1 Ut naq yoo chi nach’ok chaq xraqik li xwaqxaqlaju chihab’, kik’ulman naq eb’ li teep a’an aj pleet reheb’ laj elq’ ak ke’xkawresi rib’ choq’ re li pleet, ut ke’ok chi kub’eek chaq ut chi elk chaq sa’eb’ li b’ool, ut sa’eb’ li tzuul, ut sa’ li yamyookil ch’och’, ut lix kawil na’ajeb’, ut lix muqmuukil na’ajeb’, ut chireechaninkileb’ li jar siir chi ch’och’, li wankeb’ sa’ li ch’och’ sa’ xtz’e li saq’e ut li wankeb’ sa’ li ch’och’ sa’ xnim, ut ke’ok chireechaninkil chixjunileb’ li ch’och’ li kanab’anb’il xb’aaneb’ laj Nefita, ut eb’ li tenamit li ke’kanab’aak chaq chi yamyo.

2 A’b’an k’ehomaq reetal, maak’a’ li k’iche’ xul, chi moko yoleb’aal xul sa’eb’ li ch’och’ li kanab’anb’il xb’aaneb’ laj Nefita, ut maak’a’ li xul re te’xyo laj elq’, ka’ajwi’ sa’ li yamyookil ch’och’.

3 Ut eb’ laj elq’ ink’a’ ke’ru chi wank, ka’ajwi’ sa’ li yamyookil ch’och’, xb’aan naq maak’a’ li tzakemq, xb’aan naq eb’ laj Nefita ke’xkanab’ li ch’och’ chi sachso, ut ke’xch’utub’ chaq chixjunil lix ketomq ut lix teep chi xul ut chixjunil li k’a’ru reheb’, ut ke’wan sa’ junaj chi ch’utam.

4 Jo’kan ut, moko kiru ta chiruheb’ laj elq’ poqlenk ut xtawb’al xtzakemq, ka’ajwi’ wi te’xpleetiheb’ laj Nefita chi k’utk’u, ut rik’in naq eb’ laj Nefita wankeb’ sa’ junaj chi ch’utam, ut k’a’jo’ xnimal rajlankileb’, ut ke’xk’uula choq’ reheb’ li tzakemq, ut li kawaay ut wakax, ut li jar paay chi ketomq wan, re te’wanq xyu’am chiru xnumik wuqub’ chihab’, ut chiru a’ chihab’ a’an ke’xyo’oni xsachb’aleb’ chaq laj elq’ chiru lix b’een li ch’och’; chi jo’kan ut kinume’ li xwaqxaqlaju chihab’.

5 Ut kik’ulman naq sa’ li xb’elelaju chihab’ laj Giddianhi kixtaw naq aajel ru naq taaxik chixpleetinkileb’ laj Nefita, xb’aan naq maak’a’ chan ru naq te’kanaaq chi yo’yo, ka’ajwi’ rik’in poqlenk ut elq’ak ut kamsink.

6 Ut moko neke’chal ta xch’ool xjek’inkil rib’ chiru lix b’een li ch’och’ re te’ruuq chirawb’al li iyaj nak’uxman, maare anchal te’chalq laj Nefita sa’ xb’eeneb’ ut te’xkamsiheb’; jo’kan naq laj Giddianhi kixk’e xtaqlankileb’ lix teep aj pleet naq sa’ li chihab’ a’in toxe’taqe’q chixpleetinkileb’ laj Nefita.

7 Ut kik’ulman naq kole’taqe’q chi pleetik; ut kiwan sa’ li xwaq po, ut k’ehomaq reetal, nim ut xuwajel li kutan naq ke’taqe’ chaq chi pleetik; ut tiqtookeb’ jo’ chanru eb’ laj elq’; ut lanb’il lix yiitoqeb’ rik’in xtz’uumal karneer, ut b’onb’ileb’ rik’in kik’, ut joob’il xjolomeb’, ut wan xramb’al jolomeb’; ut nim ut xuwajel neke’k’utun li teep aj pleet re laj Giddianhi, xb’aan lix kolb’a-ib’ aq’ej, ut xb’aan naq b’onb’ileb’ rik’in kik’.

8 Ut kik’ulman naq eb’ li teep aj pleet reheb’ laj Nefita, naq ke’ril chanru neke’k’utun li teep aj pleet re laj Giddianhi, ke’t’ane’ chi ch’och’ chixjunileb’, ut ke’xtaqsi relajihomeb’ chiru li Qaawa’ lix Dios, re naq a’an tixkoleb’ xyu’am ut tixkoleb’ chaq sa’ ruq’eb’ li xik’ neke’ilok reheb’.

9 Ut naq ke’ril a’in li jar teep aj pleet re laj Giddianhi, ke’ok chixjapb’al re chi kaw xyaab’eb’ xkux, xb’aan xsahileb’ xch’ool, xb’aan naq ke’xk’oxla naq eb’ laj Nefita ke’t’ane’ chaq rik’in xiw xb’aan xnimaleb’ xxiw chiruheb’ lix teepeb’ aj pleet.

10 A’b’an sa’ li na’leb’ a’in ke’sach li rajomeb’, xb’aan naq eb’ laj Nefita ink’a’ neke’xxuwaheb’; neke’xxuwa b’an lix Dios ut ke’xtz’aama chiru a’an naq tixkoleb’ rix; jo’kan ut, naq eb’ li teep aj pleet re laj Giddianhi ke’chal sa’ xb’eeneb’ sa’ aanil, ak kawresinb’ileb’ chixk’ulb’aleb’; relik chi yaal, rik’in xmetz’ew li Qaawa’ ke’xk’uleb’.

11 Ut kitikla li pleet sa’ li xwaq po a’in; ut nim ut xuwajel li pleet ki’uxman, relik chi yaal, nim ut xuwajel li kamsink ki’uxman, jo’kan naq maajun wa chaq nawb’il xkomon li nimla kamsink sa’ xyanqeb’ chixjunil lix tenamit laj Lehi chalen chaq naq ki’el chaq Jerusalen.

12 Ut us ta kixyeechi’i chaq rahilal ut kixxaqab’ chaq aatin laj Giddianhi, k’ehomaq reetal, eb’ laj Nefita ke’xq’axeb’ ru, jo’kan naq ke’eelelik chaq chiruheb’.

13 Ut kik’ulman naq laj Gidgiddoni kixtaqlaheb’ lix teep aj pleet naq te’xtaaqeheb’ toj sa’ xnub’aal li yamyookil ch’och’, ut naq moko te’xkol ta xyu’am li ani te’t’ane’q sa’ ruq’eb’ chiru li b’e, ut chi jo’kan ke’xtaaqeheb’ ut ke’xkamsiheb’, toj sa’ xnub’aal li yamyookil ch’och’, toj reetal ajwi’ naq ke’xtz’aqob’resi ru lix taqlahom laj Gidgiddoni.

14 Ut kik’ulman naq laj Giddianhi, li kixxaqab’ chaq rib’ ut kipleetik chaq rik’in kawil ch’oolej, kitaaqeek naq ki’eelelik, ut rik’in naq lub’lu xb’aan xnimal li pleetik kixb’aanu, kitawe’ ut kikamsiik. Ut jo’ka’in roso’jik laj Giddianhi laj elq’.

15 Ut kik’ulman naq eb’ li teep aj pleet reheb’ laj Nefita ke’sutq’i wi’chik sa’ li na’ajej neke’xkol wi’ rib’. Ut kik’ulman naq kinume’ li xb’elelaju chihab’ a’in, ut eb’ laj elq’ ink’a’ chik ke’chal chi pleetik, chi moko ke’chal sa’ li xjunmay chihab’.

16 Ut sa’ li xjun xka’k’aal chihab’ ink’a’ kole’taqe’q chi pleetik, a’ut ke’taqe’ chi sutsu chirixeb’ re xramb’al xsutam lix tenamit laj Nefi; xb’aan naq ke’xk’oxla naq wi te’xram chiru lix tenamit laj Nefi lix ch’och’eb’, ut te’xtz’apeb’ chi sutsu chirixeb’, ut wi te’xrameb’ chi elk chaq, naq taaruuq te’xk’e chixq’axtesiheb’ rib’ jo’ chanru li neke’raj.

17 Anajwan ke’xxaqab’ chaq jun chik aj jolominel choq’ reheb’, a’an aj Tzemnarihah xk’ab’a’; jo’kan naq a’an laj Tzemnarihah li kixtaqla naq taa’uxq xramb’aleb’ chi sutsu.

18 A’b’anan k’ehomaq reetal, ke’xk’ul xkawilal laj Nefita rik’in a’in, xb’aan naq moko kiru ta chiruheb’ laj elq’ xramb’aleb’ chiru xk’ihal li chihab’ taa’ajmanq re xrahob’tesinkileb’ laj Nefita, xb’aan xk’ihal li k’a’ru nak’anjelak reheb’ li ke’xk’uula chaq,

19 Ut xb’aan naq moko k’i ta li taak’anjelaq reheb’ laj elq’; xb’aan naq k’ehomaq reetal, eb’ a’an maak’a’ wan reheb’, ka’ajwi’ li tib’ re te’wanq chi yo’yo, ut neke’xtaw li tib’ a’an sa’ li yamyookil ch’och’.

20 Ut kik’ulman naq ki’ok chi lajk li yoleb’aal xul sa’ li yamyookil ch’och’, jo’kan naq eb’ laj elq’ okeb’ re chi kamk xb’aan xtz’okajikeb’.

21 Ut eb’ laj Nefita rajlal yookeb’ chi elk chi kutan ut chi q’eq, ut chi t’ane’k sa’ xb’eeneb’ lix teepeb’ aj pleet, ut chixsachb’aleb’ chi mil ut chi lajetq mil.

22 Ut chi jo’kan ki’ok choq’ rajom lix tenamit laj Tzemnarihah risinkil rib’ sa’ li na’leb’ ke’xk’oxla chaq, xb’aan li nimla sache’k li kichal sa’ xb’eeneb’ chi q’eq ut chi kutan.

23 Ut kik’ulman naq laj Tzemnarihah kixtaqla reheb’ lix tenamit naq te’risi chaq rib’ sa’ xramb’al rix li tenamit, ut te’b’eeq toj sa’ li jar raqal re li ch’och’ sa’ xjayal lix nim li saq’e li q’axal najt wan.

24 Ut anajwan, laj Gidgiddoni, rik’in naq naxnaw lix k’oxlahomeb’, ut naxnaw chirix xq’unaleb’ xmetz’ew xb’aan naq maak’a’eb’ xtzakemq, ut xb’aan li nimla kamsiik li ki’ux chaq sa’ xyanqeb’, jo’kan naq kixtaqlaheb’ lix teep aj pleet chiru q’ojyin, ut kixram li b’e te’sutq’iiq wi’, ut kixk’ojob’ lix teep aj pleet sa’ li b’e te’sutq’iiq wi’.

25 Ut a’in ke’xb’aanu chiru q’ojyin, ut ke’wulak sa’ xb’eenikeb’ toj chirixeb’ laj elq’, jo’kan naq wulajaq chik, naq eb’ laj elq’ ke’xtikib’ xb’eenikeb’, ke’k’ule’ xb’aaneb’ li teep aj pleet reheb’ laj Nefita, chiruheb’ jo’ ajwi’ chirixeb’.

26 Ut eb’ laj elq’ sa’ xtz’e li saq’e ke’rame’ ajwi’ chiruheb’ chixjunil li na’ajej neke’xkol wi’ rib’. Ut chixjunil li k’a’aq re ru a’in kib’aanuman chi taqlanb’il xb’aan laj Gidgiddoni.

27 Ut ke’wan k’iila mil li ke’xq’axtesi rib’ choq’ preex chiruheb’ laj Nefita, ut li rela’ ke’kamsiik.

28 Ut laj jolominel reheb’, aj Tzemnarihah, kichape’ ut kit’uyub’aak chaq sa’ jun xtoonal li che’, relik chi yaal, kit’uyub’aak chaq sa’ xb’een a’an toj reetal naq kamenaq. Ut chirix naq ke’xt’uyub’ toj reetal naq kamenaq ke’xt’an li che’ chi ch’och’, ut ke’xjap re chi kaw xyaab’eb’ xkux, ut ke’xye:

29 Li Qaawa’ chixkolaq rix lix tenamit sa’ tiikilal ut sa’ santil ch’oolejil, re naq te’xk’e chi t’anliik chi ch’och’ chixjunil li te’sik’oq re xkamsinkileb’ xb’aan li wankilal ut li muqmuukil molam, jo’ chanru ajwi’ naq kit’anliik chi ch’och’ li winq a’in.

30 Ut ke’saho’ xch’ool ut ke’xjap wi’chik re chi junajeb’ xyaab’ xkux chixyeeb’al: Lix Dios laj Abraham, ut lix Dios laj Isaak, ut lix Dios laj Jakob chixkolaq rix li tenamit a’in sa’ tiikilal, chiru jo’ najtil te’xpatz’ xk’ab’a’ lix Dios re xkolb’aleb’ rix.

31 Ut kik’ulman naq ke’xjap re sa’ jun japojikeb’ re, re b’ichank ut xnimankil ru li Dios xb’aan xnimal li k’a’ru kixb’aanu chaq choq’ reheb’, naq kixkoleb’ chiru t’ane’k sa’ ruq’eb’ li xik’ neke’ilok reheb’.

32 Relik chi yaal, ke’xjap re chixyeeb’al: Hosanna re li Dios Q’axal Taqenaq. Ut ke’xjap re chixyeeb’al: Osob’tesinb’ilaq taxaq xk’ab’a’ li Qaawa’ Dios Nimajwal, li Dios Q’axal Taqenaq.

33 Ut ke’niman xch’ool xb’aan xsahil, toj reetal naq kib’ut’un xk’ihal xya’aleb’ ru, xb’aan xnimal lix chaab’ilal li Dios naq kixkoleb’ chaq sa’ ruq’eb’ li xik’ neke’ilok reheb’; ut ke’xnaw naq a’ xb’aan naq jalb’ileb’ xk’a’uxl ut tuulaneb’ xch’ool naq ke’kole’ chaq chiru jun li sache’k li junelik taakanaaq.