“29 junio─5 julio. Alma 23–29: “Maajo’q’e ke’xjalb’ehi rib’,” ” Kim, Taaqehin—Choq’ re li Tzoleb’aal reheb’ li Kok’al: Lix Hu laj Mormon 2020 (2020)
“29 junio─5 julio. Alma 23–29,” Kim, Taaqehin—Choq’ re li Tzoleb’aal reheb’ li Kok’al: 2020
Eb’ laj Anti-Nefi-Lehi neke’xmuqeb’ lix k’anjeleb’aal re pleet sa’ li ch’och’, xb’aan laj Jody Livingston
29 junio─5 julio
Alma 23–29
“Maajo’q’e ke’xjalb’ehi rib’ ”
Rik’in tijok, tzol Alma 23─29 ut sik’ aamusiq’ankil chirix li k’a’ru neke’raj ru li kok’al ut chan ru xtenq’ankileb’.
Xtz’iib’ankil li nakak’oxla
Xkanab’ankileb’ chi wotzok
Yiib’ jun uhej sa xch’ool chiru jun perel li hu ut kanab’eb’ chixjunqaleb’ li kok’al chixchapb’al. Naq wanq sa’ li ruq’eb’, kanab’eb’ chixyeeb’al k’a’ruhaq yookeb’ chixtzolb’al sa’ lix Hu laj Mormon lix naxk’e xsahileb’ xch’ool.
Xk’utb’al li tzol’leb’: Kok’al toj ka’ch’ineb’ xyu’am
Osob’tesinb’ilin naq ninb’aanu li k’a’ru ninyeechi’i.
K’a’ru xatzol sa’ xtzolb’al Alma 24:6─24 li naru naxtenq’aheb’ li kok’al chixtawb’al ru lix aajelil ru xb’aanunkil li k’a’ru tiik naqayeechi’i?
Kok’ k’anjel naru chi b’aanumank
-
Il ru junjunq li raqal malaj ch’ol aatin sa’ Alma 24:6─24 re xk’utb’al chiruheb’ li kok’al chirixeb’ laj Anti-Nefi-Lehi, li k’a’ru ke’xyeechi’i, ut chan ru naq ke’xb’aanu li ke’xyeechi’i. Naru ajwi’ nakawoksi li jalam-uuch natawman sa’ li tusleb’ aatin re li xamaan a’in re Kim, Taaqehin—Choq’ reheb’ li komon ut li junkab’al malaj “Ch’ol 26: Lix tenamit laj Ammon” (Eb’ li Esilal sa’ lix Hu laj Mormon, 73─74, malaj li video sa’ ChurchofJesusChrist.org).
-
Ch’olob’ chan ru naq eb’ laj Anti-Nefi-Lehi ke’xmuq sa’ ch’och’ lix k’anjeleb’aal re pleet re xb’aanunkil li ke’xyeechi’i. Kanab’eb’ li kok’al chixyiib’ankil xjalam-uuch jun li yok’leb’ ch’iich’ ut chirix a’an xk’oxlankil naq neke’xpik jun li jul ut neke’xmuq li yok’leb’ ch’iich’. Tenq’aheb’ li kok’al chixk’oxlankil li k’a’ru neke’xyeechi’i xb’aanunkil. K’a’ut naq aajel ru naq taqab’aanu li k’a’ru naqayeechi’i? Ch’olob’ naq sa’ xkub’ik li qaha’, naqab’aanuheb’ li yeechi’ink rik’in li Dios ut a’an naxb’aanu ajwi’ yeechi’ink qik’in laa’o. Eb’ li yeechi’ink a’an neke’k’ab’a’iman sumwank. Ch’olob’ xyaalal naq osob’tesinb’ilo naq naqab’aanuheb’ li k’a’ru naqayeechi’i re li Dios.
Li evangelio naxk’e xsahil inch’ool, ut naru ninwotz li sahil ch’oolejil a’an rik’ineb’ li was wiitz’in.
Laj Ammon, li kitenq’an chixk’utb’al li evangelio chiruheb’ laj Anti-Nefi-Lehi, kixk’ul xnimal xsahil xch’ool xb’aan xjultikankil li evangelio. Laj Alma, li kik’utuk ajwi’ re li evangelio chiruheb’ naab’aleb’ li kristiaan, kixk’ul ajwi’ li sahil ch’oolejil a’an. Naru naqeek’a li sahil ch’oolejil a’an naq naqawotz lix nawom qach’ool rik’ineb’ li qas qiitz’in.
Kok’ k’anjel naru chi b’aanumank
-
Sik’ ru junjunqeb’ li ch’ol aatin sa’ Alma 26 malaj 29 li neke’aatinak chirix li sahil ch’oolejil, ut il ru rik’ineb’ li kok’al (chi’ilmanq, jo’ eetalil, Alma 26:11, 13 malaj Alma 29:13-14). Kanab’eb’ li kok’al chi xaqliik rajlal sut naq te’rab’i li aatin, “sahil ch’oolejil” malaj junaq chik li aatin chanchan a’an jo’ “saho’k ch’oolej.” Tenq’aheb’ li kok’al chixtawb’al ru naq xwotzb’al li evangelio kixk’e xsahileb’ xch’ool laj Alma ut laj Ammon. Seraq’i jun aanumsihom b’ar wi’ naq xwotzb’al li evangelio kixk’e xsahil aach’ool.
-
Kanab’eb’ li kok’al chixyiib’ankileb’ xjalam-uuch li k’a’ru nak’ehok xsahileb’ xch’ool. Chirix a’an kanab’eb’ li junjunq chi kok’al chixk’eeb’al lix jalam-uuch re junaq chik li ch’ina al ut tixch’olob’ chiru li naraj naxye. K’ut naq wi k’a’ruhaq naxk’e xsahil qach’ool—jo’ li evangelio—li xsahil qach’ool naniman naq naqawotz.
-
K’e re junaq ch’ina al jun lix Hu laj Mormon ut k’e xhoonal chixwotzb’al a’an rik’in junaq chik li ch’ina al sa’ li tzoleb’aal. Waklesi xch’ooleb’ li kok’al chixch’olob’ankil li neke’reek’a chirix lix Hu laj Mormon. K’a’ut naq naqawotz lix Hu laj Mormon rik’ineb’ li qas qiitz’in?
Naru nintenq’aheb’ li wamiiw chixyu’aminkil li evangelio.
Eb’ laj Nefita ke’xkol rixeb’ laj Anti-Nefi-Lehi chiruheb’ li xik’ neke’ilok re ut ke’xtenq’aheb’ chixk’eeb’al chi uxmank li sumwank ke’ok wi’ chaq rik’in li Qaawa’.
Kok’ k’anjel naru chi b’aanumank
-
Seraq’i reheb’ li kok’al li esil naq eb’ laj Anti-Nefi-Lehi ke’xb’aanu jun yeechi’ink re naq maajun wa chik te’pleetiq (chi’ilmanq Alma 27:20─30). Ch’olob’ naq xb’aan li yeechi’ihom ke’xb’aanu laj Anti-Nefi-Lehi, ink’a’ ke’ru chixkolb’aleb’ rib’ chiruheb’ li xik’ neke’ilok reheb’. Il ru Alma 27:23, ut ch’olob’ naq eb’ li ramiiw aj Nefita ke’xkol rixeb’ laj Anti-Nefi-Lehi re naq te’ruuq chixb’aanunkil li k’a’ru ke’xyeechi’i. Chan ru naru naqatenq’aheb’ li qamiiw chixb’aanunkil li k’a’ru neke’xyeechi’i? Aatinan chirix junaq hoonal b’ar wi’ junaq aawamiiw xatxtenq’a chixb’aanunkil li k’a’ru xayeechi’i re li Dios.
-
K’utb’esi rik’ineb’ li kok’al li hoonal b’ar wi’, rik’in rahok, naru neke’xtenq’aheb’ li ras riitz’in chixsik’b’al ru li k’a’ru us. Qayehaq, k’a’ru naru naqaye re junaq qamiiw li naraj tik’ti’ik malaj naraj rahob’tesink ch’oolej?
Xk’utb’al li tzol’leb’: Kok’al ak ninqeb’
Eb’ li sumwank a’aneb’ yeechi’ihom ninb’aanu rik’in li Dios ut naxb’aanu ajwi’ a’an wik’in laa’in.
Eb’ laj Anti-Nefi-Lehi ke’xmuq lix k’anjeleb’aal re pleet ut ke’xb’aanu jun sumwank naq maajo’q’e chik te’kamsinq. Chanchan ajwi’ a’an, eb’ li kok’al nakatzoleb’ naru neke’xb’aanu li k’a’ru neke’xyeechi’i.
Kok’ k’anjel naru chi b’aanumank
-
K’e reheb’ chixjunileb’ li kok’al kok’ pek ut kanab’eb’ chixtz’iib’ankil li aatin sumwank chiru li pek. Ch’olob’ naq jun li sumwank a’an jun yeechi’ihom rik’in li qaChoxahil Yuwa’ ut eb’ li ralal xk’ajol. Chan ru naq eb’ li qasumwank neke’xk’e qametz’ew malaj “qaxaqamil” jo’ jun li pek? (Alma 24:19). Ilomaq ru sa’ komonil Alma 24:16─25 re xsik’b’al k’a’ruheb’ li sumwank ke’xb’aanu lix tenamit laj Ammon ut chan ru naq ke’xtz’aqob’resi ru lix sumwank. Kanab’eb’ li kok’al chixk’amb’al sa’ kab’l li pek re xjultikankil reheb’ naq te’xtz’aqob’resi ru lix sumwank.
-
Il ru rik’ineb’ li kok’al Alma 24:16─19, ut aatinanqex chirix k’a’ru ke’xb’aanu laj Anti-Nefi-Lehi re xk’utb’al chiru li Dios naq ke’xjal xk’a’uxleb’. K’a’ru ke’xyeechi’i naq ink’a’ chik te’xb’aanu? Ch’olob’ naq eb’ li sumwank neke’qab’aanu a’an “neke’xch’olob’ xyaalal chiru li Dios” naq naqaj xtaaqenkileb’ lix taqlahom (raqal 18). K’a’ruheb’ li sumwank xb’aanuhomeb’ li kok’al?
-
Kanab’eb’ li kok’al chixyiib’ankileb’ xjalam-uuch lix k’anjeleb’aaleb’ laj Anti-Nefi-Lehi re pleet. Chirix a’an kanab’eb’ chixtz’iib’ankil, chirix lix jalam-uucheb’, k’a’ruhaq neke’reek’a naq tento te’xjal re xtaaqenkil li Jesukristo chi tz’aqal ru. Kanab’eb’ chixk’oxlankil naq yookeb’ chixmuqb’al lix k’anjeleb’aal re pleet ut che’xyiib’ jun k’uub’anb’il na’leb’ re xb’aanunkil li k’a’ru xe’xtz’iib’a.
Alma 24:7–10; 26:23–34; 27:27–30
Xb’aan naq aj uxtaan li qaChoxahil Yuwa’, naru naqajal qak’a’uxl ut nokojalaak.
Eb’ li kutan chaq xe’nume’ eb’ li kok’al yookeb’ chaq chi tzolok chirix laj Alma, laj Ammon, ut eb’ laj Anti-Nefi-Lehi. Chan ru naru nakawoksiheb’ li seraq’ a’an re xk’utb’al naq li qaChoxahil Yuwa’ a’an aj uxtaan rik’ineb’ li neke’xjal xk’a’uxl chi maak’a’eb’ xb’alaq’?
Kok’ k’anjel naru chi b’aanumank
-
Tz’iib’a Naq maji’ ut Chirix chiru li pizarron. Kanab’eb’ junjunq li kok’al chirilb’al ruheb’ li raqal a’in re xtawb’al chan chaq ruheb’ laj Lamanita naq maji’ neke’tzole’ xb’aaneb’ laj Ammon ut eb’ li ras: Alma 17:14─15; 26:23─24. Kanab’eb’ xkomoneb’ chik li kok’al chirilb’aleb’ ru li raqal a’in re xtawb’al chan ru naq ke’jala laj Lamanita: Alma 26:31─34; 27: 27─30. Kanab’eb’ li kok’al chixtz’iib’ankil rub’eleb’ li aatin xatz’iib’a k’a’ru xe’xtaw. Chirix a’an k’e xhoonaleb’ chixtawb’al, sa’ Alma 24:7─10, chan ru naq eb’ laj Lamanita ke’ru chi jalaak chi tz’aqal. Wotz xnawom aach’ool chirix lix wankil li Dios re kuyuk maak ut re qatenq’ankil chixjalb’al qak’a’uxl ut chi jalaak.
-
Kanab’eb’ li kok’al chirilb’al ru sa’ komonil Alma 26:21─22 ut chixk’eeb’aleb’ reetal li osob’tesiik neke’xk’ul li neke’xjal xk’a’uxl. Kanab’eb’ li kok’al chixch’olob’ankil junjunqeb’ reheb’ li osob’tesiik a’an rik’ineb’ li raatin.
Li evangelio naxk’e xsahil inch’ool, ut naru ninwotz li sahil ch’oolejil a’an rik’ineb’ li was wiitz’in.
Eb’ li ch’ol a’an nujenaqeb’ rik’in reetalil li sahil ch’oolejil nachal rik’in xyu’aminkil ut xwotzb’al li evangelio. Chan ru naru nakawoksi Alma 26 ut 29 re xwaklesinkileb’ xch’ool li kok’al chixsikb’al li sahil ch’oolejil a’an?
Kok’ k’anjel naru chi b’aanumank
-
Tenq’aheb’ li kok’al chixtawb’aleb’ li aatin “sahil ch’oolejil” ut eb’ li jalan jalanq xtz’iib’ankil li aatin “saho’k ch’oolej” sa’ Alma 26 ut 29. Ilomaq ru sa’ komonil junjunqeb’ li raqal li te’xtaw ut aatinanqex chirix li neke’xk’ut chirix li sahil ch’oolejil. K’a’ru kik’ehok xsahil xch’ool laj Ammon ut laj Alma? Wotz junaq aanumsihom chirix naq xaweek’a xsahil aach’ool xb’aan xyu’aminkil ut xwotzb’al li evangelio, malaj kanab’eb’ li kok’al chixwotzb’aleb’ lix numsihom.
-
Kanab’eb’ wiib’ li kok’al chi xaqliik ut chixka’yankileb’ rib’ re rilb’al ani ta wi’ taase’eq xb’een wa. B’ar wan junjunq li na’leb’ nokoxtenq’a chixjek’inkil xsahileb’ xch’ool li qas qiitz’in? Chan ru naq lix wotzb’al li evangelio naxjek’i sahil ch’oolejil? Tenq’aheb’ li kok’al chixk’oxlankil chan ru naru neke’xwotz li sahil ch’oolejil naxk’e li evangelio rik’ineb’ li ramiiw ut eb’ lix junkab’al.
Xb’oqb’aleb’ chi tzolok sa’ kab’l
Kanab’eb’ li kok’al chixb’aanunkil li k’a’ru neke’xyeechi’i jo’ ke’xb’aanu laj Anti-Nefi-Lehi.
Xchaab’ilob’resinkil li qak’utum
Tzol jun raqal reheb’ li loq’laj hu. Sik’ ru jun li ch’ol aatin sa’eb’ li loq’laj hu malaj junaq li ch’ina raqal li nakak’oxla naq naru naxtenq’aheb’ li kok’al, ut tenq’aheb’ chixkanab’ankil sa’ xk’a’uxleb’. Eb’ li jalam-uuch ut eb’ li eek’asink-ib’ rik’in li uq’ej naru ajwi’ neke’tenq’an.