laj Ammon nak’utuk chiru li rey aj Limhi

Laj Ammon chiru li rey aj Limhi, xb’aan li xMinerva K. Teichert

27 abril–3 mayo

Mosiah 7–10

“Rik’in lix metz’ew li Qaawa’ ”

Rik’in tijok, il ru Mosiah 7─10 ut k’oxlan chirixeb’ li na’leb’ nakak’ul. Chan ru naq eb’ li yaal reheb’ li ch’ol a’an neke’ru chi tenq’ank re xb’aanunkil li nak’anjelak choq’ reheb’ li kok’al nakatzoleb’?

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Waklesiheb’ xch’ool li kok’al chixwotzb’al k’a’ruhaq neke’xnaw chirix li nak’ulman sa’eb’ li ch’ol a’an. “Ch’ol 13: Laj Tzeniff” (Eb’ li Esilal sa’ lix Hu laj Mormon, 36─37, malaj li video sa’ ChurchofJesusChrist.org) naru neke’oksiman.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Mosiah 7:18–20, 33

Li Dios kixtenq’aheb’ li kristiaan reheb’ li loq’laj hu, ut naru nikinixtenq’a ajwi’ laa’in.

Lix tenamit laj Limhi, li kiwan chi preexil xb’aaneb’ laj Lamanita, ke’raj ru xpaab’ankil naq te’tenq’aaq xb’aan li Dios, jo’kan naq laj Limhi kixjultika reheb’ li hoonal naq ke’teenq’aak chaq xb’aan li Dios.

Kok’ k’anjel naru chi b’aanumank

• Kanab’eb’ li kok’al chi aatinak chirix junaq hoonal b’ar wi’ xe’raj ru tenq’aak. Ch’olob’ naq lix tenamit li rey aj Limhi kiwan xch’a’ajkilaleb’, ut xb’aan a’an naq kixwotz reheb’ jun li esil re xtenq’ankileb’ re te’wanq xpaab’aal. Il ru Mosiah 7:19 rik’ineb’ li kok’al ut k’ut jun xjalam-uucheb’ li ralal xk’ajol aj Israel naq yookeb’ chixq’axb’al ru li Kaqi Palaw (chi’ilmanq Moises divide las aguas del Mar Rojo, ChurchofJesusChrist.org). Yaab’asi wi’chik li esil a’an ut li re ajwi’ li mana, ut tenq’aheb’ li kok’al chixk’utb’esinkileb’ li esil a’an (che’ilmanq li ch’ol 17ut 18 sa’ Eb’ li Esilal sa’ li Najter Chaq’rab’, malaj eb’ li video wankeb’ sa’ ChurchofJesusChrist.org). Chan ru naq li Qaawa’ kixtenq’aheb’ lix tenamit? Ch’olob’ naq li Qaawa’ naru ajwi’ nokoxtenq’a laa’o.

• Il ru Mosiah 7:33 rik’ineb’ li kok’al ut tenq’aheb’ chixtawb’al ru k’a’ru naxk’ut li raqal naq tento taqab’aanu re xk’ulb’al xtenq’ li Qaawa’. Tenq’aheb’ li kok’al chixyoob’ankileb’ eek’asink-ib’ li te’reetali li k’a’aq re ru a’an, ut ka’suti li raqal naq yooqeb’ chireek’asinkileb’ rib’. B’ar wan junjunq reheb’ li k’a’aq re ru b’ar wi’ naqaj ru li tenq’? Chan ru naru naqak’ut naq qakanab’ahom qib’ chiru li Qaawa’? Wotz jun aanumsihom b’ar wi’ xakanab’ aawib’ chiru li Qaawa’ ut a’an xatxtenq’a.

• Sik’ ru junjunq raqal re “Lix Hu laj Mormon naxk’ut” malaj “Kaw lix ch’ool laj Nefi” (B’ichleb’aal choq’ reheb’ li Kok’al, 62─63, 64─65) re xb’ichankil rik’ineb’ li kok’al. Tenq’aheb’ chixk’eeb’al reetal chan ru naq li Qaawa’ kixtenq’aheb’ li kristiaan a’an sa’ lix Hu laj Mormon. Wotz jalaneb’ chik esil reheb’ li loq’laj hu li nakaweek’a naq tixtenq’aheb’ li kok’al chixtzolb’al xkanab’ankileb’ rib’ chiru li Qaawa’.

Mosiah 8:16–17

Li Dios naxtaqlaheb’ chaq qe li profeet, aj ilol na’leb’, ut aj k’utb’esinel.

Chan ru naru nakawoksi Mosiah 8:16─17 re xk’utb’al chiruheb’ li kok’al chirix lix k’anjel jun profeet jo’ aj ilol na’leb’?

Kok’ k’anjel naru chi b’aanumank

• K’ut chiruheb’ li kok’al chan ru xk’eeb’aleb’ li ruq’ sa’eb’ li ru chanchan ta wi’ naq yooqeb’ chi ilok chiru kaxlan lem. Il ru Mosiah 8:17 ut kanab’eb’ li kok’al chiroksinkileb’ li “kaxlan lem” naq te’rab’i li aatin “aj ilol na’leb’.” Ch’olob’ naq li Dios naxtaqlaheb’ chaq li profeet ut naq jun reheb’ lix k’anjel jun profeet a’an li wank jo’ “aj ilol na’leb’,” xb’aan naq naru “rilb’al” li k’a’ru taachalq. Wotzeb’ reetalil li k’a’aq re ru rilomeb’ li profeet ut xk’utb’esihomeb’ chiqu (jo’eb’ li loq’laj hu), malaj wotz jun eetalil re junaq hoonal b’ar wi’ jun profeet yoo chi k’anjelak jo’ aj ilol na’leb’ (jo’ li wan sa’ 1 Nefi 11:20─21).

• Yiib’eb’ xjalam-uuch kok’ oqej chiru hu chi setb’il, ut chiruheb’ yiib’ xjalam-uucheb’ li k’a’ru xe’xye li profeet naq taqab’aanu. Yiib’ jun li b’e rik’ineb’ li kok’ oqej sa’ li tzoleb’aal ut ch’olob’eb’ li jalam-uuch. Kanab’eb’ li kok’al chixk’eeb’aleb’ xhoonal re te’xk’e rib’ choq’ profeet ut te’xb’eresi xkomoneb’ li kok’al chixtaaqenkileb’ li kok’ oqej.

• K’e chi kutankil li jalam-uuch wan sa’ li tusleb’ aatin re li xamaan a’in re Kim, Taaqehin—Choq’ reheb’ li komon ut li junkab’al, ut kanab’eb’ li kok’al chixch’olob’ankil li neke’ril. Ch’olob’ naq li profeet aj Jose Smith kiwan jo’ jun aj ilol na’leb’. Li Qaawa’ kixk’e re jun k’anjeleb’aal Urim ut Tumim xk’ab’a’, chanchan jun li pek aj ilol na’leb’, re naq taaroksi sa’ xjaltesinkil ru lix Hu laj Mormon.

• K’ut jun raqal re li raatin li Awa’b’ej re li Iglees chiru li jolomil ch’utub’aj-ib’ toje’ xnume’ (malaj, k’ut jun xjalam-uuch a’an ut il ru k’a’ruhaq kixk’ut). Ch’olob’ xyaalal naq a’an jun li profeet, aj ilol na’leb’, ut aj k’utb’esinel.

reetalil li k‘utuk

Xk’utb’al li tzol’leb’: Kok’al ak ninqeb’

Mosiah 7:18–20, 33; 9:14–19; 10:6–10, 19–21

Li Dios kixtenq’aheb’ li kristiaan reheb’ li loq’laj hu, ut naru nikinixtenq’a ajwi’ laa’in.

Li Dios kixtenq’aheb’ li kristiaan reheb’ li loq’laj hu, ut naru nikinixtenq’a ajwi’ laa’in. K’a’ru naru neke’xtzol li kok’al sa’ li esil a’an chirix naq li Dios naxtenq’aheb’ li ralal xk’ajol?

Kok’ k’anjel naru chi b’aanumank

• K’uub’eb’ ru li kok’al sa’ oxib’ ch’uut ut kanab’eb’ li junjunq ch’uut chixtzolb’al jun reheb’ li esil a’in sa’eb’ li loq’laj hu: eb’ laj Israel ke’xq’ax ru li Kaqi Palaw (chi’ilmanq Exodo 14:10–14, 21–31), lix junkab’al laj Lehi kib’eek chiru li yamyookil ch’och’ (chi’ilmanq 1 Nefi 16:9–16; 17:1–6), ut lix tenamit laj Tzeniff ke’ach’ab’aak chiruheb’ laj Lamanita (chi’ilmanq Mosiah 9:14–19; 10:6–10, 19–21). Chan ru ke’xk’ut li kristiaan sa’eb’ li esil a’in naq ke’xk’anab’ rib’ chiru li Dios? Chan ru ke’tenq’aak xb’aan li Dios? Chan ru nokoxtenq’a laa’o naq naqakanab’ qib’ chiru a’an?

• Kanab’eb’ oxib’ li kok’al chixtz’iib’ankil chiru li pizarron jun xyalb’aleb’ rix malaj xch’a’ajkilaleb’ wan. Kanab’ jun li ch’ina al chirilb’al ru Mosiah 7:33 ut waklesiheb’ xch’ool xkomoneb’ li kok’al chirisinkil jun reheb’ li yale’k-ix malaj jun ch’a’ajkilal rajlal sut naq te’rab’i k’a’ruhaq naru neke’xb’aanu re xk’ulb’al xtenq’ li Qaawa’. Chan ru naq xkanab’ankil qib’ chiru li Qaawa’ nokoxtenq’a chixq’axb’aleb’ ru lix yalb’al qix?

Mosiah 8:12–19

Li Qaawa’ naxb’oqeb’ profeet, aj ilol na’leb’, ut aj k’utb’esinel choq’ re xchaab’ilaleb’ chixjunileb’ li winq.

Naqaxaqab’ xwankileb’ li Xb’eenil Awa’b’ejil ut li Kab’laju chi Apostol jo’ profeet, aj ilol na’leb’, ut aj k’utb’esinel. Chan ru naru nakak’ut chiruheb’ li kok’al lix loq’aleb’ li profeet?

Kok’ k’anjel naru chi b’aanumank

• Sik’ ru k’iila aatin aajeleb’ ru sa’ Mosiah 8:12─19 ut tz’iib’aheb’ chiru li pizarron. Kanab’ jun li ch’ina al chirilb’aleb’ ru li raqal a’an ut kanab’eb’ lix komoneb’ li kok’al chixtaqsinkileb’ li ruq’ naq te’rab’i li junjunq chi aatin wankeb’ chiru li pizarron. Kanab’omaq rilb’al ru li raqal ut aatinanqex chirix li junjunq chi aatin jo’ tzoleb’aal.

• Kanab’eb’ li kok’al chirilb’al wi’chik ru Mosiah 8:16─18 re te’xtzol k’a’ru a’an laj ilol na’leb’. Tz’iib’a li ch’ol aatin a’in chiru li pizarron: Jun aj ilol na’leb’ a’an chanchan . Tenq’aheb’ li kok’al chixk’oxlankil chan ru xtz’aqob’resinkil ru li ch’ol aatin a’an re xch’olob’ankil k’a’ut naq laj ilol na’leb’ a’an jun osob’tesihom choq’ qe; qayehaq, jun aj ilol na’leb’ a’an chanchan jun aj ilol numximel, li naxye qe naq wan li xiw xiw.

• Sik’ ru jun ch’ol aatin sa’ Mosiah 8:16─17, ut tz’iib’a chiru li pizarron rik’in xjalinkil ru li junjunq chi aatin rik’ineb’ kok’ eetalil yoob’anb’ileb’. K’e reheb’ li kok’al jun xtusulaleb’ li eetalil a’an ut eb’ li aatin neke’reetali, ut kanab’eb’ “chixjaltesinkil ru” li ch’ol aatin, jo’ neke’xb’aanu laj ilol na’leb’. B’ar wan junjunqeb’ xyaalal naq eb’ li profeet, aj ilol na’leb’, ut aj k’utb’esinel a’aneb’ jun “nimla chaab’ilal” choq qe? (Mosiah 8:18).

Mosiah 9:14–18; 10:10–11

Naq q’un inmetz’ew, li Qaawa’ naru naxkawob’resi inmetz’ew.

Naq eb’ li kok’al neke’xnumsi ch’a’ajkilal, wan naq neke’reek’a naq q’uneb’ xmetz’ew malaj ink’a’ neke’ru chixkolb’al rib’eb’. Oksi li seraq’ chirix lix tenamit laj Tzeniff re xk’utb’al chiruheb’ li kok’al naq li Qaawa’ naru naxk’e xkawilal xmetz’eweb’.

Kok’ k’anjel naru chi b’aanumank

• Kanab’eb’ li kok’al chixwotzb’al chan ru naru neke’kawu xmetz’ew sa’ tib’elej. K’a’ru naraj naxye naq kaweb’ rib’ “jo’ chanru xkawilaleb’ li winq”? (chi’ilmanq Mosiah 10:11). K’a’ru naraj naxye “xik rik’in xmetz’ew li Qaawa’ ”? (chi’ilmanq Mosiah 9:17–18; 10:10). Chan ru naq naqak’ul lix metz’ew li Qaawa’?

• Kanab’eb’ li kok’al chixyiib’ankil jun xjalam-uuch anihaq neke’reek’a a’an naq wan xmetz’ew jo’ xmetz’ew li Qaawa’ ut chixwotzb’al k’a’ut naq xe’xyiib’ xjalam-uuch li kristiaan a’an.

reetalil li tzolok

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chixwotzb’al rik’ineb’ lix junkab’al jun esil wan sa’ li loq’laj hu li tixmusiq’aheb’ “chixkanab’ankileb’ rib’ chiru li Dios” (Mosiah 7:19).

Xchaab’ilob’resinkil li qak’utum

Oksiheb’ li musiq’anb’il patz’om. Oksiheb’ patz’om li te’xk’e xb’oqb’aleb’ li kok’al chixwotzb’al lix nawom xch’ooleb’ chirixeb’ li yaalil na’leb’ re li evangelio. Qayehaq, wi yookex chi aatinak chirixeb’ li profeet, naru nakak’e xb’oqb’aleb’ chixwotzb’al chan ru naq neke’osob’tesiik xb’aaneb’ li profeet.

perel re kok’ k’anjel: li Qaawa’ naxb’oqeb’ profeet sa’ li ruchich’och’