jun li ixq nawiq’la sa’ roq li Jesus

Kuyb’il xmaak, xb’aan laj Greg K. Olsen

9–15 marzo

Jakob 1–4

K’amomaq wi’chik eerib’ sa’ usilal rik’in li Dios xb’aan lix tojb’al rix li maak xb’aan li Kristo

Naq yooqat chirilb’al ru Jakob 1─4, k’oxla sa’ aach’ool b’ar wankeb’ li na’leb’ re li ch’ol a’an li jwal aajeleb’ ru re naq te’xtzol li kok’al. Sik’ lix b’eresihom li Musiq’ej re xnawb’al chan ru xk’utb’aleb’ li na’leb’ a’an, ut tz’iib’a li nakak’oxla.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li kok’al chixwotzb’al k’a’ruhaq xe’xb’aanu a’an malaj lix junkab’aleb’ chiru li xamaan a’in re tzolok sa’ Jakob 1─4. Naru ajwi’ nakakanab’eb’ chixwotzb’al k’a’ruhaq najultiko’ reheb’ chirix li xe’xtzol sa’ li xamaan xnume’. K’a’ru li patz’om naru nakatenq’aheb’ wi’ re taajultiko’q reheb’ li xe’xtzol?

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Jakob 1:6–8, 18; 2:1–11

Li Dios naxb’oqeb’ laj jolominel re li Iglees re intenq’ankil chixtaaqenkil li Jesukristo.

Tenq’aheb’ li kok’al chixtawb’al ru naq te’osob’tesiiq naq neke’xtaaqe lix na’leb’eb’ laj jolominel re li Iglees.

Kok’ k’anjel naru chi b’aanumank

• Yiib’eb’ kok’ muñeek li te’reetali laj Jakob ut laj Jose, eb’ li riitz’in laj Nefi, li ke’wan jo’ aj jolominel re li Iglees. Wotzeb’ junjunq raqal re Jakob 1 ut 2 re xch’olob’ankil k’a’ru b’oqb’ileb’ chixb’aanunkil laj jolominel re li Iglees. Qayehaq, eb’ laj jolominel nokohe’xb’oq “chixpaab’ankil li Kristo” (Jakob 1:8), nokohe’xb’oq chixjalb’al qak’a’uxl (chi’ilmanq Jakob 2: 5─6, 9─10) ut “neke’xch’olob’ chiqu li raatin li Dios” (Jakob 2:2, 11). Kanab’eb’ li kok’al chiroksinkileb’ li muñeek re xk’oxlankil naq a’aneb’ neke’xb’aanu ajwi’ junjunqeb’ li k’a’aq re ru a’an.

• Kanab’eb’ li kok’al chixyeeb’al xk’ab’a’eb’ junjunqeb’ laj jolominel re li Iglees neke’xnaw ru, jo’ laj jolominel re li Tzoleb’aal reheb’ li Kok’al, komoneb’ sa’ li obispil, ut eb’ li profeet ut li apostol. Tenq’aheb’ li kok’al chixk’oxlankil chan ru naq eb’ laj jolominel a’an nokohe’rosob’tesi.

wiib’ li winq neke’xk’e xsahileb’ xch’ool rik’ineb’ li ruq’ sa’ xb’een li meex

Eb’ li qajolominel sa’ li Iglees nokohe’xtenq’a chixtaaqenkil li Jesukristo.

Jakob 2:12–14, 17–21

Nintenq’aheb’ li wankeb’ xmajelal naq ninwotzok rik’ineb’.

Ma neke’xtaw ru li kok’al nakatzoleb’ li osob’tesihom neke’k’ulman xb’aan li wotzok rik’ineb’ li wankeb’ xmajelal? Chan ru naru nakatenq’aheb’ chixnawb’al naq li qaChoxahil Yuwa’ ut li Jesus neke’raj naq eb’ li kok’al te’xtenq’aheb’ li ras riitz’in?

Kok’ k’anjel naru chi b’aanumank

• Ch’olob’ naq junjunqeb’ li kristiaan sa’ lix kutankil laj Jakob jwal b’ihomeb’ chaq, a’b’an ink’a’ ke’raj xwotzb’al li k’a’ru wan reheb’ rik’ineb’ li ani neb’a’eb’. Il ru Jakob 2:17─19 re xtenq’ankileb’ li kok’al chixtawb’al ru lix k’utum laj Jakob choq’ reheb’ li kristiaan a’an. Naq yooqat chixb’aanunkil a’an, k’e reheb’ li kok’al jalam-uuch malaj k’a’aq re ru naru neke’xchap ut li wan rilomeb’ rik’ineb’ li aatin malaj ch’ol aatin wankeb’ sa’eb’ li ch’ol a’an.

• Kanab’eb’ li kok’al chixk’utb’esinkil chan ru naru neke’xwotz li k’a’ru wan reheb’ rik’in anihaq wan xmajelal. Ch’olob’ naq noko’osob’tesiik naq nokowotzok rik’ineb’ li qas qiitz’in.

• K’am k’a’ruhaq sa’ li tzoleb’aal li naru nakawotz rik’ineb’ li kok’al. K’e b’ayaq reheb’ li junjunq chi kok’al ut ch’olob’ naq yookat chixwotzb’al rik’ineb’. Patz’ reheb’ k’a’ru xe’reek’a naq xatwotzok rik’ineb’. K’a’ru neke’reek’a naq neke’wotzok rik’ineb’ li ras riitz’in? Tenq’aheb’ chixk’oxlankil k’a’ruhaq li naru neke’xwotz re xtenq’ankil anihaq chi saho’k xch’ool.

Jakob 4:6

Naru ninkawob’resi lin paab’aal chirix li Jesukristo.

Naq laj Jakob kiwan sa’ tiikilal us ta kiwan li maa’usilal sa’ xsutam, lix paab’aal tz’aqal kikawu ut ink’a’ chik na’eek’an. K’oxla chan ru naru nakatenq’aheb’ li kok’al chixtawb’al ru k’a’ru naraj naxye naq taawanq junaq aapaab’aal ink’a’ chik na’eek’an.

Kok’ k’anjel naru chi b’aanumank

• Tenq’aheb’ li kok’al chixk’oxlankil k’a’ru neke’xb’aanu rik’in lix junxaqalileb’ re naq kawaqeb’. K’a’ru naru naqab’aanu re naq li qapaab’aal kawaq tz’aqal? Te li loq’laj hu sa’ Jakob 4:6 ut tenq’aheb’ li kok’al chixk’eeb’al reetal k’a’ru ke’xb’aanu laj Jakob ut lix tenamit re naq lix paab’aaleb’ “ink’a’ chik taa’eek’anq.”

• B’icha “Li ochoch sa’ xb’een li pek” (B’ichleb’aal choq’ reheb’ li Kok’al, 132) rik’ineb’ li kok’al. Sa’ jun na’ajej chiru li pizarron, yiib’ xjalam-uuch jun li ochoch k’ojob’anb’il sa’ xb’een li samahi’. Chi junpak’al chik, yiib’ xjalam-uuch jun li ochoch k’ojob’anb’il sa’ xb’een jun li pek. Wi naru, k’am li samahi’ ut jun li pek sa’ li tzoleb’aal. B’ar wan reheb’ moko ch’a’aj ta xchiq’b’al malaj reek’asinkil? Ma naqaj naq li qapaab’aal chanchanaq li samahi’ malaj chanchanaq li pek?

reetalil li k‘utuk

Xk’utb’al li tzol’leb’: Kok’al ak ninqeb’

Jakob 1:6–8, 18; 2:1–6, 11

Li Dios naxb’oqeb’ laj jolominel re li Iglees re intenq’ankil chixtaaqenkil li Jesukristo.

Eb’ li kok’al li nakatzoleb’ te’osob’tesiiq wi neke’xkanab’ rib’ rub’el xb’eresihom lix na’leb’eb’ laj jolominel re li Iglees ut neke’xtaaqe.

Kok’ k’anjel naru chi b’aanumank

• Il ru rik’ineb’ li kok’al Jakob 1:6─8 ut 2:1─6, 11, ut tenq’aheb’ chixsik’b’aleb’ ch’ol aatin neke’xch’olob’ chan ru naq eb’ lix moos li Dios neke’xb’eresi li Iglees. Kanab’eb’ chixtz’iib’ankileb’ li ch’ol aatin a’an chiruheb’ perel hu ut chirix a’an chixk’eeb’aleb’ li hu chiru li pizarron. K’a’ut naq li Dios naxb’oqeb’ aj jolominel re li Iglees re naq toohe’xb’eresi? Kanab’eb’ li kok’al chixwotzb’aleb’ numsihom li wan rilomeb’ rik’in tzolok malaj xk’ulb’al xb’eresihom junaq laj jolominel malaj aj tzolonel re li Iglees ut li osob’tesihom xe’xk’ul.

• Kanab’eb’ li kok’al chixyiib’ankil xjalam-uuch jun laj jolominel re li Iglees li neke’xnaw ru, ut kanab’eb’ lix komoneb’ chixq’ehinkil ani a’an. K’a’ru neke’xb’aanu laj jolominel a’an re qatenq’ankil sa’ xtaaqenkil li Jesukristo? Kanab’eb’ li kok’al chixtz’iib’ankil kok’ hu choq’ reheb’ laj jolominel re li Iglees b’ar wi’ neke’xb’antioxi lix k’anjeleb’.

• K’e xb’oqb’al junaq laj jolominel re li Iglees sa’ laa na’aj re xyeeb’al reheb’ li kok’al k’a’ru naxb’aanu a’an re k’anjelak sa’ lix b’oqb’al. Kanab’eb’ li kok’al naq te’xye xk’ab’a’ junjunqeb’ li k’a’aq re ru naru neke’xb’aanu re xxaqab’ankil xk’anjeleb’ laj jolominel.

Jakob 2:12–14, 17–21

Naru nintenq’aheb’ li was wiitz’in chireek’ankil xsahileb’ xch’ool naq ninwotzok rik’ineb’.

Eb’ li tz’aqal aj taaqenel re li Jesukristo wankeb’ xch’ool chixwotzb’al li k’a’ru reheb’ rik’ineb’ li ras riitz’in. Waklesiheb’ xch’ool li kok’al chixk’eeb’al xsahileb’ xch’ool li wankeb’ xmajelal rik’in li wotzok rik’ineb’.

Kok’ k’anjel naru chi b’aanumank

• Ye reheb’ li kok’al naq naab’aleb’ li kristiaan sa’ xkutankil laj Jakob ke’q’etq’eto’ ut ke’oso’ xrahom xb’aan naq ke’xra chik li b’ihomal (chi’ilmanq Jakob 2:12─14, 17─21). Kanab’eb’ junjunqeb’ li kok’al chirilb’al ru Jakob 2:17─19 chi kaw xyaab’eb’ xkux ut tenq’aheb’ chixtawb’al ru li aatin ch’a’aj choq’ reheb’. K’a’ru tento taqasik’ xb’een wa chiru li b’ihomal? K’a’ru tento taqab’aanu rik’in yalaq li b’ihomal naqak’ul?

• Il ru Jakob 2:17 choq’ reheb’ li kok’al. K’a’ruheb’ li osob’tesihom naxwotz li qaChoxahil Yuwa’ qik’in? K’a’ut naraj a’an naq toowotzoq chiqib’il qib’? Kanab’eb’ li kok’al chi aatinak chirixeb’ hoonal b’ar wi’ xe’wotzok rik’in anihaq, ut chixyeeb’al k’a’ru xe’reek’a a’an, ut k’a’ru xreek’a li kristiaan jun chik.

Jakob 4:4–13, 17

Naru ninkawob’resi lin paab’aal chirix li Jesukristo.

Lix paab’aal laj Jakob ink’a’ chik ki’eek’an rik’in naq kixtz’il rix li raatineb’ li profeet ut kixk’ul ajwi’ xnawom xch’ool a’an (chi’ilmanq Jakob 4:6). Chan ru naru nakatenq’aheb’ li kok’al chixtawb’al rajomeb’ re xwaklesinkil jun paab’aal ink’a’ chik taa’eek’anq?

Kok’ k’anjel naru chi b’aanumank

• Kanab’eb’ li kok’al chixk’oxlankileb’ k’a’aq re ru li ke’kawu ut ke’wan chi kolb’il rik’in xnumik li hoonal, jo’ jun li nimla che’. Chan ru naq juntaq’eet li paab’aal rik’ineb’ li k’a’aq re ru xe’xk’oxla? B’ar wan reheb’ li ch’ol aatin re Jakob 4:6, 10─11 neke’xch’olob’ li k’a’ru naru naqab’aanu re naq li qapaab’aal ink’a’ chik taa’eek’anq? Kanab’eb’ li kok’al chixyiib’ankil jun xtusulal chan ru naru neke’xkawresi lix paab’aaleb’ chirix li Jesukristo.

• Wotz lix k’a’uxl li Elder Neil L. Andersen chirix li che’ li nak’i sa’ jun na’ajej b’ar wi’ mas kaw li iq’, li natawman sa’ li raatin, k’ab’a’inb’il “Eb’ li musiq’ejil sut-iq’ ” (Jolomil ch’utub’aj-ib’ re abril 2014), malaj k’ut li video “Torbellinos espirituales” (ChurchofJesusChrist.org). K’a’ut naq aajel ru naq li qapaab’aal tento naq ink’a’ chik taa’eek’anq ut kawaq jo’ jun xtoon li che’? K’a’ru neke’reetali li musiq’ejil sut-iq’? K’a’ru naru naqab’aanu re xk’ojob’ankil jun paab’aal ink’a’ chik na’eek’an? Tenq’aheb’ li kok’al chixk’oxlankil k’a’ruheb’ chik li na’leb’ neke’xk’ut chan ru naru nawan junaq paab’aal chi ink’a’ chik na’eek’an.

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixk’oxlankil k’a’ruhaq naru neke’xwotz rik’ineb’ lix junkab’al, —jo’ ajwi’ k’a’ruhaq xe’xtzol sa’ li tzoleb’aal anajwan. Sa’ jun li k’utuk chalel, k’eheb’ xhoonal re te’aatinaq chirix li k’a’ru xe’xwotz.

Xchaab’ilob’resinkil li qak’utum

Waklesiheb’ xch’ool chi oxloq’ink. Tenq’aheb’ li kok’al chixtawb’al ru naq jun na’leb’ aajel ru chirix li oxloq’ink a’an xk’oxlankil li qaChoxahil Yuwa’ ut li Jesukristo. Naru nakajultika reheb’ naq tento te’oxloq’inq rik’in xb’ichankil malaj xtz’uyinkil junaq li b’ich, malaj xk’utb’al junaq xjalam-uuch li Jesus.

perel re kok’ k’anjel: naru ninwotz li k’a’ru wan we rik’ineb’ li was wiitz’in