“13–19 julio. Alma 32–35: “Teeraw li aatin a’in sa’ lee ch’ool,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“13–19 julio. Alma 32–35,” Kim, Taaqehin—Choq’ reheb’ li komon ut li junkab’al: 2020
13–19 julio
Alma 32–35
“Teeraw li aatin a’in sa’ lee ch’ool”
Tz’iib’aheb’ li musiq’ejil na’leb’ nakak’ul naq yookat chixtzolb’al Alma 32–35. K’a’ru nakatmusiq’aak chixb’aanunkil xb’aan li k’a’ru nakatzol?
Xtz’iib’ankil li nakak’oxla
Choq’ reheb’ laj Tzoramita, li tijok a’an jun k’anjel re q’etq’etil, ut li ke’xb’aanu yal jun sut chiru li xamaan. Ke’xaqli b’ar wi’ chixjunil ke’ru chirilb’aleb’ ut ke’xye chi k’iilasutinb’il li q’etq’etil ut jo’maajo’il aatin. Jo’kan ajwi’, eb’ laj Tzoramita maak’a’eb’ xpaab’aal chirix li Jesukristo—ke’xye naq moko yaal ta a’an—ut ke’xrahob’tesiheb’ li neb’a’ (chi’ilmanq Alma 31:9–25). Chi junpak’al chik, laj Alma ut laj Amulek ke’xk’ut rik’in kawilal naq li tijok mas wi’chik wan rilom rik’in li k’a’ru nak’ulman sa’ li qaam chiru li nak’ulman chi ilb’il xb’aan chixjunileb’. Ut wi ink’a’ nak’amok sa’ xtoq’ob’ankileb’ ruheb’ li wankeb’ sa’ aajeleb’ ru, “maak’a’ xyaalal, ut maak’a’ na’ok wi’ ” (Alma 34:28). Ut sa’ xb’een chixjunil, a’an jun xk’utb’esinkil li paab’aal chirix li Jesukristo, li naxyeechi’i li kolb’a-ib’ rik’in li “xnimal ru ut roso’jikil mayej” (Alma 34:10). Li paab’aal a’an, kixch’olob’ laj Alma, nayo’la rik’in li tuulanil ut rik’in “rajb’al paab’ank” (Alma 32:27). Timil timil nak’iik, jo’ jun toon li che’, ut naraj ru ch’olaniik chi rajlal. Naq nakawil ru Alma 32–35, maare taak’oxla laa paab’aal ut laa tij laa’at; ma wan hoonal naq nakaweek’a naq yookat chi k’oxlak jo’ ke’xk’oxla laj Tzoramita? Chan ru taach’olani laa paab’aal chirix li Jesukristo re naq taa’ok choq’ “jun xtoonal li che’ li taanimanq choq’ re li yu’am li junelik taawanq”? (Alma 32:41).
Li na’leb’ re xtzolb’aleb’ li loq’laj hu aajunes
Naru tinsik’ ru wank chi tuulanin.
Laj Alma kixk’e reetal naq tuulanob’resinb’ileb’ xch’ool laj Tzoramita li neb’a’eb’ ut “wankeb’ chi kawresinb’il re rab’inkil li aatin” (Alma 32:6). Naq nakawil ru Alma 32:1–16, k’oxlan chirix chan ru nakakawresi aawib’ re rab’inkil li raatin li Dios.
K’a’ru aanumsihom li xtuulanob’resink aawe? K’a’ru aab’aanuhom re naq tuulanaq chik aach’ool? Eb’ li raqal a’in te’ruuq chixk’utb’al chawu chan ru naq taasik’ ru li tuulanil ruuchil naq taamine’q aawu chi tuulanob’resiik. Qayehaq, k’a’ru lix jalanil li wank chi “neb’a’ jo’ chanru li k’a’aq re ru re li ruchich’och’,” ut li wank chi “neb’a’ sa’ ch’oolej”? (raqal 3). K’a’ru naraj naxye “xtuulanob’resinkil aawib’ xb’aan li aatin”? (raqal 14).
Chi’ilmanq ajwi’ “Tuulan, Tuulanil,” K’utul Raqal reheb’ li Loq’laj Hu.
Nink’anjela inpaab’aal chirix li Jesukristo rik’in rawb’al ut xch’olaninkil li raatin sa’ li waam.
K’a’ut nakak’oxla laa’at naq laj Alma ki’aatinak chirix rawb’al jun iyaj re xsumenkileb’ lix patz’omeb’ laj Tzoramita chirix li loq’onink? K’a’ru li iyaj ki’aatinak wi’ laj Alma? (chi’ilmanq Alma 32:28; 33:22–23). Naq nakawil ru Alma 32:17–43, k’e reetaleb’ li aatin ut ch’ol aatin li nakate’xtenq’a chixtawb’al ru chan ru xk’anjelankil li paab’aal chirix li Jesukristo ut li raatin. K’a’ru nakatzol chirix k’a’ru li paab’aal ut k’a’ru maawa’ li paab’aal? Chirix a’an, naq nakawileb’ ru li ch’ol 33–34, sik’eb’ lix sumenkil lix patz’omeb’ laj Tzoramita, “Chan ru naq taqaw li iyaj?” (Alma 33:1).
A’in jun chik na’leb’ naru taab’aanu re xtzolb’al Alma 32–34: Yiib’eb’ jalam-uuch li neke’reetali chan ru nak’i jun li iyaj. Chirix a’an, tz’iib’aheb’ li aatin sa’ Alma 32:28–43 sa’ li junjunq jalam-uuch li nakate’xtenq’a chixtawb’al ru chan ru rawb’al ut xch’olaninkil li aatin sa’ laa waam.
Chi’ilmanq ajwi’ Mateo 13:3–8, 18–23; Hebreos 11; Neil L. Andersen, “Li paab’aal ink’a’ yal nachal—nasik’man b’an ru,” Jolomil ch’utub’aj-ib’ re octubre 2015; “Paab’aal,” K’utul Raqal reheb’ li Loq’laj Hu.
Naru ninloq’oni li Dios rik’in tijok, yalaq jo’q’e ut yalaq b’ar.
Li na’leb’ ke’xk’e laj Alma ut laj Amulek chirix li loq’onink ut li tijok a’an re xtuqub’ankil ru li b’alaq’il na’leb’ ke’xpaab’ laj Tzoramita (chi’ilmanq Alma 31:13–23). A’b’an eb’ li yaalil na’leb’ ke’xk’ut te’ruuq chiqatenq’ankil chixtawb’al ru li tijok ut li loq’onink chi chaab’ilaq chik. Maare tatruuq chixtz’iib’ankil chi tusub’anb’il eb’ li yaalil na’leb’ chirix li tijok li nakataw sa’ Alma 33:2–11 ut 34:17–29. Chixk’atq li tusulal a’an, tz’iib’a xtusulaleb’ li b’alaq’il na’leb’ chirix li tijok li tuqub’anb’ileb’ ru xb’aan li yaalil na’leb’ a’in (chi’ilmanq Alma 31:12–23). Chan ru naq li k’a’aq re ru nakatzol sa’eb’ li raqal a’in te’xjal chan ru nakattijok ut nakatloq’onink?
Aniheb’ laj Tzenos ut laj Tzenok?
Laj Tzenos ut laj Tzenok a’aneb’ profeet li ke’xch’olob’ xyaalal li Jesukristo sa’ xq’ehil li Najter Chaq’rab’, a’ut eb’ li raatin moko neke’tawman ta sa’ li Najter Chaq’rab’. Wankeb’ xk’utumeb’ li profeet a’in rik’ineb’ laj Nefita xb’aan naq wankeb’ sa’eb’ li perel ch’iich’ bronce li kixk’ul laj Nefi rik’in laj Laban. Yeeb’ileb’ ajwi’ resil sa’ 1 Nefi 19:10–12; Jakob 5:1; ut Helaman 8:19–20.
“Li yu’am a’in a’an xq’ehil re naq taqakawresi qib’ chixk’ulb’al li Dios.”
Naq nakawil ru Alma 34:30–41, k’oxla chan raj ru “taachaab’ilob’resi laa kutan naq wankat sa’ li yu’am a’in” (raqal 33). Chan ru naq li jalb’a-k’a’uxlej ut li kuyuk naru tatxtenq’a chixkawresinkil aawib’ chixk’ulb’al li Dios? Ma wan li k’a’ru tento taajal li yookat chixb’ayb’al? K’anjela yalaq musiq’ejil na’leb’ nakak’ul.
Chi’ilmanq ajwi’ Alma 12:24; Larry R. Lawrence, “K’a’ru maji’ ninb’aanu?” Jolomil ch’utub’aj-ib’ re octubre 2015.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Alma 32:9–11; 33:2–11; 34:38–39
Chan raj ru li qayu’am wi ta ka’ajwi’ kanab’ab’ilaqo chi loq’onink ut tijok sa’ domingo? Naq nekerileb’ ru li raqal a’in sa’ komonil, eb’ li komon sa’ li junkab’al te’ruuq chi aatinak chirix chan ru te’ruuq chi loq’onink wulaj wulaj ut k’a’ut naq neke’xb’antioxi naq neke’ru chixb’aanunkil a’an.
Alma 32:28–43
Jun xjalam-uuch jun li toon li che’ wan sa’ li tusleb’ aatin a’in; naru taawoksi re xk’utb’esinkil li raatin laj Alma sa’eb’ li raqal a’in. Malaj jo’ junkab’al texruuq chi xik chi b’eek re xtawb’aleb’ li q’een li jalan jalanq lix k’iijikeb’ ut te’rileb’ ru li raqal sa’ Alma 32 li neke’xjuntaq’eeta jun li q’een li yoo chi k’iik rik’in li qapaab’aal. Maare li junjunq komon sa’ li junkab’al taaruuq taaraw jun iyaj ut taa’aatinaq chirix li tento taqab’aanu re xtenq’ankil chi k’iik. Chiruheb’ li xamaan chalkeb’ re texruuq chirilb’aleb’ lee riyaj ut teejultika cherib’il eerib’ lix aajelil ru xch’olaninkil chi rajlal lix nawom qach’ool chirix li Jesukristo.
Alma 33:2–11; 34:17–29
K’a’ru neke’xye li raqal a’in chirix chan ru naru taqachaab’ilob’resi chan ru nokotijok sa’ junesal ut jo’ junkab’al?
Alma 34:31
K’a’ru qanumsihom li xk’ut chiqu naq sa’ xjalb’al qak’a’uxl, noko’ok “sa’ junpaat” chixnumsinkileb’ li osob’tesink re li k’uub’anb’il na’leb’ re li tojb’al-ix?
Alma 34:33–35
Ma neke’xnaw li komon sa’ laa junkab’al k’a’ru naraj naxye li b’ayok-ib’? Maare junaq naru tixwotz k’a’ru li b’ayok-ib’ ut li ink’a’ us nachal xb’aan. K’a’ru naraj naxye “xb’ayb’al xkutankil lix jalb’al qak’a’uxl”?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Yiib’eb’ li jalam-uuch. Naru taakanab’eb’ li komon sa’ laa junkab’al chixyiib’ankileb’ li jalam-uuch naq yookeb’ chi tzolok sa’eb’ li loq’laj hu. Qayehaq, maare taawulaq chiruheb’ xyiib’ankil xjalam-uuch jun li iyaj yoo chi k’iik re ok jo’ jun toon li che’ naq yookeb’ chixtzolb’al Alma 32.
“Ut sa’ xk’ab’a’ lix yalb’al eeq’e ut lee paab’aal ut lee kuyum rik’in li aatin sa’ xch’olaninkil, … k’ehomaq reetal, moko taanajto’q ta chik naq teech’oq li ruuchinihom, li q’axal loq’ ” (Alma 32:42).