“25–31 mayo. Mosiah 29–Alma 4: “Ke’wan chi xaqxo junelik ut chi ink’a’ neke’eek’an,” ” Kim, Taaqehin—Choq’ re li Tzoleb’aal reheb’ li Kok’al: Lix Hu laj Mormon 2020 (2020)
“25–31 mayo. Mosiah 29–Alma 4,” Kim, Taaqehin—Choq’ re li Tzoleb’aal reheb’ li Kok’al: 2020
Laj Alma li alalb’ej najultikan aatin, xb’aan laj Gary L. Kapp
25–31 mayo
Mosiah 29–Alma 4
“Ke’wan chi xaqxo junelik ut chi ink’a’ neke’eek’an”
Eb’ li kok’al nakatzoleb’ naru neke’xtzol naab’al xna’leb’eb’ sa’ li tzoleb’aal, a’b’an mas naab’al wi’chik li te’xtzol wi neke’xk’aytesi rib’eb’ chixtzolb’aleb’ li loq’laj hu sa’ kab’l. K’oxla chan ru naru taawaklesi xch’ooleb’ ut chan ru taatenq’aheb’ chixtzolb’al li evangelio sa’ kab’l.
Xtz’iib’ankil li nakak’oxla
Xkanab’ankileb’ chi wotzok
Kana’b’eb’ li kok’al chi chunlaak chiru li tz’ak sa’ jun sirso ut k’e jun b’olotz’ re jun reheb’. Kanab’ li ch’ina al a’an chixwotzb’al k’a’ruhaq xtzol toje’ chirix li evangelio sa’ kab’l malaj sa’ li Tzoleb’aal reheb’ li Kok’al. Chirix a’an kanab’ li ch’ina al chixkutb’al li b’olotz’ re anihaq chik. B’aanu a’an toj reetal naq li junjunq chi kok’al xe’wan xhoonal re xwotzb’al k’a’ruhaq.
Xk’utb’al li tzol’leb’: Kok’al toj ka’ch’ineb’ xyu’am
Jo’ komon re li Iglees, tento tinrahoq ut tink’anjelaq chiruheb’ li was wiitz’in.
Laa’at maare ink’a’ taasik’ ru xyeeb’al reheb’ li kok’al naab’al reheb’ lix k’utum laj Nehor, a’b’an naru naq naq usaq choq’ reheb’ xnawb’al naq sa’ li Iglees nokok’anjelak xb’aan naq naqaraheb’ li qas qiitz’in, ink’a’ xb’aan naq naqaj xtawb’al qab’ihomal malaj re naq nawb’ilaq qu.
Kok’ k’anjel naru chi b’aanumank
-
Seraq’i reheb’ li kok’al, rik’in aatin junpaat xtawb’al ru, li esil chirix laj Alma ut laj Nehor (chi’ilmanq Alma 1; “Ch’ol 20: Laj Alma ut laj Nehor” Eb’ li Esilal sa’ lix Hu laj Mormon, 54─55, malaj li video sa’ ChurchofJesusChrist.org). Ye wi’chik naq us ta li neke’taaqen re laj Nehor neke’xhob’eb’ li komon re li Iglees, naab’aleb’ re li komon sa’ li Iglees toj ke’wan chi chaab’il ut rik’in rahok.
-
Il ru Alma 1:30 rik’ineb’ li kok’al ut tenq’aheb’ chixtawb’al ru naq li kristiaan sa’ li Iglees ke’xwotz li k’a’ru wan reheb’ rik’ineb’ li ke’raj ru xtenq’ankil. Tenq’aheb’ li kok’al chixk’oxlankileb’ k’a’aq re ru naru neke’xwotz ut kristiaaneb’ li naru neke’xwotz wi’ li k’a’aq re ru a’an. Waklesiheb’ xch’ool li kok’al chixyiib’ankileb’ xjalam-uuch lix k’uub’anb’il na’leb’.
-
B’ichahomaq jun li b’ich li na’aatinak chirix li rahok ut li tenq’ank, jo’ “Wik’in laa’in natikla li chaab’ilal” (B’ichleb’aal choq’ reheb’ li Kok’al, 83), ut tenq’aheb’ li kok’al chixk’oxlankileb’ eek’asink-ib’ li neke’xk’ul rib’ rik’in li raatinul li b’ich.
Li Dios tixsumeheb’ lin tij.
Naq laj Alma ut eb’ laj Nefita “k’a’jo’ li xiw chapb’ileb’ wi’ ” (Alma 2:23), ke’tijok re xpatz’b’al xtenq’ankileb’ ut ke’kawob’resiik xch’ool. Tenq’aheb’ li kok’al chixtzolb’al xna’leb’eb’ rik’in lix b’aanuhomeb’ laj Alma ut eb’ laj Nefita.
Kok’ k’anjel naru chi b’aanumank
-
Rik’in roksinkileb’ li jalam-uuch wankeb’ sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al malaj li “Ch’ol 21: Eb’ laj Amlicita” (Eb’ li Esilal sa’ lix Hu laj Mormon, 56─57, malaj li video sa’ ChurchofJesusChrist.org), seraq’i reheb’ li kok’al chan ru naq eb’ laj Nefita ke’xk’ul xkawilaleb’ xmetz’ew re xq’axb’al ruheb’ laj Amlicita. Patz’ reheb’ li kok’al k’a’ru naxib’esin reheb’ malaj k’a’ru ch’a’aj choq’ reheb’, ut ch’olob’ xyaalal naq naru neke’tijok chiru li qaChoxahil Yuwa’ re xpatz’b’al xtenq’ankil rik’ineb’ li k’a’aq re ru a’an.
-
Seraq’i jun aanumsihom b’ar wi’ naq li Dios xatxtenq’a chirix naq xattijok. Kanab’eb’ li kok’al chixwotzb’al xnumsihomeb’ rik’in li tijok.
Lix nawom inch’ool naru naxkawob’resiheb’ li was wiitz’in.
Wan naq li “saqen ruhil yaal li ch’olob’anb’il” (Alma 4:19) xb’aan jun ch’ina al naru naxwaklesi xch’ooleb’ li komon. Chan ru naru nakatenq’aheb’ li kok’al chixtawb’al chan ru naru neke’xwotz lix nawom xch’ooleb’?
Kok’ k’anjel naru chi b’aanumank
-
Teheb’ li loq’laj hu sa’ Alma 4:19 ut ch’olob’ naq xb’aan naq laj Alma kiril naq jwal aj maakeb’ li kristiaan, kixk’e reetal naq jun chaab’il na’leb’ re xtenq’ankileb’, a’an xch’olob’ankil “li saqen ruhil yaal” chiruheb’. Oksi li perel re kok’ k’anjel re li xamaan a’in re xk’utb’al chiruheb’ li kok’al k’a’ru naraj naxye xnawom ch’oolej ut chixjunil li naxk’am. Waklesiheb’ xch’ool re te’xwotz xnawom xch’ooleb’.
-
K’e b’ayaq li ha’ sa’ jun li sek’ ut ch’olob’ naq li ha’ a’an chanchan lix nawom qach’ool xb’aan naq naru naqawotz rik’ineb’ li qas qiitz’in. K’e b’ayaq li ha’ sa’ kok’ sek’ choq’ re li junjunq chi kok’al ut ye reheb’ naq sa’ xwotzb’al lix nawom qach’ool, naqatenq’aheb’ li qas qiitz’in chixkawob’resinkileb’ lix nawom xch’ool.
-
Wi eb’ li kok’al neke’raj, kanab’eb’ chixtzolb’al chan ru xyeeb’al lix nawom xch’ooleb’. Ye reheb’ junjunq na’leb’ chirix chan ru naq naru neke’xk’ut naq neke’xnaw naq li evangelio tz’aqal yaal, jo’ ajwi’ rik’in li neke’xb’aanu.
Xk’utb’al li tzol’leb’: Kok’al ak ninqeb’
Naru nink’e reetaleb’ li b’alaq’il k’utum.
Sa’ junaq hoonal sa’ li qayu’am, chiqajunilo tento taqataweb’ kristiaan jo’ laj Nehor: li neke’xyal qab’alaq’inkil rik’ineb’ esil ch’ina-us neke’k’utun a’b’an yal b’alaq’eb’ ut neke’rahob’tesin ch’oolej. Lix wotzb’al li seraq’ natawman sa’ Alma 1:2─9 naru naxtenq’aheb’ li kok’al chixkawresinkileb’ rib’ choq’ reheb’ li hoonal a’an sa’eb’ lix yu’am.
Kok’ k’anjel naru chi b’aanumank
-
Tenq’aheb’ li kok’al chirilb’al ru Alma 1:2─4 re rilb’al junjunq reheb’ li k’a’aq re ru kixk’ut laj Nehor, jun aj k’utunel aj b’alaq’. Tenq’aheb’ chixtz’iib’ankileb’ junjunq patz’om re te’xsume ma yaal malaj ma ink’a’ yaal rik’in roksinkileb’ li raqal a’an. K’a’ut naq wan naq laj Satanas naxjunaji ru li yaal rik’in li b’alaq’? Tenq’aheb’ li kok’al chixk’oxlankileb’ junjunq li reetalil a’an.
-
Chirix naq teeyaab’asi wi’chik Alma 1:2─9 sa’ komonil, kanab’eb’ li junjunq chi kok’al naq te’ril ru jun reheb’ li raqal a’in sa’eb’ li loq’laj hu: Mateo 7:21–23; 2 Nefi 26:29–31; Mosiah 18:24–26 ut Helaman 12:23–26. Chan ru naq eb’ li raqal a’an sa’eb’ li loq’laj hu neke’xka’pak’ali li k’a’ru naxk’ut laj Nehor? Chan ru naru neke’qoksi li loq’laj hu re xkawob’resinkil lix nawom qach’ool chirix li evangelio?
Jo’ komon re li Iglees, tento tinrahoq ut tink’anjelaq chiruheb’ li was wiitz’in.
Wan naq eb’ li komon re li Iglees sa’ lix kutankil laj Alma jwal k’eek’ookeb’ chaq xch’ool chi tenq’ank, ut wan naq q’etq’eteb’ ut maak’a’eb’ chaq xrahom. Tenq’aheb’ li kok’al nakatzoleb’ chixtzolb’aleb’ xna’leb’ rik’in lix numsihomeb’ a’an.
Kok’ k’anjel naru chi b’aanumank
-
Tenq’aheb’ li kok’al chirilb’al ru Alma 4:6─13 ut ch’olob’eb’ li aatin jo’ “rahob’tesink” ut “b’ach’b’ach’il” (wi na’ajman ru, oksi jun li tusleb’aal aatin). K’a’ru naqeek’a naq eb’ li kristiaan neke’xb’aanu a’an qik’in? Kanab’eb’ li kok’al chixtawb’aleb’ li aatin sa’ Alma 1:26─30 li neke’xch’olob’ chan ru naq li qaChoxahil Yuwa’ naraj naq taqil qib’ chiqib’il qib’.
-
Kanab’eb’ li kok’al chirilb’al ru Alma 1:27, 30 ut chixyiib’ankil jun xtusulaleb’ li jalan jalanq chi kristiaan li ke’tenq’aak xb’aaneb’ li komon re li Iglees. Kanab’eb’ li kok’al chixk’oxlankileb’ kristiaan sa’ li na’ajej wankeb’ wi’ malaj sa’ li eskweel li maare “neke’ajok tenq’aak” (Alma 1:30) rik’in lix rahomeb’ ut lix tenq’eb’. Re xtzolb’al chi us li na’leb’ a’an, b’ichahomaq sa’ komonil jun li b’ich li na’aatinak chirix li chaab’ilal, jo’ “Awiik’in tinb’eeq laa’in” (B’ichleb’aal choq’ reheb’ li Kok’al, 78─79).
Lix nawom inch’ool naru naxkawob’resiheb’ li was wiitz’in.
Laj Alma kixk’anab’ lix k’anjel jo’ aj raqol aatin re xk’eeb’al xhoonal chixwotzb’al lix nawom xch’ool ut xtenq’ankileb’ li kristiaan chixjalb’al xk’a’uxl. Lix b’aanuhom a’an naru naxmusiq’aheb’ li kok’al chixwotzb’al lix nawom xch’ooleb’ chi kok’ aj xsa’.
Kok’ k’anjel naru chi b’aanumank
-
Il ru Alma 4:8─12, 15 rik’ineb’ li kok’al ut kanab’eb’ chixtawb’aleb’ li ch’a’ajkilal ke’wan sa’ li Iglees, jo’ chanru ch’olob’anb’il sa’eb’ li raqal a’an. Kanab’eb’ li kok’al chixyeeb’al k’a’ruhaq kiru chixb’aanunkil laj Alma re xtuqub’ankileb’ lix ch’a’ajkilal. Tenq’aheb’ chixsik’b’al, sa’ Alma 4:16─20, k’a’ru kixsik’ ru xb’aanunkil laj Alma. K’a’ut naq li xnawom ch’oolej nim xwankil?
-
Re xtenq’ankileb’ li kok’al chixtawb’al ru k’a’ru naraj naxye xnawom ch’oolej ut chixjunil li naxk’am, b’ichahomaq sa’ komonil jun li b’ich chirix li na’leb’ a’an, jo’ “Lix nawom inch’ool” (Eb’ li b’ich, 78); malaj oksi li perel re kok’ k’anjel re li xamaan a’in. Kanab’eb’ li kok’al chixwotzb’al li neke’xtzol chirix li xnawom ch’oolej sa’ eb’ li k’anjeleb’aal a’an.
Xb’oqb’aleb’ chi tzolok sa’ kab’l
Tenq’aheb’ li kok’al chixk’oxlankil anihaq li naru neke’xwotz wi’ lix nawom xch’ooleb’ sa’ li xamaan chal re. Waklesiheb’ xch’ool chixtz’iib’ankil jun xk’uub’anb’il na’leb’eb’ re naq te’xb’aanu lix jayalihomeb’.
XChaab’ilob’resinkil li qak’utum
Patz’eb’ li patz’om li neke’xb’oq chaq li xnawom ch’oolej. “Rik’in xpatz’b’aleb’ li patz’om li neke’xwaklesi xch’ooleb’ li komon sa’ li tzoleb’aal chixwotzb’al xnawomeb’ xch’ool chirixeb’ li na’leb’ li yoo chi k’utmank, naru nab’oqman li Musiq’ej rik’in wankilal” (Li k’utuk jo’ li Kolonel, 32). Re xk’eeb’al xb’oqb’aleb’ li kok’al chi ch’olob’ank, oksiheb’ li patz’om li te’ok wi’ chi k’oxlak chirix k’a’ru neke’xk’oxla chirix li Kolonel malaj lix evangelio, ut chixwotzb’al a’an. Naru ajwi’ nakapatz’ reheb’ chirix lix numsihomeb’ rik’in li tijok, chirix li k’anjelak chiruheb’ ras riitz’in, chirixeb’ li k’ojob’anb’il k’anjel jo’ li kub’iha’, malaj chirix reek’ankil lix musiq’ahom li Santil Musiq’ej.