“7–13 septiembre. 3 Nefi 1–7: “Taqsi aajolom ut chiwanq xsahil aach’ool,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“7–13 septiembre. 3 Nefi 1–7,” Kim, Taaqehin—Choq’ reheb’ li komon ut li junkab’al: 2020
Jun kutan, jun q’ojyin, ut jun kutan, xb’aan laj Jorge Cocco
7–13 septiembre
3 Nefi 1–7
“Taqsi aajolom ut chiwanq xsahil aach’ool”
Eb’ laj Nefita ke’rileb’ li sachb’a-ch’oolejil eetalil, a’b’an rik’in xnumikeb’ li kutan, ke’sach sa’ xch’ooleb’ li xnumsihomeb’ chaq (chi’ilmanq 3 Nefi 2:1). Xtz’iib’ankil li nakak’oxla tatxtenq’a re taajultiko’q aawe li nakak’ul sa’ musiq’ej naq yookat chi tzolok sa’ 3 Nefi 1–7.
Xtz’iib’ankil li nakak’oxla
Chi junpak’al, a’an chaq jun chaab’il hoonal re wank choq’ aj paab’anel chirix li Jesukristo. Yookeb’ chi tz’aqob’resiik ru k’iila profeetil aatin—eb’ li xninqal ru eetalil ut sachb’a-ch’oolej sa’ xyanqeb’ li tenamit ke’reetali naq moko najt ta chik xyo’lajik li Kolonel. A’b’anan chi junpak’al chik, a’an ajwi’ jun ch’a’ajkil kutan choq’ reheb’ laj paab’anel, xb’aan naq us ta ke’wan k’iila sachb’a-ch’oolej, eb’ li ink’a’ ke’paab’an yookeb’ chixyeeb’al naq “ak numenaq li kutan” re taayo’laaq li Kolonel (3 Nefi 1:5). Eb’ li kristiaan a’an “ke’xwaklesi nimla choqink chiru li ch’och’ ” (3 Nefi 1:7) ut ke’xxaqab’ ajwi’ jun kutan te’kamsiiq wi’ chixjunileb’ laj paab’anel wi ink’a’ taak’utmanq li eetalil yeeb’il jo’ profeet xb’aan laj Samuel aj Lamanita—naq taawan’q jun q’ojyin maak’a’aq wi’ li aak’ab’.
Sa’ li ch’a’ajkil kutan a’an, li profeet aj Nefi “ki’elajin chi anchal xmetz’ew chiru li Dios choq’ re lix tenamit” (3 Nefi 1:11). Lix sumehom li Qaawa’ naxwaklesi xch’ool yalaq ani narahob’tesiik malaj nawiib’an xch’ool ut naraj ru xnawab’al naq li saqen tixq’ax ru li q’ojyin: “Taqsi aajolom ut chiwanq xsahil aach’ool; … tintz’aqob’resi ru chixjunil li xintaqla chi yeemank rik’in xtz’uumaleb’ re lin santil profeet” (3 Nefi 1:13).
Li na’leb’ re xtzolb’aleb’ li loq’laj hu aajunes
Li Qaawa’ tixtz’aqob’resi chixjunil li raatin.
Chan raj ru kaweek’a wi ta xkomonateb’ chaq laj paab’anel sa’ li kutan yeeb’il resil sa’ 3 Nefi 1–7? Qayehaq, k’a’ raj ru kaweek’a wi ta yookat chiroyb’eninkil li q’ojyin chi maak’a’aq aak’ab’ li taareetali lix yo’lajik li Kolonel, rik’in xnawb’al naq tatkamsiiq wi ink’a’ taak’ulmanq? Naq nakawil ru 3 Nefi 1:4–21 ut 5:1–3, sik’ li ke’xb’aanu laj Nefi ut lix komoneb’ chik aj paab’anel re te’xk’uula xpaab’aaleb’ sa’eb’ li ch’a’ajkil kutan a’an. Chan ru kirosob’tesiheb’ li Qaawa’? K’a’ru nakatzol li naru tatxtenq’a naq yooqat chiroyb’eninkileb’ li osob’tesink yeechi’inb’ileb’ xb’aan li Qaawa’?
Naq neke’sach sa’ inch’ool eb’ li musiq’ejil numsihom xink’ul, k’a’jo’ wi’chik naq ninru chi aaleek xb’aan laj Satanas.
Maare nakak’oxla naq rilb’al li k’a’ru jwal sachol ch’oolej jo’ jun q’ojyin chi maak’a’ aak’ab’ taakanaaq aawik’in chiru k’iila chihab’ ut taawanq jo’ xaqleb’ choq’ re lix nawom aach’ool. A’b’an chirix xnumikeb’ li kutan, chanchan naq ke’sach sa’ xch’ooleb’ laj Nefita li eetalil ut li sachb’a-ch’oolej ke’rileb’ chaq. K’a’ru kixk’eheb’ chi sachk sa’ xch’ooleb’, ut k’a’ru kik’ulman rik’in naq ke’sach sa’ xch’ooleb’? (chi’ilmanq 3 Nefi 1:22; 2:1–3).
K’a’ru yookat chixb’aanunkil re xjultikankil ut x’ak’ob’resinkil lix nawom aach’ool chirixeb’ li musiq’ejil yaal? Qayehaq, k’oxlan chirix chan ru naq xtz’iib’ankil li nakak’ul sa’ musiq’ej naru tatxtenq’a. Chan ru taawotz lix nawom aach’ool rik’ineb’ laa komon nach’eb’ aawik’in re xtenq’ankileb’ chi paab’ank?
Chi’ilmanq ajwi’ Alma 5:6; Henry B. Eyring, “¡Oh recordad, recordad!,” Liahona, noviembre 2007, 66–69; Neil L. Andersen, “Li paab’aal ink’a’ yal nachal—nasik’man b’an ru,” Jolomil ch’utub’aj-ib’ re octubre 2015.
3 Nefi 2:11–12; 3:1–26; 5:24–26
Li Qaawa’ naxkawob’resiheb’ lix santil paab’anel chiru li k’a’ru xiwxiw sa’ musiq’ej.
Sa’ li qakutan, ink’a’ mas nokorahob’tesiik xb’aaneb’ muqmuukil molam chi aj elq’ li neke’xmin qu chi eelelik sa’ qochoch ut chixch’utub’ankil qib’ sa’ junaq na’ajej. A’b’an naqak’ul li xiwxiw sa’ musiq’ej, ut rik’in li k’a’ru ke’xk’ul laj Nefita, wan li na’leb’ li naru nokoxtenq’a laa’o. Sik’eb’ li na’leb’ a’an naq yookat chirilb’al ru 3 Nefi 2:11–12 ut 3:1–26.
Sa’ 3 Nefi 5:24–26 naqil ru resil lix ch’utub’ankileb’ lix tenamit li Qaawa’ sa’ roso’jikeb’ li kutan. K’a’ru neke’xk’ut li raqal a’an chirix chan ru yoo li Qaawa’ chixch’utub’ankileb’ lix tenamit anajwan?
Chi’ilmanq ajwi’ “Ch’utam choq’ reheb’ li saaj sa’ chixjunil li ruchich’och’: Li raatin li Awa’b’ej Russell M. Nelson ut li Hermana Wendy W. Nelson,” 3 junio, 2018, ChurchofJesusChrist.org; “Israel—Lix ch’utub’ankil Israel,” K’utul Raqal reheb’ li Loq’laj Hu.
Laa’in jun xtzolom li Jesukristo.
K’a’ru nakak’oxla naq naraj naxye li wank jo’ xtzolom li Jesukristo? (chi’ilmanq Tzol’leb’ ut Sumwank 41:5). Sa’ 3 Nefi 5:12–26, laj Mormon kixxaqab’ chiru junpaat xk’osb’al ruheb’ lix tz’iib’ahomeb’ laj Nefita ut kixye naq a’an jun xtzolom li Jesukristo. Chirix a’an, sa’ 3 Nefi 7:15–26, a’an kixch’olob’ lix k’anjel jun chik tzolom—li profeet aj Nefi. K’a’ru nakataw sa’eb’ li wiib’ raqal a’in li nakatxtenq’a chixtawb’al ru k’a’ru naraj naxye li wank jo’ xtzolom li Kristo?
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
3 Nefi 3:13–14, 25–26
K’a’ru ke’xb’aanu laj Nefita re xkolb’aleb’ rib’ chiru li xik’ neke’ilok reheb’? K’a’ru yooko chixb’aanunkil laa’o re xk’uub’ankil li qochoch jo’ jun kolb’a-ib’ na’ajej chiru li maa’usilal wan sa’ li ruchich’och’?
3 Nefi 2:1–3; 6:15–17
Re xtenq’ankil laa junkab’al chixtzolb’al chan ru naru tooxb’alaq’i laj Satanas, yiib’ xjalam-uuch jun li junxaqalil, ut naq nekeril ru 3 Nefi 2:1–3 ut 6:15–17 jo’ junkab’al, eetaliheb’ lix cha’al li junxaqalil naq yeeb’ileb’ resil. Jo’ chanru neke’xye li raqal a’in, k’a’ru naxb’aanu laj Satanas re qaaleenkil re taasachq sa’ qach’ool li Dios ut re toomaakob’q?
3 Nefi 4:7–12, 30–33
K’a’ru ke’xb’aanu laj Nefita naq ke’rileb’ chi chalk laj elq’ re laj Gadianton? K’a’ru naru taqatzol jo’ junkab’al rik’ineb’ laj Nefita naq naqak’ul li k’a’ru ch’a’aj? K’a’ru naru taqatzol rik’in li raatineb’ laj Nefita chirix naq li Qaawa’ kixtenq’aheb’ sa’ xhoonal lix ch’a’ajkilaleb’?
3 Nefi 5:13; Tzol’leb’ ut Sumwank 41:5
Ilomaq ru 3 Nefi 5:13 ut Tzol’leb’ ut Sumwank 41:5, ut aatinanqex chirix li k’a’ru naraj naxye wank jo’ xtzolom li Kristo. Maare eb’ li komon sa’ li junkab’al te’ruuq chi aatinak chirix jun hoonal naq xe’ril jun chik komon chi wank jo’ xtzolom li Kristo. Wi wankeb’ laa kok’al toj ka’ch’ineb’, taaruuq taayiib’ jun ch’ina eetalil li naxye, “Laa’in jun xtzolom li Jesukristo,” ut kanab’eb’ chixk’eeb’al li eetalil chiru xt’ikr naq nakak’e reetal naq yookeb’ chixtaaqenkil li Kolonel.
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Tenq’aheb’ laa junkab’al chixjuntaq’eetankileb’ li loq’laj hu rik’ineb’ a’an. Laj Nefi kixye, “Kinjuntaq’eeta chixjunileb’ li loq’laj hu qik’in, re naq taawanq choq’ re qachaab’ilal ut qatzolb’al” (1 Nefi 19:23). Re xtenq’ankil laa junkab’al chixjuntaq’eetankileb’ li loq’laj hu rik’ineb’ lix yu’am, taaruuq taak’e xb’oqb’aleb’ chi k’oxlak chirix li ke’xb’aanu raj wi ta ke’wan sa’ xyanqeb’ laj paab’anel li yeeb’ileb’ resil sa’ 3 Nefi 1:4–9. (Chi’ilmanq Li k’utuk jo’ li Kolonel, 21.)
Jun kutan, jun q’ojyin, ut jun kutan, xb’aan laj Walter Rane