“21–27 septiembre. 3 Nefi 12–16: “Laa’in li chaq’rab’, ut li saqen,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“21–27 septiembre. 3 Nefi 12–16,” Kim, Taaqehin—Choq’ reheb’ li komon ut li junkab’al: 2019
Rox Nefi: Li kab’laju a’in li keb’insik’ chaq ru, xb’aan laj Gary L. Kapp
21–27 septiembre
3 Nefi 12–16
“Laa’in li chaq’rab’, ut li saqen”
Wankeb’ naab’al li na’leb’ neke’tawman sa’ 3 Nefi 12–16. Junjunq reheb’ eetalinb’ileb’ sa’ li tusleb’ aatin a’in, a’ut maare taataw xkomoneb’ chik. Kanab’ naq li qaChoxahil Yuwa’, rik’in lix Musiq’, tixk’ut chawu li aajel ru choq’ aawe anajwan.
Xtz’iib’ankil li nakak’oxla
Jo’eb’ lix tzolom li Jesus li ke’ch’utla sa’ li tzuul aran Galilea, eb’ li ke’xch’utub’ rib’ sa’ li santil ochoch aran Naab’alil ke’xpaab’ lix chaq’rab’ laj Moises. Ke’xtaaqe xb’aan naq kixjayali li raameb’ rik’in li Kristo (chi’ilmanq Jakob 4:5), ut anajwan xaqxo li Jesukristo chiruheb’, yoo chixyeeb’al resil jun chaq’rab’ taqenaq wi’chik chiru a’an. A’ut, laa’o li maajun wa koowan rub’el lix chaq’rab’ laj Moises toj naru taqak’e reetal naq li chaq’rab’ kixk’e li Jesus reheb’ lix tzolom a’an jun chaq’rab’ jwal taqenaq wi’chik chiru a’an. “Nawaj raj naq tz’aqalaq eere eeru,” kixye (3 Nefi 12:48). Wi nakaweek’a naq moko tz’aqal ta aawe aawu, chijultiko’q aawe naq li Jesus kixye ajwi’, “Osob’tesinb’ileb’ li neb’a’eb’ sa’ musiq’ej li neke’chal wik’in, xb’aan naq reheb’ a’an li awa’b’ejihom re choxa” (3 Nefi 12:3). Li taqenaqil chaq’rab’ a’in, a’an jun b’oqok—sa’ jalan chik aatin yoo chixyeeb’al “Chalqex wik’in ut chexkole’q” (3 Nefi 12:20). Jo’ lix chaq’rab’ laj Moises, li chaq’rab’ a’in nokoxjayali rik’in li Kristo—li junaj li naru tooxkol ut tixtz’aqob’resi qu. “Kʼehomaq reetal,” chan, “Laaʼin li chaqʼrabʼ, ut li saqen. Chexʼiloq wankin wiʼ laaʼin, ut chexkuyuq toj saʼ rosoʼjik, ut taawanq eeyuʼam” (3 Nefi 15:9).
Li na’leb’ re xtzolb’aleb’ li loq’laj hu aajunes
Eb’ li raatin li Kolonel neke’xk’ut chiwu chan ru wank jo’ tz’aqal tzolom.
Wankeb’ naab’al li yaal, li na’leb’ k’eeb’il, ut li tijom sa’ 3 Nefi 12–14. Wahe’ jun na’leb’ re xtzolb’al ut xyu’aminkil li kixk’ut li Kolonel sa’eb’ li ch’ol a’in: Sik’ jun ch’uut chi raqal, ut k’e aach’ool chixk’osb’al ru li nak’utman sa’eb’ li raqal sa’ jun ajwi’ li ch’ol aatin li natikla rik’in “Eb’ lix tz’aqal tzolom li Jesukristo …” Qayehaq, naru naq jun xk’osb’al ru 3 Nefi 14:1–5 a’an “Eb’ lix tz’aqal tzolom li Jesukristo ink’a’ neke’raqok aatin.” Maare taawaj xsik’b’al ru jun raqal sa’eb’ li ch’ol a’in li jwal naxtoch’ aach’ool ut taakanab’ sa’ laa k’a’uxl malaj taatz’iib’a ut taak’e sa’ jun na’ajej taawil chi kok’ aj xsa’. K’oxla chan ru naru taayu’ami li nakatzol sa’ lix yalb’al aaq’e chi chaab’ilo’k jo’ xtzolom li Jesukristo.
Chi’ilmanq ajwi’ Mateo 5–7; Lukas 6:20–49.
3 Nefi 12:1–2; 15:23–24; 16:1–6
Osob’tesinb’ileb’ li neke’paab’an chi ink’a’ neke’ril.
Naq naqak’oxla chixjunileb’ li ralal xk’ajol li Dios, moko k’iheb’ ta li rilomeb’ li Kolonel ut rab’ihomeb’ lix yaab’ xkux, jo’ ke’xb’aanu li tenamit aran Naab’alil. Lix k’ihaleb’ qe chanchano b’an li tenamit yeeb’il resil sa’ 3 Nefi 12:2; 15:23; ut 16:4–6. K’a’ruheb’ li yeechi’ihom li k’eeb’il reheb’ li kristiaan sa’eb’ li raqal a’in? Chan ru xe’tz’aqob’resiik ru li yeechi’ihom a’in sa’ laa yu’am?
Chi’ilmanq ajwi’ Jwan 20:26–29; 2 Nefi 26:12–13; Alma 32:16–18.
3 Nefi 12:21–30; 13:1–8, 16–18; 14:21–23
Moko tz’aqal ta li tiikil b’aanuhom; tento ajwi’ naq saqaq ru lin ch’ool.
Jun na’leb’ maare taawil sa’eb’ li ch’ol a’in, a’an lix b’oqom li Kolonel re xyu’aminkil jun chaq’rab’ taqenaq wi’chik—naq ink’a’ ka’ajwi’ tiikeb’ ru li qab’aanuhom, tiik aj b’an wi’ li qach’ool. Sik’ li na’leb’ a’in naq li Kolonel na’aatinak chirix li wech’ok-ib’ (3 Nefi 12:21–26), li muxuk sumsu (3 Nefi 12:27–30), li tijok (3 Nefi 13:5–8), ut li kuyuk sa’ (3 Nefi 13:16–18). K’a’ chik ru naru taataw chirix a’an? K’a’ru naru taab’aanu re xsaqob’resinkil ru li rajom aach’ool ut ink’a’ yal xk’oxlankil li b’aanunb’il chi k’utk’u?
Wi ninsik’ li “k’a’aq re ru chaab’il” rik’in lin Choxahil Yuwa’, tink’ul.
Li Awa’b’ej Russell M. Nelson kixye: “Ma yaal naq li Dios naraj aawaatinankil? Yaal! … Ay, toj wan chik naab’al li naraj laa Choxahil Yuwa’ naq taanaw” (“Li k’utb’esinb’il na’leb’ choq’ re li Iglees ut choq’ re qayu’am,” Jolomil ch’utub’aj-ib’ re abril 2018). Naq nakawil ru lix b’oqom li Qaawa’ sa’ 3 Nefi 14:7–11 re tz’aamank, sik’ok, ut toch’ok, k’oxla li “k’a’aq re ru chaab’il” li naraj a’an naq taatz’aama. Eb’ li raqal a’in sa’eb’ li loq’laj hu maare tate’xtenq’a chixtawb’al ru chan ru tattz’aamanq, tatsik’oq, ut tattoch’oq. Taaruuq tate’xtenq’a ajwi’ chixtawb’al ru k’a’ut naq moko sumenb’il ta junjunqeb’ li tij jo’ nakak’oxla naq te’sumeeq: Isaias 55:8–9; Helaman 10:5; Moroni 7:26–27, 33, 37; ut Tzol’leb’ ut Sumwank 9:7–9.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
3 Nefi 12:48
Chan ru naq li raatin li Elder Jeffrey R. Holland, “Tz’aqalaq eere eeru—junaq kutan” (Jolomil ch’utub’aj-ib’ re octubre 2017) nokoxtenq’a chixtawb’al ru li raatin li Kolonel sa’ li raqal a’in? Taaruuq ajwi’ taataw aana’leb’ sa’ Moroni 10:32–33.
3 Nefi 12:9, 38–42; 14:3–5, 12
Chan ru wankeb’ rilom li raqal a’in rik’in li komonil wankeb’ wi’ li komon sa’ li junkab’al? Maare laa junkab’al taaruuq te’xk’oxla sa’ komonil chan ru xyu’aminkileb’ li raqal a’in rik’in xnimal wi’chik li paab’aal.
3 Nefi 13:19–21
Eb’ li raqal a’in te’ruuq chixtikib’ankil jun aatinak chirix k’a’ru li nim xloq’al choq’ re laa junkab’al. Ma wankeb’ lee b’ihomal sa’ ruchich’och’ li neke’ramok eere chixtamresinkil lee b’ihomal sa’ choxa? Taaruuq taaka’jultika li na’leb’ a’in rik’in xb’eresinkil laa junkab’al sa’ jun b’atz’unk re sik’ok b’ihomal, re xtawb’al li k’a’aq re ru sa’ lee rochoch li naxjultika chiruheb’ li komon sa’ laa junkab’al li b’ihomal maak’a’ roso’jik.
3 Nefi 14:7–11
Maare eb’ li kok’al toj ka’ch’ineb’ xyu’am taawulaq chiruheb’ jun li b’atz’unk, li nareetali 3 Nefi 14:8–9, b’ar wi’ te’xpatz’ xk’ulb’al k’a’ruhaq a’ut te’xk’ul jalan chik li k’a’aq re ru. K’a’ru kiraj li Kolonel naq taqanaw chirix li qaYuwa’ sa’ Choxa naq kixwotz li na’leb’ a’in?
3 Nefi 14:15–20
K’a’ruheb’ li “chaab’il uuchinihom” li nokohe’xtenq’a chixnawb’al naq laj Jose Smith, malaj li Awa’b’ej re li Iglees anajwan, a’an jun tz’aqal profeet?
3 Nefi 14:24–27
K’oxla chan ru taaruuq taatenq’a laa junkab’al chixtawb’al ru li jaljookil ru aatin sa’eb’ li raqal a’in. Maare eb’ li komon sa’ li junkab’al te’ruuq chixyiib’ankileb’ xjalam-uuch, chixk’utb’esinkil rik’in b’aanuhom, malaj chixkab’lankil k’a’ruhaq sa’ xb’een jun kawil k’ojleeb’al ut sa’ xb’een samahib’.
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Oksiheb’ li k’anjeleb’aal sa’ li k’utuk. Li Kolonel kixk’ut li xnimal ru yaalil na’leb’ rik’in roksinkil li k’a’aq re ru nawb’il ru. Taaruuq ajwi’ taab’aanu a’an naq laa junkab’al naril ru 3 Nefi 12–16. Qayehaq, naq nakawil ru li ch’ol 12, taaruuq taak’ut li atz’am, jun li kandeel, ut jun li b’ataal. A’in taaruuq ajwi’ taak’amoq sa’ jun chaab’il k’anjel re xnumsinkil wi’chik li k’a’ru xtzolman. Chirix naq xerileb’ ru li ch’ol a’in, k’uteb’ wi’chik li k’a’aq re ru a’in, ut patz’ reheb’ li komon sa’ li junkab’al k’a’ru kixk’ut li Kolonel chirix li junjunq k’a’aq re ru a’in.
Li Kolonel narula’ani li tenamit aran America, xb’aan laj Glen S. Hopkinson