“24 febrero–1 marzo. 2 Nefi 26–30: “Jun li sachb’a-ch’oolejil k’anjel ut jun li eetalil,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“24 febrero–1 marzo. 2 Nefi 26–30,” Kim, Taaqehin—Choq’ reheb’ li komon ut li junkab’al: 2020
A’an tixk’am aab’e chi uq’ej, xb’aan li xSandra Rast
24 febrero–1 marzo
2 Nefi 26–30
“Jun li sachb’a-ch’oolejil k’anjel ut jun li eetalil”
Li Qaawa’ kixye, “Nintaqlaheb’ chixjunil … naq te’xtz’iib’a li aatin li ninye reheb’ ” (2 Nefi 29:11). Rik’in li Musiq’ej, li Qaawa’ taa’aatinaq aawik’in naq yookat chixtzolb’al li raatin. Tz’iib’a li nakak’ul.
Xtz’iib’ankil li nakak’oxla
“Nekexwaatina jo’ profeet chirix li roso’jikeb’ li kutan,” kixtz’iib’a laj Nefi (2 Nefi 26:14). Sa’ jalan chik aatin, a’an kitz’iib’ak chirix li qakutankil laa’o. Ut tento naq yooq li qak’a’uxl chirix li kiril: li kristiaan li neke’xtz’eqtaana lix wankil ut lix sachb’a-ch’oolej li Dios, li kaqalink ut li wech’ink chi numtajenaq, laj tza li yoo chixb’ak’b’aleb’ li kristiaan rik’in kawil k’aam. A’b’an rochb’eeneb’ li “k’anjel re q’ojyin” sa’ roso’jikeb’ li kutan a’in (2 Nefi 26:10, 22) li b’eresinb’il xb’aan laj tza, laj Nefi ki’aatinak ajwi’ chirix “jun sachb’a-ch’oolejil k’anjel ut jun li eetalil” li b’eresinb’il xb’aan li Qaawa’ (2 Nefi 27:26). Ut tz’aqal sa’ xyi li k’anjel a’an taawanq jun li hu—jun li hu li na’aatinak chaq sa’ li poqs, li naxk’ut chi kutankil lix tik’ti’ laj Satanas, ut li naxch’utub’eb’ li tiikeb’ xch’ool jo’ jun eetalil. Li hu a’in, a’an lix Hu laj Mormon, lix sachb’a-ch’oolejil k’anjel a’an lix Iglees li Qaawa’ sa’ roso’jikeb’ li kutan, ut li sachb’a-ch’oolej a’an naq li Qaawa’ nokoxb’oq chiqajunil, maak’a’ naxye lix q’unal li qametz’ew, re tootz’aqonq.
Li na’leb’ re xtzolb’aleb’ li loq’laj hu aajunes
Li Jesukristo naxb’oqeb’ chixjunil chi chalk rik’in.
Li Profeet aj Jose Smith kixk’ut naq li qaChoxahil Yuwa’ “k’a’jo’ wi’chik naq na’uxtaanank ut na’osob’tesink, chiru li kawresinb’ilo chixpaab’ankil malaj chixk’ulb’al” (The Joseph Smith Papers, “History, 1838–1856, volume D-1,” p. 4 [addenda], josephsmithpapers.org). Il ru li k’a’ru kiril laj Nefi sa’ 2 Nefi 26:20–22 ut li k’a’ru kixk’ut chirix li Kolonel sa’eb’ li raqal 23–33, ut juntaq’eeta a’an rik’in li raatin laj Jose Smith. K’a’ru nakatzol chirix lix nimal li ruxtaan li Qaawa’? K’a’ru naru taab’aanu jo’ komon sa’ lix Iglees li Jesukristo re tatwanq mas wi’chik jo’ li Kristo sa’ li nakab’aanu rik’ineb’ li ralal xk’ajol li Dios?
Chi’ilmanq ajwi’ 3 Nefi 18:30–32.
K’a’ru li hu li yeeb’il resil sa’eb’ li ch’ol a’an?
Lix profeetil aatin laj Nefi sa’ 2 Nefi 26–27, li naxk’ul naab’al lix na’leb’ sa’ jun lix profeetil aatin laj Isaias (chi’ilmanq Isaias 29), naxye chi rub’elaj resil lix k’utunik lix Hu laj Mormon. Li profeetil aatin a’an naxch’olob’eb’ li na’leb’ a’in:
-
Li raatin li riyajil laj Lehi (eb’ li ralal xk’ajol) te’aatinaq chaq “taq’a sa’ li poqs” ut “chanchan junaq li wan xmuhel li kamenaq rik’in” ut “taatz’ape’q chaq sa’ jun li hu” (2 Nefi 26:14–17; chi’ilmanq ajwi’ Isaias 29:4).
-
Jun raqal re li hu li k’eeb’il re jun tzolb’il winq li naxye, “Ink’a’ naru chirilb’al xsa’ ” (2 Nefi 27:15–20; Jose Smith—Resilal 1:64–65; chi’ilmanq ajwi’ Isaias 29:11).
Jo’ laj Isaias, ke’wan chik li profeet sa’ li Santil Hu li ke’aatinak chirix lix Hu laj Mormon, us ta ink’a’ ke’xye lix k’ab’a’. Jo’ eetalil, Esekiel 37:15–20 na’aatinak chirix “lix che’ laj Jose,” li maare yoo chi aatinak chirix li esil reheb’ laj Nefita, a’aneb’ li riyajil laj Jose. Li esil a’an taa’junajiiq rik’in “lix che’ laj Juda,” a’an li Santil Hu.
Xkomoneb’ chik li na’leb’ naru neke’tawman sa’ li K’utul Raqal reheb’ li Loq’laj Hu , “Hu laj Mormon (Lix)”).
Laj Satanas naxsik’ b’alaq’ink.
Naab’al reheb’ lix tik’ti’ ut lix ra’al laj Satanas k’utb’esinb’ileb’ sa’ lix ch’olob’ahom laj Nefi chirixeb’ li roso’jikeb’ li kutan sa’ 2 Nefi 28. Il ma naru taataweb’ (jo’ eetalil, che’ilmanq li raqal 6, 8, 21–23, 29). K’a’ut naq tento taanaw chirixeb’ lix tik’ti’ laj Satanas? K’a’ru taab’aanu naq laj tza naxsik’ aab’alaq’inkil?
Li Dios ink’a’ naxkanab’ xk’eeb’al li k’utb’esinb’il na’leb’ re xb’eresinkileb’ li ralal xk’ajol.
Jo’ aj Santil Paab’anel sa’ Roso’jikeb’ li Kutan, osob’tesinb’ilo rik’in xnaab’alil li raatin li Dios, jo’kan naq lix tijom laj Nefi naru naqoksi sa’ li qayu’am: us naq maajo’q’e taqeek’a naq “ak tz’aqal qe!” Naq nakawileb’ ru li tijom sa’ 2 Nefi 28 ut 29, k’oxlaheb’ li patz’om jo’ a’in:
-
Chan ru naraj li Qaawa’ naq tinweek’a chirix li raatin ut chan ru naraj naq tinsume?
-
K’a’ut naq wan naq “neke’josq’o’ ” li kristiaan rik’in xk’ulb’al xkomon chik li yaal rik’in li Dios? (2 Nefi 28:28). Ma wan naq naweek’a chi jo’kan? Wi jo’kan, chan ru naq naru taawanq chik inch’ool re xk’ulb’al li yaal?
-
K’a’ru naraj naxye xk’ulb’al li raatin li Dios? Chan ru naru tink’ut chiru a’an naq nawaj xk’ulb’al xkomon chik li raatin?
Chi’ilman ajwi’ Alma 12:10–11; 3 Nefi 26:6–10.
Li Dios kixkawresi lix Hu laj Mormon choq’ re li qakutankil.
Laj Nefi kixnaw chi k’utb’esinb’il, us ta maji’ choyb’il lix tz’iib’ankil chixjunil lix Hu laj Mormon, naq junaq kutan a’an “nimaq xloq’al choq’ reheb’ li ralal xk’ajoleb’ li winq” (2 Nefi 28:2). K’a’ut naq nim xloq’al lix Hu laj Mormon choq’ aawe laa’at? K’oxla li patz’om a’in naq nakawil ru 2 Nefi 29–30. K’a’ru junjunq reheb’ li “sachb’a-ch’oolejil” k’anjel li yoo chixtz’aqob’resinkil ru li Dios sa’ li ruchich’och’ ut sa’ laa yu’am rik’in lix Hu laj Mormon?
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
2 Nefi 26:12–13
Laj Nefi kixk’ut naq li Jesukristo naxk’utb’esi rib’ rik’in li Santil Musiq’ej. K’a’ruheb’ li numsihom naru te’xwotz chirib’ileb’ rib’ li komon sa’ laa junkab’al naq xe’kawob’resiik lix nawomeb’ xch’ool chirix li Jesukristo xb’aan li Santil Musiq’ej?
2 Nefi 26:22; 28:19–22
Maare laa junkab’al taawulaq chiruheb’ jun tzolok rik’in k’anjeleb’aal li naxk’utb’esi li k’a’ru naxk’ut 2 Nefi 26:22 chirix laj tza. Naq nakattzolok chirixeb’ lix k’anjel laj Satanas sa’ 2 Nefi 28:19–22, naru taab’at li noq’ chirix xkux li ruq’ anihaq re reetalinkil “jun q’unil k’aam.” Chan ru naq jun q’unil k’aam a’an chanchan li raalehom laj Satanas? Chan ru naq taa’ok choq’ jun kawil k’aam? Chan ru naru taqak’e reetaleb’ lix tik’ti’ laj Satanas?
Laj Nefi kixjuntaq’eeta li raalehom laj tza rik’in “jun q’unil k’aam.”
2 Nefi 27:20–21
K’a’ru naraj naxye li raatin li Qaawa’ naq naxye, “Laa’in ninru chixb’aanunkil tz’aqal lin k’anjel”? Chan ru naq li yaalil na’leb’ a’an naxjal chan ru naq nokok’anjelak sa’ lix Iglees?
2 Nefi 28:30–31
Ma naru te’xk’oxla laa junkab’al k’a’ruhaq, jo’ li k’utb’esinb’il na’leb’ k’eeb’il xb’aan li Dios, li us xk’ulb’al chi timil timil? K’a’ut naq li Dios naxk’utb’esi li yaal chiqu “chi junjunqil li raqal, chi junjunqil li na’leb’, b’ab’ay arin ut b’ab’ay aran” ut ink’a’ chixjunil chi jun waakaj?
2 Nefi 29:7–9
K’a’ru naraj xk’utb’al li Qaawa’ rik’in lix Hu laj Mormon?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Wotz’ li na’leb’ nakak’ul. Li aatinak sa’ komonil chirix li nakatzol naru tixkawob’resi aanawom. Chirix rilb’al ru 2 Nefi 29:6–14, maare tatmusiq’aaq chixch’olob’ankil chiru jun aawamiiw k’a’ut naq naqaj ru lix Hu laj Mormon.
Eb’ lix tz’iib’ahom laj Nefi ke’xk’ut chi rub’elaj “jun sachb’a-ch’oolejil k’anjel ut jun li eetalil” li taak’ulmanq sa’ roso’jikeb’ li kutan (2 Nefi 27:26).