iyaj sa’ ruq’ jun li ch’ina al

13–19 julio

Alma 32–35

“Teeraw li aatin a’in sa’ lee ch’ool”

K’oxlaheb’ li kok’al nakatzoleb’ naq yooqat chixtzolb’al Alma 32─35 rik’in tijok. Naq taab’aanu a’an, te’chalq li na’leb’ sa’ laa k’a’uxl ut tatmusiq’aaq chirix chan ru taatzoleb’. Tz’iib’aheb’ a’an ut b’aanu jo’ chanru li na’leb’ nakak’ul.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

K’e lix k’ab’a’eb’ li junjunq chi kok’al sa’ jun li sek’. Kanab’ anihaq chixsik’b’al ru junaq li k’ab’a’ej, ut kanab’ li ch’ina al a’an chixwotzb’al k’a’ruhaq xtzol toje’ sa’ lix Hu laj Mormon. B’aanu a’an toj reetal naq chixjunileb’ te’tz’aqonq, a’b’an maa’ani taamin ru chixb’aanunkil.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Alma 32:28–43

Naru nintenq’an chixnimob’resinkil inpaab’aal chirix li Jesukristo.

Eb’ li iyaj, eb’ li che’, ut li ru ki’il q’een a’aneb’ k’a’ruhatq na’no ru li naru chixtenq’ankileb’ li kok’al chixtawb’aleb’ ru li na’leb’ moko neke’ru ta chi ile’k jo’ li paab’aal ut li xnawom ch’oolej. K’oxla chan ru naru nakawoksi lix na’leb’ laj Alma re xtzolb’aleb’ li kok’al.

Kok’ k’anjel naru chi b’aanumank

• K’os ru Alma 32:28─43; naru nakawoksi “Ch’ol 29: Laj Alma nak’utuk chirix li paab’aal ut li raatin li Dios” (Eb’ li Esilal sa’ lix Hu laj Mormon, 81, malaj li video sa’ ChurchofJesusChrist.org). K’ut xjalam-uuch junaq li che’ naq yoo chi k’iik ut kanab’eb’ li kok’al chatenq’ankil chixk’eeb’aleb’ li jalam-uuch chi tustu ru (che’ilmanq li jalam-uuch sa’ li perel re kok’ k’anjel re li xamaan a’in). Ch’olob’ naq jo’ chanru naqayu’ami li evangelio, lix nawom qach’ool nak’i─ natikla chaq jo’ jun li china iyaj, a’b’an naru nawulak jo’ jun nimla che’.

• K’ut chiruheb’ li kok’al jun li iyaj, ut yaab’asi lix tiklajik Alma 32:28 choq’ reheb’. Ye reheb’ li kok’al naq li raatin li Dios chanchan jun li iyaj. Patz’ reheb’ chan ru naru naqatenq’a li iyaj chi k’iik. Kanab’eb’ li kok’al chixk’oxlankil naq neke’raw jun li iyaj, neke’xk’e xha’il, ut neke’xtenq’a chi k’iik. Ye naq moko naru ta naqil li iyaj naq ak x’awman, a’b’an naqanaw naq wan aran ut yoo chaq chi k’iik; moko naru ta ajwi’ naqil li qaChoxahil Yuwa’ chi moko li Jesukristo, a’b’an naqanaw naq tz’aqal wankeb’ ut naq nokohe’xra. Tenq’aheb’ li kok’al chixk’oxlankil k’a’ru naru neke’xb’aanu re xtenq’ankileb’ rib’ re naq lix paab’aaleb’ chirix li Jesukristo taak’iiq.

• Yiib’ xjalam-uuch jun li che’ chiru li pizarron ut kanab’eb’ li kok’al chixyiib’ankileb’ lix xaq malaj eb’ li ru rajlal sut naq te’xk’oxla k’a’ruhaq naru neke’xb’aanu re naq taak’iiq lix paab’aaleb’ chirix li Jesukristo. Kanab’eb’ chireek’asinkileb’ rib’ re xk’utb’esinkil li xe’xk’oxla.

Alma 33:2–11; 34:17–27

Li qaChoxahil Yuwa’ ninrab’i naq nintijok.

Eb’ laj Tzoramita jun sut ajwi’ neke’tijok chiru li xamaan ut junaqik li aatin neke’roksi (chi’ilmanq Alma 31:22─23). Laj Alma ut laj Amulek ke’xk’ut naq naru nokotijok a’ yaal jo’q’e chirix li qamajelal sa’ musiq’ej malaj sa’ tib’elej.

Kok’ k’anjel naru chi b’aanumank

• Ileb’ ru li ch’ol aatin xasik’eb’ ru sa’ Alma 33:4─11 li neke’aatinak chirixeb’ li na’ajej b’ar wi’ naru nokotijok, ut tenq’aheb’ li kok’al chixk’oxlankil b’ar naru neke’tijok. Chirix a’an kanab’eb’ chixyiib’ankileb’ xjalam-uucheb’ naq yookeb’ chi tijok sa’eb’ li na’ajej a’an. Ch’olob’ xyaalal naq naru neke’tijok a’ yaal b’ar, us ta yal sa’ hasb’ yookeb’ chi tijok.

• Sik’eb’ ru ch’ol aatin sa’ Alma 34:17─27 li neke’xch’olob’ li nokoru wi’ chi tijok, ut ileb’ ru choq’ reheb’ li kok’al. Tenq’aheb’ chixk’oxlankil li k’a’ru naru neke’xye re li qaChoxahil Yuwa’ naq te’tijoq, ut kanab’eb’ chixyiib’ankil xjalam-uuch a’an. Ch’olob’ xyaalal naq naru neke’aatinak rik’in li qaChoxahil Yuwa’ chirix a’ yaal k’a’ru neke’reek’a malaj neke’xk’oxla. Seraq’i junaq aanumsihom b’ar wi’ naq li qaChoxahil Yuwa’ kirab’i laa tij.

• B’ichahomaq junaq li b’ich li naxk’ut li tijok chiruheb’ li kok’al, jo’ “Natijok jun ch’ina al” malaj “Ninmutz’ li wu” (B’ichleb’aal choq’ reheb’ li Kok’al, 6, 18). Tenq’aheb’ chixk’eeb’al reetal li naxk’ut li b’ich a’in chirix li tijok.

reetalil li k‘utuk

Xk’utb’al li tzol’leb’: Kok’al ak ninqeb’

Alma 32:1–16, 27–28

Naq tuulanin, li Qaawa’ naru nikinixtzol.

Laj Alma ut laj Amulek ke’ril ruuchinihom lix k’anjeleb’ sa’ xtzolb’aleb’ laj Tzoramita li tuulaneb’ xch’ool ut li ak kawresinb’ileb’ re rab’inkil li raatin li Dios. K’e reetal chan ru naru nakawaklesi xch’ooleb’ li kok’al chixsik’b’al ru wank chi tuulan.

Kok’ k’anjel naru chi b’aanumank

• Patz’ reheb’ li kok’al k’a’ru najultiko’ reheb’ chirix li xe’xtzol sa’ li xamaan xnume’ chirixeb’ laj Tzoramita (chi’ilmanq Alma 31:8─24). Jultika reheb’ naq laj Alma ki’ok xk’a’uxl chirixeb’ a’an xb’aan lix q’etq’etileb’ (chi’ilmanq Alma 31:24─28). Ilomaq ru sa’ komonil Alma 32:1─5 ut kanab’eb’ li kok’al chixk’osb’al ru li ke’xk’ul laj Tzoramita li neb’a’eb’. Chirix a’an kanab’eb’ li kok’al chirilb’al ruheb’ li raqal 12─13 re xsik’b’al k’a’ut naq laj Alma kixk’oxla naq jwal us choq’ reheb’ laj Tzoramita naq ke’isiik chaq sa’eb’ li ch’utleb’aal. B’ar wan reheb’ junjunq li osob’tesihom nak’ulman xb’aan li tuulanil?

• Tenq’aheb’ li kok’al chixtawb’al lix ch’olob’ankil li tuulan xch’ool malaj tuulanil sa’ li K’utul Raqal reheb’ li Loq’laj Hu malaj sa’ jun tusleb’aal aatin. K’a’ chik ru li na’leb’ chirixeb’ li aatin a’an neke’tawman sa’ Alma 32:13─16? Kanab’eb’ chixk’oxlankil chan ru naru neke’xtz’aqob’resi ru jun li ch’ol aatin jo’ “Nawan intuulanil naq .”

Alma 32:26–43

Lix nawom inch’ool chirix li Jesukristo nak’i naq ninch’olani.

Tenq’aheb’ li kok’al nakatzoleb’ chixk’eeb’al reetal k’a’ru naru neke’xb’aanu re “rawb’al” li raatin li Dios sa’eb’ li raam.

Kok’ k’anjel naru chi b’aanumank

• K’e chi kutankil jun k’a’aq re ru kaw ut t’ort’o (jo’ jun li pek) re reetalinkil jun li aamej jwal kaw ut aj q’etq’et, ut k’a’ruhaq q’un (jo’ li ch’och’) re reetalinkil jun li aamej q’un ut tuulan. Kanab’eb’ li kok’al chixch’e’b’aleb’ li ka’a’q re ru a’an. Chirix a’an k’ut chiruheb’ li kok’al jun li iyaj re reetalinkil li raatin li Dios. K’e xb’oqb’aleb’ re xyalb’al xch’ikb’al li iyaj sa’ li pek ut sa’ li ch’och’ ajwi’. Ilomaq ru sa’ komonil Alma 32:27─28 ut aatinanqex chirix k’a’ raj ru naraj naxye “xk’eeb’al xna’aj” (raqal 27) li raatin li Dios sa’ li qaam.

• Naq yooqex chirilb’al ru Alma 32:26─43 sa’ komonil, xaqlinqex chi kok’ aj xsa’ ut kanab’eb’ li kok’al chixyiib’ankil xjalam-uuch jun li iyaj malaj li che’ neke’ch’olob’aman aran—qayehaq, jun li iyaj ut jun li iyaj ak yoo chaq chi moqk (raqal 28), jun li che’ yoo chi k’iik (raqal 30), ut jun li che’ ak nim li yoo chixk’eeb’al li ru (raqal 37). Waklesi xch’ooleb’ chixtz’iib’ankileb’ resil li raqal wankeb’ sa’ Alma 32 chiruheb’ lix jalam-uuch. Chan ru naq xch’olaninkil jun iyaj a’an chanchan xch’olaninkil lix nawom qach’ool chirix li Jesukristo? Chan ru naq naqach’olani lix nawom qach’ool? Kanab’eb’ li kok’al chi k’oxlak chi ch’anch’o chirix chan ru naq yoo chi k’iik lix nawom xch’ooleb’ ut k’a’ru te’xb’aanu re xch’olaninkil.

Alma 33:2–11; 34:17–27

Li qaChoxahil Yuwa’ nikinrab’i naq nintijok.

Moko ch’olch’o ta ru kiwan xna’leb’eb’ laj Tzoramita chirix li tijok, ut junjunq reheb’ a’an toj naqileb’ sa’eb’ li kutan a’in. Laj Alma ut laj Amulek ke’xk’ut li ninqi yaalil na’leb’ re xq’axb’al ruheb’ li b’alaq’il na’leb’ a’an.

Kok’ k’anjel naru chi b’aanumank

• Tenq’aheb’ li kok’al chixsik’b’al sa’ Alma 33:2─11 aatin ut ch’ol aatin aajeleb’ ru li neke’ka’sutiman ut neke’aatinak chirix li tijok. K’a’ru neke’xk’ut chiqu li aatin ut li ch’ol aatin a’an chirix li tijok?

• Tenq’aheb’ li kok’al chixyiib’ankil jun xtusulal li hoonal b’ar wi’ naru neke’tijok, jo’ ajwi’ li neke’yeeman sa’ Alma 33:4─10 ut 34:17─27 ut jo’ ajwi’ eb’ li hoonal sa’eb’ lix yu’am. Kanab’eb’ li kok’al chixwotzb’al malaj chixk’oxlankil xnumsihomeb’ b’ar wi’ ke’tijok ut ke’reek’a naq li Dios kixsume lix tijeb’.

reetalil li tzolok

Xb’oqb’aleb’ chi tzolok sa’ kab’l

Wi naru, k’e reheb’ li junjunq chi kok’al iyaj li naru neke’xk’am sa’ rochocheb’ ut te’raw re xjultikankil reheb’ naq tento te’xtenq’a rib’ re naq lix nawom xch’ooleb’ chirix li Jesukristo taak’iiq. Waklesiheb’ xch’ool chixseraq’inkil reheb’ lix junkab’al li xe’xtzol chirix xk’anjelankil li paab’aal chirix li Jesukristo.

Xchaab’ilob’resinkil li qak’utum

Ch’olob’ xyaalaleb’ li osob’tesihom yeechi’inb’il. Naq taak’e xb’oqb’aleb’ li kok’al chixyu’aminkil junaq li na’leb’ re li evangelio, aatinaheb’ chirix lix yeechi’ihom li Dios choq’ reheb’ li ani neke’yu’amin re li na’leb’ a’an (chi’ilmanq Li k’utuk jo’ li Kolonel, 35).

perel re kok’ k’anjel: naru nawan inpaab’aal chirix li Jesukristo