wiib’ mil chi saaj winq aj pleet

Wiib’ mil chi saaj winq aj pleet, xb’aan laj Arnold Friberg

10–16 agosto

Alma 53–63

“Te’kole’q rix xb’aan lix sachb’a-ch’oolejil wankilal a’an”

Naq taawil ru Alma 53─63, k’oxla chan ru naru taawanq xyaalal li seraq’ a’an choq’ reheb’ li kok’al ut chan ru xtenq’ankileb’ chixtzolb’aleb’ li na’leb’ re li evangelio neke’xk’ut li seraq’.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Re xkawresinkileb’ li kok’al chi tzolok sa’ Alma 53─63, kanab’eb’ chixwotzb’al k’a’ru najultiko’ reheb’ chirixeb’ laj Anti-Nefi-Lehi (chi’ilmanq Alma 23─24). Re xtenq’ankileb’, k’ut jun jalam-uuch li xawoksi re xk’utb’al li seraq’ malaj jultika reheb’ junaq li ch’ina k’anjel xe’xb’aanu sa’ li tzoleb’aal.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Alma 53:20–21; 56:27, 47–48

Naru ninwan chi tiik chiru li Dios jo’ ke’wan li saaj aj pleetinel.

Eb’ li saaj aj pleetinel re laj Helaman naru neke’wan choq’ nimla eetalil choq’ reheb’ li kok’al sa’ laa tzoleb’aal. Waklesi xch’ooleb’ li kok’al chixyalb’al wulak jo’eb’ a’an.

Kok’ k’anjel naru chi b’aanumank

• Kanab’ jun li ch’ina al chixchapb’al chi kutankil li jalam-uuch wan sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al naq yooqat chixseraq’inkil chi k’osb’il ru li seraq’ chirixeb’ li saaj aj pleetinel re laj Helaman. Naru ajwi’ nakawoksi “Ch’ol 34: Laj Helaman ut li wiib’ mil chi saaj aj pleet” (Eb’ li Esilal sa’ lix Hu Laj Mormon, 93─94, malaj li video sa’ ChurchofJesusChrist.org). Kanab’eb’ li kok’al chixyeeb’al li neke’xnaw ut li k’a’ru nawulak chiruheb’ sa’ li seraq’ chirixeb’ li wiib’ mil chi saaj aj pleet.

• Kanab’ jun li ch’ina al ut jun li ch’ina xqa’al chireetalinkileb’ lix na’ xyuwa’eb’ li saaj aj pleet. Naq yooqat chirilb’al ru Alma 56:27 ut 47─48, k’e reheb’ li kok’al k’a’aq re ru li naru te’xchap re reetalinkil chan ru naq eb’ li na’b’ej ut eb’ li yuwa’b’ej ke’xtenq’aheb’ laj pleetinel, jo’ jun saak li tzakemq li taareetaliheb’ “li ke’k’anjelak reheb’ ” ke’xtaqla lix na’ xyuwa’eb’ ut eb’ li loq’laj hu li te’reetali lix k’utumeb’ lix na’eb’. Kanab’eb’ li kok’al chixyeeb’al k’a’ru neke’k’ehe’ re malaj neke’k’ute’ chiru xb’aaneb’ lix na’ xyuwa’eb’.

• Il ru Alma 53:20─21 ut tenq’aheb’ li kok’al chixtawb’al ru k’a’ru naraj neke’xye li aatin sak’ahil, kawil ch’ool, metz’ew ut xaqxookil ch’ool. Ch’olob’ chan ru naq eb’ li saaj aj pleet ke’xk’utb’esiheb’ li chaab’ilal a’an. Yiib’eb’ kok’ setb’il hu choq’ reheb’ li kok’al li te’xye, “Naq laa’in , laa’in jo’ jun li saaj aj pleet!” Tenq’aheb’ li kok’al chixnujob’resinkil li yamyo rik’in junaq li chaab’ilal xe’xsik’ ru sa’eb’ li wankeb’ sa’ Alma 53:20─21.

• Tenq’aheb’ li kok’al chixtz’aqob’resinkil ru li perel re kok’ k’anjel re li xamaan a’in. Tenq’aheb’ chixk’oxlankil chan ru naru neke’wan jo’ lix ch’uut aj pleet laj Helaman. B’ichahomaq sa’ komonil “Taqak’am raatin li Qaawa’ ” (B’ichleb’aal choq’ reheb’ li Kok’al, 92–93).

Alma 58:32–41

Naq wan ink’a’uxl, naru ninkanab’ wib’ sa’ ruq’ li Dios.

Naq a’an ut eb’ li ch’uut aj pleet ke’xnumsi ch’a’ajkil hoonal, laj Helaman kixkanab’ rib’ sa’ ruq’ li Qaawa’. K’a’ru naru neke’xtzol li kok’al nakatzoleb’ rik’in lix b’aanuhom a’an?

Kok’ k’anjel naru chi b’aanumank

• Yiib’ xjalam-uuch jun xnaq’ uhej josq’ rilob’aal chiru li pizarron ut aatinan chirix chan ru naq laj Helaman yoo xk’a’uxl chirix li ch’uut aj pleet xb’aan naq moko tz’aqaleb’ ta xwa malaj moko tz’aqaleb’ ta chik li winq re naq toj yooqeb’ chi pleetik (chi’ilmanq Alma 58:32─41). Kanab’eb’ li kok’al chi aatinak chirix junaq hoonal b’ar wi’ xe’ok xk’a’uxl. Il ru Alma 58:37 (malaj tenq’a jun li ch’ina al chirilb’al ru), ut tenq’aheb’ li kok’al chixjalb’al li xnaq’ uhej wan chiru li pizarron rik’in jun xnaq’ uhej se’ rilob’aal re xk’utb’al k’a’ru kireek’a laj Helaman xb’aan naq kixkanab’ rib’ sa’ ruq’ li Dios. K’a’ru naru naqab’aanu naq na’ok qak’a’uxl? B’ichahomaq sa’ komonil “Sahil ch’oolej” (B’ichleb’aal choq’ reheb’ li Kok’al, 128).

• Chiru kok’ setb’il hu, tz’iib’aheb’ junjunq li k’a’aq re ru li naru te’ok wi’ xk’a’uxl li kok’al. Kanab’eb’ li kok’al chixk’eeb’aleb’ xhoonal re xsik’b’al ru jun li hu re naq laa’at taawil ru, ut kanab’eb’ chixyeeb’al chan ru naq li Dios naru tixtenq’aheb’ rik’ineb’ li junjunq chi k’a’aq re ru a’an. Seraq’i jun aanumsihom b’ar wi’ naq li Dios xatxtenq’a naq yoo aak’a’uxl.

reetalil li k‘utuk

Xk’utb’al li tzol’leb’: Kok’al ak ninqeb’

Alma 56:45–48; 57:21, 25–27; 58:39–40

Naru ninwan chi tiik chiru li Dios jo’ ke’wan li saaj aj pleetinel.

K’a’ru li yaalil na’leb’ sa’ li esil chirixeb’ li saaj aj pleetinel re laj Helaman naru naxtenq’aheb’ li kok’al chixq’axb’al ruheb’ li ch’a’ajkilal neke’xnumsi?

Kok’ k’anjel naru chi b’aanumank

• Kanab’eb’ li kok’al chixwotzb’al k’a’ru neke’xnaw chirixeb’ li saaj aj pleetinel. Naru ajwi’ nakawoksi “Ch’ol 34: Laj Helaman ut li wiib’ mil chi saaj aj pleet” (Eb’ li Esilal sa’ lix Hu Laj Mormon, 93─94, malaj li video sa’ ChurchofJesusChrist.org). Kanab’eb’ li kok’al chixwotzb’al k’a’ru nawulak chiruheb’ chirixeb’ laj pleetinel.

• Ilomaq ru sa’ komonil Alma 56:45─48; 57:21, 25─27 ut 58:39─40. Kanab’eb’ li kok’al chixsik’b’aleb’ aatin malaj ch’ol aatin sa’eb’ li raqal a’an li neke’aatinak chirixeb’ li saaj aj pleetinel. K’a’ru naraj neke’xye li aatin ut eb’ li ch’ol aatin a’an? Chan ru naru nokowan jo’eb’ li saaj aj pleetinel a’an?

• Yaab’asi Alma 56:46─48 choq’ reheb’ li kok’al ut k’e xb’oqb’aleb’ chirab’inkil li kik’ute’ chiruheb’ li saaj aj pleetinel xb’aaneb’ lix na’ chirix li paab’aal. Chan ru naq eb’ li na’b’ej yuwa’b’ej neke’xtenq’aheb’ li ralal xk’ajol re te’wanq xpaab’aal sa’eb’ li kutan a’in? K’a’ut naq aajel ru naq eb’ li kok’al te’xtaaqeheb’ lix tiikil k’utumeb’ lix na’ xyuwa’eb’ ut eb’ laj jolominel re li Iglees “chi tz’aqal re ru”? (Alma 57:21).

jun na’b’ej naxtzol lix ka’ch’in

Li riyajil li paab’aal, xb’aan laj Jay Ward

Alma 53:10–17; 56:27

Naru nawoxloq’iheb’ lin sumwank.

Eb’ li saaj aj pleetinel ut eb’ lix na’ xyuwa’ ke’ok sa’ sumwank li ke’roxloq’i chi tiikeb’ xpaab’aal. Naru nakawoksi li seraq’ a’in re xk’utb’al chiruheb’ li kok’al chirix lix aajelil ruheb’ li sumwank.

Kok’ k’anjel naru chi b’aanumank

• K’uub’eb’ li kok’al sa’ oxib’ ch’uut: jun re reetalinkil laj Helaman, jun chik re reetalinkil lix tenamit laj Ammon, ut li rox re reetalinkileb’ li ralaleb’ lix tenamit laj Ammon. Ilomaq ru sa’ komonil Alma 53:10─17 ut kanab’eb’ naq li ch’uut te’xye chan ru naq eb’ li kristiaan yookeb’ chireetalinkil ke’ok sa’ sumwank ut ke’roxloq’i. Wotz lix nawom aach’ool chirix naq li qaChoxahil Yuwa’ nokorosob’tesi naq neke’qoxloq’i li qasumwank.

• Tz’iib’a chiru li pizarron ch’ol aatin wankeb’ sa’ Mosiah 18:8─10 malaj sa’ Tzol’leb’ ut Sumwank 20:37 li neke’xch’olob’ li naqayeechi’i xb’aanunkil naq nakub’siik qaha’. Tz’iib’aheb’ ajwi’ junjunq chik li ch’ol aatin li maak’a’ rilomeb’ rik’in li sumwank. Kanab’eb’ li kok’al chixsutb’al rix sa’ jun sirso li noko’ok sa’ sumwank re xb’aanunkil (ye reheb’ naq naru te’roksi li loq’laj hu wi na’ajman ru). Chan ru naq noko’osob’tesiik naq naqoxloq’iheb’ li qasumwank? Waklesi xch’ooleb’ li kok’al chixtz’iib’ankil li k’a’ru xe’ok wi’ sa’ sumwank rik’in li Dios naq te’xb’aanu ut naq te’xk’e li tusulal a’an b’ar wi’ naru te’ril rajlal.

• Kanab’ jun li ch’ina al chirilb’al ru Alma 56:37. Chan ru naq eb’ li yuwa’b’ej ke’xtenq’aheb’ li ralal xk’ajol chi ink’a’ ke’xmux ru li sumwank ke’xb’aanu re naq ink’a’ chik te’pleetiq? Ani neke’tenq’ank qe chiroxloq’inkileb’ li qasumwank?

Alma 61:3–14

Naru ninsik’ ru naq ink’a’ tinjosq’oq.

Laj Moroni kixjit laj Pahoran, a’b’an sa’ xna’aj li po’k, laj Pahoran kixye: “Nasaho’ b’an inch’ool rik’in xnimal ru aach’ool” (Alma 61:9).

Kok’ k’anjel naru chi b’aanumank

• Kanab’eb’ li kok’al chixk’oxlankil junaq hoonal b’ar wi’ ke’jite’ chixb’aanunkil k’a’ruhaq li ink’a’ ke’xb’aanu. Ye reheb’ naq a’an li kixk’ul laj Pahoran (chi’ilmanq Alma 60─61). Naru nakawoksi li “Ch’ol 35: Laj Moroni aj taqlanel ut laj Pahoran” (Eb’ li Esilal sa’ lix Hu laj Mormon, 95─97, malaj li video sa’ ChurchofJesusChrist.org). Re xnawb’al k’a’ru kixk’oxla laj Pahoran, k’ehomaq eehoonal chirilb’aleb’ ru li raqal sa’ Alma 61:3─14. K’a’ru kixb’aanu laj Pahoran naq kijite’ xb’aan laj Moroni? K’a’ru naqatzol sa’ lix b’aanuhom laj Pahoran chirix li kuyuk maak? Chan ru naru nokowan jo’ a’an?

• Tz’iib’a chiru li pizarron K’a’ru tento tinb’aanu naq taapo’q anihaq wik’in? Kanab’eb’ li kok’al chixk’eeb’aleb’ xhoonal re xtz’iib’ankil junjunqeb’ xsumenkil chiru li pizarron. Chan raj ru kixsume li patz’om a’an laj Pahoran? Kanab’eb’ li kok’al chixtz’iib’ankileb’ li sumehom a’an sa’ junaq li hu te’xtz’iib’a choq’ reheb’ ajwi’ a’an ut naq naru te’ril ru naq taapo’q anihaq rik’ineb’.

reetalil li tzolok

Xb’oqb’aleb’ chi tzolok sa’ kab’l

Waklesi xch’ooleb’ li kok’al chixwotzb’al rik’ineb’ lix junkab’al jun na’leb’ chirix chan ru naq neke’raj wank jo’eb’ li saaj aj pleetinel. Naru ajwi’ neke’b’antioxin chiruheb’ lix na’ xyuwa’ xb’aan naq neke’tzole’ jo’ ke’xb’aanu lix na’eb’ li saaj aj pleetinel.

Xchaab’ilob’resinkil li qak’utum

K’eheb’ li kok’al chi tz’aqonk sa’ li aatinak chirix li evangelio. Lix jalinkil xna’aj li k’a’aq re ru sa’ li tzoleb’aal naru naxtenq’aheb’ li kok’al chi tz’aqonk chi us sa’ li aatinak chirix li evangelio. Qayehaq, naru nakakanab’eb’ li kok’al chi chunlaak jo’q’ehaq sa’ jun sirso chiru li tz’ak sa’ xna’aj naq te’chunlaaq sa’ li chunleb’aal.

perel re kok’ k’anjel: naru ninwan chi tiik chiru li Dios