jun winq natijok

Jalam-uuch xb’aan laj Joshua Dennis

20–26 julio

Alma 36–38

“Tat-iloq wan wi’ li Dios ut taawanq aayu’am”

Naq yooqat chixtzolb’al Alma 36─38 rik’in tijok, tatruuq chixk’ulb’al aamusiq’ankil chirixeb’ li kok’al nakatzoleb’. Tz’iib’aheb’ li na’leb’ nakak’ul, xb’aan naq naru neke’xk’e aana’leb’ chirixeb’ li kok’ k’anjel re tzolok.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ chixjunileb’ li kok’al chixwotzb’al k’a’ruhaq xk’ute’ chiruheb’ xb’aaneb’ lix na’ xyuwa’. Patz’ reheb’ ma neke’xnaw k’a’ru kixk’ut laj Alma chiruheb’ li ralal.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Alma 36:6, 20, 24

Li jalb’a-k’a’uxlej naxk’e xsahil inch’ool.

Naq nakak’ut chiruheb’ li kok’al chirix li sahil ch’oolej naxk’e li jalb’a-k’a’uxlej naq toj kok’eb’, naru nakawaklesiheb’ xch’ool chixjalb’al xk’a’uxleb’ naq yooqeb’ chi k’iik.

Kok’ k’anjel naru chi b’aanumank

• Il ru Alma 36:20 choq’ reheb’ li kok’al ut kanab’eb’ chixk’eeb’al reetal k’a’ru kireek’a laj Alma. Kanab’eb’ chixyeeb’al k’a’ruhaq li nak’ehok xsahileb’ xch’ool. K’ut jun xjalam-uuch li Kolonel ut ch’olob’ naq laj Alma kireek’a xsahil xch’ool xb’aan naq li Jesukristo kixkuyeb’ lix maak.

• K’e reheb’ li junjunq chi kok’al jun li perel hu yiib’anb’ilaq jun li uhej sa xch’ool chiru, ut jun uhej ra xch’ool junpak’al chik. K’e xb’oqb’aleb’ chi ab’ink naq yooqat chirilb’al ru Alma 36:6 ut te’xsik’ ru b’ar wan reheb’ li uhej te’xtaqsi chi kutankil. Ch’olob’ naq laj Alma kixjal xk’a’uxl ut kireek’a xsahil xch’ool xb’aan naq li Jesukristo kixkuy xmaak xb’aan li k’a’ru ink’a’ us kixb’aanu. K’e xb’oqb’aleb’ li kok’al chi ab’ink naq yooqat chirilb’al ru Alma 36:24 chirixeb’ li k’a’ru us kixb’aanu chirix a’an ut te’xtaqsi chi kutankil li uhej chaab’il.

• B’ichahomaq sa’ komonil jun li b’ich chirix li Jesukristo, jo’ “Kixtaqla li Ralal” (B’ichleb’aal choq’ reheb’ li Kok’al, 20–21). Ch’olob’ xyaalal naq li Jesus kik’ulun sa’ li ruchich’och’ re qakolb’al chiru li maak ut re xk’eeb’al xsahil qach’ool.

Alma 37:6–7

“Rik’in li k’a’ru ka’ch’in ut moko nimob’resinb’il ta, nak’ehe’ chi uxmank li xninqal ru na’leb’.”

Chan ru naru nakak’ut chiruheb’ li kok’al naq li Qaawa’ naroksiheb’ li k’a’ru ka’ch’in ut moko nimob’resinb’il ta re xk’eeb’al chi uxmank lix k’anjel?

Kok’ k’anjel naru chi b’aanumank

• Il ru Alma 37:6─7 ut kanab’eb’ li kok’al chixk’achab’ankileb’ rib’ rajlal sut naq taaye li aatin “ka’ch’in.” K’ut chiruheb’ junjunq k’a’aq re ru ka’ch’in li naru neke’reek’asi ninqi k’a’aq re ru malaj li neke’k’ehok chi uxmank ninqi k’a’aq re ru, jo’ jun li batería malaj xlaawil jun li b’eleb’aal ch’iich’. K’a’ru li ninqi k’a’aq re ru neke’uxman malaj neke’eek’asiman sa’ xk’ab’a’eb’ li kok’ k’a’aq re ru a’an? Tenq’aheb’ li kok’al chixk’oxlankileb’ junjunq kok’ k’a’aq re ru malaj moko nimob’resinb’ileb’ ta li naraj li Dios naq taqab’aanu. K’a’ruheb’ li ninqi k’a’aq re ru naru neke’k’ulman xb’aaneb’ li kok’ taqlahom moko nimob’resinb’ileb’ ta?

• K’ut jun malaj wiib’ xjalam-uuch k’a’aq re ru ka’ch’in li neke’tam toj reetal naq neke’ninqan, jo’ lix xaq li pach’aya’ ut li pim, malaj jun tz’uqul li ha’ ut jun li kaq’nab’. Ch’olob’ xyaalal naq eb’ ajwi’ li kok’ b’aanuhom moko nimob’resinb’ileb’ ta naru neke’xjal li qayu’am ut lix yu’ameb’ li qas qiitz’in. Waklesiheb’ xch’ool li kok’al chi aatinak chirix junjunqeb’ li kok’ k’a’aq re ru moko nimob’resinb’ileb’ ta ut chaab’ileb’ li neke’xb’aanu rajlal kutan, malaj wotz laa’at junjunq eetalil. Kanab’eb’ li kok’al chixsik’b’al ru junaq chaab’il k’a’aq re ru ut moko nimob’resinb’il ta li naru neke’xb’aanu chiru li xamaan a’in ut chixyiib’ankil jun xjalam-uucheb’ naq yookeb’ chixb’aanunkil a’an. Kanab’eb’ chixk’amb’al li jalam-uuch a’an sa’ ochoch ut te’xwotz rik’ineb’ lix junkab’al.

Alma 37:38–47

Eb’ li loq’laj hu naru nokohe’xtenq’a rajlal kutan.

Us ta wankeb’ naab’aleb’ li kok’al toj kok’eb’ li ink’a’ neke’ru chi ilok ru hu, laa’at naru nakatenq’aheb’ chixtawb’al xnawom xch’ooleb’ chirixeb’ li loq’laj hu re xb’eresinkileb’ lix yu’am rajlal kutan.

Kok’ k’anjel naru chi b’aanumank

• K’e chi kutankil jun jalam-uuch re li Liahona (jo’ Libro de obras de arte del Evangelio, ajl 68), malaj kanab’eb’ li kok’al chixyiib’ankil jun jalam-uuch naq yooqeb’ chi aatinak chirix li najultiko’ reheb’ (chi’ilmanq 1 Nefi 16:10, 28─29). Chapeb’ chi kutankil li loq’laj hu ut k’e xhoonaleb’ li kok’al chixyeeb’al chan ru naq eb’ li loq’laj hu chanchan li Liahona. Oksi Alma 37:38─47 ut li perel re kok’ k’anjel re li xamaan a’in re xchaab’ilob’resinkil li aatinak.

• B’ichahomaq sa’ komonil jun li b’ich chirix xtzolb’aleb’ li loq’laj hu, jo’ “Tintzol, tink’oxla, tintijoq” malaj “Naq nintzol li loq’laj hu” (B’ichleb’aal choq’ reheb’ li Kok’al, 66; Eb’ li B’ich, 179). K’a’ruheb’ li osob’tesihom chirix xtzolb’aleb’ li loq’laj hu neke’yeeman sa’ li b’ich?

  ixq yoo chirilb’aleb’ ru li loq’laj hu

  Eb’ li loq’laj hu neke’xk’ut chiqu chan ru xtaaqenkil li Dios.

reetalil li k‘utuk

Xk’utb’al li tzol’leb’: Kok’al ak ninqeb’

Alma 36

Naru “ninyo’la rik’in li Dios” naq nintaaqe li Jesus ut ninjal ink’a’uxl chirixeb’ lin maak.

“Li jale’k ch’oolej … a’an jun jalaak sa’ li qawanjik. A’an jun li jalaak nim xwankil ut, li Qaawa’ ut eb’ lix profeet neke’xye naq a’an jun ak’ yo’laak” (“Conversión,” Temas del Evangelio, topics.ChurchofJesusChrist.org).

Kok’ k’anjel naru chi b’aanumank

• Numsi wi’chik choq’ reheb’ li kok’al li resil xjalajik xch’ool laj Alma li alalb’ej, wan sa’ Alma 35:6─21. Tz’iib’a chiruheb’ kok’ setb’il hu, aatin malaj ch’ol aatin reheb’ li raqal a’an li neke’xch’olob’ k’a’ru kireek’a laj Alma, ut k’eheb’ chiru li pizarron. Kanab’eb’ li kok’al chixtusub’ankileb’ ru li kok’ setb’il hu sa’ wiib’ ch’uut: li k’a’ru kireek’a laj Alma naq maji’ najultiko’ re li k’a’ru kik’ute’ chiru xb’aan lix yuwa’ chirix li Kolonel, ut li k’a’ru kireek’a chirix naq kijultiko’ re. Ilomaq ru sa’ komonil Alma 36:17─20, ut ch’olob’ xyaalal chiruheb’ li kok’al naq li Jesukristo naxkuy qamaak wi naqajal qak’a’uxl.

• Tz’iib’a Yo’laak rik’in li Dios ut eb’ li raqal a’in reheb’ li loq’laj hu chiru li pizarron: 1 Jwan 4:7; Mosiah 5:7; 27:25─26; Alma 5:14; 22:15. Tenq’aheb’ li kok’al chirilb’aleb’ ru li raqal ut chixsik’b’aleb’ li ch’ol aatin li neke’xch’olob’ k’a’ru naraj naxye yo’laak rik’in li Dios. Chan ru nawan jun li kristiaan chirix naq nayo’la rik’in li Dios? Chan ru naru naqak’ut naq xooyo’la rik’in li Dios?

Alma 37:6–9, 38–47

“Rik’in li k’a’ru ka’ch’in ut moko nimob’resinb’il ta, nak’ehe’ chi uxmank li xninqal ru na’leb’.”

Tenq’aheb’ li kok’al nakatzoleb’ chirilb’al naq rilb’al ruheb’ li loq’laj hu, us ta yal junpaat rajlal kutan, naru naxk’e xninqal rosob’tesinkileb’.

Kok’ k’anjel naru chi b’aanumank

• Yiib’ xjalam-uuch malaj k’e chi kutankil junaq li kub’eet. Jarub’ tz’uqul raj li ha’ taanujaq wi’? Tenq’aheb’ li kok’al chixk’eeb’al reetal naq taa’ajmanq ru naab’al tz’uqul re xnujob’resinkil. Chan ru najunajiman a’an rik’in Alma 37:6─7? Chan ru naq rilb’aleb’ ru li loq’laj hu chanchan xk’eeb’al kok’ tz’uqul chi ha’ sa’ jun li kub’eet?

• Kanab’eb’ li kok’al chixsik’b’al sa’ Alma 37:6─9 li osob’tesihom neke’chal sa’eb’ li “tz’iib’anb’il esil,” malaj eb’ li loq’laj hu. Jo’ tzoleb’aal, yiib’omaq jun xtusulal li k’a’ru neke’xtaw. Chan ru rosob’tesihom qayu’am rilb’aleb’ ru li loq’laj hu? Ye lix nawom aach’ool chirixeb’ li loq’laj hu ut waklesiheb’ xch’ool li kok’al chixb’aanunkil ajwi’ a’an.

• K’ut malaj k’e chi kutankil jun xjalam-uuch li Liahona (jo’ Libro de obras de arte del Evangelio, ajl 68), ut kanab’eb’ li kok’al chixka’sutinkil li najultiko’ reheb’ chirix li Liahona li wan resil sa’ 1 Nefi 16:10,28. Tenq’aheb’ li kok’al chirilb’al ru Alma 37:38─42. Chan ru nak’anjelak chaq li Liahona? Chan ru naq juntaq’eet a’an rik’in chan ru neke’k’anjelak li loq’laj hu? Ilomaq ru sa’ komonil eb’ li raqal 43─47 re xtenq’ankileb’ chixsumenkil li patz’om a’an. Kanab’eb’ li kok’al chixtz’aqob’resinkil ru li perel re kok’ k’anjel jo’ xkomon li ch’ina k’anjel a’in.

reetalil li tzolok

Xb’oqb’aleb’ chi tzolok sa’ kab’l

Waklesi xch’ooleb’ li kok’al chixyeeb’al k’a’ut naq neke’xb’antioxiheb’ li loq’laj hu ut chixk’eeb’al xb’oqb’aleb’ lix junkab’al chixb’aanunkil ajwi’ a’an.

Xchaab’ilob’resinkil li qak’utum

Tenq’aheb’ li kok’al chi tz’olok chi chaab’il. Li rajom naq nakatzoleb’ li kok’al moko ka’ajwi’ ta xk’utb’al li yaal chiruheb’. Tento taatenq’aheb’ ajwi’ chi wulak chi wank jo’ tz’aqal chaab’il kristiaan li neke’xsik’ li yaal xjuneseb’ rib’. Qayehaq, sa’ xna’aj naq ka’ajwi’ taaseraq’i reheb’ li kok’al li yaal neke’tawman sa’ li resilal lix jalajik xch’ool laj Alma, naru taak’uub’eb’ kok’ k’anjel b’ar wi’ naru te’xtaw xjuneseb’ rib’ li yaal sa’ li esil.

perel re kok’ k’anjel: eb’ li loq’laj hu nokohe’xnach’ob’resi rik’in li Kristo