laj Ammon na’aatinak rik’in li rey aj Lamoni

Laj Ammon ut li rey aj Lamoni, xb’aan laj Scott M. Snow

22–28 junio

Alma 17–22

“Laa’in texink’e choq’ k’anjeleb’aal”

Jo’ laj Lamoni ut xkomoneb’ chik li kristiaan sa’ li esil a’in ke’wan xmusiq’ejil numsihom li ke’jala wi’ xyu’ameb’, eb’ li kok’al nakatzoleb’ naru neke’wan xmusiq’ejil numsihom rik’ineb’ li loq’laj hu li naru naxmusiq’a lix yu’ameb’ chiru naab’aal chihab’. Kanab’ a’an sa’ laa k’a’uxl naq yookat chixk’oxlankil chan ru taatzoleb’.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

K’ut jun jalam-uuch li taareetali k’a’ruhaq li kik’ulman sa’ Alma 17─22 (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Kanab’eb’ li kok’al chixyeeb’al aawe k’a’ru neke’ril sa’ li jalam-uuch.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Alma 17–19

Naru ninwotz li evangelio rik’ineb’ jalan chik kristiaan.

Chan ru naq lix b’aanuhomeb’ li ralal laj Mosiah naru naxmusiq’aheb’ li nakatzoleb’ chixwotzb’al lix nawom xch’ooleb’ rik’ineb’ ras riitz’in?

Kok’ k’anjel naru chi b’aanumank

• Tenq’aheb’ li kok’al chixk’utb’esinkil li esil chirix laj Ammon wan sa’ Alma 17─19. Naru nakawil ru li “Ch’ol 23: Laj Ammon, jun xnimal ru moos” (Eb’ li Esilal sa’ lix Hu laj Mormon, 64─68, malaj li video sa’ ChurchofJesusChrist.org). Wi nakak’oxla naq taawulaq raj chiruheb’ li kok’al, k’ameb’ li disfraz ut k’a’aq re ru chik re te’roksi. Ye reheb’ li kok’al li k’a’ru nakatzol laa’at chirix li esil ut kanab’eb’ chixb’aanunkil ajwi’ a’an.

• K’e chi kutankil jun k’anjeleb’aal, ut ye reheb’ li kok’al k’a’ru na’oksiman wi’. K’a’ru chik chi k’anjeleb’aal neke’xnaw ru li kok’al? Kanab’eb’ chixk’oxlankil naq yookeb’ chiroksinkil jun k’anjeleb’aal. Ch’olob’ naq jo’ naq neke’qoksi li k’anjeleb’aal re xb’aanunkileb’ k’a’aq re ru, li qaChoxahil Yuwa’ naru nokoroksi re xk’eeb’al chi uxmank lix k’anjel. Il ru Alma 17:11 ut ch’olob’ naq laj Ammon ut eb’ li riitz’in ke’wan jo’ k’anjeleb’aal choq’ re li qaChoxahil Yuwa’ re xtenq’ankileb’ laj Lamanita chixtzolb’al li evangelio.

• Kanab’eb’ li kok’al chi aalinak sa’ lix na’ajeb’ ut chixk’oxlankil naq neke’toch’ok okeb’aal naq laa’at yookat chirilb’al ru li esil naq lix Abix xko’o chire kab’lal chixyeeb’al reheb’ li kristiaan resil lix wankil li Dios (chi’ilmanq Alma 19:16─34). Tenq’aheb’ li kok’al chixk’oxlankil chan ru naru neke’wan jo’ xAbix ut neke’xwotz li evangelio rik’ineb’ li ras riitz’in.

• Kanab’eb’ li kok’al chixyiib’ankileb’ jun xjalam-uucheb’ naq yookeb’ chixwotzb’al li evangelio rik’in anihaq. Tenq’aheb’ chixk’oxlankileb’ kok’ k’a’aq re ru li naru neke’xwotz. B’ichahomaq sa’ komonil jun li b’ich chirix xwotzb’al li evangelio, jo’ ”Nawaj tinwanq choq’ jun li misioneer” (B’ichleb’aal choq’ reheb’ li Kok’al, 90). K’eheb’ xhoonal re xwotzb’al li reek’ahomeb’ chirix li k’a’ru kixk’ut laj Ammon.

Alma 17:21–25; 20:9–27

Naru nintenq’aheb’ li was wiitz’in chi chalk rik’in li Kristo naq nink’ut lin rahom choq’ reheb’.

Lix rahom ut lix k’anjel laj Ammon kixq’unob’resi li raam li rey aj Lamoni ut lix yuwa’ ajwi’. K’a’ru naru neke’xtzol li kok’al chirixeb’ li seraq’ a’an?

Kok’ k’anjel naru chi b’aanumank

• K’os ru Alma 17:21─25 choq’ reheb’ li kok’al, rik’in xjultikankil naq laj Ammon kiraj k’anjelak chiru laj Lamoni. Kanab’eb’ li kok’al chixwotzb’aleb’ xnumsihom b’ar wi’ xe’k’anjelak chiru anihaq. Jultika reheb’ li kok’al naq li nimla k’anjel kixb’aanu laj Ammon kixtenq’a li rey aj Lamoni chirajb’al xtzolb’al li evangelio (chi’ilmanq Alma 18:15─23). Kanab’eb’ li kok’al chixk’oxlankil anihaq li naru neke’k’anjelak chiru sa’ li kutan a’in, ut aatinanqex chirix chan ru naru neke’xb’aanu.

• Seraq’i reheb’ li kok’al li seraq’ wan sa’ Alma 20:8─27. Naru nakawoksi li “Ch’ol 24: Laj Ammon naxk’ul xyuwa’ li rey aj Lamoni” (Eb’ li Esilal sa’ lix Hu laj Mormon, 69─70, malaj li video sa’ ChurchofJesusChrist.org). Kanab’eb’ li kok’al chixk’oxlankileb’ jalan jalanq eek’asink-ib’ naru neke’xb’aanu rajlal sut naq laa’at taaye xk’ab’a’ laj Ammon, laj Lamoni, malaj lix yuwa’ laj Lamoni. K’ut naq jun reheb’ xyaalal naq li raam lix yuwa’ laj Lamoni kijala, a’an xb’aan naq laj Ammon jwal kixra laj Lamoni. Kanab’eb’ li kok’al chixyiib’ankil xjalam-uuch k’a’ruhaq naru neke’xb’aanu re xk’utb’al xrahomeb’ chiru anihaq.

reetalil li k‘utuk

Xk’utb’al li tzol’leb’: Kok’al ak ninqeb’

Alma 17:1–4

Lix nawom inch’ool nak’i naq nawileb’ ru li loq’laj hu, nintijok, ut ninkuy insa’.

Eb’ li ralal laj Mosiah ke’k’i chi kaw xaqxookeb’ sa’ li evangelio ut ke’wan choq’ xninqal ru misioneer xb’aan naq ke’xtzol chi yalb’ileb’ xq’e li loq’laj hu, ke’tijok, ut ke’xkuy xsa’. Chi jo’kan ajwi’ naru neke’tenq’aak li kok’al nakatzoleb’.

Kok’ k’anjel naru chi b’aanumank

• K’ameb’ sa’ li tzoleb’aal k’a’aq re ru neke’reetali li loq’laj hu, li tijok, ut li kuyuk sa’, jo’ jun li ch’uuteb’ li loq’laj hu, jun xjalam-uuch anihaq naq yoo chi tijok, ut jun xjalam-uuch li tzakemq, ut ch’olob’ k’a’ru neke’reetali li junjunq chi k’a’aq re ru. Il ru Alma 17:1─4 ut patz’ reheb’ li kok’al chan ru naq eb’ li ralal laj Mosiah ke’tenq’aak xb’aaneb’ li k’a’aq re ru a’an. Chan ru nokoxtenq’a rilb’aleb’ ru li loq’laj hu, li tijok ut li kuyuk sa’ xnach’ob’resinkil qib’ rik’in li qaChoxahil Yuwa’?

• Oksi li tusleb’aal na’leb’ re li B’ichleb’aal choq’ reheb’ li Kok’al re xtenq’ankileb’ li kok’al chixtawb’aleb’ li b’ich chirix xtzolb’aleb’ li loq’laj hu ut li tijok. B’ichahomaq junjunqeb’ re a’an sa’ komonil ut tenq’aheb’ li kok’al chixsikb’al k’a’ru neke’xk’ut li b’ich chirix chan ru naq eb’ li k’a’aq re ru a’an nokohe’rosob’tesi.

Alma 17–18; 22:1–3

Naru nintenq’aheb’ li was wiitz’in chi chalk rik’in li Kristo naq nink’ut lin rahom choq’ reheb’.

Li rajom laj Ammon re wank jo’ xmoos laj Lamoni chirix xnumik li hoonal kixk’am chixtawb’al li hoonal re xtzolb’al laj Lamoni naq li raam wan chi teeto ut chi kawresinb’il re xk’ulb’al li evangelio.

Kok’ k’anjel naru chi b’aanumank

• Tenq’aheb’ li kok’al chirilb’aleb’ ru li raqal sa’ Alma 17:21─39 li neke’xseraq’i li esil chirix lix k’anjel laj Ammon chiru li rey aj Lamoni. Kanab’eb’ chixyiib’ankileb’ xjalam-uucheb’ kristiaan malaj li kik’ulman sa’ li esil ut chirix a’an xseraq’inkil li esil rik’ineb’ li raatin. Tenq’aheb’ li kok’al chirilb’al chan ru naq lix k’anjel laj Ammon kixtoch’ xch’ool li rey (chi’ilmanq Alma 18:9─23). K’a’ru naqatzol sa’ li seraq’ a’an chirix chan ru xtenq’ankileb’ li qas qiitz’in chirajb’al xtzolb’al xkomon xna’leb’eb’ chirix li evangelio?

  laj Ammon naxkoleb’ lix karneer li rey

  Laj Ammon naxkoleb’ lix ketomq li rey, xb’aan li xMinerva K. Teichert.

• Il ru Alma 22:1─3 ut k’e xb’oqb’aleb’ li kok’al chi ab’ink chi us re xk’eeb’al reetal chan ru kik’anjelak lix chaab’il b’aanuhom laj Ammon choq’ re lix yuwa’ li rey aj Lamoni. Kanab’eb’ chixk’oxlankil anihaq neke’xnaw ru li naraj ru xnawb’al chirix li evangelio. Ye reheb’ li kok’al naq lix rahomeb’ ut lix chaab’il b’aanuhomeb’ naru naxtenq’a li kristiaan a’an chirilb’al xnimal xchaab’ilal li evangelio. Tenq’aheb’ li kok’al chixk’oxlankil chan ru naru neke’wan choq’ chaab’il eetalil ut chan ru naru neke’xk’ut lix rahomeb’ reheb’ li kristiaan xe’xk’oxla.

• K’e xb’oqb’aleb’ li misioneer malaj junaq li ak xq’aj chaq sa’ xmision toje’ re xwotzb’al li esil chirix laj Ammon wan sa’ Alma 17─18. Kanab’eb’ chixwotzb’al li neke’xtzol rik’in laj Ammon chirix lix k’anjeleb’ li misioneer ut chirix k’a’ru kik’ulman xb’aan xyalb’al xq’e chi k’anjelak chiruheb’ li ras riitz’in. Aatinan rik’ineb’ li kok’al chirix chan ru naru neke’xtaaqe li kixb’aanu laj Ammon.

• Jo’ tzoleb’aal, yiib’omaq jun xtusulal sa’ li pizarron li k’a’aq re ru naru neke’xb’aanu li kok’al re k’anjelak chiruheb’ lix junkab’al. Chan ru te’osob’tesiiq chixjunil li junkab’al rik’in xb’aanunkileb’ li k’anjel a’an?

Alma 18:24–43; 19:16–34

Naru ninwotz li evangelio rik’ineb’ jalan chik kristiaan.

Chan ru naru nakawoksiheb’ li seraq’ sa’eb’ li raqal a’an re xmusiq’ankileb’ li kok’al chi wank jo’ misioneer jo’ laj Ammon ut xAbix?

Kok’ k’anjel naru chi b’aanumank

• K’uteb’ junjunq li jalam-uuch li te’reetali junjunqeb’ li yaal kixwotz laj Ammon rik’in li rey aj Lamoni li neke’tawman sa’ Alma 18:24─40 (chi’ilmanq li perel re kok’ k’anjel re li xamaan a’in). Kanab’eb’ li kok’al chixk’oxlankil naq a’aneb’ li misioneer ut chixwotzb’al li neke’xnaw chirixeb’ li yaal a’an chirib’ileb’ rib’.

• Il ru li seraq’ chirix xAbix rik’ineb’ li kok’al (chi’ilmanq Alma 19:16─20, 28─29). Kanab’eb’ li kok’al chixk’eeb’aleb’ xhoonal re xk’oxlankil naq a’aneb’ xAbix ut chixtoch’b’al li okeb’aal re li tzoleb’aal ut xch’olob’ankil xyaalal li k’a’ru kik’ulman sa’ Alma 19:1─17. Chan ru naru nokowan jo’ xAbix ut naqach’olob’ xyaalal li yaalil na’leb’ neke’qanaw?

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixk’uub’ankil rik’in tijok jun xjayalihomeb’ rik’ineb’ lix junkab’al, re xwotzb’al li evangelio rik’in anihaq.

Xchaab’ilob’resinkil li qak’utum

Patz’ reheb’ chan ru neke’xk’anjela li neke’b’oqe’ chixb’aanunkil. Naq taak’eheb’ xb’oqb’al li kok’al chi k’anjelak a’ yaal li neke’xtzol, patz’ reheb’ chan ru naq xe’xk’anjela li b’oqb’ileb’ chixb’aanunkil sa’ li tzolok chal re. A’an naxk’ut chiruheb’ li kok’al naq laa’at nakawaj xnawb’al chan ru naq li evangelio yoo chirosob’tesinkil xyu’ameb’ a’an. Naq te’xwotz lix numsihomeb’, te’kawob’resiiq ut te’xtenq’a rib’ chixyu’aminkil li evangelio (chi’ilmanq Li k’utuk jo’ li Kolonel, 35).

perel re kok’ k’anjel: naru ninwotz li evangelio rik’ineb’ jalan chik kristiaan