jun li ixq nawiq’la sa’ roq li Jesus

Kuyb’il xmaak, xb’aan laj Greg K. Olsen

9–15 marzo

Jakob 1–4

K’amomaq wi’chik eerib’ sa’ usilal rik’in li Dios xb’aan lix tojb’al rix li maak xb’aan li Kristo

Naq nakatz’iib’aheb’ li na’leb’ nakak’ul chi musiq’anb’il, nakak’ut naq wanq aach’ool chi tzole’k xb’aan li Santil Musiq’ej. Naq nakawil ru Jakob 1–4, k’oxla xtz’iib’ankil li na’leb’ nakak’oxla.

Xtz’iib’ankil li nakak’oxla

Eb’ laj Nefita ke’roxloq’i laj Nefi jo’ “nimla aj kolol rixeb’ ” (Jakob 1:10). A’an kixkoleb’ rix chiruheb’ li xik’ neke’ilok reheb’, ut kixtijeb’ chirix li musiq’ejil rahilal. Anajwan kamenaq chik, ut li teneb’ahom re xjolominkileb’ laj Nefita sa’ musiq’ej kikana sa’ xb’een laj Jakob, li kik’ojob’aak choq’ aj tij ut aj tzolonel re li tenamit xb’aan laj Nefi (chi’ilmanq Jakob 1:18). Chi musiq’anb’il, laj Jakob kixk’e reetal naq lix tenamit ke’raj ru tzole’k chi “k’a’jo’ xkawilal li aatin,” xb’aan naq yookeb’ chi ok chi “k’anjelak sa’ li maak” (Jakob 2:7, 5). Eb’ li maak a’an chanchaneb’ ajwi’ li maak neke’ch’a’ajko’ wi’ li kristiaan sa’ li kutan a’in: xrahinkil ru li tumin ut li maakob’k rik’in tz’ejwalej. Ut us ta naq laj Jakob kireek’a naq tento tixjit li maa’usilal a’an, li raam kiraho’ ajwi’ xb’aaneb’ li ani rahob’tesinb’ileb’ xb’aan li maa’usilal a’an, li “k’ob’b’ileb’ chi cham xtoch’olaleb’ ” sa’ xch’ooleb’ (Jakob 2:35). Laj Jakob kixch’olob’ xyaalal naq li k’iraak choq’ re li wiib’ chi ch’uut—laj maak jo’ ajwi’ li toch’b’il sa’ musiq’ej—nachal rik’in li Kolonel Jesukristo. Li raatin laj Jakob, jo’ li raatin laj Nefi chi rub’elaj, a’an li b’oqb’al a’in: “K’amomaq wi’chik eerib’ sa’ usilal rik’in [li Dios], xb’aan lix tojb’al rix li maak xb’aan li Kristo” (Jakob 4:11).

reetalil li tzolok aajunes

Li na’leb’ re xtzolb’aleb’ li loq’laj hu aajunes

Jakob 1:6–8, 15–19; 2:1–11

Li Qaawa’ naraj naq tinnimob’resi ru inb’oqb’al.

Choq’ re laj Jakob, xk’utb’al li raatin li Dios maawa’ ajwi’ jun k’anjel k’eeb’il re xb’aan li ras—a’an b’an “xtaqlankil xb’aan li Qaawa’,” jo’kan naq kik’anjelak chi anchal xch’ool re “xnimob’resinkil ru li ropiis” (Jakob 1:17, 19). Li Awa’b’ej Gordon B. Hinckley kixk’ut naq naqanimob’resi li qab’oqb’al “naq nokok’anjelak chi k’eeb’il qach’ool, naq nokok’utuk rik’in paab’aal ut xnawom qach’ool, naq naqawaklesi ut naqakawob’resi ut naqanimob’resi rajomeb’ chi paab’ank li ani neke’qatoch’ xch’ool” (“Magnifiquemos nuestro llamamiento,” Liahona, julio 1989, 58). K’oxla laa “taqlankil xb’aan li Qaawa’ ” naq nakawil ru Jakob 1:6–8, 15–19 ut 2:1–11. K’a’ut naq laj Jakob kik’anjelak chi jwal tiik xch’ool? K’a’ru namusiq’an aawe chixb’aanunkil lix b’aanuhom laj Jakob re xnimob’resinkil laa b’oqb’al sa’ Iglees ut laa teneb’ankil sa’ ochoch?

Chi’ilmanq ajwi’ “Elévense a la altura de su llamamiento” (video, ChurchofJesusChrist.org).

Jakob 2:23–3:12

Li Dios nasaho’ xch’ool rik’in li saq ru ch’oolejil.

Wan k’a’ru nachal xb’aan li maak sa’ xb’een li junjunq jo’ ajwi’ sa’ xb’een li tenamit. Sa’ aatinak chirix li maakob’k rik’in tz’ejwalej, laj Jakob ki’aatinak chirix li nachal sa’ xb’een li junjunq jo’ ajwi’ li nachal sa’ xb’een li tenamit. Naq nakawil ru Jakob 2:31–35 ut 3:10, sik’ chan ru naq li yib’ ru aj na’leb’ kixrahob’tesiheb’ laj Nefita jo’ tenamit ut jo’ ajwi’ sa’ junjunqal. Chan ru naq li ke’xk’ul a’an chanchan ajwi’ li nak’ulman xb’aan li yib’ ru aj na’leb’ nakawil sa’ li ruchich’och’ anajwan? K’a’ru nakataw sa’ li raatin laj Jakob li naru tatxtenq’a chixk’utb’al chiru anihaq li raab’il aab’aan lix aajelil ru li saq ru ch’oolejil? Chan ru naq osob’tesinb’ilat xb’aan lix yalb’al aaqe’ chi wank chi saq ru aach’ool?

K’e reetal naq laj Jakob ki’aatinak ajwi’ chirix li sumlaak chi numenaq jun ixaqilb’ej. K’a’ru nakataw sa’ Jakob 2:23–30 li nakatxtenq’a chixtawb’al ru k’a’ut naq li Qaawa’, chi jo’q’ehaq, kixtaqlaheb’ lix tenamit chixb’aanunkil li sumlaak rik’in wiib’ oxib’ li ixq? K’a’ru nareek’a li Dios chirixeb’ li neke’b’aanunk re chi maak’a’ xliceens?

Jakob 4

Naru tink’am wi’chik wib’ sa’ usilal rik’in li Dios xb’aan lix tojb’al rix li maak xb’aan li Jesukristo.

Laj Jakob kirelaji chiru lix tenamit naq “te’xk’am wi’chik rib’ sa’ usilal rik’in [li Dios], xb’aan lix tojb’al rix li maak xb’aan li Kristo” (Jakob 4:11). K’a’ru nakak’oxla naq naraj naxye a’an? Maare us xsik’b’al li k’a’ru naraj naxye k’amok-ib’ wi’chik sa’ usilal. Maare naru taataweb’ li aatin malaj ch’ol aatin sa’ li ch’ol a’in li neke’xk’ut chawu chan ru naq naru tatchalq rik’in li Kristo re naq naru taak’am wi’chik aawib’ sa’ usilal rik’in li Dios. Jo’ eetalil, laj Jakob kixk’ut naq lix chaq’rab’ laj Moises kik’ehe’ re li tenamit re xjayalinkileb’ rik’in li Jesukristo (chi’ilmanq Jakob 4:5). K’a’ru naxk’e li Dios re aajayalinkil rik’in li Kristo? Chan ru naq yookat chiroksinkil li k’a’aq re ru a’an re nach’ok rik’in li Dios?

Chi’ilmanq ajwi’ 2 Nefi 10:24.

Jakob 4:8–18

Naru tinnumtaaq sa’ xb’een li musiq’ejil mutz’il rik’in xjayalinkil wib’ rik’in li Kolonel.

Naq laj Jakob kixsik’ xb’eresinkileb’ lix tenamit chi tz’aqal rik’in li Qaawa’, a’an kixtijeb’ naq miwan xmusiq’ejil mutz’il ut naq ink’a’ xik’ te’iloq re “li aatin li saqen ru” re li evangelio (chi’ilmanq Jakob 4:13–14). Li Elder Quentin L. Cook ki’aatinak ajwi’ chirix li ch’a’ajkilal a’an sa’ li qakutankil: “Wankeb’ sa’ qayanq li neke’ajok re “xq’axb’al li aajel raj ru xsik’b’al” sa’ xna’aj xch’olaninkil jun xnawom ch’oolej chirix li saqen ruhil na’leb’ re li evangelio. Naqab’aanu a’an naq naqak’e xna’leb’eb’ li winq sa’ xna’aj li yaalil na’leb’ re li evangelio, naq naqataaqe chi kaw jun ajwi’ li na’leb’ re li evangelio, … malaj naq naqaterq’usi jun yoob’anb’il chaq’rab’ sa’ xb’een li tzol’leb’ re li evangelio. Xtz’eqtaanankil li na’leb’ a’an tooxtenq’a re naq ink’a’ toomutz’irq chi moko tootichk’oq sa’ musiq’ej jo’ ch’olob’anb’il xb’aan laj Jakob” (“Traspasar lo señalado,” Liahona, marzo 2003, 22).

Jo’ naxye sa’ Jakob 4:8–18, k’a’ru naru taqab’aanu re xjayalinkil qib’ rik’in li Kolonel ut xkolb’al qib’ chiru li mutz’il sa’ musiq’ej?

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.

Jakob 1:6–8, 15–19; 2:1–11; 4:18

K’a’ruheb’ li aatin ut ch’ol aatin sa’eb’ li raqal a’an li neke’xk’utb’esi lix rahom li Jakob choq’ reheb’ li jolominb’ileb’ xb’aan? K’a’ru neke’xb’aanu laj jolominel re li Iglees re qatenq’ankil chireek’ankil “li ratawomeb’ ut lix k’a’uxleb’ chirix lix chaab’ilal li qaam”? (Jakob 2:3). Maare eb’ li komon sa’ laa junkab’al te’ruuq chixwotzb’al chan ru naq naru taqaxaqab’ xwankileb’ laj jolominel re li Iglees. Naru teek’uub’ jo’ junkab’al k’a’ruhaq teeb’aanu choq’ reheb’ laj jolominel re li Iglees sa’ li na’ajej wankex wi’, jo’ xtz’iib’ankil kok’ esil re xb’antioxinkil chiruheb’ lix k’anjeleb’ malaj xpatz’b’aleb’ ut lix junkab’aleb’ sa’ lee tij.

Jakob 2:8

Chan ru naq li raatin li Dios naxk’irtesi “li aamej toch’enaq”?

Jakob 2:12–21

K’a’ru neke’xk’ut li raqal a’an chirix chan ru naq taqil li b’ihomal sa’ ruchich’och’? K’a’ru yooko chixb’aanunkil re xye’b’al li quq’ reheb’ li ani neke’raj ru tenq’aak qab’aan?

Jacob 3:1–2

K’a’ru naraj naxye li wank chi “saq ru” qach’ool ut naq too’iloq “wan wi’ li Dios chi xaqxo qak’a’uxl”?

Jakob 4:4–11

Jun na’leb’ li naru natenq’ank re laa junkab’al chixtawb’al ru li naraj naxye li wank chi “ink’a’ chik na’eek’an” junaq sa’ xpaab’aal, a’an naq taataw jun nimla xtoonal che’ li nach’ wan, ut taapatz’ reheb’ li komon sa’ laa junkab’al naq te’xchiq’eb’ li ruq’ li che’. Chirix a’an, kanab’eb’ chixyalb’al xchiq’b’al lix toon li che’. K’a’ut naq ch’a’aj wi’chik xchiq’b’al lix toonal? K’a’ru naru taqatzol sa’ lix k’utum laj Jakob chirix k’a’ru naru taqab’aanu re taawanq qapaab’aal chi “ink’a’ chik na’eek’an”?

jun nimla che’ sa’ jun awimq

Jo’ chanchan lix toonal jun li che’, li qapaab’aal chirix li Kristo naru naq “ink’a’ chik na’eek’an.”

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Xchaab’ilob’resinkil li tzolok aajunes

Ab’i li Musiq’ej. Naq nakattzolok, k’e reetal li k’a’ru nakak’oxla ut nakaweek’a (chi’ilmanq Tzol’leb’ ut Sumwank 8:2–3), us ta maare jalan wi’ rik’in li yookat chirilb’al. Naru naq li na’leb’ nakak’ul chi jo’kan a’an ajwi’ li taaraj li Dios naq taanaw ut taab’aanu.

laj Jakob natz’iib’ak chiru li perel ch’iich’ oor

Tintaqla li raatineb’ rik’ineb’ (laj Jakob aj k’utunel), xb’aan li xElspeth Caitlin Young