wiib’ mil chi saaj winq aj pleet

Wiib’ mil chi saaj winq aj pleet, xb’aan laj Arnold Fribreg

10–16 agosto

Alma 53–63

“Te’kole’q rix xb’aan lix sachb’a-ch’oolejil wankilal a’an”

Eb’ li seraq’ sa’ Alma 53–63 naru tate’xtenq’a chirilb’al li nak’ulman naq nakayu’ami lix yaalil na’leb’ li evangelio malaj naq nakatz’eeqtana. Naq nakawil ru Alma 53–63, tz’iib’a li musiq’ejil na’leb’ nakak’ul ut k’oxla chan ru naru taayu’amiheb’ li yaalil na’leb’ nakatzol.

Xtz’iib’ankil li nakak’oxla

Naq ilb’il lix “ch’ina teep aj pleet” laj Helaman (Alma 56:33) re wiib’ mil chi saaj aj Nefita chi junpak’aleb’ li teep chi aj pleet aj Lamanita, maajo’q’e raj te’ruuq chixq’axb’aleb’ ru. Moko k’iheb’ ta laj pleet re laj Helaman, ut “tz’aqal saajeb’,” ut “maajun wa ke’pleetik chaq” (Alma 56:46–47). Li wankeb’ wi’ a’an chanchan tana’ li wanko wi’ laa’o naq wan naq naqeek’a naq moko k’iho ta ut naq numtajenaq lix yalb’al qix ut li ch’a’ajkilal wanko wi’ sa’ roso’jikeb’ li kutan a’in, sa’ li qapleet rik’in laj Satanas ut lix wankilal li maa’usilal sa’ li ruchich’och’.

A’ut kiwan li wankilal rik’in lix teep laj Helaman li moko kiwan ta rik’ineb’ laj Lamanita, li maak’a’ rilom rik’in lix k’ihaleb’ ut lix seeb’aleb’ chi pleetik. Eb’ a’an ke’xsik’ ru laj Helaman, jun li profeet, re tixjolomiheb’ (Alma 53:19); “ke’tzole’ chaq xb’aaneb’ lix na’, naq wi ink’a’ neke’wiib’an xch’ool, li Dios tixkoleb’ ” (Alma 56:47); ut kiwan “xnumtajenaqil lix paab’aaleb’ chirix li k’a’ru tzolb’ileb’ chaq chixpaab’ankil.” Xb’aan a’an, ke’kole’ rix xb’aan “lix sachb’a-ch’oolejil wankil li Dios” (Alma 57:26). Us ta chixjunileb’ ke’kana chi toch’enaq sa’ li pleet, “maajun aamej kiwan sa’ xyanqeb’ li ki’oso’ ” (Alma 57:25). Chi jo’kan, naq li yu’amej nokoxtoch’ rik’in musiq’ejil toch’olal, naru taachalq xkawilal qach’ool—li esil chirix lix teep aj pleet laj Helaman a’an naq “wan jun li Dios tiik xna’leb’, ut li ani ink’a’ neke’wiib’an xch’ool, te’kole’q rix xb’aan lix sachb’a-ch’oolejil wankilal a’an” (Alma 57:26).

reetalil li tzolok aajunes

Li na’leb’ re xtzolb’aleb’ li loq’laj hu aajunes

Alma 53:10–22; 56:43–48, 55–56; 57:20–27; 58:39–40

Naq nink’anjela inpaab’aal chirix li Dios, a’an tinrosob’tesi rik’in lix sachb’a-ch’oolejil wankilal.

Maare ch’a’aj xjuntaq’eetankileb’ li sachb’a-ch’oolejil esil jo’ li re lix teep aj saaj pleet laj Helaman qik’in laa’o, xb’aan naq chanchan naq ink’a’ ke’ru chi uxmank. A’b’an jun rajb’aleb’ li esil jo’ a’an sa’eb’ li loq’laj hu, a’an xk’utb’al chiqu naq wi wan qapaab’aal, li Dios naru tixk’anjela li sachb’a-ch’oolej sa’ li qayu’am. Naq nakawil ru resileb’ li saaj aj pleet sa’eb’ li raqal a’in, sik’eb’ li na’leb’ chirix chan ru ke’xk’anjela xpaab’aaleb’ chirix li Dios, k’a’ut naq jwal kaweb’ xpaab’aal, ut k’a’ru kixk’e chi uxmank li sachb’a-ch’oolej: Alma 53:10–22; 56:43–48, 55–56; 57:20–27; ut 58:39–40. Li kaaxukuut a’in naxk’ut jun na’leb’ naru taawoksi re xtz’iib’ankil li nakataw.

Chan ruheb’ laj pleet re laj Helaman:
K’a’ru kik’utman chiruheb’:
K’a’ru ke’xb’aanu:
Eb’ li osob’tesink li ke’xk’ul:

Chirix xtzolb’aleb’ li raqal a’in, k’a’ru musiq’anb’ilat chixb’aanunkil re xk’anjelankil laa paab’aal laa’at?

Laj Helaman ki’aatinak chirix lix k’anjeleb’ li na’b’ej sa’ xkawob’resinkil lix paab’aaleb’ li saaj aj pleet (chi’ilmanq Alma 56:47–48; 57:20–27). K’a’ru lix k’anjeleb’ li komon sa’ li junkab’al ut xkomoneb’ chik sa’ xkawob’resinkil laa paab’aal laa’at? K’a’ru naru taab’aanu re xkawob’resinkil lix paab’aal laa junkab’al ut eb’ laa wamiiw?

jun li saaj aj pleet rik’in lix na’

Ink’a’ ke’wiib’an xch’ool, xb’aan laj Joseph Brickey

Alma 58:1–12, 31–37; 61

Naru tinsik’ ru xk’oxlankil li chaab’il chirixeb’ li was wiitz’in ut ink’a’ taach’a’ajko’q inch’ool xb’aaneb’.

Laj Helaman jo’ ajwi’ laj Pahoran ke’ru raj chi ch’a’ajko’k xch’ooleb’ xb’aan li ke’xk’ul. Laj Helaman ink’a’ kixk’ul li tenq’ li ki’ajman ru choq’ reheb’ lix teep aj pleet, ut laj Pahoran, us ta maak’a’ xmaak, kijite’ xb’aan laj Moroni li kixye naq ink’a’ yoo chixtaqlankil li tenq’ a’an (chi’ilmanq Alma 58:4–9, 31–32; 60). K’a’ru naxk’e xkawil aach’ool rik’in chan ru ke’xsume a’an sa’ Alma 58:1–12, 31–37 ut Alma 61? Chan ru naru taataaqe lix b’aanuhomeb’ naq wankat sa’ jun li ch’a’ajkilal jo’ eb’ a’an?

Li Elder David A. Bednar kixk’ut: “Chi yalaq jo’q’e, wan ani sa’ li Iglees a’in li tixb’aanu malaj tixye k’a’ruhaq li naru chixrahob’tesinkil xch’ool junaq chik li komon. Ch’olch’o naq li junjunq qe taqak’ul a’an—ut moko jun sut ta ajwi’ taak’ulmanq. … Laa’ex ut laa’in ink’a’ nokoru chixminb’al ru lix k’oxlahomeb’ chi moko lix b’aanuhomeb’ li qakomon. A’b’anan, naru taqasik’ ru li taqab’aanu laa’o. Chijultiko’q eere naq aj b’aanunelo qajunes qib’ ut k’eeb’il qe xtaql li qach’ool, ut naru taqasik’ ru naq ink’a’ taach’a’ajko’q qach’ool” (“Y no hay para ellos tropiezo,” Liahona, noviembre 2006, 91).

Chi’ilmanq ajwi’ Proverbios 16:32; Moroni 7:45; David A. Bednar, “Tuulan ut kub’enaq xch’ool,” Jolomil ch’utub’aj-ib’ re abril 2018.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.

Alma 53:10–17

Eb’ laj Anti-Nefi-Lehi ke’ok sa’ sumwank naq maajo’q’e chik te’hoyoq kik’. K’a’ruheb’ li sumwank xoo’ok wi’ laa’o rik’in li Dios? K’a’ru naqil ru sa’ Alma 53:10–17 li nokoxmusiq’a chixpaab’ankileb’ li qasumwank chi k’a’jo’ wi’chik qapaab’aal?

Alma 53:20–21

Chan ru naru toowanq mas wi’chik jo’eb’ li saaj winq re laj Helaman? Maare taak’anjelaq eere aatinak chirix k’a’ru lix yaalalileb’ junjunqeb’ li ch’ol aatin sa’eb’ li raqal a’in; qayehaq, k’a’ru naraj naxye naq kiwan “xsak’ahileb’ … sa’ xmetz’eweb’ ut sa’ xb’aanunkil li k’a’aq re ru”? K’a’ru naraj naxye li “b’eek chi tiik chiru [li Dios]”?

Alma 58:9–11, 33, 37

Sa’ xq’ehil li nimla ch’a’ajkilal, ma naqasik’ li qaChoxahil Yuwa’, jo’ ke’xb’aanu laj pleet aj Nefita? Chan ru kixsumeheb’ lix tijeb’? Chan ru kixsumeheb’ li qatij laa’o?

Alma 61:2, 9, 19

K’a’ru naqatzol rik’in laj Pahoran chirix chan ru toosumenq naq jitb’ilo us ta maak’a’ qamaak?

Alma 62:39–41

Wahe’ jun tzolok li naru tixtenq’a laa junkab’al chixtawb’al ru naq naru taqasik’ ru naq “tookawuq” malaj naq “tooq’unak” xb’aaneb’ lix yalb’al qix: K’e jun li paaps ut jun li mol moko chiqb’ileb’ ta sa’ jun uk’al wan wi’ ha’ li yoo chi woqxink. Li paaps ut li mol nokoreetali laa’o, ut li ha’ nareetaliheb’ lix yalb’al qix. Naq wankeb’ li paaps ut li mol sa’ li ha’ yoo chi woqxink, naru tex’aatinaq chirix junjunq reheb’ li ch’a’ajkilal yoo chixnumsinkil lee junkab’al. K’a’ru naru teesik’ ru xb’aanunkil naq wan li ch’a’ajkilal jo’eb’ a’an? Jo’ naxye sa’ Alma 62:41, chan ru naq li k’a’ru naqasik’ ru xb’aanunkil sa’eb’ li qach’a’ajkilal nak’anjelak sa’ qayu’am? Chirix naq chiqb’ileb’ chi us li paaps ut li mol, set li paaps ut jor li mol re xk’utb’al naq us ta juntaq’eet “lix yalb’aleb’ rix,” kiq’uno’ li paaps ut kikawu li mol. K’a’ru naru taqab’aanu jo’ junkab’al re naq eb’ lix yalb’al qix toohe’xtuulanob’resi ut toohe’xnach’ob’resi rik’in li Dios?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Xchaab’ilob’resinkil li qak’utum

Kanab’eb’ li kok’al chi yiib’ank. “Naq nakab’oqeb’ laa kok’al chixyiib’ankil k’a’ruhaq re xk’utb’al jun na’leb’ li evangelio, nakatenq’aheb’ chixtawb’al chi q’axal wi’chik ru li na’leb’ a’an, ut nakatenq’aheb’ chixjultikankil li k’a’ru xe’xtzol. … Kanab’eb’ chi yiib’ank, chi b’onok, chi tz’iib’ak, ut chi yo’ob’tesink” (Li k’utuk jo’ li Kolonel, 25).

wiib’ mil chi saaj winq aj pleet

Yaal, qawa’, wankeb’ ut ajlankileb’ chixjunil, xb’aan laj Clark Kelley Price