li rey aj Benjamin nak’utuk chiru lix tenamit

Wankex chi k’anjelak chiru lee Dios, xb’aan laj Walter Rane

20–26 agosto

Mosiah 4–6

“Jun nimla jalok qe”

Naq nakawil ru Mosiah 4–6 ut nakatk’oxlak chirix, k’e reetal lix musiq’ahom li Santil Musiq’ej. K’a’ruheb’ li chaab’il na’leb’ eek’asinb’ilat chixb’aanunkil? (chi’ilmanq Mosiah 5:2).

Xtz’iib’ankil li nakak’oxla

Ma xawab’i chi aatinak anihaq jun sutaq ut xat-eek’asiik chixjalb’al laa yu’am? Maare rik’in li xawab’i xak’e aach’ool naq taajal b’ayaq laa yu’am—malaj ut naq taajal chi us. Li raatin li rey aj Benjamin a’an jun xnimal ru aatin jo’ a’an, ut eb’ li yaalil na’leb’ kixk’ut a’an kireek’asiheb’ chi jo’kan. Li rey aj Benjamin kixwotz rik’in lix tenamit li k’a’ru k’utb’esinb’il chiru xb’aan jun li anjel—naq xninqal ru osob’tesihom taaruuq te’k’ule’q sa’ xk’ab’a’ “lix kik’el li Kristo li natojok rix li maak” (Mosiah 4:2). Li raatin kixjal chan ru naq ke’ril rib’ li tenamit (chi’ilmanq Mosiah 4:2), kixjal li rajomeb’ xch’ool (chi’ilmanq Mosiah 5:2), ut kixmusiq’aheb’ chi ok sa’ aatin rik’in li Dios naq junelik te’xb’aanu li rajom a’an (chi’ilmanq Mosiah 5:5). Jo’ka’in naq li raatin li rey aj Benjamin kixk’e chi jalaak lix tenamit. Chan ru naq taajaloq aawe laa’at?

reetalil li tzolok aajunes

Li na’leb’ re xtzolb’aleb’ li loq’laj hu aajunes

Mosiah 4

Sa’ xk’ab’a’ li Jesukristo, naru tink’ul ut taakanaaq wik’in li risinkil inmaak.

Ch’a’aj li numtaak sa’ xb’een li ruchich’och’il winq. Naraj ru xnimal lix anchalil li qach’ool re ok choq’ “aj santil paab’anel sa’ xk’ab’a’ lix tojb’al rix li maak xb’aan li Kristo li Qaawa’ ” (Mosiah 3:19). Wan naq, us ta nakaweek’a naq kuyb’ileb’ laa maak, maare toj taach’a’ajko’q chawu reek’ankil a’an ut kanaak sa’ xb’ehil li tiikilal. Li rej aj Benjamin kixk’ut chiru lix tenamit chan ru naq te’xk’ul li risinkil lix maakeb’ ut chan ru taakanaaq a’an re te’wanq rajlal jo’ jun aj santil paab’anel. Naq nakatzol li ch’ol 4 re li hu Mosiah, maare taapatz’ aawib’ li patz’om jo’ a’in:

Eb’ li raqal 1–12:K’a’ruheb’ li osob’tesink li ke’chal rik’ineb’ lix tenamit li rey aj Benjamin xb’aan li risinkil lix maakeb’? K’a’ru kixk’ut li rey aj Benjamin re xtenq’ankileb’ re taakanaaq rik’ineb’ li risinkil lix maakeb’? K’a’ru kixk’ut chirix chan ru naqak’ul li kolb’a-ib’? K’e reetal li kixye li rey aj Benjamin chirix li k’a’ru tento naq “junelik taakanaaq sa’ qach’ool” (raqal 11). K’a’ru eek’asinb’ilat chixb’aanunkil re naq te’jultik’oq aawe li k’a’aq re ru a’in?

Eb’ li raqal 12–16:Jo’ naxye sa’eb’ li raqal a’in, k’a’ru nak’ulman sa’ li qayu’am wi naqab’aanu li k’a’ru ch’olob’anb’il sa’ li raqal 11? Ma xak’ul li jalaak a’in sa’ laa yu’am? Chan ru naq a’in naxk’am rib’ rik’in li jalaak ch’olob’anb’il sa’ Mosiah 3:19?

Eb’ li raqal 16–30:Chan ru naq xwotzb’al li k’a’ru qe rik’ineb’ li neb’a’ nokoxtenq’a re taakanaaq qik’in li risinkil li qamaak? Chan ru naq naru taawoksi li raqal 27 sa’ lix yalb’al aaqe’ chi wank jo’ li Kristo?

Chi’ilmanq ajwi’ David A. Bednar, “Junelik taakanaaq eerik’in li risinkil lee maak,” Jolomil ch’utub’aj-ib’ re abril 2016; Dale G. Renlund, “Cómo conservar el gran cambio en el corazón,” Liahona, noviembre 2009, 97–99.

Mosiah 5:1–7

Lix Musiq’ li Qaawa’ naru tixk’e chi uxmank jun nimla jalaak sa’ inch’ool.

Chi kok’ aj xsa’ na’ab’iman li kristiaan chixyeeb’al, “Ink’a’ naru tinjalaaq. Ak we chi jo’kan.” Chixjunpak’alil a’an, lix numsihomeb’ lix tenamit li rey aj Benjamin naxk’ut chiqu chan ru naq lix Musiq’ li Qaawa’ naru chixjalb’al li qach’ool chi yaal. Li Awa’b’ej Russell M. Nelson kixk’ut: “Naru taqajal li k’aynaqo chixb’aanunkil. Tz’aqal li rajom qach’ool naru taajalaaq. … Li tz’aqal jalaak—li jalaak li ink’a’ taaraqe’q—ka’ajwi’ naru taachalq sa’ xk’ab’a’ li wankilal aj k’irtesinel, aj saqob’resinel, ut aj k’ehonel li wan re lix tojb’al rix li maak xb’aan li Jesukristo. … Lix evangelio li Jesukristo a’an ajwi’ jun evangelio re jalaak!” (“Decisiones para la eternidad,” Liahona, noviembre 2013, 108).

Naq nakawil ru resil li jalaak li ke’xnumsi lix tenamit li rey aj Benjamin, k’oxlan chirix chan ru li “nimla jalaak” li nak’amok sa’ li jalok ch’oolej ak xk’ulman—malaj naru taak’ulmanq—sa’ laa yu’am. Ma xb’aan junjunq li “ninqi” numsihom naq xjala laa ch’ool, malaj ma timil timil naq xk’ulman lix jalajik laa ch’ool?

Chi’ilmanq ajwi’ Esekiel 36:26–27; Alma 5:14; David A. Bednar, “Convertidos al Señor,” Liahona, noviembre 2012, 106–9.

li Kristo naxk’irtesi jun ixq li wan xyajel

Li Kolonel naru tixjal li qach’ool ut li qayu’am. Eb’ li uq’ej aj k’irtesinel, xb’aan laj Adam Abram

Mosiah 5:5–15

Nink’ul sa’ inb’een lix k’ab’a’ li Kristo naq nin’ok sa’ sumwank.

Li rey aj Benjamin kiraj aatinak rik’in lix tenamit re “tixk’e re li tenamit a’in jun li k’ab’a’ej.” Junjunq reheb’ a’aneb’ aj Nefita ut jalaneb’ chik a’aneb’ li riyajil laj Mulek, a’ut maawa’eb’ a’an li k’ab’a’ej li yoo chixk’oxlankil. A’an kixb’oqeb’ li tenamit chixk’ulb’al sa’ xb’eeneb’ “lix k’ab’a’ li Kristo” jo’ jun raqal li sumwank okenaqeb’ wi’ re ab’ink chiru li Dios (Mosiah 1:11; 5:10). K’a’ru nakatzol sa’ Mosiah 5:7–9 chirix li k’a’ru naraj naxye xk’ulb’al sa’ aab’een lix k’ab’a’ li Kristo?

Li Elder D. Todd Christofferson kixk’ut, “Lix yo’leb’aal li tiikil ut musiq’ejil wankilal a’an li Dios. Naru naqoksi li wankilal a’an sa’ xk’ab’a’eb’ li qasumwank rik’in a’an” (“El poder de los convenios,” Liahona, mayo 2009, 20). Naq nakawil ru Mosiah 5:5–15, tz’iib’a xtusulaleb’ li osob’tesink li te’chalq sa’ laa yu’am naq nakak’uulaheb’ li sumwank li xat’ok wi’ rik’in li Dios. Chan ru naq xk’uulankileb’ laa sumwank tatxtenq’a re taakanaaq li “nimla jalaak” li k’anjelanb’il chi sa’ laa waam sa’ xk’ab’a’ li Jesukristo ut lix tojb’al rix li maak li kixb’aanu?

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.

Mosiah 4:9–12

Chan ru naq laa junkab’al mas wi’chik naru “chixpaab’ankil li Dios” (chi’ilmanq Mosiah 4:9) ut “junelik taakanaaq sa’ xch’ooleb’ lix nimal ru li Dios”? (Mosiah 4:11). Maare eb’ li komon sa’ laa junkab’al naru te’ril ru Mosiah 4:9–12 ut te’xsik’eb’ li ch’ol aatin li neke’tenq’an chixnimob’resinkil lix paab’aaleb’ chirix li Dios. Chirix a’an, naru te’xtz’iib’aheb’ li ch’ol aatin a’an ut te’xk’eheb’ sa’ li ochoch re te’jutiko’q reheb’. Chan ru naq xjultikankil li k’a’aq re ru a’in tooxtenq’a re naq “junelik taasaho’q qach’ool” ut re naq “taakanaaq qik’in li risinkil li qamaak”? (Mosiah 4:12).

Mosiah 4:14–15

K’a’ru naqatzol chirix li pleetink-ib’ ut li wech’ok-ib’ sa’eb’ li raqal a’in?

Mosiah 4:16–26

Chan ru naq chiqajunilo laa’o aj lemoox? Jo’ naxye sa’eb’ li raqal a’in, chan ru naq tento taqil chixjunileb’ li ralal xk’ajol li Dios? (Mosiah 4:26). Ani naraj ru li qatenq’ankil?

Mosiah 4:27

Ma yoo chi alinak laa junkab’al chi q’axal kaw wi’chik chiru lix metz’ew? Maare naru taab’oqeb’ li komon sa’ laa junkab’al chixtz’ilb’al rix li jar paay chi k’anjel neke’oken wi’ re naq k’eeb’ilaqeb’ xch’ool, a’ut chaab’ilaqeb’ ajwi’ xna’leb’.

Mosiah 5:5–15

K’a’ru naraj naxye xk’ulb’al sa’ qab’een lix k’ab’a’ li Kristo chirix li qakomonil rik’in? Maare taak’anjelaq choq’ eere aatinak chirix k’a’ut naq wan naq eb’ li kristiaan neke’xjuch’ xk’ab’a’eb’ chiru li k’a’ru wan reheb’. Chan ru naru taqak’ut naq “reho” li Kolonel?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Xchaab’ilob’resinkil li qak’utum

Kanab’ chi wank li rahok. K’a’jo’ naq na’eek’aman li Musiq’ej sa’ lee rochoch a’ yaal jo’ chanru nekera eerib’ ut jo’ chanru naq wankex sa’ xyaalal cherib’il eerib’. Tenq’aheb’ chixjunil li komon sa’ laa junkab’al chixb’aanunkil li naru chiruheb’ re taawanq li rahok-ib’ ut li chaab’ilal sa’ lee rochoch, re naq chixjunileb’ te’reek’a naq neke’ru chixwotzb’al lix na’leb’eb’, lix patz’omeb’, ut lix nawomeb’ xch’ool. (Chi’ilmanq Li k’utuk jo’ li Kolonel, 15.)

li Kristo naxk’e xtzakemqeb’ li tz’ik chirix kab’l

Ilb’il chi rajlal xb’aan, xb’aan laj Greg K. Olsen