“3–9 agosto. Alma 43–52: “Xaqxo chi kaw sa’ xpaab’ankil li Kristo,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“3–9 agosto. Alma 43–52,” Kim, Taaqehin—Choq’ reheb’ li komon ut li junkab’al: 2020
Choq’ re li osob’tesink re li ach’ab’aak, xb’aan laj Scott M. Snow
3–9 agosto
Alma 43–52
“Xaqxo chi kaw sa’ xpaab’ankil li Kristo”
Maare chanchan naq li nak’ulman sa’ Alma 43–52 maak’a’ rilom aawik’in. A’b’an jo’ sa’ chixjunileb’ li loq’laj hu, li Qaawa’ naxk’e jun esil choq’ aawe. Sik’ li esil a’an rik’in tijok.
Xtz’iib’ankil li nakak’oxla
Naq naqileb’ ru li aatin a’in sa’ xtiklajik Alma ch’ol 43—“Ut anajwan ninsutq’i sa’ li esil chirixeb’ li pleet ke’wan wi’ laj Nefita rik’ineb’ laj Lamanita”—naru naqapatz’ k’a’ut naq laj Mormon kixtz’iib’a resileb’ li pleet naq b’ab’ay ajwi’ li na’ajej chiruheb’ li perel ch’iich’ (chi’ilmanq Raatin laj Mormon 1:5). Yaal naq wankeb’ naab’al li pleet sa’ roso’jikeb’ li kutan a’in, a’ut nim wi’chik xloq’al li raatin chiru ka’ajwi’ xch’olob’ankil chan ru ki’uxman li pleetik ut xch’olob’ankil resil li rahilal nak’ulman xb’aan li pleet. Li raatin nokoxkawresi ajwi’ choq’ re li pleet wulaj wulaj rik’in li maa’usilal, li “b’oqb’ilo chixpleetinkil” (Eb’ li B’ich, 160). Yaal ut naq yoo li pleet a’in, ut wan rilom rik’in li qajunelik yu’am. Jo’eb’ laj Nefita, laa’o “q’axal chaab’il wi’chik li na’leb’ musiq’anb’ilo wi’,” a’an li “qaDios, li qapaab’aal, ut li ach’ab’aak wanko wi’, ut li qatuqtuukilal,” ut li qajunkab’al. Laj Moroni kixk’ab’a’i a’in “lix na’leb’eb’ laj Kristiano,” a’an ajwi’ li na’leb’ naqasik’ xkolb’al sa’ li kutan a’in (Alma 43:45; 46:12, 16).
Li na’leb’ re xtzolb’aleb’ li loq’laj hu aajunes
Eb’ laj pleet sa’ lix Hu laj Mormon nikine’xtzol chirix li pleet wankin wi’ laa’in rik’in li maa’usilal.
Rilb’aleb’ ru li esil chirixeb’ li pleet ke’wan wi’ laj Nefita rik’ineb’ laj Lamanita maare taak’anjelaq mas wi’chik aawe wi taasik’ chan ru xjuntaq’eetankil rik’ineb’ li musiq’ejil pleet wankat wi’. Naq nakawil ru Alma 43–52, k’e reetal li ke’xb’aanu laj Nefita li kixtenq’aheb’ chi q’axok-u (malaj chi q’axe’k-u). Chirix a’an, k’oxlan chirix chan ru naru taawoksi li xatzol re aatenq’ankil chixq’axb’aleb’ ru li musiq’ejil pleet wankat wi’. Naq nakatzoleb’ li raqal jo’eb’ a’in, tz’iib’a li nakak’oxla chirix chan ru naru taataaqe xb’aanuhomeb’ laj Nefita:
-
Alma 43:19. Eb’ laj Nefita kawresinb’ileb’ rik’in li kolb’a-ib’ aq’ej. (Laa’in naru tinyal inq’e chixkawresinkil wib’ rik’in li musiq’ejil kolb’a-ib’ aq’ej.)
-
Alma 43:23–24. Ke’xsik’ lix b’eresihom li profeet.
K’e ajwi’ reetal chan ru naq eb’ laj Lamanita ut eb’ li ke’risi rib’ rik’ineb’ laj Nefita ke’xyal xsachb’aleb’ laj Nefita. Eb’ li k’a’aq re ru a’in naru te’xk’e aana’leb’ chirix chan raj ru laj tza tixyal aapleetinkil. Naq yookat chi tzolok, tz’iib’a chan raj ru naq laj Satanas tixyal aapleetinkil chanchaneb’ ajwi’ a’in:
-
Alma 43:8. Laj Tzerahemnah kixsik’ xjosq’ob’resinkil lix tenamit re naq taawanq xwankil sa’ xb’eeneb’. (Naq ninjosq’o’k rik’ineb’ li was wiitz’in, nink’e wankilal re laj Satanas sa’ inb’een.)
-
Alma 43:29. Eb’ laj Lamanita ke’raj xk’amab’aleb’ laj Nefita chi preexil.
Jun pleet re xkolb’al rix jun tenamit aj Nefita, xb’aan li xMinerva K. Teichert
Naq ninyal inq’e chi wanq inpaab’aal jo’ laj Moroni, laa’in tin’ok b’ayaq chik jo’ li Kolonel.
Ma taawaj raj naq tatruuq chi ok jo’ li Kolonel ut chixka’ch’inob’resinkil lix wankil laj tza sa’ laa yu’am? Jun na’leb’ re xb’aanunkil a’in, a’an naq taab’aanu li yeeb’il sa’ Alma 48:17 re naq tat-ok “jo’ chanchan laj Moroni.” K’e reetal chan ru laj Moroni ut k’a’ruheb’ lix na’leb’ ut lix b’aanuhom yeeb’il resil sa’ Alma 43–52, a’ut mas wi’chik sa’ 46:11–28 ut 48:7–17. K’a’ru nawulak chawu chirix li “winq kaw rib’ ” a’in? Chan ru naq eb’ li na’leb’ ut b’aanuhom jo’eb’ li re laj Moroni neke’xq’unob’resi lix wankil laj tza sa’ laa yu’am? K’oxla li eek’asinb’ilat chixb’aanunkil re xtaaqenkil lix b’aanuhom laj Moroni ut wank mas wi’chik jo’ li Kolonel.
Laj Satanas nokoraale ut nokoxb’alaq’i chi b’ayb’aykil.
Laj Satanas naxnaw naq lix k’ihaleb’ qe ink’a’ te’qab’aanu li ninqi maak ut ink’a’ te’qapaab’ li ninqi tik’ti’. Jo’kan naq, a’an naroksiheb’ li kok’ tik’ti’ ut aaleek re xk’amb’al qab’e chixb’aanunkileb’ li kok’ maak—jo’ k’ihaleb’ li naxk’oxla naq taqak’ulub’a. A’an ink’a’ naxkanab’ xb’aanunkil a’in toj reetal naq ak xqajalb’ehi qib’ rik’in li kolok-ib’ li wan sa’ li tiikil wank.
Naru taak’e reetal a’in sa’ li esil chirix laj Amalikiah naq kixb’alaq’i laj Lehonti, li natawman sa’ Alma 47. Naq yookat chi tzolok, k’oxla chan ru naq laj Satanas maare yoo chixyalb’al xq’e chab’alaq’inkil, jo’ yeeb’il xb’aan li Elder Robert D. Hales:
“Laj Amalikiah kirelaji laj Lehonti chi “kub’eek chiroq li tzuul” re aatinak rik’in sa’ li ru taq’a. A’b’an, naq laj Lehonti ki’el chaq chi tzuul, kik’ehe’ re li b’an nakamsin “chi timil” roj reetal naq kikam, ut lix teep aj pleet kit’ane’ sa’ ruq’ laj Amilikiah (chi’ilmanq Alma 47). Rik’in li wech’ok-ib’ ut li jitok, wankeb’ li kristiaan li nokorelaji chi elk chaq chi tzuul. Aran chi tzuul wan li saqen. … A’an li kolb’a-ib’ na’ajej” (“Valor cristiano: El precio del discipulado,” Liahona, noviembre 2008, 74).
Chi’ilmanq ajwi’ 2 Nefi 26:22; 28:21–22.
Li junajil naxk’am chaq li kolok-ib’.
Sa’ xq’ehil li tz’iib’anb’il resil sa’ xtiklajik Alma 50, chanchan naq maajo’q’e raj te’numtaaq laj Lamanita sa’ xb’eeneb’ laj Nefita. Chanchan naq maajun taaruuq raj taanumtaaq sa’ xb’eeneb’ laj Nefita xb’aaneb’ li kolb’a-ib’ aq’ej, li kolb’a-ib’ na’ajej’, ut li junajil li wan reheb’. A’b’anan, eb’ laj Lamanita sa’ junpaat ke’xchap naab’al reheb’ lix tenamit—jo’eb’ ajwi’ li ke’kawob’resiik xb’aan laj Moroni (chi’ilmanq Alma 51:26–27). Chan ru naq kik’ulman a’an? Sik’ xsumenkil a’an naq nakawil ruheb’ li ch’ol a’in (chi’ilmanq Alma 51:1–12). K’oxlaheb’ li tijom choq’ re laa junkab’al li maare wankeb’ sa’ li ch’ol a’in.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Alma 45:2–8
Rilb’aleb’ ru li raqal a’in sa’ komonil maare tixmusiq’a laa junkab’al chi aatinak li jun rik’in li jun chik chirix li evangelio, jo’ kixb’aanu laj Alma rik’in laj Helaman.
Alma 46:12–22
Li eetalil re ach’ab’aak kixmusiq’aheb’ laj Nefita chixpaab’ankileb’ lix taqlahom li Dios ut chixkolb’aleb’ rix lix paab’aal. K’a’ru nokoxmusiq’a laa’o chixb’aanunkil a’in? Maare laa junkab’al taaruuq te’xyiib’ jun eetalil re ach’ab’aak choq’ eere—jun li t’ikr malaj hu tz’iib’anb’il wi’ malaj yiib’anb’il wi’ xjalam-uuch li k’a’ru naxjultika eere naq teepaab’eb’ lix taqlahom li Dios wulaj wulaj.
Alma 48:7–9; 49:1–9; 50:1–6
Naq laa junkab’al naril ru resileb’ li kolb’a-ib’ na’ajej reheb’ laj Nefita, taaruuq tex’aatinaq chirix chan ru yookex chixkawob’resinkil lee rochoch chiru laj tza. Eb’ li kok’al maare taawulaq chiruheb’ xyiib’ankil jun kolb’a-ib’ na’ajej rik’in chunleb’aal ut isb’, malaj te’ruuq chixyiib’ankil xjalam-uucheb’ li kolb’a-ib’ na’ajej reheb’ laj Nefita.
Alma 51:1–12
K’a’ru neke’xk’ut li raqal a’in chirix li naru taa’uxmanq sa’ li qajunkab’al naq wan li wech’ok-ib’? K’a’ru naru taqab’aanu re xtamresinkil li qajunajil?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
B’aanuheb’ li patz’om naq yookat chi tzolok. Naq nakatzoleb’ li loq’laj hu, patz’ aawib’ li k’a’ru naru taatenq’anq aawe chixk’oxlankil ma yookat chixyu’aminkil chi chaab’il li k’a’ru nakawil ru.
Li eetalil re ach’ab’aak, xb’aan laj Larry Conrad Winborg