yoo chi eelelik lix tenamit li rey aj Limhi

Relik li rey aj Limhi rochb’eeneb’ lix tenamit, xb’aan li xMinerva K. Teichert

11–17 mayo

Mosiah 18–24

Okenaqo sa’ jun sumwank rik’in a’an

Naq yooqat chirilb’al ru Mosiah 18─24, che’wanq li kok’al nakatzoleb’ sa’ laa k’a’uxl. Li Santil Musiq’ej naru chatenq’ankil chixk’eeb’aleb’ reetal li yaal aajelaqeb’ ru choq’ reheb’ a’an.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

K’ut jun jalam-uuch re xkub’iha’ anihaq ut kanab’eb’ li kok’al chixwotzb’al k’a’ruhaq neke’xnaw chirix li kub’iha’. Naru neke’xwotz k’a’ruhaq xe’xtzol naq yookeb’ chirilb’al ru Mosiah 18─24 rik’ineb’ lix junkab’al, naq xe’wulak sa’ junaq kub’iha’, malaj sa’ junaq chik hoonal.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Mosiah 18:7–16

Naq nakub’e inha’ ninb’aanu jun sumwank rik’in li Dios.

Jun na’leb’ jwal aajel ru re xtenq’ankileb’ li kok’al chixkawresinkileb’ rib’ choq’ re li kub’iha’, a’an xk’utb’al chiruheb’ li sumwank te’xb’aanu naq te’kub’eeq xha’.

Kok’ k’anjel naru chi b’aanumank

• Yaab’asi li esil chirix laj Alma ut lix tenamit sa’ li ha’ re Mormon, rik’in roksinkil Mosiah 18:7─16 malaj “Ch’ol 15: Laj Alma najultikan aatin ut nakub’sin ha’ ” (Eb’ li Esilal sa’ lix Hu laj Mormon, 43─44, malaj li video sa’ ChurchofJesusChrist.org). K’ut li jalam-uuch wan sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, ut kanab’eb’ li kok’al chixyeeb’al aawe k’a’ru neke’xnaw chirix li esil a’an.

• Rik’in roksinkil Mosiah 18:8─10 jo’ jun aj b’eresinel, k’ut chiruheb’ li kok’al rik’in laa waatin junjunq li yeechi’ihom te’xb’aanu naq te’kub’eeq xha’. Qayehaq, te’xyeechi’i xtaaqenkil li qaChoxahil Yuwa’ ut li Jesus naq te’xk’ojob’ xch’ool li ani raheb’ xch’ool. Wotz jun li esil chirix chan ru naq laa’at malaj anihaq chik nakanaw ru kixpaab’eb’ li yeechi’ihom a’an. (Chi’ilmanq ajwi’ Tzol’leb’ ut Sumwank 20:77, 79; xCarole M. Stephens, “Tenemos gran motivo para regocijarnos,” Liahona, noviembre 2013, 115─117.)

• Ch’olob’ naq sa’ xk’ulb’al laa’o li kub’iha’, li qaChoxahil Yuwa’ naxk’e ajwi’ xyeechi’ihom choq’ qe. Wotzeb’ li yeechi’ihom a’an, jo’ chanru ch’olob’anb’il sa’ Mosiah 18:9─10.

Mosiah 18:17–28

Naq nakub’e inha’, nin’ok jo’ komon sa’ lix Iglees li Jesukristo.

Tenq’aheb’ li kok’al chixtawb’al ru k’a’ru naraj naxye ok jo’ komon re li Iglees rik’in li kub’iha’ ut li k’ojob’aak.

Kok’ k’anjel naru chi b’aanumank

• K’e xb’oqb’al junaq komon toje’ xkub’e xha’ re tixwotz lix numsihom. Il ru Mosiah 18:17 ut ch’olob’ naq xb’aan naq nakub’e qaha’ noko’ok jo’ komon re lix Iglees li Jesukristo reheb’ laj Santil Paab’anel sa’ Roso’jikeb’ li Kutan ut naqayeechi’i xtaaqenkil li Jesus.

• K’uteb’ jalam-uuch chiruheb’ li kok’al li neke’reetali li nach’olob’aman sa’ Mosiah 18:17─28. Qayehaq, li jalam-uuch La ordenación al sacerdocio (Libro de obras de arte del Evangelio, ajl 106) naru nareetali li raqal 18, ut li jalam-uuch El pago del diezmo (Libro de obras de arte del Evangelio, ajl 113) naru nareetaliheb’ li raqal 27─28. Kanab’eb’ li kok’al chixch’olob’ankil li neke’ril sa’eb’ li jalam-uuch, ut oksiheb’ li jalam-uuch ut eb’ li raqal re xtenq’ankileb’ chirilb’al li naraj naxye wank jo’ komon re li Iglees.

jun kub’iha’ sa’ li palaw

Naq nakub’e qaha’, naqab’aanu jun sumwank rik’in li Dios.

Mosiah 24:8–17

Li Dios naru naxseeb’ob’resiheb’ li wiiq.

Jo’q’e xatxtenq’a li Dios chireek’ankil naq laa wiiq chanchan naq moko aal ta? K’oxla chan ru naru nakawotzeb’ laa numsihom ut lix nawom aach’ool rik’ineb’ li kok’al.

Kok’ k’anjel naru chi b’aanumank

• Tenq’aheb’ li kok’al chixk’oxlankileb’ eekasink-ib’ moko ch’a’aj ta li naru neke’xb’aanu naq laa’at yooqat chixyeeb’al reheb’ k’a’ru kik’ulman rik’in lix tenamit laj Alma sa’ Mosiah 24:8─17. Jultika naq sa’ xk’ab’a’ naq laj Alma kixsik’ ru xtaaqenkil lix k’utum laj Abinadi chirix li Jesus, a’an ut lix tenamit ke’rahob’tesiik, a’b’an maajun wa ke’xkanab’ xpaab’ankil li Jesus.

• Il ru Mosiah 24:14─15 rik’ineb’ li kok’al. Nujob’resi jun li b’oolx rik’ineb’ k’a’aq re ru jwal aal (re reetalinkileb’ li iiq), ut kanab’eb’ li kok’al chixwaklesinkil. Ch’olob’ naq sa’eb’ li hoonal naq ra li qach’ool, naq yajo, malaj naq wankeb’ jalan chik qach’a’ajkilal, naru naqeek’a naq yooko chiriiqankil k’a’ruhaq jwal aal. Kanab’eb’ li kok’al chixk’eeb’aleb’ xhoonal re xtenq’ankil li ch’ina al yoo chixpaqonkil li b’oolx re naq taaseeb’o’q. Ch’olob’ naq li qaChoxhail Yuwa’ naru naxb’aanu naq eb’ li qiiq te’seeb’o’q naq naqasik’ lix tenq’ rik’in li tijok, rik’in li k’anjelak chiruheb’ li qas qiitz’in, ut wan chik xkomon.

reetalil li k‘utuk

Xk’utb’al li tzol’leb’: Kok’al ak ninqeb’

Mosiah 18:7–16

Naq nakub’e inha’, ninb’aanu jun sumwank rik’in li Dios.

Chan ru naru nakatenq’aheb’ li kok’al nakatzoleb’ chixtawb’al ru li sumwank naqab’aanu naq nakub’e qaha’?

Kok’ k’anjel naru chi b’aanumank

• K’e reheb’ li junjunq chi kok’al jun perel li hu. Ilomaq ru sa’ komonil Mosiah 18:8─10 ut kanab’eb’ li kok’al chixtz’iib’ankil malaj chixyiib’ankil xjalam-uuch chiru lix huheb’ li yeechi’ihom naqab’aanu naq nakub’e qaha’ ut, junpak’al chik, eb’ li osob’tesihom naxyeechi’i qe li qaChoxahil Yuwa’. Kanab’eb’ chixwotzb’al sa’ li tzoleb’aal li k’a’ru xe’xtaw. Naq yooqeb’ chixwotzb’al a’an, k’eheb’ aapatz’om jo’eb’ a’in: Chan ru naru “nokoyaab’ak rik’ineb’ li neke’yaab’ak”? K’a’ru naraj naxye wank jo’ aj yehol nawom chirix li Dios “sa’ chixjunil li na’ajej”? (raqal 9). K’a’ru naru naqab’aanu re xpaab’ankileb’ li qasumwank?

• Kanab’eb’ wiib’ oxib’ reheb’ li kok’al li ak xe’kub’e xha’ chixwotzb’al k’a’ru najultiko’ reheb’ chirix li k’a’ru xe’xk’ul. K’a’ut naq jwal chaab’il li kutan a’an choq’ reheb’? K’a’ru xe’xb’aanu? Ch’olob’ naq rajlal domingo neke’x’ak’ob’resi li sumwank re li kub’iha’ naq neke’tz’aqon sa’ li loq’laj wa’ak. Tenq’aheb’ li kok’al chixjuntaq’eetankil li sumwank re li kub’iha’ li natawman sa’ Mosiah 18:8─10 rik’ineb’ lix tijul li loq’laj wa’ak (chi’ilmanq Tzol’leb’ ut Sumwank 20:77, 79). K’a’ru naru naqab’aanu re naq li tz’aqonk sa’ li loq’laj wa’ak a’anaq jun xchaq’al ru hoonal ut oxloq’, jo’ chanru kiwan li qakub’iha’?

• Kanab’ jun li ak’ komon chixwotzb’al chan ru xtzolok chirix li Iglees ut k’a’ru xreek’a naq xkub’e xha’. Kanab’eb’ li kok’al chixyeeb’al lix patz’omeb’, jo’ k’a’ru xtenq’an re li kristiaan a’an rajb’al xb’aanunkileb’ li yeechi’ink yeeb’ileb’ sa’ Mosiah 18:7─17.

Mosiah 18:17–28

Laa’in komon sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan.

Chan ru naru nakamusiq’aheb’ li kok’al chixb’antioxinkileb’ li rosob’tesinkileb’ jo’ komon re li Iglees?

Kok’ k’anjel naru chi b’aanumank

• Kanab’eb’ li kok’al chirilb’al ru Mosiah 18:17─28 re xsik’b’aleb’ xk’utum lix Iglees li Kristo sa’ lix kutankil laj Alma li juntaq’eeteb’ ajwi’ anajwan. Tz’iib’aheb’ lix sumenkil chiru kok’ kaaxukuut che’, malaj kok’ huhil sek’ ut kanab’eb’ li kok’al chiroksinkileb’ a’an re xyiib’ankil jun ch’ina kab’l li taareetali lix Iglees li Jesukristo.

• Il ru li raatinul li b’ich “Lix Iglees li Jesukristo” malaj b’icha li b’ich rik’ineb’ li kok’al (B’ichleb’aal choq’ reheb’ li Kok’al, 48), ut k’e xb’oqb’aleb’ chirab’inkil chi us re te’xtaw li naqayeechi’i xb’aanunkil jo’ komon re li Iglees. Tenq’aheb’ chixk’oxlankil chan ru naru naqapaab’eb’ li yeechi’ihom.

Mosiah 21:1–5, 13–16; 22:1–11; 24:8–22

Li Dios naru naxseeb’ob’resiheb’ li wiiq.

Li esil chirix lix tenamit laj Alma naru naxk’utb’esi chiruheb’ li kok’al naq li Dios chi jo’q’ehaq naxk’e qametz’ew re xkuyb’aleb’ lix yalb’al qix ut ink’a’ narisi a’an. Chan ru naru nakatenq’aheb’ chixtzolb’al li na’leb’ a’an sa’ li esil?

Kok’ k’anjel naru chi b’aanumank

• Tenq’aheb’ li kok’al chixk’utb’al li kik’ulman sa’eb’ li seraq’ chirix lix tenamit laj Limhi sa’ Mosiah 21:1─5, 13─16 ut 22:1─11, ut chirix lix tenamit laj Alma sa’ Mosiah 24:8─22. Chirix a’an kanab’eb’ li kok’al chixyiib’ankil xjalam-uuch jun reheb’ li esil a’an. Kanab’eb’ li kok’al chixk’eeb’aleb’ lix jalam-uuch sa’ tz’aqal xtusulal ru re xseraq’inkil li esil. Naq yooqeb’ chixb’aanunkil a’an, aatinan chirix naq li Dios kixtenq’aheb’ li kristiaan chixkuyb’al li riiqeb’.

• Kanab’eb’ li kok’al chirilb’al ru Mosiah 21:14─15 ut 24:13─14. Chan ru naq li Qaawa’ kixsume lix tijeb’ lix tenamit laj Limhi ut lix tenamit laj Alma? Kanab’eb’ li kok’al chi aatinak chirixeb’ hoonal b’ar wi’ xe’tijok re xpatz’b’al xtenq’ankil rik’in junaq yale’k-ix ut naq xe’tenq’aak xb’aan li qaChoxahil Yuwa’, malaj wotz junaq aanumsihom laa’at.

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixch’olob’ankil chiru anihaq li k’a’ru te’xyeechi’i, malaj ak xe’xyeechi’i xb’aanunkil jo’ xkomon li sumwank re lix kub’iha’eb’.

Xchaab’ilob’resinkil li qak’utum

Ab’iheb’ li kok’al. Wi eb’ li kok’al chanchan naq ink’a’ neke’wan sa’ xyaalal, maare a’an li hoonal re xyalb’al junaq chik li ch’ina k’anjel malaj xik chi b’eek junpaataq chi ch’anch’o. Jo’ jun chik na’leb’, wi nakawil naq eb’ li kok’al yookeb’ chi tz’aqonk ut yookeb’ chi tzolok, matk’oxlak chirix xb’aanunkil junaq chik reheb’ li na’leb’ ka’ajwi’ re roksinkil chixjunil li k’anjeleb’aal.

perel re kok’ k’anjel: naqab’aanuheb’ sumwank naq nakub’e qaha’