“10–16 febrero. 2 Nefi 6–10: “Aay, k’a’jo’ xnimal lix k’uub’anb’il na’leb’ li qaDios!” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“10–16 febrero. 2 Nefi 6–10,” Kim, Taaqehin—Choq’ reheb’ li komon ut li junkab’al: Lix Hu laj Mormon 2020
Ink’a’ chi’uxmanq li nawaj laa’in, a’ b’an laa waajom laa’at, xb’aan laj Harry Anderson
10–16 febrero
2 Nefi 6–10
“Aay, k’a’jo’ xnimal lix k’uub’anb’il na’leb’ li qaDios!”
Naq nakawil ru 2 Nefi 6–10, k’oxlaheb’ li na’leb’ li naraj li Qaawa’ xk’utb’al chawu. Naq nakak’e reetaleb’ a’an, tz’iib’aheb’ ut rik’in tijok k’oxla chan ru naru taak’anjela li yookat chixtzolb’al.
Xtz’iib’ankil li nakak’oxla
Ak numenaq 40 chihab’ relikeb’ chaq lix junkab’al laj Lehi aran Jerusalen. Ke’wan sa’ jun ak’ ch’och’ ink’a’ nano ru, q’axal najt rik’in Jerusalen ut li jun ch’ol chik lix tenamit li Dios re li sumwank. Ak kikam laj Lehi, ut eb’ li ralal xk’ajol ak okenaqeb’ sa’ jun wech’ok-ib’ li taawanq chiru k’iila cient chihab’ sa’ xyanqeb’ laj Nefita—“li neke’paab’ank re lix tijom ut lix k’utb’esihom li Dios”—ut eb’ laj Lamanita, li ink’a’ neke’paab’an chi jo’kan (2 Nefi 5:6). Sa’ li hoonal a’an, laj Jakob, a’an li riitz’in laj Nefi li k’ojob’anb’il chik jo’ aj k’utunel chiruheb’ laj Nefita, kiraj naq li tenamit re li sumwank te’xnaw naq maajo’q’e sachenaqeb’ sa’ xch’ool li Dios, jo’kan naq tento naq maajo’q’e taasachq li Dios sa’ xch’ooleb’ a’an. A’in jun li esil li ajb’il ru chi yaal sa’ li ruchich’och’ wanko wi’, b’ar wi’ eb’ li sumwank wankeb’ chi eetz’unb’il ut li k’utb’esinb’il na’leb’ chi tz’eqtaananb’il. “Chijultiko’q a’an qe, … xb’aan naq moko tz’eqb’ilo ta. … Nim ru li k’a’ru yeech’i’inb’il xb’aan li Qaawa’,” chan (2 Nefi 10:20–21). Sa’ xyanqeb’ li yeechi’ihom a’an, maajun reheb’ naxq’ax xnimal ru li “xtojb’al rix li maak li maak’a’ roso’jik” re numtaak sa’ xb’een li kamk ut li xb’alb’a (2 Nefi 9:7). “Jo’kan ut,” chan laj Jakob, “chisaho’q sa’ eech’ool”! (2 Nefi 10:23).
Li na’leb’ re xtzolb’aleb’ li loq’laj hu aajunes
Li Qaawa’ naruxtaanaheb’ ru lix tenamit ut tixtz’aqob’resi ruheb’ lix yeechi’ihom.
Re xtenq’ankileb’ lix tenamit chixtawb’al ru naq okenaqeb’ sa’ lix junkab’al laj Israel ut naru neke’xkanab’ rib’ chiru li Dios ut eb’ lix yeechi’ihom, laj Jakob kixye lix profeetil aatin laj Isaias, li tz’iib’anb’il sa’ 2 Nefi 6–8. Laj Isaias kixye chan ru naq te’jek’imanq laj Israel ut naq li Kolonel tixch’utub’eb’ wi’chik ut tixtojeb’ rix lix tenamit jo’ kixyeechi’i reheb’. Nak yookat chirilb’al ru a’an, k’oxlaheb’ li patz’om jo’eb’ a’in:
-
K’a’ru nintzol chirix lix rahom li Kolonel choq’ we laa’in?
-
Chan ru naxk’ojob’ li Kolonel xch’ooleb’ li ani neke’sik’ok re?
-
K’a’ chik ru naru tinb’aanu re “royb’eninkil” chi mas tiik wi’chik inch’ool li Kolonel ut eb’ li osob’tesihom kixyeechi’i?
Rik’in lix tojb’al rix li maak kixb’aanu, li Jesukristo naxkoleb’ chixjunil li kristiaan chiru li kamk sa’ tz’ejwalej jo’ ajwi’ sa’ musiq’ej.
K’a’ruheb’ li aatin malaj jalam-uuch li taawoksi raj re xyeeb’al re anihaq k’a’ut naq q’axal naqaj ru jun aj Tojol qix re qakolb’al chiru li kamk ut li maak? Laj Jakob kiroksiheb’ li aatin “xuwajel” ut “josq’ aj xul.” K’a’ru kixk’ut laj Jakob chirix “li josq’ aj xul re li kamk ut li xb’alb’a” ut li “b’e re too’eeleliq” kixkawresi li Dios choq’ qe? (2 Nefi 9:10). Naq nakawil ru 2 Nefi 9:1–26, k’oxla reetalinkil rik’in jun b’onol li taak’ulmanq raj qe wi ta maak’a’ lix tojb’al rix li maak kixb’aanu li Jesukristo. Chirix a’an, rik’in jalan chik li b’onol, naru taak’e reetalil li k’a’ru naru taqak’ul sa’ xk’ab’a’ lix tojb’al rix li maak kixb’aanu li Kolonel. K’a’ruheb’ li yaalil na’leb’ nakataw chirix lix tojb’al rix li maak kixb’aanu li Jesukristo li nakate’xk’e chixnimankil ru “lix chaab’ilal xna’leb’ li Dios, li ruxtaan ut li rusilal”? (2 Nefi 9:8).
Chi’ilmanq ajwi’ “Xtojb’al rix li maak,” Li K’utul Raqal reheb’ li Loq’laj Hu.
Naru tinchalq wan wi’ li Kristo ut tink’ul li xninqal ru osob’tesink re lix tojb’al rix li maak li kixb’aanu.
Li Jesukristo kichal “sa’ ruchich’och’ re tixkoleb’ chixjunil li winq wi te’ab’inq chiru lix yaab’ xkux” (2 Nefi 9:21; tiqb’il xkawil li aatin). Sa’ jalan chik aatin, tento naq wanq qach’ool chixk’ulub’ankil li kole’k li naxyeechi’i a’an jo’ osob’tesihom. Chirix xch’olob’ankil li nimla k’uub’anb’il na’leb’ re li tojb’al-ix, laj Jakob kixk’eheb’ li aajel ruhil tijom ut b’oqom, li neke’tawman sa’ 2 Nefi 9:27–54, re qatenq’ankil chixk’ulb’aleb’ li osob’tesink re lix tojb’al rix li maak. K’oxla xtz’iib’ankileb’ sa’ jun kaaxukuut jo’ a’in:
|
Eb’ li tijom |
Eb’ li b’oqom |
|---|---|
Eb’ li tijom | Eb’ li b’oqom |
Eb’ li tijom | Eb’ li b’oqom |
K’a’ru nakaweek’a naq musiq’anb’ilat xb’aan li Musiq’ej chixb’aanunkil re xsumenkileb’ li tijom ut b’oqom a’an?
Sa’ xk’ab’a’ lix mayej li Jesukristo, naru “taasaho’q” sa’ inch’ool.
Li raatin laj Jakob, a’an jun aatin re sahil ch’oolejil. “Ninye eere li na’leb’ a’in,” chan “re taasaho’q sa’ eech’ool, ut teetaqsi lee jolom chi junelik” (2 Nefi 9:3). Naq nakawil ru 2 Nefi 10:20, 23–25, k’a’ru nakataw li nakatxk’e chi yo’onink? K’a’ chik ru xataw sa’ 2 Nefi 9–10 li xatxk’e chi yo’onink? K’a’ru taab’aanu re naq te’jultiko’q aawe li k’a’aq re ru a’in naq nach’inan laa ch’ool?
Chi’ilmanq ajwi’ Jwan 16:33.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
2 Nefi 8:3–7
Naq nakawil ru 2 Nefi 8:3, naru taak’uteb’ xjalam-uuch jun chaqi ch’och’ ut jun li awimq. Chan ru naq li Qaawa’ naxk’e chi atz’umak li chaqi ch’och’ re li qayu’am jo’ chanchan jun li awimq? Sa’eb’ li raqal 4–7, k’a’ru naxye li Qaawa’ qe naq taqab’aanu re xk’ulb’al li sahil ch’oolejil li ch’olob’anb’il sa’ li raqal 3?
2 Nefi 8:24–25
Chan ru naq li raatin laj Isaias choq’ re li tenamit re Sion naru nokoxkawresi sa’ xyalb’al qaq’e chi wank choq’ xchaab’il tzolom li Jesukristo? Chan ru naq li aatin aj waklesinel ch’oolej kixye laj Isaias re li tenamit re Sion naru tooxkawob’resi sa’ lix yalb’al qaq’e chi chaab’ilo’k jo’ tzolom tiikeb’ chi paab’ank chiru li Jesukristo?
2 Nefi 9:1–26
K’a’ru naru tixb’aanu laa junkab’al re naq mas teetaw wi’chik ru lix nimal ru li “xtojb’al rix li maak li maak’a’ roso’jik” kixb’aanu li Jesukristo? (raqal 7). Maare te’ruuq chixtz’ilb’al rix malaj xk’oxlankil li k’a’aq re ru chanchan naq maak’a’jo’ rajlankileb’—jo’ li pach’aya’ sa’ jun awimq, li samahib’ chire jun li palaw, malaj eb’ li chahim sa’ choxa. Chan ru naq maak’a’ roso’jik lix tojb’al rix li maak kixb’aanu li Kolonel? B’arwan reheb’ li ch’ol aatin sa’ 2 Nefi 9 neke’xnimob’resi li qab’antioxihom chirix li kixb’aanu li Kolonel choq’ qe?
2 Nefi 9:27–44
Maare chiru jun kutan re li xamaan a’in laa junkab’al taaruuq te’sik’oq sa’ 2 Nefi 9:27–38 re xtawb’aleb’ li tijom (neke’chal chirix li aatin “rahilal”). B’arwan reheb’ a’an aajel ru re naq tex’aatinaq chirix jo’ junkab’al? Sa’ jalan chik kutan, naru texsik’oq sa’ 2 Nefi 9:39–44 re xtawb’al li k’a’ru kixye laj Jakob re lix tenamit naq us naq taajultiko’q reheb’.
2 Nefi 9:28–29, 50–51
K’a’ru junjunq reetalil “lix jo’maajo’ileb’, ut lix q’unaleb’ xmetz’ew, ut lix majelal xna’leb’eb’ li winq”? (raqal 28). K’a’ru naru taqab’aanu re xnimob’resinkil lix aajelil ru li k’a’ru re li Dios ut xch’inankil lix aajelil ru li k’a’ru re li ruchich’och’?
2 Nefi 9:45
Maare taawulaq chiru laa junkab’al xyiib’ankil jun kadeen rik’in hu re naq li junjunq naru tixk’e chirix ut tixchiq’chiq’i rib’ re risinkil. Chan ru naq li maak a’an chanchan jun kadeen? Chan ru naq li Kolonel nokoxtenq’a chixchiq’b’al chiqix?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Chatwanq rik’ineb’ ut chawab’iheb’. “Junjunq reheb’ li hoonal q’axal chaab’il re k’utuk neke’tikla jo’ jun patz’om malaj ch’a’ajkilal sa’ xch’ool jun komon sa’ li [junkab’al]. … K’eheb’ chixnawb’al rik’in laa waatin ut rik’in laa b’aanuhom naq wan aach’ool chirab’inkileb’ ” (Li k’utuk jo’ li Kolonel, 16).
Li Kolonel tixkoleb’ chixjunil li ralal xk’ajol li Dios “wi te’ab’inq chiru lix yaab’ xkux” (2 Nefi 9:21). Kixk’irtesiheb’ naab’al rik’in k’iila paay chi yajel, xb’aan laj J. Kirk Richards