“31 agosto–6 septiembre. Helaman 13–16: “Sahil esilal re nimla sahil ch’oolejil,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“31 agosto–6 septiembre,” Kim, Taaqehin—Choq’ reheb’ li komon ut li junkab’al: 2020
Laj Samuel aj Lamanita sa’ xb’een li xaqxookil tz’ak, xb’aan laj Arnold Friberg
31 agosto–6 septiembre
Helaman 13–16
“Sahil esilal re nimla sahil ch’oolejil”
Naq nakatz’iib’a li na’leb’ nakak’ul sa’ li xamaan a’in, k’oxla chan ru naq eb’ li na’leb’ sa’ Helaman 13–16 neke’xkawob’resi jalaneb’ chik li na’leb’ li ak xatzol sa’eb’ li loq’laj hu.
Xtz’iib’ankil li nakak’oxla
Li xb’een sut naq laj Samuel aj Lamanita kixyal xwotzb’al “sahil esilal” aran Tzarahemla (Helaman 13:7), kitz’eqtaanaak ut ki’isiik xb’aaneb’ laj Nefita kaweb’ raam. Naru raj xyeeb’al naq chanchan naq ke’xyiib’ jun xaqxookil tz’ak ink’a’ naru xt’anb’al chixsutameb’ li raam li kiramok reheb’ chixk’ulb’al li raatin laj Samuel. Laj Samuel kixtaw ru lix aajelil ru li raatin, ut kixk’ut lix paab’aal rik’in xtaaqenkil lix taqlahom li Dios “naq taasutq’iiq wi’chik, ut taach’olob’anq jo’ profeet” (Helaman 13:3). Jo’ kixk’ul laj Samuel, chiqajunilo laa’o naqataweb’ li xaqxookil tz’ak sa’ “xkawresinkil xb’e li Qaawa’ ” (Helaman 14:9) ut sa’ xyalb’al qaq’e chixtaaqenkileb’ lix profeet. Ut jo’ laj Samuel, laa’o ajwi’ naqach’olob’ xyaalal li Jesukristo, “li taachalq chi yaal,” ut naqab’oq chixjunil “chixpaab’ankil lix k’ab’a’ ” (Helaman 13:6; 14:13). Moko chixjunil ta te’ab’inq, ut te’wanq ajwi’ li toohe’xka’pak’ali. A’b’anan, eb’ li neke’xpaab’ li esil a’in rik’in paab’aal chirix li Kristo neke’xtaw naq chi yaal a’an li “sahil esilal re nimla sahil ch’oolejil” (Helaman 16:14).
Li na’leb’ re xtzolb’aleb’ li loq’laj hu aajunes
Li Qaawa’ naxk’eheb’ tijom sa’ xtz’uumaleb’ reheb’ lix profeet.
Sa’eb’ li loq’laj hu, wan naq eb’ li profeet neke’juntaq’eetaman rik’ineb’ laj k’aak’alenel sa’ xb’een li xaxqookil tz’ak malaj najt xteramil kab’l, li neke’xye resil li xiwxiw (chi’ilmanq Isaias 62:6; Esekiel 33:1–7).
Li Awa’b’ej M. Russell Ballard kixk’ut: “Chalen chaq najter, eb’ li profeet ke’xb’aanu xk’anjel naq ke’xye reheb’ li tenamit li rahilal wan chiruheb’. Teneb’anb’ileb’ lix Apostol li Qaawa’ chirilb’aleb’, chixq’usb’aleb’, ut chixtenq’ankileb’ li ani yookeb’ chi patz’ok chirix li yu’am a’in” (“Li Dios naxjolomi li k’amok b’e,” Jolomil ch’utub’aj-ib’ re octubre 2015).
Naq nakatzol ut nakak’oxla Helaman 13, taaruuq taaweetaliheb’ li k’iila tijom kixk’e laj Samuel. Qayehaq, k’a’ru kixk’ut chirix li jalb’a-k’a’uxlej? chirix li tuulanil ut li b’ihomal? Chan ru naru te’k’anjelaq aawe li tijom a’in? K’a’ruheb’ li tijom toje’ k’eeb’ileb’ xb’aaneb’ li profeet sa’ li kutan a’in, ut k’a’ru nakaweek’a naq tento taab’aanu rik’ineb’ li tijom a’in?
Li profeet nokoxjayali rik’in li Jesukristo.
Li Qaawa’ naruxtaanaheb’ ru li neke’xjal xk’a’uxl.
Sa’ xtiklajik, laj Samuel kitaqlaak rik’ineb’ laj Nefita re xwotzb’al li sahil esilal chirix lix k’ulunik li Kolonel (chi’ilmanq Helaman 13:7). Xb’aan naq ke’xtz’eqtaana, a’an kisutq’i rik’in kawil tijomeb’ chirix lix raqb’a-aatin li Dios. A’b’anan, eb’ li tijom a’in junelik ke’chal rik’in jun b’oqom aj uxtaan naq te’xjal xk’a’uxl; sik’eb’ li b’oqom a’in sa’ Helaman 13–15 (chi’ilmanq Helaman 13:6, 11; 14:15–19; 15:7–8). Chan ru naq wankeb’ rilom li tijom a’in aawik’in? K’a’ru naqatzol sa’eb’ li raqal a’in chirix li jalb’a-k’a’uxlej? Jo’q’e xak’ul li ruxtaan li Dios li nachal rik’in li jalb’a-k’a’uxlej?
Eb’ li eetalil ut sachb’a-ch’oolej neke’ru chixkawob’resinkil lix paab’aaleb’ li ink’a’ neke’xkawob’resi raameb’.
Sa’ Helaman 14, laj Samuel kixch’olob’ naq li Qaawa’ kixk’e reetalil lix yo’lajik ut lix kamik li Kolonel re “naq texruuq chi paab’ank re lix k’ab’a’ ” (Helaman 14:12). Naq nakatzol Helaman 14, k’e reetaleb’ li reetalil lix yo’lajik li Kolonel sa’eb’ li raqal 1–8 ut eb’ li reetalil lix kamik sa’eb’ li raqal 20–28. K’a’ut nakak’oxla naq eb’ li eetalil a’in chaab’ileb’ re reetalinkil lix yo’lajik ut lix kamik li Jesukristo?
Ma naru nakak’oxla junaq chik li eetalil kixk’e li Qaawa’ re aatenq’ankil chixpaab’ankil a’an? Qayehaq, eb’ li profeet ke’xye chi rub’elaj naq te’wanq li eetalil li te’uxmanq rub’elaj li xkab’ xk’ulunik li Kolonel (chi’ilmanq “Reetalileb’ li kutan,” K’utul Raqal reheb’ li Loq’laj Hu). Ma ak xe’tz’aqob’resiik ru junjunq reheb’ li eetalil a’in sa’ li qakutan? Jalaneb’ chik li eetalil li neke’k’amok sa’ li paab’aal chirix li Jesukristo maare kok’eb’ ut k’eeb’ileb’ chi ch’inch’inq. K’oxla chiru junpaat chan ru aawilom li ruq’ li Jesukristo sa’ laa yu’am.
K’a’ru li tijom li k’eeb’il chirixeb’ li eetalil sa’ Helaman 16:13–23? K’a’ru naru taab’aanu re naq moko chanchanaqat ta li tenamit sa’eb’ li raqal a’in?
Chi’ilmanq ajwi’ Alma 30:43–52; Ronald A. Rasband, “Chi k’oxlanb’il xb’aan li Dios,” Jolomil ch’utub’aj-ib’ re octubre 2017.
Xtaaqenkil li na’leb’ naxk’e li profeet nikinxnach’ob’resi rik’in li Qaawa’.
Li Elder Neil L. Andersen kixk’ut: “Ink’eehom reetal naq wi nintzol rik’in tijok li raatin lix profeet li Dios, ut ninjayali chi us ut chi timil li rajom inch’ool rik’in lix musiq’anb’il k’utum, junelik naniman inpaab’aal chirix li Qaawa’ Jesukristo. Wi naqasik’ ru xkanab’ankil li raatin ut naqaye naq chaab’il chik naqanaw qajunes qib’, nalaj li qapaab’aal ut namoy ru li qilom chirix li junelik q’e kutan” (“Lix profeet li Dios,” Jolomil ch’utub’aj-ib’ re abril 2018). Chan ru naq eb’ li raatin ut eb’ lix b’aanuhomeb’ laj Nefita sa’ Helaman 16 neke’xk’ut xyaalalil li kixk’ut li Elder Andersen? K’a’ruheb’ li teneb’ank nakaweek’a naq tento taak’ul sa’ aab’een chirixeb’ lix profeet li Qaawa’ ut li raatineb’?
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Helaman 13:3–4
K’a’ru namusiq’aak wi’ laa junkab’al chirix li kixb’aanu laj Samuel rik’in lix taqlahom li Qaawa’ sa’ Helaman 13:3–4? Naq yookex chi tzolok jo’ junkab’al chiru li xamaan a’in, maare tatruuq chixwaklesinkil xch’ooleb’ li komon sa’ laa junkab’al re te’xwotz li musiq’anb’il na’leb’ li “na’ok sa’ xch’ooleb’.”
Helaman 13:38
Naab’aleb’ sa’ li qakutan neke’xk’oxla naq li sahil ch’oolejil naru taatawmanq “rik’in xb’aanunkil maa’usilal.” Chan ru naq xyu’aminkil li evangelio naxk’am chaq qe li tz’aqal sahil ch’oolejil?
Helaman 15:3
Chan ru nak’utman lix rahom li Dios naq a’an nokoxtij? B’oqeb’ li komon sa’ laa junkab’al chi patz’ok sa’ tuulanil re li Qaawa’ k’a’ru naru te’xb’aanu re te’chaab’ilo’q.
Helaman 15:5–8
K’a’ru naqatzol chirix li jalok ch’oolej rik’ineb’ laj Lamanita sa’eb’ li ch’ol a’in? Chan ru naru taqataaqe lix b’aanuhomeb’?
Helaman 16:1–3
Ma taawulaq raj chiru laj junkab’al xk’utb’esinkil li esil chirix laj Samuel aj Lamanita? Chirix rilb’al ru li esil, maare eb’ li komon sa’ li junkab’al taaruuq te’xk’e xhoonal li junjunq chi xaqliik sa’ xb’een jun li ch’unleb’aal ut chirilb’al ru junjunq reheb’ lix profeetil aatin laj Samuel naq lix komoneb’ chik neke’reek’asi rib’ chanchan naq yookeb’ chixkutinkil chi tzimaj ut chi pek. A’in taaruuq tixtenq’a laa junkab’al chixtawb’al ru chan ru naq maare ke’reek’a laj Samuel ut eb’ laj Nefita. Eb’ li kok’al toj ka’ch’ineb’ maare taawulaq chiruheb’ xyiib’ankileb’ jalam-uuch chirix li esil. Chan ru naru toowanq jo’ laj Samuel ut taqawotz li evangelio rik’ineb’ li qas qiitz’in us ta wan qaxiw?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Chasik’eb’ li eetalil neke’k’utun k’iila sut. Jun eetalil a’an jun k’uub’anb’il na’leb’ malaj k’utb’esink li naru taa’oksimanq jo’ aj k’amol b’e re xtz’aqob’resinkil ru k’a’ruhaq. Sa’eb’ li loq’laj hu, neke’qataw li eetalil li neke’xk’ut chan ru naq li Qaawa’ naxtz’aqob’resi ru lix k’anjel, jo’ xtaqlankileb’ lix moos re xtijb’aleb’ li tenamit.
© The Book of Mormon for Young Readers, Laj Samuel aj Lamanita, xb’aan li xBriana Shawcroft