li rey aj Benjamin nak’utuk chiru lix tenamit

Wankex chi k’anjelak chiru lee Dios, xb’aan laj Walter Rane

20–26 abril.

Mosiah 4–6

“Jun nimla jalok qe”

B’ar wan reheb’ lix k’utum li rey aj Benjamin sa’ Mosiah 4─6 tixtenq’aheb’ chi us li kok’al nakatzoleb’ chireek’ankil “jun nimla jalok” (Mosiah 5:2) sa’ lix ch’ooleb’? Tz’iib’a li nakak’oxla naq yooqat chixsik’b’al aab’eresinkil rik’in li tijok.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Tz’iib’a xk’ab’a’eb’ li junjunq chi kok’al chiru kok’ setb’il hu ut k’eheb’ li kok’ hu sa’ jun li ch’ina sek’. Naq yooqat chirisinkileb’ li k’ab’a’ej sa’ li sek’, k’e xb’oqb’al li ch’ina al a’an chixwotzb’al k’a’ruhaq najultiko’ re, re li tzol’leb’ sa’ li xamaan xnume’ malaj k’a’ruhaq xtzol sa’ Mosiah 4─6 sa’ kab’l chiru li xamaan.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Mosiah 4:1–3, 10

Li jalb’a-k’a’uxlej naxk’e sahil ch’oolejil.

Tenq’aheb’ li kok’al chi tzolok chirix lix chaq’alil ru li maatan re li jalb’a-k’a’uxlej li wan choq’ qe sa’ xk’ab’a’ lix tojb’al rix li maak xb’aan li Jesukristo.

Kok’ k’anjel naru chi b’aanumank

• Oksi Mosiah 4:1─3 ut 10 re xk’utb’al chiruheb’ li kok’al li naraj naxye li jalb’a-k’a’uxlej. Qayehaq, tenq’aheb’ chixk’eeb’al reetal naq lix tenamit li rey aj Benjamin ke’raho’ xch’ool xb’aaneb’ lix maak ut naq ke’xpatz’ xkuyb’al xmaak (eb’ li raqal 1─2), ut naq li rey aj Benjamin kixye reheb’ naq te’xkanab’ lix maakeb’ (raqal 10). Il ru li raqal 3 choq’ reheb’ ut patz’ k’a’ru ke’reek’a li tenamit naq ke’xjal xk’a’uxleb’.

• Patz’ reheb’ li kok’al k’a’ru naqeek’a naq naqatz’ajni li qat’ikr. K’a’ru naqeek’a naq nokosaqo’ wi’chik? Ch’olob’ naq jo’ xpuch’b’al li t’ikr tz’aj ru, naru naqajal qak’a’uxl naq naqab’aanu li ink’a’ us. K’ut jun xjalam-uuch li Jesukristo ut ch’olob’ xyaalal naq wi naqajal qak’a’uxl, a’an wan xwankil re risinkileb’ li qamaak ut re qasaqob’resinkil wi’chik. B’ichahomaq sa’ komonil li xkab’ raqal re li b’ich “Chinaatenqʼa re tinkuyebʼ lix maak” (B’ichleb’aal choq’ reheb’ li Kok’al, 52). Patz’ reheb’ li kok’al k’a’ru naxk’ut li b’ich chirix li jalb’a-k’a’uxlej.

Mosiah 4:13–26

Tento tinwanq rik’ineb’ li was wiitz’in rik’in rahok ut rikin chaab’ilal.

Chan ru naru nakawoksi Mosiah 4:13─26 re xk’utb’al chiruheb’ li kok’al naq “te’xra rib’ chirib’ileb’ rib’, ut re te’k’anjelaq li jun chiru li jun chik”? (raqal 27).

Kok’ k’anjel naru chi b’aanumank

• Yiib’ xjalam-uuch jun ch’ina aamej chiru li pizarron. Kanab’eb’ li kok’al chixwotzb’al chan ru naru nokowan rik’in chaab’ilal rik’ineb’ li qas qiitz’in. Rajlal sut naq neke’xwotz k’a’ruhaq, sachb’esi li aamej ut yiib’ junaq mas nim chik. Ch’olob’ xyaalal naq li qarahom choq’ reheb’ li qas qiitz’in nak’i naq nokowan rik’in chaab’ilal rik’ineb’. K’e reheb’ li kok’al kok’ huhil aamej ut kanab’eb’ chixyiib’ankileb’ jalam-uuch re chan ru naru naqak’ut li qarahom ut li qachaab’ilal.

• Tenq’aheb’ li kok’al chixyoob’ankileb’ eek’asink-ib’ naru neke’xb’aanu naq neke’xb’icha jun li b’ich na’aatinak chirix xraab’aleb’ li qas qiitz’in, jo’ “Chiqara li qas qiitz’in” malaj “Li rahok cherib’il eerib’ ” (B’ichleb’aal choq’ reheb’ li Kok’al, 39, 74).

Mosiah 5:5–15

Naq ninb’aanu li sumwank rik’in li Dios, nink’ul xk’ab’a’ li Kristo sa’ inb’een.

K’oxla chan ru naru nakatenq’aheb’ li kok’al nakatzoleb’ chixkawresinkileb’ rib’ re xb’aanunkil li sumwank re li kub’iha’ rik’in li Dios ut re naq “ralal xk’ajol li Kristo taayehe’q reheb’ ” (Mosiah 5:7).

Kok’ k’anjel naru chi b’aanumank

• Tenq’aheb’ li kok’al chixyiib’ankileb’ kok’ eetalil te’xk’am li k’ab’a’ej “Jesukristo” ut chixk’eeb’al chiruheb’ lix kamiis chixk’atq li raameb’ (il sa’ li perel re kok’ k’anjel re li xamaan a’in). Ch’olob’ naq li rey aj Benjamin kixk’ut chiru lix tenamit naq rik’in naq naqab’aanu li sumwank, malaj yeechi’ihom, rik’in li Dios, a’an chanchan xk’amb’al xk’ab’a’ li Kristo “junelik… chi tz’iib’anb’il sa’ li qach’ool” (Mosiah 5:12). K’a’ru naqayeechi’i xb’aanunkil naq nakub’e qaha’ ut naqak’ul li loq’laj wa’ak? (chi’ilmanq Mosiah 5:8; Tzol’leb’ ut Sumwank 20:37, 77, 79).

• Patz’ reheb’ li kok’al k’a’ raj ru te’xb’aanu re te’ok choq’ ramiiw anihaq (qayehaq, aatinak rik’ineb’ a’an, xb’aanunkil k’a’aq re ru rik’ineb’ ut xnumsinkil hoonal rik’ineb’). Il ru Mosiah 5:13 choq’ reheb’ li kok’al. K’a’ru naru naqab’aanu re xnawb’al ru li Jesukristo chi chaab’il, re naq moko a’anaq ta chik “li moko nawb’il ta ru” xb’aaneb’?

reetalil li k‘utuk

Xk’utb’al li tzol’leb’: Kok’al ak ninqeb’

Mosiah 4:1–11

Naru ninjal ink’a’uxl.

Chan ru naru nakatenq’aheb’ li kok’al chixtawb’al ru li naraj naxye li jalok k’a’uxl? B’ar wan reheb’ li raqal sa’ Mosiah 4:1─11 nakak’oxla laa’at naq naru naxtenq’aheb’ li kok’al?

Kok’ k’anjel naru chi b’aanumank

• Tz’iib’a li aatin kuyuk maak chiru li pizarron. Ilomaq ru sa’ komonil Mosiah 4:1─3 ut kanab’eb’ li kok’al chixsik’b’aleb’ aatin sa’ li raqal 3 li neke’xch’olob’ li osob’tesihom naqak’ul naq naqajal qak’a’uxl ut naqak’ul xkuyb’al qamaak.

• Kanab’eb’ li kok’al chixyeeb’aleb’ xk’ab’a’ k’a’aq re ru tento taqab’aanu re xjalb’al qak’a’uxl chi tz’aqal re ru ut chi anchal qach’ool. Tenq’aheb’ chixtawb’al junjunq reheb’ li k’a’aq re ru a’an sa’ Mosiah 4:10 ut aatinanqex chirix li naraj neke’xye li aatin ut li ch’ol aatin neke’tawman sa’ li raqal a’an. Wotz jun li esil naxk’utb’esi li jalb’a-k’a’uxlej, maare re laa yu’am laa’at malaj sa’ junaq li kok’ hu re li Iglees.

• Tenq’aheb’ li kok’al chixtawb’aleb’ aatin sa’ Mosiah 4:6, 9, ut 11 li neke’aatinak chirix li qaChoxahil Yuwa’. K’a’ut naq aajel ru xtawb’al ru chan ru rilb’al li qaChoxahil Yuwa’ naq naqaj ru xjalb’al qak’a’uxl? Wotz lix nawom aach’ool chirix chan ru aaweek’ahom lix rahom li Dios naq nakajal aak’a’uxl.

Mosiah 4:12–26

Li evangelio nikinixmusiq’a chi wank rik’ineb’ li was wiitz’in rik’in rahok ut chaab’ilal.

Li rey aj Benjamin kixk’ut naq wi nokochal rik’in li Kristo ut naqak’ul xkuyb’al qamaak, “toonujaq rik’in lix rahom li Dios” (Mosiah 4:12), li nokoxk’e chi wank rik’in rahom ut chaab’ilal rik’ineb’ li qas qiitz’in.

Kok’ k’anjel naru chi b’aanumank

• Tenq’aheb’ li kok’al chixsik’b’aleb’ ch’ol aatin sa’ Mosiah 4:13─16, 26 li te’xch’olob’ chan ru naru nokok’anjelak chiruheb’ li qas qiitz’in. Kanab’eb’ chixk’utb’esinkileb’ li k’a’aq re ru a’an malaj chixyiib’ankileb’ xjalam-uucheb’, ut kanab’eb’ naq lix komoneb’ li kok’al te’xq’ehi li ch’ol aatin. Chan ru naru naqak’ut qarahom ut qachaab’ilal sa’ ochoch, sa’ li eskweel, malaj sa’ li iglees?

• Kanab’eb’ li kok’al chixwotzb’al jun xnumsihomeb’ b’ar wi’ xe’rahok ut xe’k’anjelak chiru anihaq, ut k’a’ru xe’reek’a chirix li xe’xb’aanu. B’ar wan junjunq reheb’ lix yaalal naq eb’ li kristiaan maare ink’a’ neke’raj k’anjelak chiruheb’ li ras riitz’in? Patz’ reheb’ li kok’al k’a’ raj ru te’xye re anihaq re xwaklesinkil xch’ool chixtenq’ankileb’ li kristiaan wankeb’ sa’ rajb’al ru. Naru neke’xtaw xna’leb’eb’ sa’ Mosiah 4:16─26.

ch’ina xqa’al nab’atz’un rik’in jun k’uula’al

Li Jesukristo kixk’ut chiqu naq toowanq rik’in chaab’ilal rik’ineb’ li qas qiitz’in.

Mosiah 5:5–15

Naq nakub’e inha’ ut nintz’aqon sa’ li loq’laj wa’ak, nink’ul xk’ab’a’ li Kristo sa’ inb’een.

Naab’al reheb’ li kok’al nakatzoleb’ maare ak kub’enaqeb’ xha’ ut yookeb’ chix’ak’ob’resinkil xsumwank rik’in li loq’laj wa’ak. Jultika reheb’ naq jun xcha’al aajel ru li sumwank re li kub’iha’, a’an xk’ulb’al sa’ xb’eeneb’ lix k’ab’a’ li Jesukristo.

Kok’ k’anjel naru chi b’aanumank

• Yiib’ xjalam-uuch jun sirso chiru li pizarron ut k’e jun xjalam-uuch li Jesukristo sa’ xyi. Kanab’eb’ li kok’al chixyiib’ankil xjalam-uucheb’ a’an naq yooqeb’ chirilb’al ru Mosiah 5:8 sa’ komonil. K’a’ru naxye li raqal a’an naq tento taqak’ul sa’ qab’een? K’a’ru li “xoo’ok wi’ ”? Kanab’eb’ li kok’al chixtz’iib’ankil xk’ab’a’ li Kristo sa’ lix jalam-uucheb’ a’an xe’xyiib’ ut chixk’eeb’aleb’ lix jalam-uuch sa’ li sirso rik’in lix jalam-uuch li Kolonel. K’a’ru li sumwank noko’ok wi’ naq nakub’e qaha’ ut naq nokotz’aqon sa’ li loq’laj wa’ak? (chi’ilmanq Mosiah 18:8–9; Tzol’leb’ ut Sumwank 20:77, 79).

• Aatinan rik’ineb’ li kok’al chirix k’a’ut naq eb’ li kristiaan neke’xk’e xk’ab’a’eb’ sa’ junjunq k’a’aq re ru, jo’ eb’ li k’anjel re li eskweel, li t’ikr re b’atz’unk, ut wankeb’ chik xkomon (chi’ilmanq Mosiah 5:14─15). Chan ru naru naqak’ut naq wan xk’ab’a’ li Kristo “junelik … chi tz’iib’anb’il sa’ li qach’ool”? (Mosiah 5:12).

• K’e xb’oqb’al jun li saaj winq malaj saaj ixq re laa teep chi wulak sa’ laa tzoleb’aal re xch’olob’ankileb’ li sumwank neke’qa’ak’ob’resi naq nokotz’aqon sa’ li loq’laj wa’ak. Il ru rik’ineb’ li kok’al lix tijuleb’ li loq’laj wa’ak wankeb’ sa’ Tzol’leb’ ut Sumwank 20:77 ut 79, ut kanab’eb’ chixsik’b’aleb’ ch’ol aatin li te’xch’olob’ li naqayeechi’i naq taqab’aanu, ut k’a’ru naxyeechi’i qe li Qaawa’ choq’ reeqaj.

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixyiib’ankil xjalam-uuch k’a’ruhaq xe’xtzol chiru li kutan a’in ut chiroksinkil lix jalam-uucheb’ re xk’utb’al chiruheb’ lix junkab’al li xex’tzol.

Xchaab’ilob’resinkil li qak’utum

K’ut chiruheb’ li kok’al xtz’iib’ankil li neke’xk’oxla. Eb’ li kok’al naru ajwi’ neke’xtzol xk’aytesinkil rib’eb’ chixtz’iib’ankil li neke’xk’oxla rik’in li Musiq’ej; qayehaq, naq neke’xjuch’ lix loq’laj hu, naq neke’xyiib’ jalam-uuch, malaj naq neke’xtz’iib’a kok’ na’leb’ sa’ lix huheb’.

perel re kok’ k’anjel: sa’ xb’aanunkil sumwank rik’in li Dios naraj naxye naq ninwulak jo’ xtzolom li Kristo