laj Alma nak’utuk chiru laj Korihor

Chixjunil li k’a’aq re ru naxk’ut naq wan jun li Dios (laj Alma ut laj Korihor), xb’aan laj Walter Rane

6–12 julio

Alma 30–31

“Xchaab’ilal li raatin li Dios”

Tzol Alma 30─31 rik’in xk’oxlankileb’ li kok’al nakatzoleb’. Naq yooqat chi k’oxlak chirix lix kawileb’ ut lix majelaleb’, li Santil Musiq’ej tatxtenq’a chixnawb’al k’a’ru taak’ut chiruheb’.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li kok’al chixwotzb’al xsumenkileb’ patz’om jo’ a’in: Jo’q’e tento tootijoq? K’a’ru naqaye naq nokotijok? Ma wan anihaq naraj xwotzb’al chan ru ke’tijok laj Tzoramita ut chan ru kitijok laj Alma?

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Alma 30:44

Chixjunil li k’a’aq re ru naxch’olob’ xyaalal li Dios.

Laj Alma kixk’uteb’ li k’a’aq re ru sa’ choxa ut sa’ li ch’och’ re xch’olob’ankil xyaalal naq li Dios yo’yo ut naxb’eresi li ruchich’och’. K’a’ru naru nakak’ut chiruheb’ li kok’al sa’ xsutameb’ li naxch’olob’ xyaalal li Dios?

Kok’ k’anjel naru chi b’aanumank

• Il ru Alma 30:44 rik’ineb’ li kok’al ut k’e xb’oqb’aleb’ chixk’eeb’al reetal li k’a’aq re ru kixye laj Alma li nokoxtenq’a chixnawb’al naq tz’aqal wan li Dios. K’eheb’ chi kutankil xjalam-uuch junjunq li k’a’aq re ru a’an ut kanab’eb’ li kok’al chixk’utb’al li yookat chirilb’al resil sa’ li raqal. Kanab’eb’ li kok’al chixyiib’ankileb’ sa’ jalam-uuch li k’a’ru neke’tenq’an reheb’ chixpaab’ankil li Dios.

• Wi naru, elen chirix li tzoleb’aal chi b’eek rochb’eeneb’ li kok’al malaj kanab’eb’ chi xaqliik chiru jun li ventaan naq yooqat chirilb’al ru Alma 30:44. Kanab’eb’ chixk’utb’aleb’ li k’a’aq re ru li neke’tenq’an reheb’ chixnawb’al naq tz’aqal wan li Dios. Li perel re kok’ k’anjel re li xamaan a’in naru ajwi’ natenq’an.

• Kanab’eb’ li kok’al chi chunlaak sa’ jun sirso ut te’xb’icha sa’ komonil jun li b’ich li na’aatinak chirix lix yo’ob’tesihom li Dios, jo’ “Raab’ilin xb’aan li Dios sa’ choxa” (B’ichleb’aal choq’ reheb’ li Kok’al, 16). Naq yooqeb’ chi b’ichank li kok’al, kanab’eb’ chixnumsinkil junaq k’a’aq re ru chirib’ileb’ rib’, jo’ jun li b’olotz’. Naq li son taaxaqliiq, kanab’ li ch’ina al li xkana wi’ li b’olotz’ chixyeeb’al junaq k’a’aq re ru kixyo’ob’tesi li qaChoxahil Yuwa’ li naxb’antioxi a’an.

Alma 31:5

Li raatin li Dios nim xwankil.

Naq eb’ li kok’al neke’k’oxlak chirix li wankilal, maare te’xk’oxlaheb’ li superhéroes, li rey ixq, malaj li rey. Laa’at naru nakatenq’aheb’ chixtawb’al ru naq li raatin li Dios jwal nim wi’chik xwankil chiru “k’a’aq chik re ru” (Alma 31:5).

Kok’ k’anjel naru chi b’aanumank

• Yiib’ xjalam-uuch jun li yok’leb’ ch’iich’ chiru li pizarron. Il ru Alma 31:5 rik’ineb’ li kok’al ut kanab’eb’ chixk’eeb’al reetal li k’a’ru naxye laj Alma naq jwal nim wi’chik xwankil chiru li yok’leb’ ch’iich’. Wotz junaq aanumsihom b’ar wi’ naq li raatin li Dios kixb’aanu junaq nimla k’anjel sa’ laa yu’am.

• B’ichahomaq jun li b’ich sa’ komonil chirixeb’ li loq’laj hu, jo’ “Tintzol, tinxk’oxla, tintijoq” (B’ichleb’aal choq’ reheb’ li Kok’al, 66), ut kanab’eb’ li kok’al chi ab’ink re xtawb’al chan ru nokohe’xtenq’a li loq’laj hu. Ka’suti li ch’ol aatin “Li raatin li Dios jwal nim wi’chik xwankil chiru …” naab’al sut, ut kanab’eb’ li kok’al chatenq’ankil chixtz’aqob’resinkil ru li ch’ol aatin.

Alma 31:8–35

Li qaChoxhahil Yuwa’ narab’iheb’ lin tij.

Laj Alma kiraho’ xch’ool naq kiril chan ru yookeb’ chi tijok laj Tzoramita (chi’ilmanq Alma 31:24), xb’aan naq ink’a’ neke’xpaab’ li Jesukristo ut jun ajwi’ li tij neke’xka’suti sa’ jun na’ajej b’ar wi’ naru neke’ile’ (Alma 31:13─14). A’b’an lix tij laj Alma tuulan tz’aqal ut kixk’ut xpaab’aal chirix li Kristo.

Kok’ k’anjel naru chi b’aanumank

• Rik’in roksinkileb’ li raqal sa’ Alma 31:8─35, k’os ru choq’ reheb’ li kok’al li resilal laj Alma ut eb’ laj Tzoramita. Naru nakawoksi “Ch’ol 28: Eb’ laj Tzoramita ut li Rameumptom” (Eb’ li Esilal sa’ lix Hu laj Mormon, 78─80, malaj li video sa’ ChurchofJesusChrist.org). K’ut lix jalanileb’ lix tij laj Tzoramita rik’in li re laj Alma. Kanab’eb’ li kok’al chixk’oxlankil naq xe’xnaw ru jun li ch’ina al aj Tzoramita. K’a’ raj ru te’xye re, re xk’utb’al chiru chan ru li tijok?

• Tenq’aheb’ li kok’al chixtawb’aleb’ ru chan ru neke’tijok laj Tzoramita (chi’ilmanq Alma 31:15─18) naq yookeb’ chatenq’ankil chixyiib’ankil jun li Rameumptom rik’ineb’ kok’ kaaxukuut malaj kok’ pek. Ch’olob’ naq moko a’an ta tz’aqal xtusulal li tijok. Patz’ reheb’ li kok’al chan ru tento tootijoq, ut kanab’eb’ chirisinkil jun li kaaxukuut malaj jun li pek naq yooqeb’ chixyeeb’al junjunqaq li na’leb’.

reetalil li k‘utuk

Xk’utb’al li tzol’leb’: Kok’al ak ninqeb’

Alma 30

Lix Hu laj Mormon nikinixtij chirixeb’ li b’alaq’ aj k’utum.

Lix b’alaq’ aj k’utum laj Korihor neke’ch’olob’aman sa’ lix Hu laj Mormon re qatenq’ankil chixnawb’aleb’ ru ut chixtz’eqtaanankileb’ li k’utum chanchaneb’ a’an sa’eb’ li qakutan.

Kok’ k’anjel naru chi b’aanumank

• K’eheb’ chi kutankil junjunqeb’ k’a’aq re ru (jo’ li tumin malaj li tzakemq) ut reetalileb’ a’an jo’ b’atz’uul. B’ar wan raj te’wulaq chiruheb’ li kok’al? Tenq’aheb’ li kok’al chixsik’b’al sa’ Alma 30:12─18 tik’ti’ malaj b’alaq aj k’utum kixk’ut laj Korihor chirix li Dios.

• Tenq’aheb’ li kok’al chixk’eeb’al reetal li tik’ti’ kixk’ut laj Korihor ut chixtz’iib’ankileb’ a’an chiru kok’ setb’il hu re xk’eeb’al chiru li pizarron (chi’ilmanq Alma 30:12─18, 24). Kanab’eb’ li kok’al chixsik’b’al sa’ Alma 30:32─35 chan ru naq laj Alma kixsumeheb’ lix tik’ti’ laj Korihor. Patz’ reheb’ li kok’al chan ru naru neke’xnaw naq tz’aqal yaal li k’a’ru kixk’ut laj Alma.

  laj Korihor na’aatinak rik’in laj Alma

  Laj Korihor na’aatinak rik’in laj Alma, xb’aan laj Robet T. Barret.

Alma 31:5

Li raatin li Dios jwal nim wi’chik xwankil chiru k’a’ruhaq chik.

Jo’q’e aaweek’ahom lix wankil li raatin li Dios? K’oxla chan ru naq eb’ laa numsihom naru neke’xmusiq’aheb’ li kok’al nakatzoleb’.

Kok’ k’anjel naru chi b’aanumank

• Kanab’eb’ li kok’al chixk’oxlankil k’a’ruhaq malaj anihaq li jwal nim xwankil, malaj ut, k’uteb’ xjalam-uuch junjunq k’a’aq re ru ninqeb’ xwankil. K’a’ut naq ninqeb’ xwankil li k’a’aq re ru a’an? Ilomaq ru sa’ komonil Alma 31:5 ut patz’ reheb’ li kok’al k’a’ru naraj naxye li raqal a’an naq neke’xk’oxla. Chan ru naq li raatin li Dios jwal nim wi’chik xwankil chiru jun li yok’leb’ ch’iich’? K’a’ru wan xwankil chixb’aanunkil?

• Aatinan rik’ineb’ junjunq li kok’al rub’elaj, ut k’e xb’oqb’aleb’ chixk’oxlankil junaq xnumsihomeb’ li naru neke’xwotz sa’ li tzoleb’aal b’ar wi’ naq eb’ li loq’laj hu malaj raatin junaq aj jolominel sa’ li Iglees kixtenq’aheb’ chixb’aanunkil k’a’ruhaq us. K’a’ut naq li raatin li Dios kixtenq’aheb’ chirajb’al xb’aanunkil li k’a’ru us?

• B’icha jun li b’ich rik’ineb’ li kok’al chirix li raatin li Dios, jo’ “Jun li profeet” malaj “Tintzol, tink’oxla, tintijoq” (B’ichleb’aal choq’ reheb’ li Kok’al, 58, 66). Te’ruuq ajwi’ chixb’ichankil junaq chik li b’ich chirix a’an.

Alma 31:8–35

Naru ninwan chi tuulan.

Sa’ chixjunil li k’a’ru ink’a’ us ke’xb’aanu laj Tzoramita, lix q’etq’etileb’ kixrahob’tesi chi us xch’ool laj Alma. A’in jun li chaab’il hoonal re xk’utb’al chiruheb’ li kok’al lix aajelil ru li tuulanil.

Kok’ k’anjel naru chi b’aanumank

• Tenq’aheb’ li kok’al chixtawb’al ru lix jalanileb’ li q’etq’etil ut tuulanil (chi’ilmanq “Q’etq’etil” ut “Tuulan xch’ool” sa’ li K’utul Raqal reheb’ li Loq’laj Hu). Kanab’eb’ li kok’al chixk’eeb’aleb’ xhoonal chirilb’al ru Alma 31:24─28. Malaj ilomaq ru sa’ komonil “Ch’ol 28: Eb’ laj Tzoramita ut li Rameumptom” (Eb’ li Esilal sa’ lix Hu laj Mormon, 78─90). Naq yooqex chirilb’al ru, k’e xb’oqb’aleb’ chixk’eeb’al reetal chan ru naq q’etq’eteb’ laj Tzoramita. Chan ru kixk’ut laj Alma naq tuulan xch’ool? (chi’ilmanq Alma 31:30─33).

• K’uub’eb’ li kok’al chi ch’uut ut kanab’eb’ li junjunq chi ch’uut chixsik’b’al ru xsumenkil jun patz’om jo’eb’ a’in: B’ar ke’xk’e li raam laj Tzoramita? (chi’ilmanq Alma 31:24, 28). B’ar wan junjunq reheb’ li k’a’aq re ru re ruchich’och’ li neke’xk’e wi’ li raam li kristiaan sa’eb’ li kutan a’in? K’a’ut naq eb’ li kristiaan naru neke’xk’oxla naq jwal chaab’ileb’ chik chiruheb’ li ras riitz’in? Naq li junjunq chi ch’uut ak xk’e jun xsumehom, kanab’eb’ chixyiib’ankil xcha’al jun Rameumptom chiru li pizarron. Chirix a’an kanab’eb’ chixsachb’esinkil xcha’alil a’an rajlal sut naq te’xk’oxla junaq na’leb’ jo’ chanru naru neke’xk’ut xtuulanil.

reetalil li tzolok

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chixk’utb’al chiruheb’ lix junkab’al k’a’ruhaq xe’xtzol chirix lix wankil li raatin li Dios.

Xchaab’ilob’resinkil li qak’utum

Tenq’aheb’ li kok’al chixtzolb’aleb’ li loq’laj hu. Eb’ li kok’al toj ka’ch’ineb’ xyu’am maare ink’a’ neke’ru chi ilok ru hu, a’b’an toj chi jo’kan naru nakak’eheb’ chi tz’aqonk chixtzolb’aleb’ li loq’laj hu. Qayehaq, naru nakawil ru junaq li raqal ut nakanab’eb’ chi xaqliik malaj chixtaqsinkil li ruq’eb’ naq te’rab’i junaq aatin malaj ch’ol aatin taaye reheb’. Chirix a’an tenq’aheb’ chixtawb’al ru li aatin malaj li ch’ol aatin. (Chi’ilmanq Li k’utuk jo’ li Kolonel, 20–21.)

perel re kok’ k’anjel: chixjunil li k’a’aq re ru naxch’olob’ xyaalal li Dios