“20–26 julio. Alma 36–38: “Tat-iloq wan wi’ li Dios ut taawanq aayu’am,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“20–26 julio. Alma 36–38,” Kim, Taaqehin—Choq’ reheb’ li komon ut li junkab’al: 2020
Jalam-uuch xb’aan laj Joshua Dennis
20–26 julio
Alma 36–38
“Tat-iloq wan wi’ li Dios ut taawanq aayu’am”
“Naq nakaweek’a li sahil ch’oolejil li nachal rik’in xtawb’al ru li evangelio, taawaj xyu’aminkil li nakatzol” (Predicad mi Evangelio [2004], 19). Tz’iib’a li nakak’oxla ut nakaweek’a chirix chan ru xyu’aminkileb’ li yaalil na’leb’ yookat chixtzolb’al.
Xtz’iib’ankil li nakak’oxla
Naq laj Alma kiril li maa’usilal sa’ xsutam, a’an kireek’a “rahil ch’oolejil,” “rahilal,” ut “xyot’b’al li raam” (Alma 8:14). Chirix li maa’usilal sa’ xyanqeb’ laj Tzoramita, kixye, “naxrahob’tesi li waam” (Alma 31:30). Kireek’a ajwi’ chi jo’kan naq kisutq’i sa’ xmision sa’ xyanqeb’ laj Zoramita—kiril naq “li raameb’ li tenamit ke’ok chi kawuk, ut naq ke’ok chi ch’a’ajko’k xch’ooleb’ xb’aan xkawil li aatin,” ut xb’aan a’in naq “kiraho’ xch’ool chi numtajenaq” (Alma 35:15). K’a’ru kixb’aanu laj Alma chirix li kiril ut li kireek’a? Ink’a’ yal kika’ch’ino’ xch’ool chi moko ki’ok choq’ aj b’ach’b’ach’ chirix chan ru wan li ruchich’och’. Ruuchil a’an, “kixtaqla xch’utub’ankileb’ li ralal” ut kixk’ut chiruheb’ “li k’a’aq re ru re tiikilal” (Alma 35:16). A’an kixk’ut chiruheb’ naq “maak’a’ chik junaq b’e chi moko chan chik ru naru nakole’ wi’ li winq, ka’ajwi’ rik’in ut sa’ xk’ab’a’ li Kristo. … K’e reetal, a’an li aatin re yaal ut tiikilal” (Alma 38:9).
Li na’leb’ re xtzolb’aleb’ li loq’laj hu aajunes
Naru ninyo’la rik’in li Dios naq tuulanin ut naq tinjal ink’a’uxl.
Moko k’iheb’ ta li te’k’uluq re li jalok ch’oolej tz’aqal jo’ chanru kixk’ul laj Alma. A’b’an wankeb’ na’leb’ sa’ lix numsihom li naru taqatzol ut taqayu’ami chiqajunil, xb’aan naq chixjunileb’ tento naq “te’yo’laaq rik’in li Dios” (Alma 36:23). Naq nakawil ru Alma 36, sik’eb’ li na’leb’ naru taayu’ami. Qayehaq, chan ru nareek’a chirix li maak li ani yo’lajenq rik’in li Dios? chan ru nareek’a chirix li Jesukristo? Taaruuq ajwi’ taasik’eb’ li jalok taak’oxla naq te’k’utb’esimanq sa’ lix paab’ahom ut lix b’aanuhom junaq li yo’lajenaq rik’in li Dios.
Chi’ilmanq ajwi’ Mosiah 5:7; 27:25–26; Alma 5:14; 22:15; Helaman 3:35; “Jale’k xch’ool, Jalb’il xch’ool,” K’utul Raqal reheb’ li Loq’laj Hu.
Li Jesukristo kixtoj rix lix maakeb’ li ruchich’och’.
Maare taak’e reetal naq k’iilasutinb’il junjunqeb’ li na’leb’ sa’ li raatin laj Alma chirix xjalajik lix ch’ool sa’ li ch’ol a’in. Nak’ulman a’an xb’aan naq Alma 36 a’an jun xk’utb’al xyaal jun paay chi utz’u’ujinb’il aatin reheb’ aj Judio, li quiasmo nayeeman re, sa’ wi’ eb’ li aatin malaj na’leb’ k’utb’esinb’ileb’ chi tusub’anb’il, neke’k’amok sa’ jun jolomil na’leb’, toj reetal naq ka’sutinb’ileb’ chi q’ajel-ix. Sa’ Alma 36, li na’leb’ sa’ li raqal 3 ka’sutinb’il sa’ li raqal 27, li na’leb’ sa’ li raqal 5 ka’sutinb’il sa’ li raqal 26, ut nak’ulman ajwi’ rik’in xkomoneb’ chik. Li jolomil na’leb’, a’an li na’leb’ q’axal nim xwankil sa’ li quiasmo. Sik’ ma naru taataw li jolomil na’leb’ sa’eb’ li raqal 17–18. K’e reetal chan ru kijale’ xyu’am laj Alma rik’in naq “kixchap xk’a’uxl li na’leb’ a’in.” Chan ru naq li na’leb’ a’in wanjenaq xwankil sa’ laa yu’am? K’a’ chik li na’leb’ nakataw li k’iilasutinb’il sa’eb’ li raqal a’in?
Chan ru naq li esil a’in chirix li jalb’a-k’a’uxlej ut li kuyuk maak nakatxmusiq’a chixtaaqenkil lix b’aanuhom laj Alma ut chi ilok wan wi’ li Kolonel?
Re xtawb’al xkomon chik li na’leb’ chirix li quiasmo, chi’ilmanq El Libro de Mormón, Manual del alumno (Manual re li Sistema Educativo de La Iglesia [2009], 239–240).
Ke’k’uulaman li loq’laj hu “choq’ re jun chaab’il ajom.”
Ma aak’oxlahom jun sutaq chirix li sachb’a-ch’oolej ut osob’tesink re naq wankeb’ li loq’laj hu anajwan? Li Dios “xk’e chiqak’uula li k’a’aq re ru a’in, li loq’eb’ ” (Alma 37:14). Naq nakawil ru Alma 37, sik’eb’ li osob’tesink li neke’chal rik’in naq wankeb’ li loq’laj hu. Chan ru naq aak’ulumeb’ li osob’tesink a’an? Chan ru naru taqoksiheb’ li loq’laj hu re tenq’ank “chixk’utb’esinkil xwankilal [li Dios] reheb’ li tasal tenamit toj te’chalq”? (Alma 37:18).
Sa’ Alma 37:38–47, laj Alma naxjuntaq’eeta “li raatin li Kristo” rik’in li Liahona. Naq yookat chixk’oxlankil li juntaq’eetank a’in, k’oxla chan ru nakak’ul li sachb’a-ch’oolej ut li wankilal re li raatin li Kristo “wulaj wulaj” (Alma 37:40).
Chi’ilmanq ajwi’ D. Todd Christofferson, “La bendición de las Escrituras,” Liahona, mayo 2010, 32–35.
Eb’ li loq’laj hu neke’xk’ut chiqu chan ru xtaaqenkil li Dios.
“Rik’in li k’a’ru ka’ch’in ut moko nimob’resinb’il ta, nak’ehe’ chi uxmank li xninqal ru na’leb’.”
Wan naq taqeek’a tana’ naq jwal ninqeb’ li qach’a’ajkilal, jo’kan naq jwal nim ajwi’ li na’ajman ru re xtuqub’ankileb’. A’ut naab’al sut li Qaawa’ naxsik’ ru roksinkil “li k’a’ru ka’ch’in ut moko nimob’resinb’il ta” (Alma 37:6) re xtz’aqob’resinkil ru lix k’anjel ut rosob’tesinkil lix yu’ameb’ li ralal xk’ajol. Naq nakawil ru Alma 37:6–7, k’oxla ut tz’iib’a chan ru aawilom chi k’anjelak li na’leb’ a’in sa’ laa yu’am. K’a’ru junjunq reheb’ li k’a’ru ka’ch’in ut moko nimob’resinb’il ta naroksi li Dios re aawosob’tesinkil ut xtz’aqob’resinkil ru lix k’anjel?
Chi’ilmanq ajwi’ Alma 37:41–46; Dallin H. Oaks, “Li k’a’ru ka’ch’in ut moko nimob’resinb’il ta,” Jolomil ch’utub’aj-ib’ re abril 2018.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Alma 36:5–26
Us ta k’a’jo’ xchaq’alil ru li k’a’ru kixk’ul laj Alma, lix jalajik lix ch’ool naxk’utb’esi junjunq li na’leb’ li wankeb’ rilom qik’in chiqajunil. B’oq li junjunq komon sa’ laa junkab’al chixsik’b’al ru jun raqal sa’ Alma 36:5–26 li nak’utuk chirix li “yo’laak rik’in li Dios.” K’a’ru naqatzol sa’eb’ li raqal a’in? Maare eb’ li komon sa’ li junkab’al taaruuq te’xwotz chan ru neke’xyu’ami li na’leb’ ch’olob’anb’ileb’ xb’aan laj Alma.
Alma 36:18–21, 24
Chan raj ru taaruuq te’qoksi li raqal a’in re xtenq’ankil anihaq chirilb’al naq ink’a’ xuwajel li jalok k’a’uxlej, nujenaq b’an rik’in sahil ch’oolejil? Chan ru naru li jalb’a-k’a’uxlej chiqamusiq’ankil chixwotzb’al li evangelio rik’ineb’ li qas qiitz’in?
Alma 37:6–7, 38–46
K’a’ru junjunq reheb’ “li k’a’ru ka’ch’in ut moko nimob’resinb’il ta” (Alma 37:6) li neke’xk’am chaq li ninqi jalok sa’ li qayu’am? Chan ru naq li raatin li Dios chanchan li Liahona? Chan ru naru taqatenq’a qib’ chiqib’il qib’ sa’ xtzolb’aleb’ li loq’laj hu chi yalb’il qaq’e?
Alma 37:35
K’a’ut naq us xtzolb’al xpaab’ankileb’ li taqlahom “sa’ qasaajil”?
Alma 38:12
Ma naxnaw laa junkab’al k’a’ru li tz’uum re xsa’ re li kawaay? Maare naru taak’ut jun xjalam-uuch li tz’uum re xsa’ re li kawaay ut tat-aatinaq chirix chan ru na’oksiman re xb’eresinkil li kawaay. K’a’ru naraj naxye “xramb’al li qatawom”? Chan ru naq xramb’al li qatawom nokoxtenq’a chi wank “chi nujenaq rik’in rahok”?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Tz’iib’aheb’ li na’leb’ nakak’ul. Naq nakatz’iib’a li musiq’anb’il eek’ahom, nakak’ut chiru li Qaawa’ naq nakawoxloq’i li na’leb’ naxk’e, ut a’an tatrosob’tesi rik’in xkomon chik li k’utb’esinb’il na’leb’. Naq yookat chi tzolok, tz’iib’aheb’ li na’leb’ nakak’ul. (Chi’ilmanq Li k’utuk jo’ li Kolonel, 12, 30.)
Li anjel naxk’ut rib’ chiru laj Alma ut eb’ li ralal laj Mosiah, xb’aan laj Clark Kelley Price