li Jesukristo nak’utuk chiruheb’ lix tzolom

Li Kristo nak’utuk chiruheb’ lix tzolom, xb’aan laj Justin Kunz

2–8 marzo

2 Nefi 31–33

“A’in li b’e”

Re xtikib’ankil lix kawresinkil aawib’, il ru 2 Nefi 31─33. Sik’ lix b’eresihom li Musiq’ej chirix li k’a’ru tento taak’ut chiruheb’ li kok’al. Li tusleb’ aatin a’in naru naxk’e aana’leb’.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Xb’aan naq laj Nefi kik’utuk chirix lix kub’iha’ li Kristo, kanab’eb’ li kok’al chixwotzb’al k’a’ruhaq xe’xtzol chirix li kub’iha’. Naru ajwi’ neke’xwotz li k’a’ru neke’xk’oxla ut neke’reek’a chirix lix kub’iha’eb’ a’an malaj lix kub’iha’ junaq ramiiweb’ malaj komon sa’ xjunkab’aleb’.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

2 Nefi 31

Li Jesukristo kixk’ut chiwu chan ru tinq’ajq rik’in li qaChoxahil Yuwa’.

Laj Nefi kixk’ut naq xtaaqenkil lix b’aanuhom ut eb’ lix k’utum li Kolonel ka’ajwi’ a’an li jun chi b’e re “taakole’q wi’ li winq sa’ li rawa’b’ejihom li Dios” (2 Nefi 31:21).

Kok’ k’anjel naru chi b’aanumank

• K’e chi kutankil li jalam-uuch wan sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al naq yooqat chixk’osb’al ru li seraq’ chirix lix kub’iha’ li Jesus (chi’ilmanq 2 Nefi 31:4─13). Ch’olob’ naq li kub’iha’ a’an jun li yokb’ sa’ li b’e li nokoxk’e chi sutq’iik chi wank rik’in li qaChoxahil Yuwa’. K’e xb’oqb’al anihaq li toje’ xkub’e xha’ re tixye reheb’ li kok’al k’a’ru nareek’a chirix li kub’iha’.

• Ch’olob’ naq li Jesukristo kixk’ut chiqu li tento taqab’aanu re q’ajk rik’in a’an chirix naq tookamq. Yiib’ xjalam-uuch jun li b’e chiru li pizarron ut k’e jun xjalam-uuch li Kristo sa’ xmaril. K’e reheb’ li kok’al jalam-uuch li te’reetali lix tzol’leb’ li Kristo (paab’aal chirix li Kristo, jalb’a-k’a’uxlej, kub’iha’, maatan re li Santil Musiq’ej, ut kuyuk toj sa’ roso’jik). Tenq’aheb’ chixk’eeb’aleb’ li jalam-uuch chiru li b’e.

• Tenq’aheb’ li kok’al chixkanab’ankil sa’ xk’a’uxleb’ li xkaa raqalil li paab’aal. B’ichahomaq sa’ komonil jun li b’ich chirix jun reheb’ li xb’eenileb’ na’leb’ re li evangelio, jo’ “Li paab’aal,” “Naq nakub’e lin ha’,” malaj “Tinsik’ ru li us” (B’ichleb’aal choq’ reheb’ li Kok’al, 50–51, 53, 82–83).

2 Nefi 32:3

Naru nintzeka xsahil li raatin li Kristo.

Chan ru naq li k’a’ru aanumsihom laa’at rik’in “xtzekankil xsahil li raatin li Kristo” (2 Nefi 32:2) naru naxtenq’aheb’ li kok’al chixtawb’al ru li ch’ol aatin a’an?

Kok’ k’anjel naru chi b’aanumank

• Kanab’eb’ li kok’al chixyeeb’al xk’ab’a’eb’ junjunq reheb’ li tzakemq jwal nawulak chiruheb’ ut kanab’eb’ chixk’utb’esinkil chan raj ru naq te’xtzeka xsahil. Il ru 2 Nefi 32:3 ut k’e xb’oqb’aleb’ li kok’al chi ab’ink chi us re naq te’xk’e reetal k’a’ru li tento taqatzeka xsahil, jo’ naxye laj Nefi. K’a’ru naraj naxye xtzekankil xsahileb’ li loq’laj hu? Ch’olob’ naq eb’ li loq’laj hu a’aneb’ li na’ajej naru naqataw wi’ li raatin li Kristo.

• Tz’iib’aheb’ chiru li pizarron li aatin Dios ut Qaawa’. Kanab’eb’ li kok’al chixteeb’aleb’ li loq’laj hu a’ yaal k’a’ru perel ut chixsik’b’aleb’ li aatin a’an. Wi na’ajman ru, tenq’aheb’. Ch’olob’ xyaalal naq wi naqileb’ ru li loq’laj hu, naru naqataw qana’leb’ chirix li Dios.

2 Nefi 32:8–9

Li qaChoxahil Yuwa’ naraj naq tintijoq junelik.

Eb’ li raqal a’an naru neke’xmusiq’aheb’ li kok’al chiroksinkil li tijok jo’ xcha’al lix yu’ameb’ rajlal kutan.

Kok’ k’anjel naru chi b’aanumank

• Patz’ reheb’ li kok’al jo’q’e neke’tijok. Ma neke’tijok eq’la? sa’ q’ojyin? naq okeb’ re chi wa’ak? Tenq’aheb’ li kok’al chixk’oxlankil chan raj ru te’reek’asi rib’ re xk’utb’al jo’q’e naru nokotijok, jo’ naq noko’aj, naq nokoyokla, naq nokowa’ak, malaj sa’ junaq chik hoonal. Il ru choq’ reheb’ jun malaj wiib’ raqal re 2 Nefi 32:9 ut jultika li ch’ol aatin “junelik tento textijoq.”

• Patz’ reheb’ li kok’al chan ru neke’tijok. K’a’ru neke’xb’aanu rik’in lix jolomeb’, li ruq’eb’, ut wan chik xkomon? K’a’ru neke’xye? Kanab’eb’ chixk’oxlankil naq laa’at ink’a’ nakanaw tijok ut kanab’eb’ chixk’utb’al chawu. K’a’ut naq li qaChoxahil Yuwa’ naraj naq tootijoq?

ch’ina xqa’al natijok

Naru noko’aatinak rik’in li Dios sa’ li tijok.

reetalil li k‘utuk

Xk’utb’al li tzol’leb’: Kok’al ak ninqeb’

2 Nefi 31

Li Jesukristo kixk’ut chiwu chan ru tinq’ajq rik’in lin Choxahil Yuwa’.

Naru nokoq’aj rik’in li Dios chirix li yu’am a’in wi naqataaqe li tzol’leb’ kixk’ut li Jesukristo: li paab’aal chirix li Kristo, li jalb’a-k’a’uxlej, li kub’iha’, li maatan re li Santil Musiq’ej, ut li kuyuk toj sa’ roso’jik.

Kok’ k’anjel naru chi b’aanumank

• K’ut li jalam-uuch natawman sa’ li tusleb’ aatin re li xamaan a’in re Kim, Taaqehin—Choq’ reheb’ li komon ut li junkab’al, ut kanab’eb’ li kok’al chixwotzb’al li neke’xnaw chirix lix kub’iha’ li Jesus (chi’ilmanq Mateo 3:13─17). Tz’iib’aheb’ li aatin a’in chi jek’inb’il ruheb’ chiru li pizarron: li Jesus kixk’ut xyaalal re li Yuwa’b’ej naq taa’ab’inq chiru. Kanab’eb’ li kok’al chirilb’al ru 2 Nefi 31:7 jo’ tzoleb’aal ut chixk’eeb’aleb’ li aatin sa’ tz’aqal xtusulal ru.

• Patz’ reheb’ li kok’al k’a’ raj ru te’xye re anihaq li yoo chixkawresinkil rib’ re taakub’eeq xha’, ut tenq’aheb’ chixtz’iib’ankil lix na’leb’eb’ chiru kok’ hu re naq te’xsi re anihaq. Chan ru naru yooqo chixtaaqenkil lix b’aanuhom li Jesus chirix naq nakub’e qaha’?

• Ch’olob’ naq lix tzol’leb’ li Kristo a’an ajwi’ li kixk’ut li Jesukristo naq tento taqab’aanu re naq tooq’ajq rik’in li qaChoxahil Yuwa’. Chiruheb’ jalan jalanq li perel hu, tz’iib’a paab’aal chirix li Kristo, jalb’a-k’a’uxlej, kub’iha’, maatan re li Santil Musiq’ej, Il ru 2 Nefi 31:11─19 choq’ reheb’ li kok’al ut kanab’eb’ chixk’eeb’aleb’ xhoonal re pisk’ok sa’ xb’eeneb’ li hu naq te’rab’i li na’leb’ wan chiruheb’ li hu. Tenq’aheb’ chixk’oxlankil jun xnumsihomeb’ rik’ineb’ li junjunq chi na’leb’.

2 Nefi 32:3–5

Naru nintzeka xsahil li raatin li Kristo.

K’a’ut naq aajel ru naq eb’ li kok’al te’xtaw ru lix aajelil ru xtzekankil xsahil raatin li Kristo?

Kok’ k’anjel naru chi b’aanumank

• Kanab’eb’ li kok’al chixk’oxlankil jun li ninq’e. K’a’ raj ru li tzakemq te’raj naq wanq aran? K’a’ raj ru te’xk’ux xb’een wa? Chirix a’an, naq laa’at yooqat chirilb’al ru 2 Nefi 32:2, kanab’eb’ chixk’oxlankil k’a’ru naraj naxye xtzekankil xsahileb’ li loq’laj hu K’a’ut naq laj Nefi kiroksi li aatin xtzekankil xsahil re xk’utb’al chiqu chan ru tento taqatzol li raatin li Dios? K’a’ut naq ink’a’ ka’ajwi’ kixye rilb’al ru? K’a’ru naraj naxye xtzekankil xsahileb’ li loq’laj hu? Wotz rik’ineb’ li kok’al li osob’tesihom aak’ulum laa’at rik’in xtzekankil xsahileb’ li loq’laj hu.

• Tz’aqob’resi ru li perel re kok’ k’anjel rik’ineb’ li kok’al ut k’e xb’oqb’aleb’ chixxaqab’ankil jun xjayalihomeb’ re xb’aanunkil k’a’ruhaq re xtzekankil xsahileb’ li loq’laj hu chiru li xamaan a’in.

2 Nefi 32:8–9

Li qaChoxahil Yuwa’ naraj naq tintijoq junelik.

Laj tza nokoraale re naq ink’a’ tootijoq. K’oxla chan ru naru nakatenq’aheb’ li kok’al chixq’axb’al ru li aaleek a’an ut re naq “junelik tento te’tijoq” (2 Nefi 32:9).

Kok’ k’anjel naru chi b’aanumank

• Sik’ ru jun li ch’ol aatin chirix li tijok sa’ 2 Nefi 32:8─9, tz’iib’a chiru li pizarrón, ut rameb’ ru li junjunq chi aatin rik’in hu. Kanab’eb’ li kok’al chixk’eeb’aleb’ xhoonal re risinkil li hu chi junjunq toj reetal naq te’ruuq chixq’ehinkil k’a’ru naxye li ch’ol aatin.

• Ilomaq ru sa’ komonil 2 Nefi 32:8─9 ut kanab’eb’ li kok’al chixwotzb’al li neke’xtzol chirix li tijok sa’eb’ li raqal a’an. K’a’ru naraj naxye “junelik tento textijoq”? (raqal 9). Chan ru naqab’aanu a’an?

• K’a’ raj ru xyaalal naq anihaq ink’a’ raj taaraj tijok? Wotz jun aanumsihom b’ar wi’ laa’at xattijok us ta ink’a’ wan laa wajom re xb’aanunkil. Chan ru xaweek’a chirix a’an? Kanab’ jun li ch’ina al chirilb’al ru li xkab’ raqal re 2 Nephi 32:8, ut k’e xhoonaleb’ li kok’al chixk’oxlankil rix a’an. K’a’ut naq laj Satanas ink’a’ naraj naq tootijoq? Chan raj ru taajultiko’q qe naq tento tootijoq us ta maak’a’ li qajom re xb’aanunkil?

reetalil li tzolok

Xb’oqb’aleb’ chi tzolok sa’ kab’l

Waklesiheb’ xch’ool li kok’al chixtawb’al anihaq—jun ramiiweb’, jun li riitz’ineb’ malaj junaq chik komon sa’ lix junkab’aleb—li naru neke’xk’ut chiru li tijok.

Xchaab’ilob’resinkil li qak’utum

Eb’ li kok’al aj ajeb’ ru. Kanab’eb’ li kok’al chixk’utb’esinkileb’ esilal wankeb’ sa’eb’ li loq’laj hu ut sa’eb’ li b’ich. Oksi lix ajikeb’ ru re xchaab’ilob’resinkil li tzolok. (Chi’ilmanq Li k’utuk jo’ li Kolonel, 25─26.)

perel re kok’ k’anjel: li xtzekankil xsahil li raatin li Kristo nokoxch’olani sa’ musiq’ej