28 septiembre–11 octubre. 3 Nefi 17–19: “K’ehomaq reetal, nujenaq xsahil inch’ool,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“28 septiembre–11 octubre. 3 Nefi 17–19,” Kim, Taaqehin—Choq’ reheb’ li komon ut li junkab’al: 2020
Lix saqenkil li rilob’aal kilemtz’un chiruheb’, xb’aan laj Gary L. Kapp
28 septiembre–11 octubre
3 Nefi 17–19
“K’ehomaq reetal, nujenaq xsahil inch’ool”
Eb’ li ch’ol li ak xqil ru sa’ 3 Nefi neke’xjayali rib’ sa’ li raatin li Kolonel, a’b’an eb’ li ch’ol 17–19 neke’xch’olob’ lix k’anjel ut li k’a’ru kixk’ut sa’ xyanqeb’ li tenamit. Naq nakawileb’ ru li ch’ol a’in, k’a’ru naxk’ut li Musiq’ej chawu chirix li Kolonel?
Xtz’iib’ankil li nakak’oxla
Li Jesukristo ak kixnumsi li kutan sa’ k’anjelak chiruheb’ li wankeb’ sa’ li ch’och’ Naab’alil, sa’ xk’utb’al lix evangelio, sa’ xkanab’ankileb’ li tenamit chirilb’al ut chixch’e’b’aleb’ li k’ob’olal sa’ lix junxaqalil waklijenaq chi yo’yo, ut sa’ xch’olob’ankil xyaalal naq a’an li yeechi’inb’il aj Mesias. Chirix a’an xwulak xhoonalil naq tento taaxik. Tento taasutq’iiq rik’in lix Yuwa’, ut kixnaw naq eb’ li tenamit ke’raj ru hoonal re xk’oxlankil sa’ xch’ooleb’ li k’a’ru kixk’ut chiruheb’. A’an kixyeechi’i naq taasutq’iiq wulajaq ut kixkanab’eb’ li tenamit chi xik sa’ rochocheb’. A’b’an maajun xko’o. Ink’a’ ke’xye li ke’reek’a sa’ xch’ooleb’, a’b’an li Jesus kiru chixk’eeb’al reetal: ke’royb’eni naq a’an “taakanaaq chik junpaataq rik’ineb’ ” (3 Nefi 17:5). Wan naab’al chik lix k’anjel aajeleb’ ru, a’b’an li hoonal re uxtaanank-u ink’a’ junelik nachal sa’ jun hoonal yamyo, jo’kan naq li Jesus kikana rik’ineb’ junpaataq chik. Li kik’ulman chirix a’an maare a’an li esilal q’axal ch’ina us chirix rilb’aleb’ li komon li tz’iib’anb’il resil sa’eb’ li loq’laj hu. Eb’ li ke’wan aran ka’ajwi’ ke’xye naq ink’a’ naru chi yeemank chan ru xchaab’ilal (chi’ilmanq 3 Nefi 17:16–17). Chirix li musiq’ejil hoyonik a’in, li Jesus ka’ajwi’ kixye: “Anajwan ut k’ehomaq reetal, nujenaq xsahil inch’ool” (3 Nefi 17:20).
Li na’leb’ re xtzolb’aleb’ li loq’laj hu aajunes
Li Kolonel a’an kixk’ut rik’in xb’aanuhom chan ru tento taa’uxq rilb’aleb’ li komon.
Naqanaw naq wankeb’ tana’ 2,500 chi kristiaan (chi’ilmanq 3 Nefi 17:25) li ke’ula’aniik xb’aan li Kristo li xb’een sut, jo’ tz’iib’anb’il sa’ 3 Nefi 11–18. A’ut li Kolonel toj kixtaw xhoonal re rilb’al li junjunq reheb’. K’a’ru nakatzol chirix rilb’aleb’ li komon rik’in li kixb’aanu li Kolonel sa’ li ch’ol a’in? K’a’ruheb’ li rajomeb’ ru li kixtenq’aheb’ wi’? K’oxlan chirix chan ru lix b’aanhom naru tatxtenq’a chirilb’aleb’ laa komon.
K’ehomaq reetal lee kok’al, xb’aan laj Gary L. Kapp
3 Nefi 17:13–22; 18:15–25; 19:6–9, 15–36
Li Kolonel kixk’ut chiqu chan ru tijok.
K’oxla chan raj ru rab’inkil li Kolonel chi tijok chawix. K’a’ raj ru tixye chawix? Eb’ lix k’utum ut lix tij sa’eb’ li ch’ol a’in naru tate’xtenq’a chixsumenkil li patz’om a’an. Naq yookat chi tzolok, k’a’ru nakatzol rik’in li kixb’aanu li Kristo li naru tixchaab’ilob’resi li tijok nakab’aanu laa’at? K’a’ruheb’ li osob’tesink xak’ul sa’ laa yu’am xb’aan li tijok?
Naru tinnujaq sa’ musiq’ej naq nink’ul li loq’laj wa’ak.
Naq nakawil ru 3 Nefi 18:1–12, k’oxlan chirix chan ru naq xk’ulb’al li loq’laj wa’ak naru tatxtenq’a chi “nujak” sa’ musiq’ej (3 Nefi 18:3–5, 9; chi’ilmanq ajwi’ 3 Nefi 20:1–9). Qayehaq, taaruuq taatz’iib’a xtusulaleb’ li patz’om li neke’xk’e chatz’il aawix naq yookat chixk’ulb’al li loq’laj wa’ak, jo’ “K’a’ru naweek’a chirix li Kolonel ut lix mayej choq’ we?” “Chan ru naq lix mayej naxjal inyu’am wulaj wulaj?” malaj “K’a’ru yookin chixb’aanunkil chi us jo’ tzolom, ut chan ru naru tinchaab’ilob’resi wib’.
Li aatin a’in re li Awa’b’ej Henry B. Eyring taaruuq tatxtenq’a chi k’oxlak chirix chan ru naq li loq’laj wa’ak naru tatxtenq’a chi nujak rik’in li Musiq’ej: “Naq nakatz’il rix laa yu’am chiru xhoonalil li loq’laj wa’ak, nawoyb’eni naq jayalinb’il laa k’a’uxl, ink’a’ ka’ajwi’ rik’in li ink’a’ us xab’aanu, rik’in aj b’an wi’ li k’a’ru us xab’aanu—eb’ li hoonal xaweek’a wi’ naq li qaChoxahil Yuwa’ ut li Kolonel saheb’ xch’ool aawik’in. Chiru junpaat naq yoo chi jek’imank li loq’laj wa’ak, naru taapatz’ re li Dios naq tatxtenq’a chirilb’aleb’ li k’a’aq re ru a’an. … Naq laa’in ninb’aanu a’in, li Musiq’ej naxk’ojob’ inch’ool naq us ta maji’ tz’aqal we wu, chaab’ilin chik anajwan chiru chan ru xinwan ewer. Ut a’in naxk’e xkawilal inch’ool naq, b’antiox re li Kolonel, naru tinchaab’ilo’q wi’chik wulaj” (“Recordarle siempre,” Liahona, febrero 2018, 5).
Eb’ lix tzolom li Jesukristo neke’xsik’ li maatan re li Santil Musiq’ej.
K’oxlan chirix jun li tij toje’ xaye. K’a’ru nakatzol rik’ineb’ laa tij chirix k’a’ru tz’aqal li rajom aach’ool? Chirix junjunqeb’ li kutan rik’in li Kolonel, li ch’utch’uukil tenamit “ke’tijok re xk’ulb’al li k’a’ru k’a’jo’ ajb’il xb’aaneb’ ”—li maatan re li Santil Musiq’ej (3 Nefi 19:9). Naq nakawileb’ ru li raqal a’in, k’oxla li rajom aach’ool laa’at re tat-ochb’eeniiq xb’aan li Santil Musiq’ej. K’a’ru nakatzol chirix xsik’b’al naq li Santil Musiq’ej taa’ochb’eeninq aawe?
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
3 Nefi 17
Naq yookex chirilb’al ru li ch’ol a’in jo’ junkab’al, k’oxla xaqliik chiru junpaataq re xyeeb’al reheb’ li komon sa’ laa junkab’al naq te’xk’oxla li esil a’in chanchan naq yookeb’ chi tz’aqonk xjuneseb’ rib’ sa’ li kik’ulman. Qayehaq, taaruuq taawoksiheb’ li patz’om jo’eb’ a’in: “K’a’ paay chi rahilal taak’am raj chiru li Kolonel re tixk’irtesi?” “K’a’ raj ru taawaj naq a’an tixye sa’ lix tij a’an choq’ aawe?” malaj “Ani reheb’ li raarookeb’ aab’aan taawaj raj naq a’an tarosob’tesi?” Rilb’al ru li ch’ol a’in maare tatxmusiq’a chi tijok choq’ reheb’ li komon sa’ laa junkab’al chi junjunqil, jo’ kixb’aanu li Jesus.
3 Nefi 18:1–12
K’a’ru naraj naxye “nujak” xb’aan xk’ulb’al li loq’laj wa’ak, ut chan ru naqanumsi a’an? K’a’ru naqatzol sa’eb’ li raqal 5–7 chirix k’a’ut naq li Jesus kixk’e qe li k’ojob’anb’il k’anjel re li loq’laj wa’ak?
3 Nefi 18:17–21
K’a’ru naqatzol sa’eb’ li raqal a’in chirix k’a’ru aj-e li tijok? Chan ru naru taqachaab’ilob’resi li musiq’ejil wankilal reheb’ li qatij, sa’ junesal jo’ ajwi’ sa’ junkab’al?
3 Nefi 18:25; 19:1–3
K’a’ru qanumishom jo’ junkab’al rik’in li evangelio li naqaj raj naq chixjunileb’ li wankeb’ chiqasutam taaruuq ajwi’ te’xnumsi? Chan ru naru taqataaqe lix b’aanuhomeb’ li ani wankeb’ sa’eb’ li raqal a’in ut “took’anjelaq chi numtajenaq” (3 Nefi 19:3) re xk’amb’aleb’ li qas qiitz’in rik’in li Kristo, re naq eb’ a’an te’ruuq ajwi’ “chixch’e’b’al ut chirilb’al” (3 Nefi 18:25) li k’a’ru ak xqataw sa’ li evangelio.
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Kanab’ li Musiq’ej chixk’amb’al aab’e sa’ li tzolok. Li Santil Musiq’ej naru tatxb’eresi rik’in li tento taatzol wulaj wulaj. K’e aach’ool chirab’inkil lix musiq’anb’il na’leb’, us ta maare naxye aawe naq taawil ru jalan chik li na’leb’ malaj naq tattzoloq chi jalan rik’in chan ru k’aytesinb’ilat chixb’aanunkil. Qayehaq, naq nakattzolok chirix li loq’laj wa’ak sa’ 3 Nefi 18, li Musiq’ej maare tixye aawe naq taak’e xkomon chik laa hoonal re xtzolb’al li na’leb’ a’an.
Ke’ril chi teeliik li choxa, xb’aan laj Walter Rane