1 Anajwan ut k’ehomaq reetal, kik’ulman naq chixjunileb’ li wankeb’ sa’ li ch’och’ ke’rab’i li yehom a’in, ut ke’xk’e reetal. Ut chirix li yehom a’in kiwan li ch’anch’ookilal sa’ li ch’och’ chiru xnumik k’iila hoonal;

2 Xb’aan naq k’a’jo’ xnimal xsachikeb’ xch’ool li tenamit, jo’kan naq ke’xkanab’ yaab’ak ut ayaynak xb’aan xsachikeb’ li rech alaleb’ li ke’kamsiik chaq; jo’kan naq kiwan li ch’anch’ookilal sa’ chixjunil li ch’och’ chiru xnumik k’iila hoonal.

3 Ut kik’ulman naq kichal wi’chik jun xyaab’ kuxej rik’ineb’ li tenamit, ut chixjunileb’ li tenamit ke’ab’in, ut ke’xk’e reetal, ut kixye:

4 Aay, laa’ex li kexwan sa’eb’ li ninqi tenamit a’in li ke’t’ane’, li ralal xk’ajol laj Jakob, relik chi yaal, li wankex sa’ lix junkab’al laj Israel, k’a’jo’ naq kok’ aj xsa’ kexinch’utub’ jo’ jun xan kaxlan naxch’utub’eb’ lix kok’ kaxlan rub’el xxik’, ut kexinch’olani.

5 Ut jo’kan wi’chik, k’a’jo’ naq kok’ aj xsa’ kexinch’utub’ raj jo’ jun xan kaxlan naxch’utub’eb’ lix kok’ kaxlan rub’el xxik’, relik chi yaal, ex tenamit re lix junkab’al laj Israel, li kext’ane’; relik chi yaal, ex tenamit re lix junkab’al laj Israel, laa’ex li nekexwan chaq Jerusalen, jo’ ajwi’ laa’ex li t’anenaqex; relik chi yaal, k’a’jo’ naq kok’ aj xsa’ kexinch’utub’ raj jo’ jun xan kaxlan naxch’utub’eb’ lix kok’ kaxlan, ut ink’a’ keraj.

6 Ex xjunkab’al laj Israel li kinkol eeyu’am, k’a’jo’ naq kok’ aj xsa’ texinch’utub’ jo’ jun xan kaxlan naxch’utub’eb’ lix kok’ kaxlan rub’el xxik’, wi teejal eek’a’uxl ut texsutq’iiq wik’in chi anchal li rajom eech’ool.

7 Wi b’an ink’a’, ex xjunkab’al laj Israel, lix na’ajeb’ eerochoch te’kanaaq chi sachenaq toj reetal naq tixtaw xq’ehil xtz’aqob’resinkil ru li sumwank rik’ineb’ lee yuwa’.

8 Anajwan ut kik’ulman naq chirix naq ke’rab’i li tenamit li aatin a’in, k’ehomaq reetal, ke’ok wi’chik chi yaab’ak ut chi ayaynak xb’aan xsachikeb’ li rech alaleb’ ut li rochb’eeneb’.

9 Ut kik’ulman naq chi jo’kan ke’nume’ li oxib’ chi kutan. Ut kiwan chi eq’la, ut li aak’ab’ ki’oso’ chaq chixb’een li ch’och’, ut li ch’och’ kixkanab’ chiq’chotk, ut li pek kixkanab’ jache’k, ut kiraqe’ li xuwajel aakanak, ut ki’oso’ chixjunil li kawil eek’ank.

10 Ut li ch’och’ kixjunaji wi’chik rib’, jo’kan naq kikana chi xaqxo; ut ki’oso’ li raho’k ch’oolej, ut li yaab’ak, ut li ayaynak reheb’ li tenamit li ke’kole’ chaq xyu’am; ut lix rahileb’ xch’ool kixsutq’isi rib’ choq’ sahil ch’oolejil, ut lix yaab’ahomeb’ choq’ xnimankil ru ut b’antioxink chiru li Qaawa’ Jesukristo, laj Tojoleb’ rix.

11 Ut toj aran kitz’aqlok ru li loq’laj hu li yeeb’il chaq xb’aaneb’ li profeet.

12 Ut a’an li jun raqal tiik wi’chik xch’ool re li tenamit li ke’kole’, ut a’aneb’ li ke’k’uluk chaq reheb’ li profeet ut ink’a’ ke’xkutiheb’ chi pek; ut a’aneb’ li moko ke’xhoy ta xkik’eleb’ laj santil paab’anel, li ke’kole’ xyu’am—

13 Ut eb’ a’an ke’kole’ xyu’am ut ink’a’ ke’sub’e’ ut ke’muqe’ sa’ li ch’och’; ut ink’a’ ke’ok chi ha’ sa’ xchamal li palaw; ut ink’a’ ke’k’ate’ xb’aan xam, chi moko ki’uq’e’ sa’ xb’eeneb’ re ke’kamsiik chi tenb’il; ut ink’a’ ke’k’ame’ sa’ li sut iq’; chi moko kinumta chaq sa’ xb’eeneb’ lix b’ook li sib’ ut li aak’ab’.

14 Anajwan ut, ani na’ilok ru li aatin, chixtawaq ru; ani wan rik’in li loq’laj hu, chixtz’ilaqeb’ rix, ut chirilaq ut chixk’ehaq reetal chixjunil li kamk a’in ut li sache’k xb’aan xam, ut xb’aan sib’, ut xb’aan kaq-sut-iq’, ut xb’aan sut iq’, ut xb’aan xtehelal li ch’och’ re xk’ulb’aleb’, ut chixjunil li k’a’aq re ru a’in, ma ink’a’ tab’i’ wan chixtz’aqob’resinkil ru lix profeetil aatineb’ naab’al li santil profeet.

15 K’ehomaq reetal, ninye eere, Yaal, naab’al ke’xch’olob’ xyaalal li k’a’aq re ru a’in sa’ xk’ulunik li Kristo, ut ke’kamsiik xb’aan naq ke’xch’olob’ xyaalal li k’a’aq re ru a’in.

16 Relik chi yaal, li profeet aj Tzenos kixch’olob’ xyaalal li k’a’aq re ru a’in, ut jo’kan ajwi’ laj Tzenok ki’aatinak chirix li k’a’aq re ru a’in, xb’aan naq ke’xch’olob’ tz’aqal xyaalal chiqix laa’o, li wanko choq’ rela’ li riyajileb’.

17 K’ehomaq reetal, li qayuwa’ aj Jakob kixch’olob’ ajwi’ chirix jun rela’ li riyajil laj Jose. Ut k’ehomaq reetal, ma maawa’o tab’i’ jun rela’ li riyajil laj Jose? Ut li k’a’aq re ru a’in li naxch’olob’ xyaalal chiqix, ma ink’a’ tab’i’ tz’iib’anb’il chiruheb’ li perel ch’iich’ bronce li kixk’am chaq Jerusalen laj Lehi li qayuwa’?

18 Ut kik’ulman naq sa’ xraqik li xkaalaju xka’k’aal chihab’, k’ehomaq reetal, tink’ut cheru naq eb’ lix tenamit laj Nefi li ke’kole’ xyu’am, ut jo’kan ajwi’ eb’ laj Lamanita jo’ yeeb’il chaq reheb’, li ke’kole’ chaq xyu’am, ke’wan ninqi usilal li kik’ute’ chiruheb’, ut ninqi osob’tesink li kihoye’ sa’ xb’een xjolomeb’, jo’kan naq moko najt ta chirix xtaqik li Kristo sa’ choxa, a’an kixk’utb’esi rib’ chi yaal chiruheb’—

19 Ut kixk’ut lix tib’el chiruheb’, ut kik’anjelak chiruheb’; ut chirix a’in taak’eemanq resilal lix k’anjel. Jo’kan naq toj arin nink’e xraqik lin yehom.