“17–23 agosto. Helaman 1–6: “Lix saqoonaq laj Tojol qix,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)

“17–23 agosto. Helaman 1–6,” Kim, Taaqehin—Choq’ reheb’ li komon ut li junkab’al: 2020

Jalam-uuch

eb’ lix b’oolam li palaw neke’xpik’a rib’ chiruheb’ li pek

17–23 agosto

Helaman 1–6

“Lix saqoonaq laj Tojol qix”

Eb’ li na’leb’ sa’ li tusleb’ aatin a’in naru tate’xb’eresi naq nakatzol Helaman 1–6, a’b’an maakanab’ naq a’an te’xk’os li k’a’ru taatzol. Li Santil Musiq’ej tatxb’eresi rik’ineb’ li yaal li tento taatzol.

Xtz’iib’ankil li nakak’oxla

Lix hu laj Helaman naxye resil li sahil ch’oolejil jo’ ajwi’ li rahil ch’oolejil kiwan sa’ xyanqeb’ laj Nefita ut laj Lamanita. Natikla rik’in jun “li nimla ch’a’ajkilal sa’ xyanq lix tenamiteb’ laj Nefita” (Helaman 1:1), ut a’an ka’ajwi’ lix tiklajikeb’ li ch’a’ajkilal li tz’iib’anb’ileb’ resil sa’ li hu a’in. Sa’ rilb’al ru, naqataweb’ li esil chirix li muqmuukil b’aanuhom sa’ xjolomil li tenamit, chirixeb’ li molam chi aj elq’, chirix naq ke’tz’eqtaanak li profeet, ut chirix li q’etq’etil ut lix maak’a’il li paab’aal chiru li ch’och’. A’b’an, naqataw ajwi’ li k’a’ru chaab’il, jo’ laj Nefi ut laj Lehi ut “jun raqal re li tenamit li tuulaneb’ xch’ool,” li ke’kana chi yo’yo, ut li ke’tam sa’ musiq’ejil (Helaman 3:34). Chan ru naq ke’xb’aanu? Chan ru ke’kana chi kaweb’ rib’ us ta yoo chi t’ane’k ut sache’k li tenamit li wankeb’ wi’? Ke’xb’aanu li tento taqab’aanu laa’o re taawanq qakawilal sa’ xyi li “kawil kaq-sut-iq’ ” naxtaqla laj tza re “taatenoq sa’ qab’een”—a’an xkab’lankil li qayu’am “sa’ xb’een lix saqoonaq laj Tojol qix, a’an li Kristo, li Ralal li Dios, … jun k’ojleb’aal b’ar wi’ wi te’kab’laq li winq sa’ xb’een ink’a’ taaruuq te’t’ane’q” (Helaman 5:12).

Jalam-uuch

reetalil li tzolok aajunes

Li na’leb’ re xtzolb’aleb’ li loq’laj hu aajunes

Helaman 1–6

Li q’etq’etil nikinixnajtob’resi rik’in li Musiq’ej ut lix kawilal li Qaawa’.

Naq nakawil ru Helaman 1–6—ut chiru chixjunil lix Hu laj Mormon—maare taak’e reetal jun eetalil chirix lix wanjikeb’ laj Nefita; Naq tiikeb’ xch’ool laj Nefita, li Dios narosob’tesiheb’ ut neke’usa. Chirix xnumikeb’ li kutan, neke’q’etq’eto’k ut neke’ok sa’ maa’usilal, ut neke’xsik’ ru li nak’amok sa’ li sachk ut li rahilal. Toja’ naq neke’tuulanob’resiik ut neke’musiq’aak chixjalb’aleb’ xk’a’uxl, ut li Dios narosob’tesiheb’ wi’chik. Naab’al sut k’iilasutinb’il a’in, jo’kan naq wankeb’ li neke’xye re, “li sirso re q’etq’etil.”

Sik’ reetalil li sirso a’in naq yookat chi tzolok. Maare taawaj xb’onb’aleb’ naq nakataweb’. Wahe’ junjunqeb’ li patz’om li tate’xtenq’a chixtawb’al ru li eetalil a’in ut chirilb’al chan ru wan rilom aawik’in:

K’a’ruheb’ lix k’utb’esinkil li q’etq’etil nakataw sa’ xyanqeb’ laj Nefita? (chi’ilmanq, jo’ eetalil, Helaman 3:33–34; 4:11–13). Ma nakataw xkomon li q’etq’etil a’an aawik’in?
K’a’ru li nachal xb’aan li q’etq’etil ut li maa’usilal? (chi’ilmanq Helaman 4:23–26). K’a’ru li nachal xb’aan li tuulanil ut li jalb’a-k’a’uxlej? (chi’ilmanq Helaman 3:27–30, 35; 4:14–16).
K’a’ru kiraj laj Helaman naq taajultiko’q reheb’ li ralal? (chi’ilmanq Helaman 5:4–12). Chan ru naq xjultikankileb’ li yaalil na’leb’ ain tatxtenq’a re naq ink’a’ tatq’etq’eto’q.

Chi’ilmanq ajwi’ Dieter F. Uchtdorf, “El orgullo y el sacerdocio,” Liahona, noviembre 2010, 55–58.

Helaman 3:24–35

Naru tinsantob’resiiq naq tinq’axtesi inch’ool chiru li Dios.

Sa’ Helaman 3, laj Mormon naxch’olob’ jun xq’ehil naq q’axal usilanb’il ut osob’tesinb’il li Iglees, toj reetal naq eb’ laj jolominel ke’sach xch’ooleb’ (che’ilmanq li raqal 24–32). Rik’in xnumikeb’ li kutan ke’xq’etq’eti rib’ junjunq reheb’ li kristiaan, a’ut ke’wan chik li “ke’kawu xmetz’ew sa’ xtuulanileb’, … toj reetal ajwi’ naq ke’saqob’resiik ru ut ke’santob’resiik xch’ooleb’ ” (Helaman 3:35). K’e reetal sa’eb’ li raqal 34–35 k’a’ru ke’xb’aanu li ani tuulaneb’ re naq te’santob’resiiq. Chan ru naq li k’a’aq re ru a’in nakate’xtenq’a chi santob’resiik? Maare taak’anjelaq aawe xnawb’al naq li K’utul Raqal reheb’ li Loq’laj Hu naxch’olob’ li santob’resink chi jo’ka’in: “Naq nakanab’aak junaq chi kolb’il chiru li maak, saq ru, ch’ajb’il, ut sant sa’ xk’ab’a’ lix tojb’al rix li maak xb’aan li Jesukristo.” K’a’ru eek’asinb’ilat chixb’aanunkil re xtaaqenkil lix b’aanuhomeb’ li tzolom a’in? K’a’ru yookat chixb’aanunkil re xq’axtesinkil aach’ool chiru li Dios?

Helaman 5:14–52

Kawob’resinb’il inpaab’aal xb’aan “xnimal li wilom li xink’ul chaq.”

Li Elder Jeffrey R. Holland kixye jun sut reheb’ li neke’ch’a’ajko’ rik’in lix paab’aaleb’: “Nim chik laa paab’aal chiru li nakak’oxla xb’aan li “xnimal ru aawilom” jo’ yeeb’il re sa’ lix Hu laj Mormon [Helaman 5:50]. … K’utk’u li ruuchinihom li xyu’aminkil li evangelio sa’ xyu’ameb’ laj Santil Paab’anel sa’ Roso’jikeb’ li Kutan yalaq b’ar” (“Creo,” Liahona, mayo 2013, 94). Naq nakawileb’ ru li raqal a’in, k’oxla junjunq li eetalil li xk’ut li Qaaw’ chawu. Qayehaq, maare ink’a’ aawab’ihom chi tz’aqal lix yaab’ xkux li Qaawa’, a’b’an aaweek’ahom li Santil Musiq’ej chi aatinak “sa’ hasb’ ” li “ki’ok toj sa’ xyi li aamej”? (Helaman 5:30; chi’ilmanq ajwi’ Tzol’leb’ ut Sumwank 88:66). Maare xatwan sa’ li aak’ab’, xatz’aama chiru li Dios naq taanimanq laa paab’aal, ut “xatnujak rik’in li sahil ch’oolejil a’an li ink’a’ naru xyeeb’al” (Helaman 5:40–47). K’a’ chik ru xak’ul li xkawob’resink re laa paab’aal chirix li Jesukristo ut lix evangelio?

Jalam-uuch

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.

Helaman 3:27–30

Naq li profeet aj Mormon yoo chixk’osb’aleb’ ru li loq’laj tz’iib’anb’il esil, chi jo’q’ehaq kiroksi li ch’ol aatin “chi jo’kan naqil” re xka’jultikankileb’ li aajel ruhil yaal. K’a’ru kiraj naq taqil sa’ Helaman 3:27–30? Naq yooqat chi tzolok chiru li xamaan a’in, maare tatxaqliiq junjunq sut re xpatz’b’al reheb’ li komon sa’ laa junkab’al chan ru te’xtz’aqob’resi ru li ch’ol aatin “chi jo’kan naqil,” chirix li xe’xtzol. K’a’ruheb’ li yaalil na’leb’ neke’raj xka’jultikankil?

Helaman 5:6–7

Lix yuwa’chin li Awa’b’ej George Albert Smith li ak kamenaq, laj George A. Smith xk’ab’a’, kixk’ut rib’ chiru sa’ jun li matk’ ut kixpatz’ re, “Nawaj xnawb’al k’a’ru aab’aanuhom rik’in lin k’ab’a’.” Li Awa’b’ej Smith kixsume, “Maak’a’ inb’aanuhom rik’in laa k’ab’a’ li tatxutaanaq raj wi’ ” (sa’ Enseñanzas de los Presidentes de la Iglesia: George Albert Smith [2011], xxviii). Chirix rilb’al ru Helaman 5:6–7, maare taaruuq tat-aatinaq rik’in laa junkab’al chirix xjultikankil ut roxloq’inkileb’ li k’ab’a’ej k’eeb’il qe, jo’ ajwi’ lix k’ab’a’ li Kolonel.

Helaman 5:12

Re xtenq’ankil laa junkab’al chirilb’al k’a’ru naraj naxye naq wan jun “k’ojleb’aal ch’olch’o ru,” maare texruuq chixyiib’ankil jun ch’ina kab’l ut teek’e sa’ xb’een jalan jalanq li k’ojleb’aal. Chirix a’an texruuq chixyiib’ankil jun “kawil kaq-sut-iq’ ” rik’in xhirb’al li ha’ sa’ xb’een ut roksinkil jun li waal re rapusinkil rik’in kawil iq’. K’a’ru xk’ulman rik’in li kab’l naq wan sa’ li junjunq k’ojleb’aal? Chan ru naq li Kristo wan choq’ jun “k’ojleb’aal ch’olch’o ru” sa’ li qayu’am?

Helaman 5:29–33

Chan ru xqak’e reetal lix yaab’ xkux li Dios sa’ li qayu’am?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Xchaab’ilob’resinkil li tzolok aajunes

Chiwanq aakuyum aawik’in aawib’. Jun k’ojleb’aal re paab’aal nayiib’aman chi junjunqil lix cha’al. Wi nakataw naq wankeb’ li tzol’leb’ li ch’a’aj xtawb’aleb’ ru anajwan, chiwanq aakuyum. Chiwanq aapab’aal naq li tawok-u taachalq naq nakayiib’ laa k’ojleb’aal sa’ xb’een li Jesukristo rik’in xk’anjelankil laa paab’aal ut tzolok chi yalb’il aaq’e.