“14–20 septiembre. 3 Nefi 8–11: “Waklinqex ut chalqex wik’in,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“14–20 septiembre. 3 Nefi 8–11,” Kim, Taaqehin—Choq’ reheb’ li komon ut li junkab’al: 2020
Laa’in lix saqen li ruchich’och’, xb’aan laj James Fullmer
14–20 septiembre
3 Nefi 8–11
“Waklinqex ut chalqex wik’in”
Sa’ 3 Nefi 8–11, eb’ li tenamit ke’rab’i lix yaab’ xkux li Dios chi aatinak rik’ineb’. Naq nakawileb’ ru li ch’ol a’in, k’e reetal li naxye lix yaab’ xkux aawe.
Xtz’iib’ankil li nakak’oxla
“Kʼehomaq reetal, laaʼin li Jesukristo, li keʼxchʼolobʼ chaq xyaalal li profeet naq taachalq saʼ li ruchichʼochʼ ” (3 Nefi 11:10). Rik’ineb’ li aatin a’an, li Kolonel li waklijenaq chi yo’yo kixk’ut rib’, ut kixtz’aqob’resiheb’ ru li proofetil aatin yeeb’il sa’ lix Hu laj Mormon chiru 600 chihab’. “Naq kixk’ut rib’ ut kixye li aatin a’an,” kixtz’iib’a li Elder Jeffrey R. Holland, “a’an li tz’aqal jayalihom, li xnimal ru hoonal, sa’ chixjunil li resilal lix Hu laj Mormon. A’an li k’utb’esihom ut li yehom li ke’xtaw wi’ xna’leb’eb’ ut ke’musiq’aak wi’ chixjunjunqaleb’ li profeet aj Nefita. … Chixjunileb’ ak ke’xye resil a’an, ke’b’ichan chirix a’an, ke’matk’ek chirix a’an, ut ke’tijok re naq tixk’ut rib’—ut aran kiwan chi yaal. K’a’jo’ xnimal ru li kutan a’an! Li Dios li naxjaltesi chixjunileb’ li aak’ab’ ruhil q’ojyin sa’ saqen ruhil eq’la, ak kik’ulun” (Christ and the New Covenant [1997], 250–51).
Li na’leb’ re xtzolb’aleb’ li loq’laj hu aajunes
Li Jesukristo a’an lix saqen li ruchich’och’.
Maare taak’e reetal naq eb’ li na’leb’ chirix li aak’ab’ ut li saqen—re tz’ejwalej jo’ ajwi’ re musiq’ej—yeeb’ileb’ resil chi k’iilasutinb’il sa’ 3 Nefi 8–11. K’a’ru nakatzol sa’eb’ li ch’ol a’in chirix li musiq’ejil aak’ab’ ut li musiq’ejil saqen? K’a’ru naxk’am chaq li aak’ab’ sa’ laa yu’am? K’a’ru naxk’am chaq li saqen? K’a’ut nakak’oxla naq li Kolonel kixsik’ ru xyeeb’al naq a’an “lix saqen ut lix yu’am li ruchich’och’ ”? (3 Nefi 9:18; 11:11). Chan ru naq li Jesukristo nawan jo’ jun saqen sa’ laa yu’am?
Wi ninjal ink’a’uxl, li Kolonel tinixch’utub’, tinixkol, ut tinixk’irtesi.
K’a’ru nakak’oxla naq ke’reek’a li kristiaan chirix xnumsinkil li sachk ut li aak’ab’ yeeb’il resil sa’ 3 Nefi 8? K’a’ru nakak’oxla naq ke’reek’a naq ke’rab’i lix yaab’ xkux li Kolonel chi aatinak chirix li saqen, li uxtaan, ut li tojok-ix sa’eb’ li ch’ol 9 ut 10?
Us ta kixye li Kolonel naq xb’aan xmaakeb’ li kristiaan ke’wan li xuwajel sachk a’an, kixyeechi’i naq tixk’irtesiheb’ li ani te’chalq rik’in a’an ut te’xjal xk’a’uxl (chi’ilmanq 3 Nefi 9:2, 13). Elder Neil L. Andersen kixye: “Jwal sachso inch’ool rik’ineb’ li ruq’ li Kolonel li te’q’alunq re li ani jalb’il xk’a’uxl rik’in uxtaan ut rahok, maak’a’ naxye xnimal xb’ach’b’ach’il li maak li kanab’anb’il. Ninch’olob’ xyaalal naq li Kolonel naru ut naraj xkuyb’al li qamaak” (“Arrepent[íos]… para que yo os sane,” Liahona, noviembre 2009, 40).
Sik’ sa’ 3 Nefi 9–10 reetalil li ruxtaan li Kristo ut li rajom chi kuyuk maak. Qayehaq, k’a’ru nakataw sa’ 3 Nefi 9:13–22 ut 10:1–6 li nakatxtenq’a chireek’ankil lix rahom ut li ruxtaan li Kolonel? K’oxlaheb’ li hoonal naq xaweek’a’ naq a’an “xatxch’utub’ ” ut “xatxch’olani” laa’at (chi’ilmanq 3 Nefi 10:4). K’oxla xtz’iib’ankil resileb’ li numsihom a’in sa’ jun diario malaj xwotzb’aleb’ rik’ineb’ laa komon raarookeb’ aab’aan.
Naru tintzol rab’inkil ut xtawb’al ru lix yaab’ xkux li Dios.
Ma xaweek’a jun sutaq naq ch’a’aj chawu xtawb’al ru jun esil li yoo chixyeeb’al aawe li Dios? Maare li ke’xk’ul li kristiaan sa’ 3 Nefi 11:1–8 naru tatxtenq’a chixtawb’al ru junjunq na’leb’ chirix rab’inkil ut xtawb’al ru lix yaab’ xkux li Dios. Taaruuq taak’e reetal chan ru lix yaab’ xkux li Dios li ke’rab’i li kristiaan ut li k’a’ru ke’xb’aanu re xtawb’al ru chi chaab’il. Chan raj ru naru taak’anjelaq aawe li esil a’in naq laa’at nakayal aaq’e chirab’inkil ut chixk’eeb’al reetal lix yaab’ xkux li Dios sa’ laa yu’am rik’in li na’leb’ k’utb’esinb’il chawu?
Li Jesukristo nikinxb’oq chixk’ulb’al injunes xnawom inch’ool chirix a’an.
Ke’wan tana’ 2,500 kristiaan ch’utch’uukeb’ chaq aran Naab’alil naq kixk’ut rib’ li Jesukristo (chi’ilmanq 3 Nefi 17:25). Us ta k’iheb’ li tenamit, li Kolonel kixkanab’ “li junjunq” chixch’e’b’al xk’ob’olal li klawx sa’ ruq’ ut sa’ roq (3 Nefi 11:14–15). K’a’ru naxk’ut a’in chawu chirix lix aajelil ru xnumsinkil aajunes aawib’ li k’a’ru naxnimob’resi laa paab’aal chirix li Jesukristo? Chan ru nakatxb’oq li Kolonel chi “wakliik ut chi chalk rik’in a’an”? (3 Nefi 11:14). K’a’ru aanumsihom li xatxtenq’a chixk’ulb’al xnawom aach’ool naq a’an aj Kolol aawe? Maare taak’oxla ajwi’ chan ru lix b’aanuhom li Kolonel sa’eb’ li raqal a’in te’ruuq chamusiq’ankil sa’ xyalb’al aaqe’ chirilb’aleb’ laa komon.
Chi junjunqil, xb’aan laj Walter Rane
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
3 Nefi 8–9
Re xtenq’ankil laa junkab’al chixtawb’al ru li k’a’ru yeeb’il resil sa’ 3 Nefi 8–9, taaruuq taaye resileb’ li ch’ol a’in, malaj taanumsi li aatin chapb’il chiru ch’iich’ sa’ jun na’ajej q’ojyin ru. Aatinanqex chirix chan raj ru li wank sa’ aak’ab’ chiru oxib’ kutan. Chirix a’an texruuq chi aatinak chirix chan ru naq li Jesukristo a’an “lix saqen … li ruchich’och’ ” (3 Nefi 9:18).
3 Nefi 10:1–6
Jun xjalam-uuch jun li xan kaxlan li yoo chixch’utub’ankileb’ li kok’ kaxlan rub’el xxik’ naru taatenq’anq reheb’ li kok’al chixtawb’al ru chan ru li Kolonel ut k’a’ru lix k’anjel. Taaruuq taawileb’ ru li raqal a’in naq laa junkab’al yookeb’ chirilb’al jun xjalam-uuch li xan kaxlan ut lix kok’ kaxlan. K’a’ut naq jun xan kaxlan naxch’utub’eb’ lix kok’ kaxlan? K’a’ut naq li Kolonel naraj qach’utub’ankil chi nach’ rik’in? K’a’ru naru nak’ulman wi jun ch’ina kaxlan tixsik’ ru naq ink’a’ taach’utlaaq naq b’oqb’il?
3 Nefi 11:1–7
Maare taaruuq taawil ru junjunq reheb’ li raqal a’in chi “ka’ch’in xyaab’ aakux” (3 Nefi 11:3). K’a’ru tento ke’xb’aanu li kristiaan re xtawb’al ru li xyaab’ kuxej kichal chaq sa’ choxa? K’a’ru naqatzol rik’in li k’a’ru ke’xk’ul?
3 Nefi 11:21–38
Ma wan anihaq sa’ laa junkab’al li yoo chixkawresinkil rib’ choq’ re li kub’iha’? Rilb’al ru 3 Nefi 11:21–38 taaruuq tixtenq’aheb’ chixkawresinkil rib’. Chan ru naq xk’oxlankileb’ lix k’utum li Kolonel sa’eb’ li raqal a’in taaruuq tixtenq’aheb’ li komon sa’ li junkab’al li ak kub’enaqeb’ xha’?
3 Nefi 11:29–30
K’a’ru neke’xk’ut li raqal a’in chirix li wech’ok-ib’? K’a’ru naru taqab’aanu re “xk’eeb’al xraqik” li wech’ok-ib’ sa’ li qochoch? (3 Nefi 11:30).
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Xtz’iib’ankil li na’leb’ nakak’ul. Elder Richard G. Scott kixye, “Li na’leb’ tz’iib’anb’il a’an li na’leb’ naru taa’oksimanq sa’ jun hoonal naq na’ajman ru. … [Xtz’iib’ankil li nakak’ul sa’ musiq’ej] naxk’e chi uxmank naq taak’ul xkomon chik li saqen (“Como Adquirir Conocimiento Espiritual,” Liahona, enero 1994, 103).
Jun aj Ilol karneer, xb’aan laj Howard Lyon