laj Lehi yoo chirilb’al li Liahona

Laj Lehi ut li Liahona, xb’aan laj Joseph Brickey

27 enero–2 febrero

1 Nefi 16–22

“Tinkawresi li b’e cheru”

Naq nakatzol 1 Nefi 16–22, sik’eb’ li raqal li neke’xtoch’ aach’ool. Wankeb’ li ani neke’xb’oneb’ li raqal a’an sa’eb’ lix loq’laj hu; wankeb’ chik li neke’xtz’iib’a xna’leb’eb’ sa’ xxukeb’ li perel. K’oxla chan ru taatz’iib’a resileb’ li musiq’anb’il na’leb’ nakak’ul.

Xtz’iib’ankil li nakak’oxla

Naq lix junkab’al laj Lehi ke’b’eek sa’ xjayal li yeechi’inb’il ch’och’, li Qaawa’ kixyeechi’i a’in reheb’: “Tinkawresi li b’e cheru, wi taa’uxq naq teepaab’ lin taqlahom” (1 Nefi 17:13). Relik chi yaal, li yeechi’ihom a’an maawa’ naq moko ch’a’ajaq ta lix b’eenikeb’—toj ke’xwech’ rib’ chirib’ileb’ rib’ lix komon li junkab’al, ke’toqe’ li roq li tzimaj, ut ke’ch’a’ajkilo’ ut ke’kam li kristiaan, ut toj ke’teneb’aak chixyiib’ankil jun jukub’ rik’in yal li k’a’aq re re ke’xtaw sa’ li chaqi ch’och’. A’b’anan, naq li junkab’al kiwan chiruheb’ li ch’a’ajkilal malaj li k’a’ru chanchan ink’a’ naru xb’aanunkil, laj Nefi kixk’e reetal naq li Dios moko najt ta wan. A’an kixnaw naq li Dios “naxch’olaniheb’ [li tiikeb’ xch’ool], ut naxk’eheb’ xmetz’ew, ut naxk’e li taak’anjelaq re naq te’ruuq chixb’aanunkil li k’a’ru kixtaqlaheb’ wi’ ” (1 Nefi 17:3). Wi wankeb’ li hoonal naq nakapatz’ k’a’ut naq neke’xk’ul li rahilal li chaab’ileb’ xch’ool, jo’ laj Nefi ut lix junkab’al, maare taataw aana’leb’ chirix a’an sa’eb’ li ch’ol a’in. A’ut li k’a’ru jwal nim wi’chik ru taawil, a’an li k’a’ru neke’xb’aanu li chaab’ileb’ xch’ool naq neke’xk’ul li rahilal.

reetalil li tzolok aajunes

Li na’leb’ re xtzolb’aleb’ li loq’laj hu aajunes

1 Nefi 16–18

Naq nin’ab’in chiruheb’ li taqlahom, li Dios tinixtenq’a chi numtaak sa’ xb’een li ch’a’ajkilal.

Eb’ li ch’ol 16–18 re 1 Nefi neke’xye resil junjunqeb’ li ch’a’ajkilal ke’nume’ wi’ lix junkab’al laj Nefi, jo’ li roq li tzimaj li kitoqe’ (chi’ilmanq 1 Nefi 16:17–32), lix kamik laj Ismael (chi’ilmanq 1 Nefi 16:34–39), lix yiib’ankil jun li jukub’ (chi’ilmanq 1 Nefi 17:7–16; 18:1–4), ut li wech’ok-ib’ sa’ li junkab’al (chi’ilmanq 1 Nefi 18:9–22). Chan ru naq jalan li kixb’aanu laj Nefi sa’eb’ li ch’a’ajkilal a’in chiru li ke’xb’aanu li komon sa’ lix junkab’al? K’a’ru li kik’ulman xb’aan lix b’aanuhomeb’?

Maare us raj choq’ aawe xtz’iib’ankil li nakataw sa’ jun kaaxukuut rik’in li jolomil aatin jo’eb’ a’in: “Ch’a’ajkilal,” “Lix sumehom laj Nefi,” “Lix sumehomeb’ jalan,” ut “Li k’a’ru kik’ulman.” K’a’ut naq laj Nefi kiru chi kanaak chi tiik chi paab’ank us ta ke’wan chik li ink’a’ ke’xb’aanu chi jo’kan? K’oxla chan ru naq lix b’aanuhom laj Nefi ut lix junkab’al naru chatenq’ankil rik’in laa ch’a’ajkilal.

Che’ilmanq ajwi’ li video chirix a’an sa’ xyanqeb’ li video chirix lix Hu laj Mormon sa’ ChurchofJesusChrist.org malaj li aplicación Biblioteca del Evangelio.

1 Nefi 16:10–16, 23–31; 18:11–22

Li Qaawa’ naxk’am inb’e rik’in li k’a’ru ka’ch’in.

Naq li Dios kixk’am xb’e lix junkab’al laj Lehi sa’ li chaqi ch’och’, ink’a’ kixk’e reheb’ jun eetalil ch’olch’o ru re te’wulaq sa’ li yeechi’inb’il ch’och’. A’b’an, a’an kixk’e li Liahona re laj Lehi re xb’eresinkil lix junkab’al wulaj wulaj sa’ xjayal li na’ajej yookeb’ chixsik’b’al. K’a’ru xk’ehom aawe li qaChoxahil Yuwa’ re xk’amb’al aab’e ut aab’eresinkil? K’a’ru naraj naxye naq “rik’in li k’a’ru ka’ch’in li Qaawa’ naru naxk’e chi uxmank lix ninqal ru na’leb’ ”? (1 Nefi 16:29).

Naq nakawil ru 1 Nefi 16:10–16, 23–31 ut 18:11–22, k’oxla xtz’iib’ankil jun xtusulaleb’ li na’leb’ li neke’xk’ut chan ru naq li Dios naxk’ameb’ xb’e li ralal xk’ajol (jo’ eetalil, 1 Nefi 16:10 naru naxk’ut naq wan naq li Dios naxk’am qab’e chi jalan rik’in li xqoyb’eni). K’a’ru aanumishom rik’ineb’ li na’leb’ a’in?

Chi’ilmanq ajwi’ Alma 37:7, 38–47; Tzol’leb’ ut Sumwank 64:33–34.

laj Lehi yoo chiroksinkil li Liahona

Wi kawresinb’ilex ink’a’ texxuwaq, xb’aan laj Clark Kelley Price

1 Nefi 19:23–24; 20–22

Naru “tinjuntaq’eeta chixjunileb’ li loq’laj hu” wik’in.

Laj Isaias kitz’iib’ak choq’ reheb’ chixjunil li ralal xk’ajol laj Israel, ut laj Nefi kiril naq wan lix junkab’al sa’ xyanqeb’—ut wankat ajwi’ laa’at sa’ xyanqeb’ (chi’ilmanq 1 Nefi 19:23–24). Naq ki’aatinak chirix li raatin laj Isaias li kiroksi laj Nefi sa’ lix hu, li Awa’b’ej Henry B. Eyring kixye, “Naq nawil li raatin laj Nefi … nink’oxla naq laj Nefi kixsik’eb’ ru li raqal li taaruuq tink’ul sa’ waam chi maak’a’ ink’a’uxl chirixeb’ li utz’u’ujinb’il eetalil, jo’ raj naq li Qaawa’ yoo chiwaatinankil” ” (“El Libro de Mormón cambiará sus vidas,” Liahona, febrero 2004, 14).

Rik’in li raatin li Elder Eyring sa’ laa k’a’uxl, k’oxlaheb’ li patz’om jo’eb’ a’in naq nakawil ru eb’ li ch’ol 20–22:

1 Nefi 20:1–9.B’ar wan li ch’ol aatin sa’eb’ li raqal a’in li naxye chan ru naq ke’wan li ralal xk’ajol laj Israel? Chan ru neke’xye chan ru naq ke’wan laj Laman ut laj Lemuel? K’a’ruheb’ li q’usum ut li na’leb’ li nakataw choq’ aawe?

1 Nefi 20:17–22.Chan ru kixk’am li Qaawa’ xb’eheb’ li ralal xk’ajol laj Israel? Chan ru kixk’am xb’e lix junkab’al laj Lehi? Chan ru naxk’am aab’e laa’at?

K’a’ chik ru nakataw sa’ 1 Nefi 20–22 li nakatxk’e chireek’ankil naq li Qaawa’ yoo chi aatinak aawik’in? Chan ru naq li k’a’ru yeeb’il xb’aan laj Nefi sa’ li ch’ol 22 nakate’xtenq’a chixtawb’al ruheb’ lix profeetil aatin laj Isaias?

1 Nefi 21

Aniheb’ lix junkab’al laj Israel ut aniheb’ laj Gentil?

Lix junkab’al laj Israel a’aneb’ li ralal xk’ajol li profeet aj Jakob sa’ li Najter Chaq’rab’, li kik’ab’a’in laj Israel xb’aan li Qaawa’ (chi’ilmanq Genesis 32:28; 35:10; chi’ilmanq ajwi’ li K’utul Raqal reheb’ li Loq’laj Hu, “Israel”). Li Qaawa’ kixk’e junjunq li sumwank re laj Israel, ut li ralal xk’ajol ke’ok choq’ lix tenamit li Dios re li sumwank. A’b’anan, chirix xnumik k’iila chihab’, naab’al reheb’ ak ke’xtz’eqtaana li Qaawa’, ut moqon ke’jek’iman chiru li ruchich’och’.

Li aatin Gentil sa’eb’ li raqal a’in na’aatinak chirixeb’ li tenamit li maji’ neke’xk’ul li evangelio (chi’ilmanq li K’utul Raqal reheb’ li Loq’laj Hu, “Gentil, Eb’ laj”). Laj Isaias kixk’ut naq sa’ roso’jikeb’ li kutan taak’eemanq li evangelio reheb’ laj Gentil ut te’ok choq’ k’anjeleb’aal sa’ xtzolb’aleb’ ut xch’utub’ankileb’ lix junkab’al laj Israel (chi’ilmanq 1 Nefi 21:22; 22:8–12; chi’ilmanq ajwi’ Isaias 60; 66:18–20).

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.

1 Nefi 17:1–6, 17–22

Maare laa junkab’al taaruuq chixk’eeb’al reetal chan ru naq jalan li raatin laj Nefi chirix li b’eek chiru li yamyookil ch’och’ (chi’ilmanq 1 Nefi 17:1–6) rik’in li raatineb’ li ras (chi’ilmanq 1 Nefi 17:17–22). K’a’ut naq jwal jalan li ke’ril li junjunq us ta juntaq’eet li ke’xnumsi? K’a’ru naru taqatzol rik’in laj Nefi chirix li ilok rik’in paab’aal?

1 Nefi 17:17–22; 18:9–16

K’a’ru nak’ulman naq wan li kaqalink ut li wech’ok-ib’ sa’ jun li junkab’al? Chan ru naru toonumtaaq sa’ xb’eeneb’ li ch’a’ajkilal a’an?

1 Nefi 19:22–24

Laj Nefi kixjuntaq’eetaheb’ li loq’laj hu rik’in lix junkab’al re naq taawanq choq’ re xchaab’ilaleb’ ut xtzolb’aleb’ (chi’ilmanq 1 Nefi 19:23). Wankeb’ junjunq li esil sa’ 1 Nefi 16–18 li naru teejuntaq’eeta eerik’in eerib’ jo’ junkab’al. Maare naru teek’utb’esi jun reheb’ li esil a’an ut tex’aatinaq chirix chan ru nak’anjelak choq’ re lee junkab’al.

1 Nefi 21:14–16

Chan ru naq li esil sa’eb’ li raqal a’in naru tixtenq’a junaq li nareek’a li junataalil?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Xchaab’ilob’resinkil li tzolok aajunes

Patz’ aatenq’ankil rik’in li Qaawa’. Eb’ li loq’laj hu k’eeb’ileb’ chi k’utb’esinb’il, ut laa’o naqaj ru li k’utb’esinb’il na’leb’ re xtawb’aleb’ ru chi tz’aqal. Li Qaawa’ kixyeechi’i, “Wi texpatz’oq we rik’in paab’aal, … relik chi yaal naq taak’ehe’q chenaw li na’leb’ a’in” (1 Nefi 15:11).

laj Nefi ut lix junkab’al sa’ li jukub’

K’a’jo’ li rahilal ke’xb’aanu we, xb’aan laj Walter Rane