“29 junio–5 julio. Alma 23–29: “Maajo’q’e ke’xjalb’ehi rib’,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“29 junio–5 julio. Alma 23–29,” Kim, Taaqehin—Choq’ reheb’ li komon ut li junkab’al: 2020
Eb’ laj Anti-Nefi-Lehi neke’xmuqeb’ lix k’anjeleb’aal re pleet sa’ li ch’och’, xb’aan laj Jody Livingston
29 junio–5 julio
Alma 23–29
“Maajo’q’e ke’xjalb’ehi rib’ ”
Naq nakatzol Alma 23–29, k’a’ruheb’ li esil nakataw choq’ aawe aajunes ut choq’ re laa junkab’al? K’a’ru naru taawotz sa’eb’ laa tzoleb’aal sa’ li Iglees?
Xtz’iib’ankil li nakak’oxla
Ma wan naq nakapatz’ ma naru chi yaal taajalaaq jun kristiaan? Maare yoo laa k’a’uxl chirix ma naru tatnumtaaq sa’ xb’een li ink’a’ us aab’aanuhom malaj li ink’a’ us k’aynaqat chixb’aanunkil, malaj maare juntaq’eet laa k’a’uxl chirixeb’ li raab’ileb’ aab’aan. Wi jo’kan, li seraq’ chirixeb’ laj Anti-Nefi-Lehi naru tatxtenq’a. Eb’ li tenamit a’in xik’ ke’ilok reheb’ laj Nefita. Naq laj Ammon ut eb’ li ras riitz’in ke’xk’e xch’ool chixjultikankil li evangelio chiruheb’, eb’ laj Nefita “ke’xse’eheb’.” Ke’xk’oxla naq us wi’chik xkamsinkileb’ raj laj Lamanita chiru xjalb’aleb’ raj xch’ool. (Chi’ilmanq Alma 26:23–25.)
A’ut ke’jala laj Lamanita—rik’in lix wankilal li Qaawa’ re jalok ch’oolej. Junxil ke’wan jo’ “jun li tenamit kawujenaqeb’ ut josq’eb’ ” (Alma 17:14), a’ut ke’ok chi “na’nookeb’ ru xb’aan x’anchalileb’ xch’ool chiru li Dios” (Alma 27:27). Relik chi yaal, “maajo’q’e ke’xjalb’ehi rib’ ” (Alma 23:6).
Maare wan li b’alaq’il na’leb’ tento taakanab’ malaj “li k’anjeleb’aal re xpo’jik aach’ool” li tento taatz’eqtaana (Alma 23:7). Malaj ut maare ka’ajwi’ tento naq anchalaq chik b’ayaq aach’ool chirix laa paab’aal, ut kawaq b’ayaq chik aach’ool re naq ink’a’ taajalb’ehi aawib’. Maak’a’ naxye k’a’ru li jalaak aajel ru choq’ aawe, li aatin sa’ Alma 23–29 naru tixk’e aayo’onihom naq, rik’in lix wankilal li Jesukristo re xtojb’al aawix, naru taa’uxq li jalaak chi junaj wa.
Li na’leb’ re xtzolb’aleb’ li loq’laj hu aajunes
Naq eb’ li ralal xk’ajol li Dios neke’xk’ul li evangelio, neke’chal li xninqal ru osob’tesink.
Naq li rey sa’ xb’eeneb’ laj Lamanita kixye naq li raatin li Dios “moko taawanq ta xramb’al ru” sa’ xyanq lix tenamit (chi’ilmanq Alma 23:1–5), a’an kixte li okeb’aal re te’xk’ul xninqal ru osob’tesink. Naq nakawil ru Alma 23–29, sik’eb’ li osob’tesink a’in. K’a’ru naru taab’aanu re naq li raatin li Dios maak’a’aq “xramb’al ru” sa’ laa yu’am malaj sa’ laa junkab’al?
Lix jalajik inch’ool chirix li Jesukristo ut lix evangelio naxjal inyu’am.
Eb’ laj Lamanita li ke’ula’aniik xb’aan laj Ammon ut eb’ li ras riitz’in chanchan naq ink’a’ raj te’jale’q xch’ool—chapb’ileb’ xb’aaneb’ li b’alaq’il na’leb’ reheb’ lix yuwa’eb’ ut xb’aaneb’ lix maa’usilal. A’b’an, naab’al reheb’ ke’xk’ulub’a lix evangelio li Jesukristo ut ke’xk’anjela li ninqi jalaak sa’ xyu’ameb’. Jo’ reetalil lix jalajikeb’ xch’ool, laj Anti-Nefi-Lehi ke’xk’ab’a’i rib’ .
Xk’oxlankil lix jalajikeb’ xch’ool laj Lamanita a’in naru tatxmusiq’a chixk’oxlankil lix jalajik aach’ool laa’at “choq’ re li Qaawa’ ” (Alma 23:6). Naru xtzolb’aleb’ li ch’ol a’in rik’in xtz’ilb’al rix chan ru naq lix jalajik xch’ooleb’ laj Anti-Nefi-Lehi kixjal lix yu’ameb’. Re xtikib’ankil, naru taawoksiheb’ li raqal a’in.
Naq nakak’oxla li jalaak ke’xk’ul laj Anti-Nefi-Lehi, k’e reetal chan ru naq lix jalajik aach’ool chirix li Kristo yoo chixjalb’al aayu’am. K’a’ru nakaweek’a naq toj tento taajal sa’ laa yu’am re naq nimaq wi’chik xwankil li evangelio sa’ laa yu’am?
Aj uxtaan li Dios.
Us ta maare jalaneb’ wi’ lix maakeb’ laj Ammon ut eb’ laj Anti-Nefi-Lehi rik’in li k’a’ru xak’ul sa’ laa yu’am, chiqajunilo naqaj ru li ruxtaan li Dios. K’a’ru nakataw sa’ Alma 24:7–19 ut 26:17–22 li nakatxtenq’a chixtawb’al ru li ruxtaan? Naq nakawil ru, naru tatk’oxlaq chirixeb’ li na’leb’ a’in: chan ru naq xatb’oqe’ chixjalb’al aak’a’uxl, k’a’ru ak xanumsi rik’in li jalb’a-k’a’uxlej, k’a’ru xab’aanu re naq ink’a’ chik tatmaakob’q, ut k’a’ruheb’ li osob’tesink xe’chal aawik’in rik’in li jalb’a-k’a’uxlej. Naq nakawileb’ li raqal chi jo’ka’in, k’a’ru nakatzol chirix li ruxtaan li Dios sa’ laa yu’am?
Li k’anjelak chiru li Qaawa’ naxk’am chaq sahil ch’oolejil.
Us ta jalan jalanq li ke’xk’ul, juntaq’eet li reek’ahomeb’ laj Ammon ut laj Alma chirixeb’ lix k’anjeleb’ jo’ aj yehol aatin. K’oxla rilb’al ru Alma 26 ut 29 ut xjuntaq’eetankileb’. K’a’ru nakawil naq juntaq’eet? K’a’ruheb’ li aatin ut ch’ol aatin li ka’sutinb’ileb’? K’a’ru naru nakatzol rik’in laj Ammon ut laj Alma chirix xtawb’al li tz’aqal sahil ch’oolejil us ta wankeb’ laa ch’a’ajkilal? (Re xtz’ilb’al rixeb’ li ch’a’ajkilal kixk’ul laj Alma, che’ilmanq li aatin sa’ xtiklajikeb’ li ch’ol re Alma 5–16. Re xtz’ilb’al rixeb’ li ch’a’ajkilal ke’xk’ul laj Ammon ut eb’ li ras riitz’in, che’ilmanq li aatin sa’ xtiklajikeb’ li ch’ol re Alma 17–28.)
K’a’ru li q’olom ut k’a’ru li xokleb’aal?
Sa’ xq’ehil li q’olok, ch’utub’anb’il li trigo, a’an li q’olom, toja’ naq k’uulanb’il sa’eb’ li xokleb’aal. Li Elder David A. Bednar kixwotz jun xch’olob’ankileb’ li eetalil sa’ Alma 26:5: “Li q’olom sa’ li jaljookil ru aatin a’in neke’reetali li komon sa’ li Iglees li toje’ xe’kub’e xha’. Eb’ li xokleb’aal, a’aneb’ li santil ochoch” (“Honorablemente [retener] un nombre y una posición,” Liahona, mayo 2009, 97). K’oxla k’a’ru naxk’ut chawu li jalajookil ru aatin sa’ Alma 26:5–7 chirix lix aajelil ruheb’ li sumwank re li santil ochoch.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Alma 24:6–19
K’a’ut naq eb’ laj Anti-Nefi-Lehi ke’xmuqeb’ lix k’anjeleb’aal re pleet “sa’ xchamal li ch’och’ ”? (Alma 24:16). Maare eb’ li komon sa’ li junkab’al taawulaq raj chiruheb’ xtz’iib’ankil chiru kok’ hu li k’a’ru te’raj xq’axb’al ru malaj xkanab’ankil. Chirix a’an, te’ruuq chixb’ekb’al jun li jul b’ar wi’ te’xmuqeb’ li kok’ hu.
Alma 24:7–12
Xtzolb’aleb’ li raqal a’in naru tixtenq’a laa junkab’al chixtawb’al ru li xnimal ru maatan re li jalb’a-k’a’uxlej. K’a’ru ke’xb’aanu laj Anti-Nefi-Lehi re xjalb’aleb’ xk’a’uxl chirix lix maakeb’? Chan ru naq li Qaawa’ kixtenq’aheb’ chixjalb’aleb’ xk’a’uxl? K’a’ru naru taqatzol rik’in lix b’aanuhomeb’?
Alma 24:20–27
K’a’ru naqil li naxch’olob’ xyaalal li aatin a’in sa’ lix Hu laj Mormon: “Jo’kan naqil naq k’iila paay chan ru naq li Qaawa’ nak’anjelak re taa’uxq xkolb’al lix tenamit”? (Alma 24:27).
Alma 26:2
Chan ru te’xsume laa junkab’al lix patz’omeb’ laj Ammon sa’ Alma 26:2? Maare taaruuq taatz’iib’aheb’ lix sumehomeb’ chi tustu sa’ jun nimla perel hu ut taat’uyub’ sa’ jun na’ajej re naq chixjunil naru te’ril. Waklesi xch’ooleb’ li komon sa’ li junkab’al chixtiqb’al xna’leb’eb’ chiru naq neke’xk’oxla jalaneb’ chik li osob’tesink li “kixk’e sa’ qab’een” li Dios.
Alma 29:9
Chan ru naq laj Ammon ut laj Alma ke’wan choq’ k’anjeleb’aal sa’ ruq’ li Dios? K’oxla rilb’al ru junjunq li k’anjeleb’aal sa’ laa wochoch ut aatinak chirix chan ru naq neke’xtenq’a laa junkab’al. Chan ru naq a’in nokoxtenq’a chixtawb’al ru chan ru naru toowanq choq’ “k’anjeleb’aal sa’ ruq’ li Dios”?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Jal chan ru nakatk’utuk. Xjalb’al chan ru na’ux li tzolok loq’laj hu sa’ junkab’al naru tixtenq’aheb’ li komon sa’ li junkab’al re naq wanqeb’ xch’ool chi ab’ink ut chi okenk. Qayehaq, chirix naq jun komon sa’ li junkab’al naril ru jun raqal, a’an taaruuq tixpatz’ reheb’ lix komon naq te’xka’suti rik’in tz’aqal li raatineb’ li k’a’ru xyaab’asi.
Xjalam-uucheb’ laj Anti-Nefi-Lehi naq ke’xmuqeb’ lix k’anjeleb’aal re pleet, xb’aan laj Dan Burr