“1–7 junio. Alma 5–7: “Ma xeyal li nimla jalaak a’in sa’ lee ch’ool?” ” Kim, Taaqehin—Choq’ re li Tzoleb’aal reheb’ li Kok’al: Lix Hu laj Mormon 2020 (2020)
“1–7 junio. “1–7 junio. Alma 5–7,” Kim, Taaqehin—Choq’ re li Tzoleb’aal reheb’ li Kok’al: 2020
Moko sachb’ilex ta sa’ xch’ool, xb’aan laj Jon McNaughton
1–7 junio
Alma 5–7
“Ma xeyal li nimla jalaak a’in sa’ lee ch’ool?”
K’oxlan rik’in tijok chirixeb’ li na’leb’ wankeb’ sa’ Alma 5─7 li taaweek’a naq nimaq xwankileb’ choq’ reheb’ li kok’al nakatzoleb’.
Xtz’iib’ankil li nakak’oxla
Xkanab’ankileb’ chi wotzok
Kanab’eb’ li kok’al chixwotzb’al li najultiko’ reheb’ naq xe’xtzol chirix laj Alma li alalb’ej, wiib’ oxib’ xamaan chaq. Ch’olob’ naq chirix naq laj Alma kixjal xch’ool, kixk’ut chiruheb’ li tenamit aajel ruhil k’a’aq re ru chirix li evangelio. Kanab’eb’ li kok’al chixwotzb’al k’a’ru neke’xnaw chirix li kixk’ut.
Xk’utb’al li tzol’leb’: Kok’al toj ka’ch’ineb’ xyu’am
Naru nintaw xnawom inch’ool rik’in li Santil Musiq’ej.
Eb’ li kok’al nakatzoleb’ naru neke’xk’iresi lix nawom xch’ooleb’ chi kaw, us ta toj kok’eb’.
Kok’ k’anjel naru chi b’aanumank
-
Oksi jun xjalam-uuch laj Alma li alalb’ej, (chi’ilmanq Libro de obras de arte del Evangelio, ajl 77) re xjultikankil li seraq’ chirix naq ki’ula’aniik xb’aan li anjel (chi’ilmanq Mosiah 27). Chirix a’an kanab’eb’ li kok’al chixch’olob’ankil k’a’ru li xnawom ch’oolej, ut tenq’aheb’ a’ yaal chan ru na’ajman ru. Ch’olob’ naq laj Alma kixyal xq’e chixtawb’al xnawom xch’ool chirix naq ki’ula’aniik xb’aan li anjel. Il ru Alma 5:46 naab’al sut chi timil ut kanab’eb’ li kok’al chi ab’ink chi us re xk’eeb’al reetal k’a’ru kixb’aanu laj Alma ut chan ru naq kixnaw li yaal. (Maare tento naq taach’olob’ naq li kuyuk sa’ naraj naxye xkanab’ankil wa’ak ut uk’ak.)
-
K’eheb’ chi kutankil jalam-uuch reheb’ k’a’aq re ru li neke’k’i chi kok’ aj xsa’ ut neke’raj ru ch’olaniik chi kok’ aj xsa’, jo’ jun li che’ malaj ral junaq li xul. Kanab’eb’ li kok’al chixwotzb’al chan ru naqach’olaniheb’ li k’a’aq re ru a’an ut neke’qatenq’a chi k’iik. Jultika reheb’ naq tento ajwi’ taqach’olani lix nawom qach’ool.
-
Oksi jun li globo re reetalinkil li xnawom ch’oolej ut nujob’resi chi iq’ rajlal sut naq taawotz k’a’ruhaq li natenq’ank re li xnawom ch’oolej chi k’iik. B’ak’ li globo ut numsi sa’ xyanqeb’ li kok’al, ut kanab’eb’ chixwotzb’al junaq na’leb’ li naru chi tenq’ank chixk’iresinkil lix nawom ch’ooleb’. Kanab’eb’ li kok’al chixyiib’ankil xjalam-uucheb’ a’an naq yookeb’ chixb’aanunkil k’a’ruhaq naxk’iresi lix nawom xch’ooleb’.
Naq naqak’ulub’a li evangelio, a’an chanchan xtikib’ankil jun chik ak’ yu’am.
Li Kolonel kixk’uleb’ sa’ xb’een a’an lin maak, lin rahilal, ut eb’ lin ch’a’ajkilal.
Eb’ li yaal wankeb’ sa’ Alma 7:10─13 naru neke’xtenq’aheb’ li kok’al chixnawb’al naq neke’k’oxlaak xb’aan li Jesukristo ut a’an naru naxtenq’aheb’.
Kok’ k’anjel naru chi b’aanumank
-
K’ut chiruheb’ li kok’al jun xjalam-uuch li Jesus. Ch’olob’ naq a’an naxnaw chan ru li wank rik’in rahilal, rik’in rahil ch’oolej, ut rik’in xiw. Il ru junjunqeb’ re li aatin sa’ Alma 7:11─13 li neke’xch’olob’ li rahilal kixk’ul li Kolonel, ut ch’olob’eb’ reheb’ li kok’al li aatin li maare ink’a’ neke’xtaw ru. Ye naq li Jesus naru nokoxtenq’a ut naxk’ojob’ qach’ool naq ra qach’ool. Wotz rik’ineb’ chan ru naq li Kolonel nakatxtenq’a ut naxk’ojob’ aach’ool.
-
Kanab’eb’ li kok’al chixwotzb’al xnumsihomeb’ a’an b’ar wi’ xe’yajer malaj xe’wan xrahilal, malaj junaq chik ch’a’ajkilal li xk’ehok xrahileb’ xch’ool. Ch’olob’ xyaalal naq li Kolonel ajwi’ kixnumsi chixjunileb’ li ka’a’q re ru a’an ut naq naxnaw chan ru qatenq’ankil.
Li b’e re q’ajk rik’in li qaChoxahil Yuwa’ ut li Jesukristo a’an tiik ru.
Chan ru naru nakawoksi lix ch’olob’ahom laj Alma chirix li b’e re q’ajk rik’in li qaChoxahil Yuwa’ re xtenq’ankileb’ li kok’al chixtzolb’al xsik’b’aleb’ ru li k’a’ru us.
Kok’ k’anjel naru chi b’aanumank
-
Il ru Alma 7:19 rik’ineb’ li kok’al ut ch’olob’ naq, wi naqasik’ ru li k’a’ru us, wanko sa’ li b’e nak’amok rik’in li qaChoxahil Yuwa’. K’e reheb’ li kok’al junjunqeb’ li na’leb’ neke’sik’e’ ru (jo’ wank chi maak’a’ rahom rik’ineb’ li komon sa’ li junkab’al malaj ink’a’ k’anjelak chiruheb’). Kanab’eb’ chixyeeb’al aawe wi li k’a’ru sik’b’il ru a’an chaab’il ut nak’amok rik’in li Dios, malaj ink’a’ us ut nokoxnajtob’resi chiru a’an.
-
Il ru Alma 7:20 ut tenq’aheb’ li kok’al chixtawb’aleb’ ru li aatin sa’ li raqal a’an li naxch’olob’ li b’e re q’ajk rik’in li Dios. Yiib’ xjalam-uuch jun li b’e chiru li pizarron natikla qik’in ut nawulak toj rik’in li qaChoxahil Yuwa’. Chirix a’an yiib’ xjalam-uuch jun li b’e yokotzinb’il ru ut wankeb’ li jalb’ehink chiru, li maak’a’eb’ relik ut nokohe’xnajtob’resi chiru li Dios. Kanab’eb’ li kok’al chixnumsinkileb’ li ru’uj ruq’ chiruheb’ li b’e. B’ar wan li b’e chaab’il chi us? Tenq’aheb’ chixk’oxlankil li k’a’ru us li taatenq’anq reheb’ chi wank sa’ li b’e tiik ru.
Xk’utb’al li tzol’leb’: Kok’al ak ninqeb’
Alma 5:12–14, 27–28, 57; 7:14–24
Tento tinyo’laaq wi’chik ut chirix a’an tintaaqe li b’e nak’amok rik’in li Dios.
Chan ru naru nakatenq’aheb’ li kok’al chixtawb’al ru li naraj naxye li yo’laak wi’chik?
Kok’ k’anjel naru chi b’aanumank
-
K’ut chiruheb’ li kok’al xjalam-uuch jun k’uula’al malaj kanab’eb’ chi aatinak chirix chan ru jun k’uula’al naq nayo’la. Kanab’ jun li ch’ina al chirilb’al ru Alma 5:14. Re xtenq’ankileb’ li kok’al chixtawb’al ru li naraj naxye “yo’laak chi musiq’ejil chiru li Dios,” kanab’eb’ chixk’oxlankil chan chaq ru laj Alma li alalb’ej, naq maji’ najala xch’ool. Chan chik ru chirix a’an? (Chi’ilmanq Mosiah 27:23–32 ut Alma 36:12–24.) Ch’olob’ naq wi wan qapaab’aal chirix li Jesukristo ut naqayu’ami lix evangelio, a’an chanchan naq xqatikib’ jun chik li ak’ yu’am, jo’ nak’ulman rik’in jun k’uula’al.
-
Ilomaq ru sa’ komonil Alma 7:19 ut ch’olob’ naq chirix li yo’laak wi’chik, tento taqataaqe “li b’e li naxik sa’ li rawa’b’ejihom li Dios.” Muqeb’ kok’ hu sa’ li tzoleb’aal li tz’iib’anb’ilaqeb’ wi’ li raqal a’in reheb’ li loq’laj hu: Alma 5:12─13, 27─28, 57; 7:14─16, 23─24. Kanab’eb’ li kok’al chixtawb’aleb’ li kok’ hu, chixsik’b’aleb’ li raqal sa’eb’ li loq’laj hu, ut chixwotzb’al li k’a’ru neke’xk’ut li junjunq chi raqal chirix li tento taqab’aanu re q’ajk rik’in li Dios.
Naru nintaw xnawom inch’ool rik’in li Santil Musiq’ej.
Laj Alma ki’ula’aniik xb’aan jun li anjel, a’b’an lix nawom xch’ool “k’eeb’il chixnaw xb’aan lix loq’laj Musiq’ li Dios” (Alma 5:46).
Kok’ k’anjel naru chi b’aanumank
-
Il ru rik’ineb’ li kok’al Alma 5:44─46. K’a’ru kixb’aanu laj Alma re xtawb’al xnawom xch’ool chirix li evangelio? K’e reheb’ li junjunq chi kok’al jun perel li hu ut kanab’eb’ chixyiib’ankil jun k’uub’anb’il na’leb’ re li te’xb’aanu chiru li xamaan re xkawob’resinkil lix nawom xch’ooleb’.
-
Numsi jun li lem sa’ xyanqeb’ li kok’al ut kanab’eb’ chirilb’al rib’ chi sa’ naq laa’at yooqat chirilb’al ru Alma 5:14. K’a’ru naraj naxye xk’amb’al xjalam-uuch li Kolonel sa’ qilob’aal? Seraq’i resileb’ hoonal b’ar wi’ anihaq kixye malaj kixb’aanu k’a’ruhaq li kixjultika aawe li Kolonel, ut kanab’eb’ li kok’al chixb’aanunkil ajwi’ a’an.
Li Kolonel kixk’uleb’ sa’ xb’een a’an lin maak, lin rahilal, ut eb’ lin ch’a’ajkilal.
Naq yooqat chixtzolb’al Alma 7, k’oxla chan ru naru nakawaklesi xpaab’aaleb’ li kok’al chirix li Jesukristo re naq te’xsik’ a’an sa’eb’ lix yalb’al rix.
Kok’ k’anjel naru chi b’aanumank
-
Kanab’eb’ li kok’al chirilb’al ru Alma 7:11─13 re xsik’b’al li rahilal kixnumsi li Jesukristo. Maare te’raj xwotzb’aleb’ xnumsihom b’ar wi’ xe’reek’a rahilal, yajel, malaj ch’a’ajkilal. Jo’ neke’xye li raqal a’an, k’a’ut naq li Kolonel kiwan xch’ool chixnumsinkil chixjunileb’ li rahilal a’an?
-
Seraq’in reheb’ li kok’al chirix junaq yajel, tiq’ilal, malaj junaq chik ch’a’ajkilal xanumsi laa’at, ut patz’ reheb’ ma xnumsihomeb’ jun sutaq a’an. Ilomaq ru sa’ komonil Alma 7:11─13 ut k’uteb’ li rahilal kixnumsi li Jesus sa’ qak’ab’a’. Tenq’aheb’ li kok’al chixk’oxlankileb’ li hoonal b’ar wi’ li Kolonel kixnumsiheb’ li rahilal a’an, jo’ naq ki’aaleek (chi’ilmanq Mateo 4:1─11) malaj naq kixk’ul rahilal sa’ li awimq Getsemani. Chan ru nokoxtenq’a xnawb’al naq li Jesus naxnaweb’ ru lix yalb’al qaq’e? Ye lix nawom aach’ool chirix lix wankil li Jesus re xk’ojob’ankil qach’ool, qatenq’ankil ut qak’irtesinkil.
Xb’oqb’aleb’ chi tzolok sa’ kab’l
Kanab’eb’ li kok’al chixt’uyub’ankil jun xjalam-uuch li Jesus sa’ junaq na’ajej b’ar wi’ naru neke’ril junelik re xjultikankil reheb’ li xe’xtzol chiru li kutan a’in.
Xchaab’ilob’resinkil li qak’utum
Chaab’ilob’resi aawib’ jo’ aj k’utunel chanchan li Kristo. Jo’ aj k’utunel, aajel ru xk’oxlankil chan ru xnimob’resinkil laa seeb’al re xtenq’ankileb’ li kok’al chixxaqab’ankil lix paab’aaleb’ chirix li qaChoxahil Yuwa’ ut chirix li Jesukristo. K’oxla roksinkileb’ li patz’om re yalok-ix re junesal wan sa’ li perel 37 re Li k’utuk jo’ li Kolonel.