xb’aanunkil chi jo’kan, malaj ut wan k’a’ruhaq chik li taatenq’anq reheb’ li komon sa’ laa junkab’al chixtawb’aleb’ ru li eetalil sa’ li jaljookil ru aatin. Maare naru taak’e xnub’aal jun na’ajej chiru jun li meex malaj li ch’och’ li nareetali li awimq (malaj li ruchich’och’) ut re reetalinkil lix toonal li che’ olivo li awb’il (malaj lix junkab’al laj Israel) naru taawoksi k’a’ruhaq, jo’ jun jorb’a-k’a’uxlej, li naru taajache’q sa’ kok’ jachal (re reetalinkil lix jek’inkil laj Israel) toja’ naq taach’utub’aaq wi’chik (re reetalinkil lix ch’utub’ankil laj Israel). K’a’ru naxk’ut li jaljookil ru aatin a’in chiqu chirix li Qaawa’? chirixeb’ lix moos?
Jakob 5:70–77
Naq nakattzolok chirix li jun sut chik naq nak’anjelak li Qaawa’ sa’ li rawimq, k’a’ru li naxwaklesi aach’ool laa’at ut laa junkab’al chi k’anjelak chiru li Qaawa’ “rik’in xnimal eemetz’ew”? (Jakob 5:71). Naru taab’oqeb’ li komon sa’ laa junkab’al chixjuntaq’eetankil li raqal 75 rik’in lix yu’ameb’, rik’in xk’eeb’al lix k’ab’a’eb’ sa’ li raqal a’in—qayehaq, “Osob’tesinb’ilat laa’at [k’ab’a’ej].” Maaru naru te’xwotz jun sut naq xe’reek’a xsahileb’ xch’ool naq xe’k’anjelak chiru laj Eechal re li awimq, qayehaq, naq xe’xwotz li evangelio, naq xe’k’anjelak sa’ li santil ochoch, malaj naq xe’xkawob’resiheb’ li komon sa’ li Iglees. (Chi’ilmanq ajwi’ M. Russell Ballard, “Confíen en el Señor,” Liahona, noviembre 2013, 43–45.)
Jakob 6:4–7
Chan ru naq li Qaawa’ xye’ li ruq’ aj uxtaan qe laa’o? K’a’ru naraj naxye li aatin “jilok” sa’eb’ li raqal a’in? Chan ru naq li Qaawa’ najilok qik’in? Chan ru naq tooruuq chi jilok rik’in a’an?
Jakob 7:1–12
K’a’ru naqatzol sa’eb’ li raqal a’in chirix chan ru naq li kristiaan neke’xyal xjalb’ehinkil jalaneb’ chik li kristiaan? Chan ru naru taqataaqe laj Jakob ut toowanq chi xaqxooko sa’ li qapaab’aal chirix li Kristo?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Kanab’ sa’ k’a’uxlej jun li raqal reheb’ li loq’laj hu. Sik’ ru jun raqal sa’eb’ li loq’laj hu li mas nawulak chiru laa junkab’al, ut sa’ komonil kanab’omaq sa’ lee k’a’uxl. Li Elder Richard G. Scott kixk’ut, “Naq naqatzol jun raqal sa’eb’ li loq’laj hu, na’ok a’an choq’ jun qochb’een li ink’a’ nokoxkanab’ chirix xnumik li kutan” (El poder de las escrituras,” Liahona, noviembre 2011, 6).