“3–9 agosto. Alma 43–52: “Xaqxo chi kaw sa’ xpaab’ankil li Kristo,” ” Kim, Taaqehin—Choq’ re li Tzoleb’aal reheb’ li Kok’al: Lix Hu laj Mormon 2020 (2020)
“3–9 agosto. Alma 43–52,” Kim, Taaqehin—Choq’ re li Tzoleb’aal reheb’ li Kok’al: 2020
Choq’ re li osob’tesink re li ach’ab’aak, xb’aan laj Scott M. Snow
3–9 agosto
Alma 43–52
“Xaqxo chi kaw sa’ xpaab’ankil li Kristo”
Naq yooqat chixk’uub’ankileb’ laa k’anjel, maare taataweb’ aana’leb’ arin sa’eb’ li na’leb’ k’eeb’ileb’ re xtzolb’aleb’ li kok’al toj ka’ch’ineb’ ut eb’ li ak ninqeb’.
Xtz’iib’ankil li nakak’oxla
Xkanab’ankileb’ chi wotzok
Kanab’eb’ li kok’al chixwotzb’al li najultiko’ reheb’ chirix junjunqeb’ li kristiaan sa’ li esil wan sa’ Alma 43─52, jo’ laj Moroni aj taqlanel malaj li eetalil re ach’ab’aak. Re xtenq’ankileb’ chixjultikankil, k’ut chiruheb’ jalam-uuch wankeb’ sa’ Eb’ li Esilal sa’ lix Hu laj Mormon, Libro de obras de arte del Evangelio, malaj Kim, Taaqehin—Choq’ reheb’ li komon ut li junkab’al.
Xk’utb’al li tzol’leb’: Kok’al toj ka’ch’ineb’ xyu’am
Alma 43:17–21; 48:7–8; 49:1–5; 50:1–6
Naru nintaw xkolb’al wix sa’ musiq’ej sa’ li evangelio.
Re xkolb’aleb’ rix laj Nefita chiruheb’ laj Lamanita, laj Moroni kixkawresi lix tenamit rik’in k’anjeleb’aal re pleet ut rik’in ramleb’. Lix yalb’aleb’ xq’e naxk’ut chiqu naq naru naqataw xkolb’al qix sa’ musiq’ej.
Kok’ k’anjel naru chi b’aanumank
-
Aatinan b’ayaq rik’ineb’ li kok’al chirix lix pleeteb’ laj Nefita ut eb’ laj Lamanita (chi’ilmanq Alma 43), rik’in xch’olob’ankil naq eb’ laj Nefita ke’roksi li ramleb’ re xkolb’aleb’ rib’. Naru nakawoksi “Ch’ol 31: Laj Moroni aj taqlanel naxq’ax ru laj Tzerahemnah” (Eb’ li Esilal sa’ lix Hu laj Mormon, 85─88, malaj li video sa’ ChurchofJesusChrist.org). Il ru Alma 43:19 ut kanab’eb’ li kok’al chixk’utb’aleb’ xcha’al lix junxaqalileb’ naq te’rab’i xk’ab’a’ sa’ li raqal reheb’ li loq’laj hu.
-
Ch’olob’ naq jo’ ajwi’ naq eb’ laj Nefita ke’wan sa’ jun li pleet sa’ tib’elej, laa’o wanko sa’ jun li pleet sa’ musiq’ej rik’in laj Satanas, li ink’a’ naraj naq te’qapaab’ lix taqlahom li Dios. Yiib’ xjalam-uuch jun ch’ina al chiru li pizarron ut tenq’aheb’ li kok’al chixk’oxlankil k’a’aq re ru li neke’xkol qix sa’ musiq’ej, jo’ naq li ramleb’ t’ikr naxkol rix li qatib’el (qayehaq, li tijok, rilb’aleb’ ru li loq’laj hu, malaj xpaab’ankileb’ li taqlahom). Rajlal sut naq taayeemanq k’a’ruhaq, yiib’ xjalam-uuch jun xcha’al li ramleb’ t’ikr sa’ xb’een li ch’ina al chiru li pizarron.
Xkolb’al rix jun tenamit aj Nefita, xb’aan li xMinerva K. Teichert
Alma 46:11–16; 48:11–13, 16–17
Naru ninwan chi tiik jo’ laj Moroni aj taqlanel.
Laj Moroni a’an jun nimla eetalil re paab’aal, kawil ch’oolej, ut li k’anjelak chiruheb’ li kristiaan. K’oxla chan ru naru nakawaklesi xch’ooleb’ li kok’al chixtaaqenkil lix b’aanuhom.
Kok’ k’anjel naru chi b’aanumank
-
K’ut li jalam-uuch re li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Rik’in roksinkileb’ li ch’ol aatin wankeb’ sa’ Alma 46:11─16, seraq’i reheb’ li kok’al resil li reetalil li ach’ab’aak ut li k’a’ru tz’iib’anb’il chiru. Naru nakawil ajwi’ li “Ch’ol 32: Laj Moroni aj taqlanel ut li eetalil re ach’ab’aak” (Eb’ li Esilal sa’ lix Hu laj Mormon, 89─90, malaj li video sa’ ChurchofJesusChrist.org). Kanab’eb’ li kok’al chixseraq’inkil li esil jo’ chanru neke’ru. K’ut naq laj Moroni kiroksi li reetalil li ach’ab’aak re xtenq’ankileb’ laj Nefita re naq taajultiko’q reheb’ li k’a’ru aajel ru choq’ reheb’.
-
Tenq’aheb’ li kok’al chixyiib’ankil jun reetalil li ach’ab’aak choq’ reheb’ a’an malaj re li tzoleb’aal. Re xtikib’ankil, tenq’aheb’ chixk’oxlankil li neke’xpaab’ malaj li naraj li qaChoxahil Yuwa’ naq taajultiko’q reheb’. Kanab’eb’ chixyiib’ankil xjalam-uucheb’ li k’a’aq re ru a’an chiru jun li nimla hu, malaj ut, naru nakak’ameb’ jalam-uuch li naru neke’xlatz chiru li hu.
-
Kanab’eb’ li kok’al chi aatinak chirixeb’ junjunq li kristiaan jo’ chanru neke’raj wulak, ut k’a’ut naq taawulaq raj chiruheb’ wulak jo’eb’ a’an. Chirix a’an wotz rik’ineb’ junjunq li aatin wankeb’ sa’ Alma 48:11─13 li neke’aatinak chirix laj Moroni, ut kanab’eb’ chixq’ehinkil ani chi aj-ix neke’aatinak li raqal a’an. K’ut jun xjalam-uuch laj Moroni ut aatinanqex chirix chan ru naru nokowan jo’ a’an.
Xk’utb’al li tzol’leb’: Kok’al ak ninqeb’
Alma 43:17–21; 48:7–8; 49:1–5; 50:1–6
Naru nintaw xkolb’al wix sa’ musiq’ej sa’ li evangelio.
Sa’ li ruchich’och’ wan naab’al li musiq’ejil xiwxiw, a’b’an naab’al li k’a’ru naru neke’xtzol li kok’al rik’ineb’ laj Nefita chirix chan ru xkolb’aleb’ rib’.
Kok’ k’anjel naru chi b’aanumank
-
Kanab’eb’ li kok’al chirilb’al ru chi ch’anch’o jun reheb’ li raqal a’an li neke’aatinak chirix chan ru naq eb’ laj Nefita ke’xkawresi rib’ re pleetik rik’ineb’ laj Lamanita: Alma 43:19; 48:8; 49:1─5 ut 50:2─4. Kanab’eb’ li kok’al chixwotzb’al li xe’xtzol (wi na’ajman ru, tenq’aheb’). Ch’olob’ naq wanko sa’ jun li musiq’ejil pleet rik’in laj Satanas ut naq tento taqakol qix sa’ musiq’ej, jo ke’xkol rib’ laj Nefita sa’ tib’elej chiruheb’ laj Lamanita. K’a’ chi k’anjeleb’aal re pleet malaj musiq’ejil ramleb’ naru neke’qayiib’ re xkolb’al qix sa’ lix yalb’al qaq’e sa’ musiq’ej?
-
Tenq’aheb’ li kok’al chixyiib’ankil jun ramleb’ rik’in jun li karton, ut te’xtz’iib’a chiru a’an k’a’aq re ru li neke’xkol qix sa’ musiq’ej. K’e re li junjunq chi kok’al jun perel li hu ut kanab’eb’ chixtz’iib’ankil k’a’ruhaq ink’a’ us li naru nokoraale wi’ laj Satanas chixb’aanunkil (jo’ li tik’ti’ik, elq’ak, malaj lab’alink). Kanab’eb’ chixyiib’ankil jun b’olotz’ rik’in hu ut te’xkut chiru li ramleb’ re xk’utb’esinkil chan ru naq li evangelio naru naxkol qix chiru laj Satanas (chi’ilmanq ajwi’ Efesios 6:16).
Alma 46:11–16; 48:11–13, 16–17
Naru ninwan chi tiik jo’ laj Moroni aj taqlanel.
Laj Moroni kiwan jo’ jun xtiikil ut xkawil moos li Jesukristo, ut kixwaklesi xch’ooleb’ laj Nefita chixyu’aminkil li evangelio (chi’ilmanq Alma 48:17). K’a’ru naru neke’xtzol li kok’al nakatzoleb’ rik’in lix b’aanuhom a’an?
Kok’ k’anjel naru chi b’aanumank
-
Ilomaq ru sa’ komonil Alma 46:11─16. K’a’ru kiraj laj Moroni naq taajultiko’q raj reheb’ laj Nefita? (chi’ilmanq li raqal 12). Chan ru kixtenq’aheb’ chixjultikankileb’ li k’a’aq re ru a’an? Kanab’eb’ li kok’al chixyeeb’al junjunq li k’a’aq re ru naraj li qaChoxahil Yuwa’ naq taajultiko’q qe. Kanab’eb’ li kok’al chixyiib’ankil lix “eetalil re li ach’ab’aak” rik’ineb’ ch’ol aatin malaj jalam-uuch li te’tenq’anq reheb’ chixjultikankileb’ li k’a’aq re ru a’an.
-
Kanab’ jun li ch’ina al chirilb’al ru Alma 48:17. Re xtenq’ankileb’ li kok’al chixtawb’al ru k’a’ut naq nokob’oqe’ chi wank jo’ laj Moroni, k’e xb’oqb’aleb’ chixtzolb’al Alma 48:11─13, 16. Kanab’eb’ chixsik’b’aleb’ aatin ut ch’ol aatin li toohe’xtenq’a chixtawb’al ru k’a’ut naq laj Moroni kiwan jo’ xchaab’il moos li Jesukristo. Naq yooqeb’ chixwotzb’al li te’xtaw, waklesi xch’ooleb’ chixk’oxlankil k’a’ru naru neke’xb’aanu re te’wulaq jo’ laj Moroni.
Laj Satanas nokoraale ut nokoxb’alaq’i chi b’ayatq.
Aajel ru naq eb’ li kok’al te’xnaw naq laj Satanas tixyal qaalenkil chixb’aanunkil kok’ maak re naq tooxk’am sa’eb’ li ninqi maak.
Kok’ k’anjel naru chi b’aanumank
-
Ilomaq ru sa’ komonil junjunq raqal sa’ Alma 47:4─19 ut ch’olob’ chiruheb’ li kok’al chan ru naq laj Amalikiah ki’ok chixtaqlankil lix ch’uut aj pleet laj Lehonti, us ta eb’ li komon a’an ke’xye naq “xaqxookeb’ xk’a’uxl” re naq ink’a’ te’mine’q ru chi pleetik rik’ineb’ laj Nefita. K’a’ raj ru kik’ulman wi laj Amalikiah kixye raj re laj Lehonti li k’a’ru kixk’uub’ xb’aanunkil chalen chaq sa’ xtiklajik? K’a’ru neke’xk’ut chiqu eb’ li raqal a’an chirix chan ru naq laj Satanas naxyal qab’alaq’inkil?
-
K’ut xjalam-uuch jun li ochoch li chaab’il ut jun chik li moko jwal chaab’il ta, malaj ut, k’ut xjalam-uuch jun li awimq ilb’il chi us ut jun chik nujenaq chi pim xsa’. Kanab’eb’ li kok’al chi aatinak chirix li k’a’ru neke’ril sa’eb’ li jalam-uuch ut chan ru naq ke’k’ulman li jalaak a’an chiru xnumik li hoonal. K’a’ raj ru kiru chixb’aanunkil laj eechal re li ochoch malaj li awimq re naq ink’a’ raj kik’ulman a’an? Ch’olob’ naq eb’ li kristiaan naru neke’wulak choq’ aj maak chi timil timil wi ink’a’ neke’xk’uy li raalehom laj Satanas chixb’aanunkil li kok’ maak (jo’ li tik’ti’ik malaj rilb’al li pornografia) ut chirix a’an li ninqi maak. B’ar wan junjunq reheb’ li maak li tento naq ink’a’ te’qab’aanu sa’ li qayu’am?
Xb’oqb’aleb’ chi tzolok sa’ kab’l
Kanab’ jun li ch’ina al chixyeeb’al jun k’a’aq re ru xrab’i malaj xreek’a chiru li kutan a’in ut naraj xwotzb’al rik’in junaq komon sa’ lix junkab’al. Waklesiheb’ xch’ool re naq te’xb’aanu li k’a’ru k’uub’anb’il xb’aaneb’.
Xchaab’ilob’resinkil li qak’utum
Tenq’aheb’ li kok’al chixnimob’resinkil xkawileb’ xch’ool. Maare junjunqeb’ li kok’al te’reek’a naq moko te’ruuq ta chixtzolb’al li evangelio xjuneseb’ rib’. Naru naniman xkawileb’ xch’ool wi nakawaklesiheb’ xch’ool naq neke’tz’aqon sa’ li tzoleb’aal.