“3–9 febrero. 2 Nefi 1–5: “Koowan jo’ chanru li sahil ch’oolejil,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“3–9 febrero. 2 Nefi 1–5,” Kim, Taaqehin—Choq’ reheb’ li komon ut li junkab’al: 2020
Laj Adan ut li xEva, xb’aan laj Douglas Fryer
3–9 febrero
2 Nefi 1–5
“Koowan jo’ chanru li sahil ch’oolejil”
Eb’ li loq’laj hu neke’ru chixteeb’al rokeb’aal li k’utb’esinb’il na’leb’ choq’ re li junjunq. Naq nakawil ru 2 Nefi 1–5, maare taataw naq wan li k’a’ru naraj li Qaawa’ xk’utb’al chawu.
Xtz’iib’ankil li nakak’oxla
Wi ta taanaw naq raqe’k re laa yu’am, k’a’ru li roso’jikil esil taawaj raj xwotzb’al rik’ineb’ li ani jwal raab’ileb’ aab’aan? Naq li profeet aj Lehi kireek’a naq raqe’k re xyu’am, kixch’utub’eb’ li ralal xk’ajol jun sut chik re xyeeb’al li profeetil aatin reheb’ ut xwotzb’al li yaalil na’leb’ re li evangelio li jwal kixra rik’ineb’ li kristiaan li jwal raarookeb’ xb’aan. A’an kik’utuk chirix li ach’ab’aak, li paab’ank, lix t’anik laj Adan ut li xEva, li tojb’al-ix sa’ xk’ab’a’ li Jesukristo, ut li sahil ch’oolejil. Moko chixjunileb’ ta li ralal xk’ajol ke’xk’ulub’a lix nawom xch’ool, a’b’an eb’ li ke’k’ulub’ank re—jo’eb’ ajwi’ li k’iila millon chi kristiaan li neke’ril ru anajwan—ke’xtaw sa’ li raatin li na’leb’ li te’ruuq wi’ chi wank “jo’ chanru li sahil ch’oolejil” (2 Nefi 5:27).
Li na’leb’ re xtzolb’aleb’ li loq’laj hu aajunes
Wan xtaql inch’ool re xsik’b’al ru li yu’amej maak’a roso’jik.
Li Elder D. Todd Christofferson kixye: “Li Dios naraj naq eb’ li ralal xk’ajol te’k’anjelaq rik’in lix taql ch’oolej li kixk’e chaq reheb’. … A’an lix k’uub’anb’il na’leb’ ut rajom lix ch’ool naq laa’o taqasik’ ru li k’a’ru taa’uxq sa’ li qayu’am” (“Ach’ab’anb’il chi junelik, re te’k’anjelaq xjuneseb’,” Jolomil ch’utub’aj-ib’ re octubre 2014). Sa’ li raatin chirix li xtaql ch’oolej, laj Lehi kixye resileb’ li aajel ruhil na’leb’ li neke’xk’e xwankil li xtaql ch’oolej ut li nokohe’xtenq’a chixtawb’al li qachoxahil wankilal, jo’eb’ li na’leb’ a’in:
-
Xnawb’al ru li us ut li ink’a’ us (2 Nefi 2:5)
-
Jun chaq’rab’ k’eeb’il reheb’ li winq (2 Nefi 2:5)
-
Li ka’pak’alil ut li q’unb’esink ch’oolej naq na’ux li sik’ok-u (2 Nefi 2:11)
-
Li wankilal chi k’anjelak (2 Nefi 2:16)
Naq nakawil ru 2 Nefi 2, k’a’ru nakatzol chirixeb’ li na’leb’ a’in chirix li xtaql ch’oolej ut chan ru naq neke’xk’am rib’? K’a’ raj ru taak’ulmanq rik’in xtaql li qach’ool wi ta maak’a’ jun malaj xkomon chik reheb’ li na’leb’ a’in? K’a’ chik ru nakatzol chirix li xtaql ch’oolej sa’ li raatin laj Lehi?
Tz’aqal aajeleb’ ru li t’ane’k ut lix tojb’al rix li maak xb’aan li Jesukristo sa’ lix k’uub’anb’il na’leb’ li Dios.
Wankeb’ naab’al li neke’ril lix t’anik laj Adan ut li xEva jo’ jun nimla rahilal. A’b’anan, lix k’utum laj Lehi chirix li t’ane’k naxk’utb’esi k’a’ut naq aajel ru a’an sa’ lix k’uub’anb’il na’leb’ li Yuwa’b’ej choq’ re li qachaab’ilob’resinkil chi junelik. Naq nakawileb’ ru li raqal a’in, sik’ k’a’ut naq ki’ajman ru naq taak’ulmanq li t’ane’k re naq laa’o—li ralal xk’ajol li Dios—tooruq chi chaab’ilo’k. Chan ru naq lix mayej li Kolonel re xtojb’al rix li maak kooxkol chiru li t’ane’k?
Chi’ilmanq ajwi’ Moises 5:9–12; 6:51–62; “Xtʼanik laj Adan ut li xEva,” Li K’utul Raqal reheb’ li Loq’laj Hu.
Laj Jose Smith kisik’e’ ru chi rub’elaj li yu’am a’in re xk’ojob’ankil wi’chik li evangelio.
Sa’eb’ li roso’jikil raqal re 2 Nefi 3 wan jun profeetil aatin k’eeb’il xb’aan laj Jose sa’ Egipto chirix jun aj ilol na’leb’ chalel li taawanq xk’ab’a’ jo’ xk’ab’a’ a’an (che’ilmanq li raqal 14–15)—laj Jose Smith. Maak’a’jo’ ajwi’ naq naxk’ut xyaalal lix k’anjel laj Jose Smith. K’a’ru neke’xye li raqal 6–24 naq tixb’aanu laj Jose Smith, jun “aj ilol na’leb’ sik’b’il ru,” re rosob’tesinkil lix tenamit li Dios? Chan ru naq lix k’anjel li Dios “nimaq xloq’al” choq’ aawe?
Jun raqal jwal aajel ru re lix k’anjel laj Jose Smith, a’an xk’eeb’al chi k’utmank lix tz’iib’anb’il esil li riyajil laj Jose, li wan chi sa’ lix Hu laj Mormon. K’a’ru nakatzol sa’ li ch’ol a’in chirix lix aajelil ru lix Hu laj Mormon?
Chi’ilmanq ajwi’ JJS, Genesis 50:24–38 (sa’ xraqik li K’utul Raqal reheb’ li Loq’laj Hu).
Li Profeet re li Qaawa’, xb’aan laj David Lindsley
Naru tinsutq’iiq rik’in li Dios sa’ lix q’unal inmetz’ew.
Laj Nefi toje’ kikam xyuwa’. Li teneb’ahom re xb’eresinkil lix junkab’al anajwan kikana sa’ xb’een a’an. Kireek’a naq sutsu xb’aan li aaleek ut kich’inan xch’ool xb’aaneb’ lix maak. Us ta jalan li wankat wi’ rik’in li kiwan wi’ laj Nefi, maare toj taataw ru chi us junjunq reheb’ lix k’oxlahom ut li reek’ahom li kixtz’iib’a sa’ 2 Nefi 4:15–35. K’a’ru kixtenq’a laj Nefi sa’ lix ch’a’ajkilal? Chan ru naq li kixb’aanu laj Nefi sa’ xch’a’ajkilal naru nakatxtenq’a naq nakayal aaq’e rik’in laa ch’a’ajkilal?
Natawman li sahil ch’oolejil sa’ xyu’aminkil li evangelio.
Kʼaʼru li sahil ch’oolejil naq taaye laaʼat? Laj Nefi kixtz’iib’a naq lix tenamit kiwan “jo’ chanru li sahil ch’oolejil” (2 Nefi 5:27). Naru taasik’ li ke’xsik’ ru xb’aanunkil laj Nefi ut lix tenamit li kixk’eheb’ chi saho’k sa’ xch’ooleb’—chan ru naq ke’xtenq’a rib’ chirib’ileb’ rib’ sa’ junesal ut jo’ junkab’al, li k’a’ru ke’roxloq’i sa’ lix tenamit, ut xkomon chik. K’a’ru nakatzol li naru tatxtenq’a chixyiib’ankil jun yu’amej re sahil ch’oolejil, jo’ kixb’aanu lix tenamit laj Nefi?
K’a’ru li majewaak li kikana sa’ xb’eeneb’ laj Lamanita?
Sa’ xkutankil laj Nefi, li majewaak sa’ xb’eeneb’ laj Lamanita a’an naq “ke’isiiq chaq chiru li Qaawa’ … sa’ xk’ab’a’ li maa’usilal ke’xb’aanu” (2 Nefi 5:20–21). A’in naraj naxye naq isinb’il chaq lix Musiq’ li Qaawa’ sa’ xyanqeb’. Moqon, naq eb’ laj Lamanita ke’ok chixpaab’ankil lix evangelio li Jesukristo, “moko taaqenb’ileb’ ta chik xb’aan xmajewahom li Dios” (Alma 23:18).
Lix Hu laj Mormon naxye ajwi’ naq kichal sa’ xb’eeneb’ jun xq’eqil lix tib’eleb’ laj Lamanita chirix naq ke’xjach rib’ rik’ineb’ laj Nefita. Lix yaalalil li eetalil a’in ink’a’ natawman ru chi tz’aqal. Sa’ xtiklajik, li eetalil kixjacheb’ ru laj Lamanita rik’ineb’ laj Nefita. Moqon, naq xkab’ichaleb’ laj Nefita ut laj Lamanita ke’xnumsi xq’ehil li maa’usilal jo’ ajwi’ xq’ehil li tiikilal, maak’a’ chik xyaalalil li eetalil re xk’utb’al xwanjikeb’ laj Lamanita chiru li Dios.
Eb’ li profeet sa’ li qakutankil neke’xch’olob’ naq xq’eqal li tib’elej maawa’ reetalil li majewaak. Li Iglees naxpaab’ lix k’utum laj Nefi naq li Qaawa’ “maajun naxtz’eqtaana li nachal rik’in, q’eq ut saq, moos ut ach’ab’anb’il, winq ut ixq” (2 Nefi 26:33). Li Awa’b’ej Russell M. Nelson kixye: “Li Qaawa’ naxch’olob’ naq juntaq’eet naril chixjunil li ralal xk’ajol. … Maak’a’ naxye aniho, k’a’ru li qaatinob’aal, ma winqo malaj ixqo, ut b’ar wan li qatenamit naq noko’ok chi tiik qapaab’aal sa’ xb’ehil li sumwank re chalk rik’in laj Tojol qix” (“President Nelson Remarks at Worldwide Priesthood Celebration” [1 junio, 2018], newsroom.ChurchofJesusChrist.org).
Chi’ilmanq ajwi’ “Till We All Come in the Unity of the Faith” (video, ChurchofJesusChrist.org).
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
2 Nefi 1:13–25
K’a’ru neke’xk’ut li raqal a’in chirix li k’a’ru naraj jun yuwa’b’ej tiik xch’ool choq’ reheb’ li ralal xk’ajol?
2 Nefi 3:6
Ilomaq ru sa’ komonil “Aj Ilol Na’leb’ ” sa’ li K’utul Raqal reheb’ li Loq’laj Hu. Chan ru naq laj Jose Smith kik’anjelak jo’ aj ilol na’leb’? K’a’ut naq nokob’antioxink xb’aan li k’anjel li kixb’aanu laj Jose Smith? (chi’ilmanq 2 Nefi 3:6–24).
2 Nefi 4:20–25
Naq nekeril ru sa’ komonil 2 Nefi 4:20–25, hilanqex chirix li junjunq raqal ut b’oqeb’ li komon sa’ li junkab’al re te’xwotz jo’q’e xk’ulumeb’ malaj reek’ahomeb’ li k’a’ru kixch’olob’ laj Nefi. K’a’ru xb’aanuhom li Dios choq’ re li qajunkab’al?
2 Nefi 5
Chan ru naq laa junkab’al yoo chi wank “jo’ chanru li sahil ch’oolejil”? Naq laa junkab’al yoo chirilb’al ru 2 Nefi 5, naru tex’aatinaq chirix li kiwulak chiru laj Nefi: li junkab’al (raqal 6), eb’ li taqlahom (raqal 10), eb’ li loq’laj hu (raqal 12), li tzolok (raqal 15), eb’ li santil ochoch (raqal 16), li k’anjelak (raqal 17), ut eb’ li b’oqb’al sa’ li Iglees (raqal 26). Jun na’leb’ re eetenq’ankil chixb’aanunkil a’in, a’an xtawb’al li k’a’aq re ru li neke’reetaliheb’ li k’a’aq re ru a’in ut aatinak chirix chan ru naqak’ut naq laa’o, jo’eb’ laj Nefita, naqoxloq’iheb’ ajwi’ li k’a’aq re ru a’in.
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
K’e reetal li nak’ulman. Wi nakak’e reetal li k’a’ru yoo chi k’ulmank sa’ xyu’ameb’ laa kok’al, k’a’jo’ naq taak’eemanq chawu xtzolb’aleb’. Li raatineb’ malaj xpatz’omeb’ laa walal aak’ajol naru neke’oksiman choq’ hoonal re k’utuk. (Chi’ilmanq Li k’utuk jo’ li Kolonel, 16.)
Laj Lehi ut lix tenamit neke’wulak sa’ li yeechi’inb’il ch’och’, xb’aan laj Clark Kelley Price