“24–30 agosto. Helaman 7–12: “Chijultiko’q eere li Qaawa’,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)

“24–30 agosto. Helaman 7–12,” Kim, Taaqehin—Choq’ reheb’ li komon ut li junkab’al: 2020

Jalam-uuch

laj Nefi natijok sa’ jun najt xteramil kab’l

Xjalam-uuch laj Nefi sa’ jun najt xteramil kab’l xb’aan laj Jerry Thompson

24–30 agosto

Helaman 7–12

“Chijultiko’q eere li Qaawa’ ”

Laj Nefi, laj Lehi, ut xkomoneb’ chik ke’xk’ul “k’iila na’leb’ nak’utb’esiik chiruheb’ chi wulaj wulaj” (Helaman 11:23). Xk’ulb’al k’iila na’leb’ chi k’utb’esinb’il ink’a’ nak’ulman ka’ajwi’ choq’ reheb’ li profeet—laa’at ajwi’ naru taak’ul. Xtz’iib’ankil li nakak’oxla naru tatxtenq’a chixk’ulb’al li k’utb’esinb’il na’leb’ chi kok’ aj xsa’.

Xtz’iib’ankil li nakak’oxla

Laj Helaman, lix yuwa’ laj Nefi, kixye reheb’ li ralal, “Chijultiko’q, chijultiko’q eere”: kiraj naq te’jultiko’q reheb’ lix xe’toonil, li raatineb’ li profeet, ut q’axal wi’chik naq taajultiko’q reheb’ “aj Tojol qix, a’an li Kristo” (chi’ilmanq Helaman 5:5–14). Saqen ru naq laj Nefi kijultiko’ re, xb’aan naq a’an ajwi’ li esil kixch’olob’ moqon chiruheb’ li tenamit chi “ink’a’ nalub’ ” (Helaman 10:4). “Chan put ru kiru chi sachk sa’ eech’ool lee Dios?” (Helaman 7:20), kixpatz’. Chixjunil lix k’anjel laj Nefi—li jutikank aatin, li tijok, xb’aanunkileb’ li sachb’a-ch’oolej, ut xpatz’b’al re li Dios naq taawanq li we’ej—a’an re xtenq’ankileb’ li tenamit chi sutq’iik rik’in li Dios ut chixjultikankil. Q’axal nim chik li ch’a’ajkilal naq nasach sa’ qach’ool li Dios chiru naq maji’ naqanaw ru a’an, ut ink’a’ ch’a’aj naq taasachq a’an sa’ qach’ool naq jalb’ehinb’il qak’a’uxl xb’aan “li jo’maajo’il k’a’aq re ru re li ruchich’och’ a’in” ut naq moyb’il ru xb’aan li maak (Helaman 7:21; chi’ilmanq ajwi’ Helaman 12:2). A’b’anan, jo’ k’utb’il sa’ lix k’anjel laj Nefi, maajun wa numenaq li hoonal re “sutq’iik rik’in lee Dios” (Helaman 7:17).

Jalam-uuch

reetalil li tzolok aajunes

Li na’leb’ re xtzolb’aleb’ li loq’laj hu aajunes

Helaman 7–11

Eb’ li profeet neke’xk’e chi nawmank li rajom li Dios.

Wankeb’ naab’al li profeet sa’ lix Hu laj Mormon, a’b’an Helaman 7–11 a’an jun na’ajej q’axal chaab’il re xtzolb’al k’a’ru jun li profeet, k’a’ru naxb’aanu, ut chan ru tento taqak’ul li raatin. Naq nakawileb’ ru li ch’ol a’in, k’e reetaleb’ lix b’aanuhom ut lix k’oxlahom laj Nefi ut chan ru na’aatinak rik’in li Qaawa’. Chan ru nakatxtenq’a lix k’anjel laj Nefi chixtawb’al ru chi chaab’ilaq chik lix k’anjel li profeet sa’ li qakutan laa’o? Wahe’ junjunq li na’leb’ re aatenq’ankil. K’a’ chik ru nakataw laa’at?

Helaman 7:17–22:Eb’ li profeet neke’xyaab’asi li jalb’a-k’a’uxlej ut neke’xye resil li k’a’ru nak’ulman xb’aan li maakob’k.

Helaman 7:29; 9:21–36:Eb’ li profeet neke’xnaw chi k’utb’esinb’il xb’aan li Dios li tento te’rab’i li tenamit.

Helaman 10:7:Eb’ li profeet k’eeb’il reheb’ li wankilal re tz’apok sa’ ruchich’och’ ut sa’ choxa (chi’ilmanq ajwi’ Mateo 16:19; Tzol’leb’ ut Sumwank 132:46).

Helaman 10:4–7, 11–12:

K’a’ru neke’xk’e chaweek’a li raqal a’in chirix li qayo’yookil profeet? K’a’ruheb’ li na’leb’ toje’ xk’ut a’an? K’a’ru yookat chixb’aanunkil re rab’inkil ut xtaaqenkil lix b’eresihom?

Helaman 9–10

Eb’ li eetalil ut sachb’a-ch’oolej neke’tenq’an, a’b’an ink’a’ tz’aqaleb’ re xk’uub’ankil li paab’aal li ink’a’ na’oso’.

Wi ta tz’aqaleb’ li eetalil ut sachb’a-ch’oolej re xjalb’al xch’ool anihaq, ke’jale’ raj xch’ool chixjunileb’ laj Nefita xb’aan li xninqal ru eetalil kixk’e laj Nefi sa’ Helaman 9. A’b’anan, “kiwakli jun jachok-ib’ sa’ xyanq li tenamit” (Helaman 10:1) xb’aan naq naab’al reheb’ “toj ke’xkawob’resi li raameb’ ” (Helaman 10:15). K’a’ru nekex’b’aanu rajlal laj maak rik’ineb’ eetalil ut sachb’a-ch’oolej? (chi’ilmanq Helaman 10:12–15; chi’ilmanq ajwi’ 3 Nefi 2:1–2). K’a’ut naq xiwxiw wi wan lix nawom qach’ool chi k’ojob’anb’il sa’ xb’eeneb’ li eetalil? (chi’ilmanq “Eetalil,” K’utul Raqal reheb’ li Loq’laj Hu).

Helaman 10:2–4

Li k’oxlak sa’ ch’oolej naxb’oq li k’utb’esinb’il na’leb’.

Wi jun sutaq xaweeka’ naq raahob’tesinb’ilat, naq yoo laa k’a’uxl, malaj naq sachso laa ch’ool, maare taatzol jun aajel ruhil na’leb’ rik’in li kixb’aanu laj Nefi sa’ Helaman 10:2–4. K’a’ru kixb’aanu a’an naq kireek’a “xtawajik xch’ool”? (raqal 3).

Li Awa’b’ej Henry B. Eyring kixk’ut: “Naq nokok’oxlak sa’ qach’ool, naqab’oq lix k’utb’esihom li Musiq’ej. Li k’oxlak sa’ ch’oolej, choq’ we laa’in, a’an li k’oxlak ut li tijok ninb’aanu chirix naq ak xwil ru ut xintzoleb’ li loq’laj hu chi timil timil (“Presten servicio con el Espíritu,” Liahona, noviembre 2010, 60). Chan ru naru taak’aytesi aawib’ chi k’oxlak sa’ aach’ool chi kok’ aj xsa’? Re xtawb’al jun na’leb’ chirix xk’oxlankil li raatin li Dios chi kok’ aj xsa’, chi’ilmanq li raatin li Hermano Devin G. Durrant “Lin ch’ool junelik naxtz’ileb’ rix” (Jolomil ch’utub’aj-ib’ re octubre 2015).

Chi’ilmanq ajwi’ Proverbios 4:26; Lukas 2:19; 1 Nefi 11:1; 2 Nefi 4:15–16; 3 Nefi 17:3; Moroni 10:3; Tzol’leb’ ut Sumwank 88:62.

Helaman 12

Li Qaawa’ naraj naq taajultiko’q a’an we.

Sa’ Helaman 12, laj Mormon, li yoo chixk’osb’al ru li esil, naxtz’iib’a junjunq reheb’ li na’leb’ naru taqatzol rik’in li raatin laj Nefi sa’eb’ li ch’ol li ak xe’nume’. K’oxla roksinkil li raatin a’an re xtz’ilb’al rix laa ch’ool laa’at. Taaruuq taatz’iib’a chi tusub’anb’il li k’a’aq re ru kixye laj Moroni li neke’xk’eheb’ li kristiaan chi sachk sa’ xch’ooleb’ li Qaawa’. K’a’ru nakatxtenq’a chixjultikankil li Qaawa’? K’a’ru musiq’anb’ilat chixjalb’al a’ yaal li xatzol?

Jalam-uuch

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.

Helaman 7–9

Chan ru naq li k’a’ru kixb’aanu laj Nefi chanchan li neke’xb’aanu li profeet sa’ li kutan a’in? K’a’ru naxk’ut li qaprofeet anajwan? Maare tatruuq chixsik’b’al ru junjunq reheb’ li b’eresihom k’eeb’il xb’aan li profeet ut tex’aatinaq jo’ junkab’al chirix chan raj ru teetaaqe chi chaab’ilaq chik.

Helaman 10:4–5, 11–12

Chan ru kixk’ut laj Nefi naq kixsik’ li rajom li Qaawa’ ruuchil li rajom xjunes rib’? Chan ru naru naqataaqe lix b’aanuhom a’an? Chan ru naru li qajunkab’al chixsik’b’al chi chaab’ilaq chik li rajom li Qaawa’?

Helaman 11:1–16

K’a’ru kiraj sa’ xch’ool laj Nefi, ut k’a’ru kixb’aanu sa’ xk’ab’a’ a’an? K’a’ru naqatzol chirix li tijok rik’in li kixb’aanu laj Nefi?

Helaman 11:17–23

K’a’ru naqatzol chirix laj Lehi, li riitz’in laj Nefi, sa’ Helaman 11:17–23? Ani naqanaw ru li tiik ru xyu’am chi ink’a’ ilb’il xb’aan naab’aleb’?

Helaman 12:1–6

Ma naru taak’oxla junaq k’utb’esink tatruuq chiroksinkil re xtenq’ankil laa junkab’al chixtawb’al ru k’a’ru naraj naxye naq “na’eek’asiman xch’ooleb’ ”? Qayehaq, taaruuq taakanab’ naq jun komon sa’ li junkab’al tixyal xk’eeb’al k’a’ruhaq sa’ xb’een lix jolom chi ink’a’ taat’ane’q. Toja’ naq taakanab’eb’ li komon sa’ li junkab’al chi ilok sa’ Helaman 12:1–6 re xtawb’al k’a’ut naq naru na’eek’asiman xch’ooleb’ li kristiaan sa’ xtaaqenkil li Qaawa’. Chan ru naru toowanq chi ink’a’ taa’eek’asiiq qach’ool sa’ musiq’ej?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Xchaab’ilob’resinkil li qak’utum

Li ka’jultikank. Wahe’ jun na’leb’ re xtenq’ankileb’ li komon sa’ li junkab’al re naq te’jultiko’q reheb’ li raqal sa’eb’ li loq’laj hu yookeb’ chixtzolb’al: Sik’ ru jun raqal li nawulak chawu, ut k’utb’esi sa’ lee rochoch, b’ar wi’ li komon sa’ li junkab’al te’ruuq chirilb’al chi kok’ aj xsa’. Kanab’eb’ li komon sa’ li junkab’al chixk’eeb’aleb’ xhoonal chixsik’b’al ru jun raqal sa’eb’ li loq’laj hu re xk’utb’esinkil, ut aatinanqex chirix naq nekech’utub’ eerib’ jo’ junkab’al, jo’ naq yookex chi wa’ak malaj yookex chi tijok.