laj Isaias yoo chi tz’iib’ak chiru b’otb’ookil hu

17–23 febrero

2 Nefi 11–25

“Nasaho’ sa’ qach’ool rik’in li Kristo”

Laj Nefi kixk’ut naq li raatin laj Isaias “saqen ru chiruheb’ chixjunil li xe’nujak rik’in li musiq’ej re profeetil aatin” (2 Nefi 25:4). Naq nakawil ru, sik’ li musiq’ej re profeetil aatin rik’in xkawresinkil aawib’ sa’ musiq’ej, rab’inkil xyaab’ xkux li Musiq’ej, ut xtz’iib’ankil li nakak’oxla.

Xtz’iib’ankil li nakak’oxla

Ch’a’aj li tz’iib’ak chiru perel ch’iich’, ut ka’ch’in ajwi’ li na’ajej re tz’iib’ak chiru lix perel ch’iich’ laj Nefi li kok’ ru. Jo’kan ut, k’a’ut naq laj Nefi kixyal xq’e chi kaw re xtz’iib’ankil naab’al reheb’ lix tz’iib’ahom laj Isaias sa’ li esil yoo chixtz’iib’ankil? Kixb’aanu “re naq ani … taa’iloq re li aatin a’in, te’xwaklesi li raam ut te’saho’q sa’ xch’ool” (2 Nefi 11:8). Jo’kan naq li b’oqb’al re rilb’al ru li raatin laj Isaias, a’an ajwi’ jun b’oqb’al re saho’k sa’ ch’oolej. Naru taasaho’q aach’ool, jo’ kisaho’ xch’ool laj Nefi, rik’in lix profeetil aatin laj Isaias chirix lix ch’utub’ankil li tenamit Israel, lix k’ulunik li Mesias, ut li tuqtuukilal chiru li Jun Mil Chihab’ li yeechi’inb’il reheb’ li tiikeb’ xch’ool. Naru taasaho’q aach’ool naq us ta wanko sa’ jun kutan re “li ch’a’ajkilal, ut li q’ojyin,” aawilom “jun nimla saqen” (2 Nefi 18:22; 19:2). Naru taasaho’q aach’ool naq naru taawisi chaq “li ha’ sa’eb’ li yo’leb’aal ha’ re li kolb’a-ib’ ” (2 Nefi 22:3). Sa’ jalan chik aatin, naru “nasaho’ sa’ aach’ool rik’in li Kristo” (2 Nefi 25:26).

reetalil li tzolok aajunes

Li na’leb’ re xtzolb’aleb’ li loq’laj hu aajunes

2 Nefi 11–25

Chan ru naru tintaweb’ ru chi mas wi’chik lix k’utum laj Isaias?

Laj Nefi kixk’e reetal naq choq’ reheb’ junjunq, “moko saqen ta ru li raatin laj Isaias” (2 Nefi 25:4). Naru naq yaal a’an choq’ reheb’ li ani ink’a’ mas neke’xnaw chan ru ut b’ar ke’wan li najteril aj Judio jo’ kixnaw laj Nefi (chi’ilmanq 2 Nefi 25:6). A’b’an laj Nefi kixk’e ajwi’ qana’leb’ re qatenq’ankil chixtawb’al xyaalalil lix tz’iib’ahom laj Isaias.

“Juntaq’eeta li raatin” aawik’in laa’at (2 Nefi 11:2).Naab’al reheb’ lix k’utum laj Isaias wan wiib’ oxib’ lix yaalalil ut lix k’anjelankil. Qayehaq, lix tz’iib’ahom chirix lix jek’inkil ut lix ch’utub’ankil li tenamit Israel naru tatxmusiq’a chi k’oxlak chirix aawajom chi “ch’utub’aak” wi’chik rik’in li Kolonel.

Sik’ naq tatnujaq “rik’in li musiq’ej re profeetil aatin” (2 Nefi 25:4).Re xtawb’al ru lix profeetil aatin laj Isaias, us naq taasik’ aana’leb’ rik’in li Musiq’ej. Tijon re xk’ulb’al aab’eresinkil sa’ musiq’ej. Maare ink’a’ taataw ru chixjunil chi jun waakaj, a’b’an li Musiq’ej naru tatxtenq’a chixtzolb’al li k’a’ru aajel ru choq’ re laa yu’am anajwan.

Maare chaab’ilaq ajwi’ xsik’b’al aana’leb’ rik’ineb’ li tenq’ re tzolok neke’tawman sa’eb’ li loq’laj hu, jo’ li kok’ tz’iib’ahom sa’eb’ li perel, lix tiklajikeb’ li ch’ol, li K’utul Raqal reheb’ li Loq’laj Hu, ut xkomoneb’ chik.

2 Nefi 11:2–8; 25:19–29

“Li tiikil b’e, a’an xpaab’ankil li Kristo.”

Laj Nefi kixtikib’ ut kixraq xtz’iib’ankil li raatin laj Isaias rik’in lix nawom xch’ool chirix li Jesukristo (chi’ilmanq 2 Nefi 11:2–8; 25:19–29). K’a’ru nawulak chawu chirix lix ch’olob’ahom? Naq nakattzolok chiru li xamaan a’in, k’oxla li k’a’ru kiraj laj Nefi, “xq’unb’esinkileb’ xch’ool li ralal xk’ajol … naq te’xpaab’ li Kristo, ut te’xk’am wi’chik rib’ sa’ usilal rik’in li Dios,” (2 Nefi 25:23), ut k’e reetaleb’ li raqal li neke’xq’unb’esi aach’ool laa’at chixpaab’ankil ut chixtaaqenkil li Jesukristo.

Naru tattenq’aaq wi najultiko’ aawe naq naab’al reheb’ lix profeetil aatin laj Isaias chirix li Kolonel neke’roksi li eetalil. Qayehaq, maare taawil li Kolonel sa’eb’ li eetalil jo’ laj eechal re jun li awimq (chi’ilmanq 2 Nefi 15:1–7), jo’ jun li pek (chi’ilmanq 2 Nefi 18:14), malaj jun li saqen (chi’ilmanq 2 Nefi 19:2). K’a’ruheb’ chik li eetalil chirix li Jesukristo nakataw sa’eb’ li ch’ol a’an? K’a’ru neke’xk’ut li eetalil a’an chawu chirix li Jesukristo?

2 Nefi 12–13

Te’tuulanob’resiiq laj q’etq’et ut eb’ laj rahol re li ruchich’och’.

Laj Nefi kiril chi rub’elaj naq li q’etq’etil tixk’e chi sache’k lix tenamit (chi’ilmanq 1 Nefi 12:19). Jo’kan ut naq ink’a’ nasach qach’ool naq laj Nefi kixwotz rik’in lix tenamit lix tijom laj Isaias chirix li q’etq’etil. Sa’eb’ li ch’ol 12 ut 13, sik’eb’ li aatin kiroksi laj Isaias re xch’olob’ankil li q’etq’etil, jo’ taqenaqil ilob’aal ut laj q’etq’et. Chirix a’an, naru taayal xyeeb’aleb’ li tijom a’in rik’in tz’aqal aawaatin laa’at, jo’ chanchan naq yookat chixtz’iib’ankil jun esil choq’ aawe re aatijb’al chirix li q’etq’etil.

Chi’ilmanq ajwi’ “Capítulo 18: Cuidaos del orgullo” (Enseñanzas de los Presidentes de la Iglesia: Ezra Taft Benson [2014], 251–263).

2 Nefi 12:2–5; 21:9–12; 22; 24:1–3

Sa’ li Jun Mil Chihab’, lix tenamit li Dios te’xyal xsahil li tuqtuukilal.

Maare us aawilb’al aawib’ sa’ xna’aj laj Nefi ut lix junkab’al. K’oxla naq xat-eelelik chaq Jerusalen ka’ch’in chik ma nasache’ (chi’ilmanq 2 Nefi 25:10), ut anajwan okenaqat sa’ lix jek’inkileb’ laj Israel. Chan raj ru taaweek’a rilb’al ru lix k’utum laj Isaias chirix lix ch’utub’ankil laj Israel ut li tuqtuukilal re li Jun Mil Chihab’ li te’k’ulmanq sa’ junaq kutan chalel? Jo’ aj Santil Paab’anel sa’ Roso’jikeb’ li Kutan, b’oqb’ilo chi tenq’ank sa’ xch’utub’ankil lix tenamit li Dios sa’ roso’jikeb’ li kutan a’in re kawresink choq’ re lix awa’b’ejil li Qaawa’ chiru li Jun Mil Chihab’. Naq nakawileb’ ru li raqal a’in, k’oxla chan ru yookat chi tenq’ank sa’ xtz’aqob’resinkileb’ ru li profeetil aatin ch’olob’anb’il aran. K’a’ru musiq’anb’ilat chixb’aanunkil re tenq’ank sa’ xch’utub’ankil lix tenamit li Dios?

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.

2 Nefi 12:1–3

Wi ak wulajenaqat sa’ li santil ochoch—“li tzuul re li rochoch li Qaawa’ ”—naru taawotz rik’in laa junkab’al chan ru naq eb’ li sumwank re li santil ochoch yookeb’ chatenq’ankil chi b’eek “chiru li ruq’ xb’e” li Qaawa’. Wi maji’ wulajenaqex sa’ li santil ochoch, rilb’aleb’ ru li raqal a’in sa’ komonil naru texxmusiq’a chi aatinak chirix chan ru naru teekawresi eerib’ re xk’ulb’aleb’ li osob’tesink re li santil ochoch.

2 Nefi 15:18–23

Ma naru teek’oxla jo’ junkab’al junjunq li maa’us aj na’leb’ sa’ li kutan a’in li ch’olob’anb’ileb’ sa’eb’ li raqal a’an? Chan ru naru taqil qib’ re ink’a’ toob’alaq’iiq xb’aan li b’alaq’il na’leb’ chirix li us ut li ink’a’ us?

2 Nefi 21

Wi laa junkab’al naraj xtenq’ankil re xtawb’al ru li ch’ol a’in (li wan ajwi’ sa’ Isaias 11), naru teetaw eena’leb’ sa’ Tzol’leb’ ut Sumwank 113:1–6, b’ar wi’ naxsumeheb’ junjunq li patz’om li Profeet aj Jose Smith chirix Isaias 11. K’a’ru naqatzol sa’eb’ li raqal a’an chirix li Jesukristo?

2 Nefi 21:9

K’a’ru junjunq li k’anjel naru taqab’aanu re tenq’ank chixnujob’resinkil li ruchich’och’ rik’in “xnawb’al chirix li Qaawa’ ”?

2 Nefi 25:23–26

Chan ru naq eb’ li komon sa’ laa junkab’al naru “te’saho’q sa’ xch’ool rik’in li Kristo”? Maare naru taab’oqeb’ chixtz’iib’ankil sa’ kok’ setb’il hu li na’leb’ chirix li Kolonel li naxk’eheb’ chi saho’k sa’ xch’ooleb’. Toja’ naq, sa’ jun q’ojyin re junkab’al chalel malaj sa’ xtzolb’aleb’ li loq’laj hu jo’ junkab’al, jun komon taaruuq taaril ru li naxye jun reheb’ li kok’ setb’il hu. Eb’ li komon sa’ li junkab’al naru te’tz’iib’aq chiru xkomoneb’ chik li kok’ setb’il hu chiru li chihab’.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Xchaab’ilob’resinkil li tzolok aajunes

Sik’ li k’a’ru nak’utun k’iila sut. Sa’eb’ li loq’laj hu naru naqataweb’ li eetalil li neke’xk’ut chiqu chan ru naq nak’anjelak li Qaawa’. Qayehaq, sa’ 2 Nefi 11–25, maare taataweb’ li eetalil li neke’xk’ut chan ru naq li Qaawa naq’usuk ut chan ru naq nakuyuk maak.

li Santil Ochoch re li Ciudad de Panama

Li Santil Ochoch re li Ciudad de Panama. “Taaxaqab’aaq li tzuul re li rochoch li Qaawa’ sa’ xb’eeneb’ chaq li ninqi tzuul, … ut chixjunileb’ li tenamit te’xik rik’in.” (2 Nefi 12:2).