eb’ lix b’oolam li palaw neke’xpik’a rib’ chiruheb’ li pek

17–23 agosto

Helaman 1–6

“Lix saqoonaq laj Tojol qix”

Eb’ li kok’ k’anjel sa’ li tusleb’ aatin a’in k’uub’anb’ileb’ re xk’eeb’aleb’ aana’leb’ ut re xmusiq’ankil laa waam ut laa k’a’uxl. Eb’ li chaab’il na’leb’ neke’wulak naq nakatk’oxlak rik’in tijok chirixeb’ li loq’laj hu ut li k’a’ru aajel ru choq’ reheb’ li kok’al nakatzoleb’.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Re xtenq’ankileb’ li kok’al sa’ xtzolb’al li evangelio sa’ kab’l, kanab’eb’ junjunq reheb’ chixwotzb’al k’a’ruhaq xe’xtzol chiru li xamaan a’in. Ch’olob’ chan ru naq laa’at nakatzol li evangelio sa’ kab’l ut aatinan chirix chan ru naq eb’ li kok’al naru neke’xtenq’a lix junkab’aleb’ chixtzolb’al lix Hu laj Mormon.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Helaman 5:12

Naru tinkab’la lin k’ojleb’aal sa’ xb’een li Jesukristo.

Laj Helaman kixk’ut chiruheb’ li ralal, laj Nefi ut laj Lehi, chixkab’lankileb’ lix yu’am sa’ xb’een lix saqoonaq laj Tojol qix. K’oxla chan ru naru taab’aanu ajwi’ a’an rik’ineb’ li kok’al nakatzoleb’.

Kok’ k’anjel naru chi b’aanumank

• K’ut xjalam-uuch jun li santil ochoch malaj junaq chik li kab’l, ut ch’olob’ naq eb’ li ninqi kab’l neke’raj ru xkawil k’ojleb’aal re naq ink’a’ te’t’ane’q xb’aan li iq’ malaj li kaq-sut-iq’. Re xk’utb’esinkil, kanab’eb’ li kok’al chixyalb’al reek’asinkil junaq li pek chi aapusinb’il. Il ru li xb’een raqal sa’ Helaman 5:12 ut kanab’eb’ li kok’al chixtaqsinkileb’ li ruq’ naq te’rab’i ani li “saqoonaq” li tento taawanq choq’ qak’ojleb’aal.

• Kanab’eb’ li kok’al chireek’ansinkileb’ rib’ naq yooqat chirilb’al ru Helaman 5:12. Qayehaq, naru neke’reek’asi li ruq’eb’ naq taayaab’asi resil lix “kawil kaq-sut-iq’ ” laj tza, ut te’kanaaq chi xaqxo naq taayaab’asi resil “lix saqoonaq laj Tojol qix.”

• Kanab’eb’ li kok’al chatenq’ankil chixyiib’ankil jun ch’ina kab’l rik’in yalaq k’a’ru li k’anjeleb’aal. Re xtikib’ankil, yiib’omaq jun “k’ojleb’aal ch’olch’o ru” ut aatinaheb’ chirix naq tento naq a’anaq li Jesukristo lix k’ojleb’aal qayu’am. Kanab’eb’ li kok’al chixwotzb’aleb’ k’a’aq re ru li naru neke’xb’aanu re xtaaqenkil li Jesukristo, ut kanab’eb’ chixk’eeb’al junaq kaaxukuut jo’ jun k’ojleb’aal rajlal sut naq te’xwotz junaq na’leb’.

• Kanab’eb’ li kok’al chixb’onb’al li perel re kok’ k’anjel, ut tenq’aheb’ chixsetb’al. K’a’ru naru naqab’aanu re xkab’lankil qayu’am sa’ xb’een lix k’ojleb’aal li Jesukristo? Wotzeb’ junjunq li na’leb’ chirix chan ru naq laa’at nakakab’la laa yu’am sa’ xb’een li Kolonel ut chan ru naq xb’aan xb’aanunkil a’an osob’tesinb’ilat.

Helaman 5:21–52

Li Santil Musiq’ej qʼun naʼaatinak, ut kaʼchʼin lix yaabʼ lix kux.

Lix ch’olob’ankil li xyaab’ kuxej natawman sa’ Helaman 5:29–30, 45–47 li ke’rab’i laj Lamanita juntaq’eet rik’in jo’ naqach’olob’ chan ru na’aatinak li Santil Musiq’ej. Naru nakawoksiheb’ li raqal a’an re xtenq’ankileb’ li kok’al chixk’eeb’al reetal lix yaab’ xkux li Musiq’ej.

Kok’ k’anjel naru chi b’aanumank

• Seraq’i li esil chirix naq laj Nefi ut laj Lehi ke’wan sa’ tz’alam. Naru nakawoksi li “Ch’ol 37: Laj Nefi ut laj Lehi neke’k’ehe’ sa’ tz’alam” (Eb’ li Esilal sa’ lix Hu laj Mormon, 99─102, malaj li video sa’ ChurchofJesusChrist.org). Naq tat-aatinaq chirix li xyaab’ kuxej ke’rab’i laj Lamanita, aatinan chi ka’ch’in xyaab’ aakux. Ka’suti li esil jarub’aq sut ut kanab’eb’ li kok’al chi hasb’ak aawik’in. Aatinan rik’ineb’ li kok’al chirixeb’ li hoonal b’ar wi’ naq li Santil Musiq’ej nahasb’ak aawik’in ut naxkawresi lix nawom aach’ool.

• Il ru Helaman 5:30 ut b’ichahomaq sa’ komonil jun li b’ich na’aatinak chirix li Santil Musiq’ej, jo’ “Li Santil Musiq’ej” (B’ichleb’aal choq’ reheb’ li Kok’al, 56). K’uteb’ li aatin sa’ li raqal reheb’ li loq’laj hu ut sa’ li b’ich li neke’xch’olob’ chan ru nokoraatina li Santil Musiq’ej (chi’ilmanq ajwi’ Helaman 5:45–47). Oksi Helaman 5:29 ut eb’ ajwi’ laa numsihom re xwotzb’al rik’ineb’ li kok’al junjunqeb’ reetalil chaab’il k’a’aq re ru li naru naxmusiq’a qe li Santil Musiq’ej.

reetalil li k‘utuk

Xk’utb’al li tzol’leb’: Kok’al ak ninqeb’

Helaman 1–6

Naq tuulan inch’ool, li qaChoxahil Yuwa’ tinrosob’tesi.

Sa’ lix Hu laj Mormon wankeb’ naab’al reetalileb’ lix xiwxiwil li kaqal ut li rosob’tesihom li tuulanil, ut naab’aleb’ re li eetalil a’an neke’tawman sa’ Helaman 1–6. Naq yooqat chixtzolb’aleb’ li ch’ol a’an, k’oxla chan ru naru nakawoksiheb’ li eetalil a’an re xtzolb’aleb’ li kok’al sa’ laa tzoleb’aal.

Kok’ k’anjel naru chi b’aanumank

• Kanab’eb’ li kok’al chatenq’ankil chixyiib’ankil chiru li pizarron li “sirso re q’etq’etil.” Ilomaq ru sa’ komonil Helaman 3:24, 33–34 ut 4:11–15, ut kanab’eb’ li kok’al chixk’utb’al xcha’alil li sirso re q’etq’etil li neke’tawman sa’eb’ li raqal a’an.

• Tz’iib’aheb’ chiru li pizarron li aatin Tuulan ut Q’etq’et. Tz’iib’aheb’ junjunq reetalil li tuulanil k’anjel ut li q’etq’etil k’anjel chiruheb’ kok’ setb’il hu ut kanab’eb’ li kok’al chixk’eeb’aleb’ xhoonal chixsik’b’al ru junaq li ch’ina hu ut chixk’eeb’al chiru li pizarron chixk’atq lix ch’olob’ankil. B’ar wan junjunq chan ru naq laa’o naru naqasik’ ru wank chi tuulan?

li sirso re q’etq’etil

Li “sirso re q’etq’etil.”

Helaman 5:5–14

Tinkab’la lin k’ojleb’aal sa’ xb’een li Jesukristo.

Sa’ Helaman 5:12 wankeb’ xjalam-uuch chan ru naru naqakab’la qak’ojleb’aal sa’ xb’een li Kristo. Chan ru naru nakawoksiheb’ li jalam-uuch a’an re xk’utb’al li na’leb’ a’an chiruheb’ li kok’al? Lix b’aanunkil a’an taatenq’anq chixkawresinkileb’ li kok’al choq’ reheb’ li aaleek ut eb’ li yale’k-ix te’xtaw.

Kok’ k’anjel naru chi b’aanumank

• K’ameb’ sa’ li tzoleb’aal naab’al paay ru li k’anjeleb’aal re reetalinkileb’ li q’unil malaj kawil k’ojleb’aal (jo’ li algodón malaj junaq li pek malaj perpookil tz’ak). Kanab’eb’ li kok’al chixyiib’ankil jun nimla kab’l rik’ineb’ kok’ kaaxukuut malaj jalaneb’ chik li k’anjeleb’aal jalan jalanq xyiib’ankil. K’a’ut naq junjunq li k’ojleb’aal mas kaweb’ chiru jalan chik? Ilomaq ru sa’ komonil Helaman 5:12 ut patz’ reheb’ li kok’al k’a’ut neke’xk’oxla naq li Jesukristo a’an “jun li kawil k’ojleb’aal” choq’ re li qayu’am. Chan ru naru naqakab’la li qayu’am sa’ xb’een a’an? Kanab’eb’ chixsik’b’al na’leb’ sa’ Helaman 3:27–29, 35 ut Eb’ lix Raqalil li Paab’aal 1:4.

• Kanab’eb’ li kok’al chirilb’al ru Helaman 5:5–14 ut chirajlankil jarub’ sut wan li aatin “jultikank” aran. K’a’ru kixk’ut laj Helaman chiruheb’ li ralal xk’ajol li tento taajultiko’q reheb’? Chan ru naq xjultikankileb’ li k’a’aq re ru a’an nokoxtenq’a chixk’eeb’al li Jesukristo choq’ xk’ojleb’aal li qayu’am?

Helaman 5:20–52

Li jalb’a-k’a’uxlej naxjal ru li musiq’ejil aak’ab’ rik’in li saqen.

Eb’ laj Lamanita li xkoheb’ sa’ li tz’alam re xkamsinkil laj Nefi ut laj Lehi ke’sute’ rix xb’aan tz’aqal li aak’ab’. Naq nokomaakob’k, noko’ok sa’ musiq’ejil aak’ab’. Helaman 5:20–52 naxk’ut chiqu chan ru naru na’isiman chaq li “qach’ool re q’ojyin” (raqal 41).

Kok’ k’anjel naru chi b’aanumank

• Q’ojyinob’resi chi tz’aqal li tzoleb’aal ut chirix a’an yaab’asi malaj k’os ru li seraq’ wan sa’ Helaman 5:20–40 rik’in roksinkil jun li ch’ina pook. K’a’ ta wi’ ru ke’reek’a laj Lamanita naq ke’kana sa’ aak’ab’? K’e xb’oqb’aleb’ li kok’al chirab’inkil li kixk’ut xb’aanunkil laj Aminadab chiruheb’ li kristiaan re naq taa’isimanq chaq li aak’ab’, ut chirix a’an yaab’asi li raqal 41. Chirix a’an locheb’ li saqen ut ilomaqeb’ ru sa’ komonil li raqal 42–48. K’a’ru neke’xk’ut chiqu li raqal a’an chirix li osob’tesihom naxk’e li jalb’a-k’a’uxlej sa’ qayu’am?

• Kanab’eb’ li kok’al chixk’oxlankil naq yookeb’ chixtzolb’al jun ch’ina al toj ka’ch’in chirix li Santil Musiq’ej. Chan ru naru neke’roksi Helaman 5:29–33, 44–47 re xk’utb’al chan ru na’eek’aman lix yaab’ xkux li Santil Musiq’ej ut junjunqeb’ li k’a’aq re ru naxye qe li Musiq’ej? Chan ru naq li Santil Musiq’ej naxwaklesi aach’ool chixjalb’al aak’a’uxl? Kanab’eb’ li kok’al chixwotzb’aleb’ lix numsihom b’ar wi’ ke’reek’a tuqtuukilal ut xk’ojob’ankil xch’ooleb’ xb’aan li Santil Musiq’ej.

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixpatz’b’al reheb’ li komon sa’ xjunkab’aleb’ chan ru naq neke’xk’ojob’ lix yu’ameb’ sa’ xb’een li Jesukristo. Malaj ut, naru neke’xwotz rik’ineb’ lix junkab’al chan ru naq eb’ a’an te’xk’ojob’ xyu’ameb’ sa’ xb’een a’an.

Xchaab’ilob’resinkil li qak’utum

Ye xnawom aach’ol chirix li Jesukristo. Wan laa santil hoonal re tenq’ank chixkawob’resinkil xnawomeb’ xch’ool li kok’al sa’ laa tzoleb’aal. Tenq’aheb’ chireek’ankil lix rahom li Jesus choq’ reheb’ ut wotz xnawom aach’ool chirix a’an rajlal.

perel re kok’ k’anjel: tinkab’la lin k’ojleb’aal sa’ xb’een li Jesukristo