“6–12 julio. Alma 30–31: “Xchaab’ilal li raatin li Dios,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“6–12 julio. Alma 30–31,” Kim, Taaqehin—Choq’ reheb’ li komon ut li junkab’al: 2020
Chixjunil li k’a’aq re ru naxk’ut naq wan jun li Dios (laj Alma ut laj Korihor), xb’aan laj Walter Rane
6–12 julio
Alma 30–31
“Xchaab’ilal li raatin li Dios”
Laj Alma kixch’olob’ xyaalal naq “k’a’jo’ wi’chik xwankil” li raatin li Dios (Alma 31:5). Naq nakawil ru Alma 30–31, tz’iib’a li na’leb’ nachal sa’ aach’ool naq nakaweek’a lix wankil li raatin li Dios sa’ laa yu’am.
Xtz’iib’ankil li nakak’oxla
Eb’ li seraq’ sa’ Alma 30–31 neke’xk’ut chi saqen ru lix wankilaleb’ li aatin—choq’ re li us ut li ink’a’ us. Xmaak li “sahil aatin” ut li “ninqi taqenaqil aatin” re jun aj tzolonel aj b’alaq’, aj Korihor xk’ab’a’, kiru raj naq “te’k’ame’q k’iila aamej taq’a sa’ li sache’k” (Alma 30:31, 47). Jo’kan ajwi’, eb’ lix k’utum laj Tzoram, li kirisi chaq rib’ sa’ xyanqeb’ laj Nefita, ke’xk’am jun ch’uut chi kristiaan chi t’ane’k “sa’ li nimla sachk” ut “chixpo’b’al ru lix b’e li Qaawa’ ” (Alma 31:9, 11).
Chi junpak’al chik, ink’a’ kiru chi eek’asiik lix paab’aal laj Alma chirix naq li raatin li Dios “k’a’jo’ wi’chik xwankil sa’ xb’een xk’a’uxleb’ li tenamit chiru li yok’leb’ ch’iich’, malaj k’a’aq chik ru li na’uxman reheb’ ” (Alma 31:5)—jo’ li raatin laj Korihor ut laj Tzoram. Li raatin laj Alma kixk’ut li junelikil yaal ut kixb’oq lix wankilal li choxa re xch’anab’ankil laj Korihor (chi’ilmanq Alma 30:39–50), ut li raatin kixb’oq ajwi’ li rosob’tesihom li choxa sa’ xb’eeneb’ li xkoheb’ chirix re xk’amb’aleb’ chaq laj Tzoramita wi’chik sa’ li yaal (chi’ilmanq Alma 31:31–38). Jwal ninqeb’ xwankil li na’leb’ a’in choq’ reheb’ laj taaqenel re li Kristo sa’ li kutan a’in, naq wan wi’chik xnimal xwankil li “ninqi taqehil aatin” ut li “nimla sachk” sa’ xk’a’uxleb’ li kristiaan (Alma 30:31; 31:9). Laa’o b’an naru taqataw li yaal wi, jo’ kixb’aanu laj Alma, taqakanab’ qib’ chiru “xchaab’ilal li raatin li Dios” (Alma 31:5).
Li na’leb’ re xtzolb’aleb’ li loq’laj hu aajunes
K’a’ru jun aj xik’ ilonel re li Kristo?
Sa’ Alma 30:6, naxye naq laj Korihor a’an “aj xik’ ilonel re li Kristo.” Junaq li xik’ na’ilok re li Kristo, a’an yalaq ani naxpak’ paab’ank chirix li Kristo, a’ut chi yaal a’an naxka’pak’ali li Kristo (1 Jwan 2:18–22; 4:3–6; 2 Jwan 1:7). Naru ajwi’ naqaye naq a’an “yalaq ani malaj yalaq k’a’ru naxk’e junaq chik na’leb’ jo’ raj li tz’aqal k’uub’anb’il na’leb’ re li kolb’a-ib’ sa’ li evangelio, ut naxyal ru rik’in li Kristo, chi k’utk’u malaj sa’ muqmu” (K’utul Raqal reheb’ li Loq’laj Hu, “Aj xik’ ilonel re li Kristo”).
K’a’ruheb’ li b’alaq’il na’leb’ neke’xpak’ rib’ jo’ li yaalil evangelio li nakawil sa’ li ruchich’och’ anajwan? Jo’ eetalil, li Hermana Julie B. Beck, li kiwan jo’ jolomil awa’b’ej re li Komonil re Tenq’ank, kixk’ut, “Yalaq tzol’leb’ malaj na’leb’ naqab’i sa’ li ruchich’och’ li xik’ na’ilok re li junkab’al, a’an ajwi’ xik’ na’ilok re li Kristo” (“Enseñar la doctrina de la familia,” Liahona, marzo 2011, 35).
Laj Korihor naxyal ru laj Alma, xb’aan laj Robert T. Barrett
Lix Hu laj Mormon naru tinixtenq’a chixkolb’al wib’ chiru lix wankileb’ li neke’xsik inb’alaq’inkil.
Naq nakawil ru Alma 30:6–31, maare chanchan naq ak xawab’iheb’ li na’leb’ kixk’ut laj Korihor. Naru taak’ulmanq a’an xb’aan naq, jo’ kixk’ut li Awa’b’ej Ezra Taft Benson, lix Hu laj Mormon naxk’utb’esi ut naru tooxkawob’resi chiru li “maa’usilal, li k’uub’anb’il na’leb’, ut li tzol’leb’ re laj tza sa’ li qakutankil. Eb’ laj q’etol paab’aal sa’ lix Hu laj Mormon, juntaq’eeteb’ rik’ineb’ laj q’etol paab’aal wankeb’ anajwan. Li Dios, rik’in lix junelikil nawom chi junxilaj, kixk’uub’ lix Hu laj Mormon re naq laa’o taqak’e reetal li sachk ut taqanaw chan ru xpleetinkil li b’alaq’il na’leb’ neke’k’utman sa’eb’ li tzoleb’aal, lix jolomil li tenamit, sa’eb’ li iglees, ut sa’ xna’leb’il li winq sa’ li qakutankil” (Enseñanzas de los Presidentes de la Iglesia: Ezra Taft Benson, [2014], 144).
K’oxla xtz’iib’ankil chi tusub’anb’il eb’ li b’alaqil na’leb’ kixk’ut laj Korihor sa’ Alma 30:6–31. K’a’ru junjunq li na’leb’ te’k’ulmanq rik’in xpaab’ankileb’ li k’utum a’an? Qayehaq, k’a’ru nak’ulman rik’in xpaab’ankil li na’leb’ naq “jo’q’e nakam junaq winq, ak xraqik chaq a’an”? (Alma 30:18). K’a’ruheb’ li b’alaq’il na’leb’ kixk’ut laj Korihor li juntaq’eeteb’ rik’in li b’alaq’il na’leb’ nakawil sa’ li ruchich’och’ anajwan?
Rik’in rilb’al ru resilal li kik’ulman rik’in laj Korihor ut laj Alma naru taakawresi aawib’ choq’ reheb’ li hoonal naq te’wanq li te’xyal aab’alaq’inkil. Maare taak’anjelaq aawe xtzolb’al Alma 30:29–60 re xtawb’al ru chan ru naq kib’alaq’iik laj Korihor (che’ilmanq li raqal 52–53). K’a’ru naru taatzol sa’ lix sumehom laj Alma chirixeb’ lix k’utum laj Korihor? (chi’ilmanq Alma 30:31–35).
Wan xwankil li raatin li Dios re xk’amb’aleb’ xb’e li kristiaan sa’ tiikilal.
Li ch’a’ajkilal naq ke’xjach rib’ laj Tzormita rik’ineb’ laj Nefita, chanchan naq taa’ajmanq ru xtaqlahom li jolomil tenamit malaj li pleetik re xtuqub’ankil ru (chi’ilmanq Alma 31:1–4). A’b’anan laj Alma ak kixtzol xkanab’ankil rib’ chiru “xchaab’ilal li raatin li Dios” (Alma 31:5). K’a’ru nakatzol sa’ Alma 31:5 chirix lix wankil li raatin li Dios? Chan ru aawilom li raatin li Dios chixk’amb’al xch’ool “li tenamit chixb’aanunkil li k’a’ru tiik”? (Alma 31:5). K’oxlan chirix chan ru tatruuq “chixyalb’al” (malaj chiroksinkil) li raatin li Dios re xtenq’ankil anihaq li nakara.
Re xtawb’al ru chi chaab’il chik chan ru naq laj Alma kixyal xkolb’aleb’ li ras riitz’in, tatruuq chixk’eeb’al reetal lix k’oxlahom, li reek’ahom, ut lix b’aanuhom a’an, ut chi junpak’al, li reheb’ laj Tzoramita, jo’ ch’olob’anb’il sa’ Alma 31. Jun kaaxukuut jo’ a’in naru tatxtenq’a. K’a’ru li jalan li nakak’e reetal? K’a’ru nakaweek’a naq naru taab’aanu re wank jo’ laj Alma?
|
Eb’ laj Tzoramita |
Laj Alma |
|---|---|
Eb’ laj Tzoramita Ke’xpaab’ naq chixjunileb’ li moko xkomoneb’ ta, teneb’anb’il sa’ xb’eeneb’ xik sa’ xb’alb’a (Alma 31:17). | Laj Alma Kixpaab’ naq eb’ laj Tzoramita a’aneb’ li “ras riitz’in” ut naq “nim xloq’al” li raam li junjunq reheb’ ” (Alma 31:35). |
Eb’ laj Tzoramita Ke’xk’e xch’ool chirix li b’ihomal (Alma 31:24, 28). | Laj Alma Kiraj xk’amb’aleb’ li aamej rik’in li Jesukristo (Alma 31:34). |
Eb’ laj Tzoramita | Laj Alma |
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Alma 30:44
K’oxla rilb’al ru ut aatinak chirix Alma 30:44 sa’ komonil naq yookex chi b’eek chirix kab’l malaj naq yookex chirilb’aleb’ jalam-uuch reheb’ lix yo’ob’tesihom li Dios. Eb’ li komon sa’ li junkab’al te’ruuq chixwotzb’al li k’a’ru neke’ril li naxch’olob’ xyaalal li Dios. Chan ru naq eb’ li k’a’aq re ru a’an—malaj k’a’ruhaq chik li xqanumsi—nokohe’xtenq’a chixnawb’al naq wan li Dios?
Alma 30:56–60
K’a’ru naqatzol sa’ Alma 30:56–60 chirix li k’a’ru naxb’aanu laj tza reheb’ li neke’taaqenk re? K’a’ru naru taqab’aanu re xkolb’al qib’ chiru lix wankilal a’an?
Alma 31:20–38
Chirix rilb’al ru Alma 31:20–38 rik’in laa junkab’al, taaruuq tex’aatinaq chirixeb’ li patz’om a’in: Chan ru naq jalan lix tij laj Alma rik’in lix tijeb’ laj Tzoramita? Chan ru naru taqataaqe lix b’aanuhom laj Alma sa’ li tijok naqab’aanu sa’ junesal ut jo’ junkab’al?
Eb’ li kok’al toj ka’ch’ineb’ taaruuq te’xk’e jun li pek rub’el xsok xjolomeb’ re taajultiko’q reheb’ li tijok rajlal eq’la ut rajlal ewu. Maare taawulaq ajwi’ chiruheb’ rutz’u’ujinkileb’ lix pek.
Alma 31:23
K’a’ru yooko chixb’aanunkil wulaj wulaj sa’ li qochoch re tzolok ut aatinak chirix li Dios?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Kawresi li na’ajej wankat wi’. “Li na’ajej wanko wi’ naru taawanq xnimal xwankil chirix qaseeb’al chixtzolb’al ut chireek’ankil li yaal” (Li k‘utuk jo’ li Kolonel, 15). Yal aaq’e chixsik’b’al jun li na’ajej re xtzolb’aleb’ li loq’laj hu re taawanq aran li Santil Musiq’ej. Li chaab’il b’ich ut jalam-uuch neke’ru ajwi’ chixk’eeb’al xb’oqb’al li Musiq’ej.
Li Rameumptom, xb’aan laj Del Parson