“27 julio–2 agosto. Alma 39–42: “Li nimla k’uub’anb’il na’leb’ re sahil ch’oolejil,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“27 julio–2 agosto. Alma 39–42,” Kim, Taaqehin—Choq’ reheb’ li komon ut li junkab’al: 2020
At ixq, k’a’ naq nakatyaab’ak? xb’aan laj Mark R. Pugh
27 julio–2 agosto
Alma 39–42
“Li nimla k’uub’anb’il na’leb’ re sahil ch’oolejil”
Naq nakatzol Alma 39–42, li Santil Musiq’ej naru tixk’e aana’leb’ chirix li k’a’ru yoo chi k’ulmank sa’ laa yu’am.
Xtz’iib’ankil li nakak’oxla
Naq anihaq li naqara naxb’aanu li maak q’axal nim, wan naq ch’a’aj xnawb’al chan ru xtenq’ankil. Jwal nim xwankil Alma 39–42 xb’aan naq naxk’ut chan ru naq laj Alma—jun xtzolom li Kristo li kiraj ru chaq junxil xjalb’al xk’a’uxl chirixeb’ lix maak q’axal raheb’—kiru chixb’aanunkil a’an. Laj Korianton, li ralal laj Alma, kixb’aanu li ko’b’eetak, ut laj Alma, jo’ kixb’aanu k’iila sut, kiroksi li yaalil na’leb’ re xtenq’ankil chixjalb’al xk’a’uxl (chi’ilmanq Alma 4:19; 31:5). Sa’eb’ li ch’ol a’in, naqil lix kawil li raatin laj Alma sa’ xjitb’al li maak ut li ruxtaan ut xrahom choq’ re laj Korianton. Jo’kan ajwi’, naqeek’a lix kawilal xch’ool laj Alma naq li Kolonel “taachalq chi yaal re risinkil li maak ut xch’olob’ankil li sahil esilal re li kolb’a-ib’ ” chiruheb’ li neke’xjal xk’a’uxl (Alma 39:15). Rik’in naq laj Korianton moqon kisutq’i wi’chik sa’ li k’anjel re jultikank aatin (chi’ilmanq Alma 49:30), naru taqak’ul qayo’onihom naq te’kuye’q qamaak ut taatoje’q qix sa’ li hoonal naq “ch’a’ajkilanb’ilo” (Alma 42:29) chirix li qamaak malaj lix maak junaq li raaro qab’aan.
Li na’leb’ re xtzolb’aleb’ li loq’laj hu aajunes
Li maakob’k rik’in tz’ejwalej a’an tz’eqb’eetal sa’ rilob’aal li Qaawa’.
Re xk’eeb’al chixnaw li ralal naq q’axal yib’ ru li maakob’k rik’in tz’ejwalej, laj Alma kixk’ut “naq li k’a’aq re ru a’in tz’eqb’eetal sa’ rilob’aal li Qaawa’ ” (Alma 39:5). K’a’ut naq aajel ru li saq ru ch’oolej choq’ aawe? K’a’ut naq aajel ru choq’ re li Qaawa’? Li aatin a’in re li Elder Jeffrey R. Holland naru tatxtenq’a:
“Saqen ru naq jun na’leb’ q’axal aajel ru choq’ re li Qaawa’ chirix li qawanjik sa’ ruchich’och’, a’an chan ru na’ok junaq sa’ li ruchich’och’ a’in ut chan ru na’el. A’an kixk’e kawil chaq’rab’ chirix chan ru te’uxmanq a’in.
“… Li tz’ejwalejil junajil wan chi k’ulub’anb’il choq’ re jun sumal li sumsu, xb’aan naq a’an tz’aqal reetalil li junajil, xtz’aqalil li junajil li k’ojob’anb’il ut k’eeb’il xb’aan li Dios. … Lix yaalalil li sumlaak, a’an naq taa’uxq xjunajinkil jun li winq ut jun li ixq. … A’an a’in jun xjunajinkil chi tz’aqal tz’aqal, jo’kan naq naqoksi li aatin tz’apok sa’ junajil re xch’olob’ankil li junelikil yeechi’ihom li wan rik’in” (“La Pureza Personal,” Liahona, enero 1999, 90–91).
K’oxla li na’leb’ kixk’e laj Alma re laj Korianton sa’ Alma 39:8–15. Chan ru nakatxtenq’a chixtawb’al chik ru lix aajelil ru li chaq’rab’ re saq ru ch’oolej ut chan ru numtaak sa’ xb’een li aaleek? Eb’ li raatin laj Alma neke’xk’ut ajwi’ naq k’a’jo’ naraj li Qaawa’ xkuyb’al li qamaak naq naqajal qak’a’uxl, ut naq wan li yo’onihom choq’ qe chiqajunil. Naq nakawil ru Alma 39–42 chiru li xamaan a’in, sik’ b’ar natawman reetalil li ruxtaan li Dios. Chan ru xat-osob’tesiik xb’aan li ruxtaan li Dios?
Chi’ilmanq ajwi’ “Xsaqal ru li tib’elej,” Choq’ re Xkawilaleb’ li Saaj, 35–37.
Tinwaklesiiq chi yo’yo ut tinxaqliiq chiru li Dios re taaraqe’q aatin chiwix.
Naq laj Alma kixk’e reetal naq wankeb’ xpatz’om laj Korianton chirix li wakliik chi yo’yo, a’an kixk’ut chiru li nak’ulman chirix naq nokokam. K’a’ruheb’ li yaalil na’leb’ kixk’ut laj Alma sa’eb’ li ch’ol 40–41 li us raj naq tixtaw ru laj Korianton—ut yalaq ani chik li xmaakob’? Maare taaruuq taatusub’ li k’a’ru nakatzol rik’in xk’eeb’al reetaleb’ li na’leb’ kixk’ut laj Alma (jo’ li ruchich’och’ reheb’ li musiq’ej, li wakliik chi yo’yo, ut li k’ojob’ank wi’chik), toja’ naq taatz’iib’a li kixk’ut laj Alma chirix li junjunq na’leb’. Chan ru naru tate’xtenq’a li yaalil na’leb’ a’in naq nakat-aaleek malaj naq yookat chixsik’b’al lix kuyb’aal aamaak?
Naru tinsik’ xsumenkileb’ inpatz’om chirix li evangelio rik’in paab’aal.
Wan naq maare naqak’oxla naq eb’ li profeet neke’xnaw lix sumenkileb’ chixjunileb’ li patz’om chirix li evangelio. A’b’an, k’e reetal naq sa’ li ch’ol 40, ke’wan xpatz’om laj Alma li moko sumenb’ileb’ ta, chirix li yu’am chirix li kamk. K’a’ru kixb’aanu re xtawb’al xsumenkileb’? K’a’ru kixb’aanu naq maak’a’ lix sumenkileb’? K’oxla chan ru naq lix b’aanuhom laj Alma naru tatxtenq’a rik’ineb’ laa patz’om chirix li evangelio.
Rik’in li tijok naru taqataw xsumenkileb’ li patz’om chirix li evangelio.
Lix tojb’al rix li maak xb’aan li Jesukristo naxk’e chi k’anjelak li k’uub’anb’il na’leb’ re li tojb’al-ix.
Laj Korianton kixk’oxla naq ink’a’ tiik ru naq taak’eemanq tojb’a-maak sa’ xk’ab’a’eb’ li maak (chi’ilmanq Alma 42:1). A’b’an laj Alma kixk’ut naq wan jun b’e re eelelik chiru li “wank sa’ rahilal” li nokoxk’e wi’ li maakob’k; li jalb’a-k’a’uxlej ut li paab’aal chirix lix tojb’al rix li maak xb’aan li Jesukristo, li nujenaq rik’in uxtaan ut tiikilal (chi’ilmanq Alma 42:15). Naq nakawil ru Alma 42, sik’ chan ru naq lix tojb’al rix li maak xb’aan li Kolonel naxk’e chi uxmank naq laa’at taaruuq taak’ul li uxtaan chi ink’a’ “na’elq’ak chiru li k’a’ru tiik ru” (raqal 25). K’a’ruheb’ li yaalil na’leb’ nakataw sa’ li ch’ol a’in li nakate’xtenq’a chireek’ankil li ruxtaan a’an?
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Alma 39:1–9
Ma taak’anjelaq re laa junkab’al li aatinak chirix li chaq’rab’ re saq ru ch’oolej? Wi jo’kan, k’oxla roksinkileb’ li k’anjeleb’aal a’in a’ yaal li na’ajman ru choq’ re laa junkab’al: Alma 39:1–9; “Xsaqal ru li tib’elej,” Choq’ re Xkawilaleb’ li Saaj, 35–37; “Castidad,” Temas del Evangelio, topics.ChurchofJesusChrist.org; overcomingpornography.org; ut eb’ li video “¿Qué debo hacer si veo pornografía?” ut “Yo escojo ser limpio” (ChurchofJesusChrist.org). K’oxla chan ru naru taatenq’a laa junkab’al chixtawb’aleb’ ru li osob’tesink neke’chal rik’in li saq ru ch’oolej ut li wank chi sumsu.
Alma 39:9–15
K’a’ru naqatzol rik’ineb’ li raqal a’in chirix chan ru xkolb’al qib’ chiru li maak?
Alma 42:4
Taaruuq taab’aanu jun li b’atz’unk b’ar wi’ taajek’i li kok’ setb’il hu tz’iib’anb’ileb’ wi’ li na’leb’ chirix li Kristo malaj chirix li evangelio sa’ li ochoch. Taaruuq teeril jarub’eb’ li kok’ setb’il hu neke’ru chixch’utub’ankil li komon sa’ li junkab’al chiru b’ab’ay li hoonal, toja’ naq tex’aatinaq chirix chan ru naq li k’a’ru tz’iib’anb’il chiruheb’ li kok’ setb’il hu naru toohe’xtenq’a chi wank jo’ li Dios. Chan ru naq li “kutan k’eeb’il” qe sa’ ruchich’och’ chanchan li hoonal k’eeb’il sa’ li b’atz’unk a’in? Chan ru naru taqoksi li “kutan re xyalb’al qix” sa’ ruchich’och’ re wank jo’ li Kolonel?
Alma 42:12–15, 22–24
Maare tatruuq chixk’utb’al chan ru neke’k’anjelak sa’ wiib’al li tiik ruhil na’leb’ ut li uxtaan rik’in xyiib’ankil xjalam-uuch jun li b’isleb’ re aatinak chirixeb’ li patz’om jo’eb’ a’in: K’a’ru nak’ulman rik’in li b’isleb’ naq nokomaakob’k? K’a’ru narelaji li tiik ruhil na’leb’ re naq juntaq’eet wankeb’ lix wiib’ pak’al li b’isleb’? Chan ru naq li Kolonel naxk’e jo’ nimal elajinb’il xb’aan li tiik ruhil na’leb’ re naq naru taawanq li uxtaan?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
K’e aach’ool rik’in li jar raqal chi na’leb’ li te’osob’tesinq re laa junkab’al. Naq nakatzoleb’ li loq’laj hu rik’in tijok, patz’ aawib’, “K’a’ru nintaw arin li tz’aqal taawanq xwankil choq’ re lin junkab’al?” Sik’ laa b’eresinkil xb’aan li Musiq’ej naq nakak’oxla chan ru xtenq’ankil laa junkab’al chixtawb’aleb’ li yaalil na’leb’ a’in.
A’in li walal, xb’aan li xElspeth Caitlin Young