“12–18 octubre. 3 Nefi 20–26: “Laa’ex ralal xk’ajol li sumwank,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“12–18 octubre. 3 Nefi 20–26,” Kim, Taaqehin—Choq’ reheb’ li komon ut li junkab’al: 2020
Xjalam-uuch li Kristo naq kixk’ut rib’ chiruheb’ laj Nefita, xb’aan laj Andrew Bosley
12–18 octubre
3 Nefi 20–26
“Laa’ex ralal xk’ajol li sumwank”
Naq ki’aatinak chirixeb’ li loq’laj hu, li Jesus kiroksi chi kok’ aj xsa’ li aatin tz’ilok-ix (chi’ilmanq 3 Nefi 20:11; 23:1, 5). Naq nakawil ru 3 Nefi 20–26, k’a’ru li taatz’il rix?
Xtz’iib’ankil li nakak’oxla
Naq nakawab’i chi oksimank li ch’ol aatin lix junkab’al laj Israel, ma nakaweek’a naq yookeb’ chi aatinak chawix laa’at? Eb’ laj Nefita ut laj Lamanita a’aneb’ tz’aqal riyajileb’ laj Israel—li resilaleb’ natikla sa’ Jerusalen—a’b’an choq’ re junjunq reheb’, chanchan naq laj Jerusalen a’an “jun ch’och’ jwal najt, jun ch’och’ moko nawb’il ta qab’aan” (Helaman 16:20). Yaal naq a’aneb’ chaq “jun ruq’ lix toon che’ re Israel,” a’b’anan ke’wan ajwi’ chi “sachenaq chaq chiru xtoonal” (Alma 26:36; chi’ilmanq ajwi’ 1 Nefi 15:12). A’ut naq li Kolonel kixk’ut rib’ chiruheb’, a’an kiraj naq te’xnaw naq ink’a’ sachenaqeb’ sa’ rilob’aal a’an. “Laa’ex xkomonex lix junkab’al laj Israel,” chan, “ut laa’ex wankex sa’ li sumwank” (3 Nefi 20:25). Maare jo’kan tixye raj aawe laa’at sa’ li kutan a’in, xb’aan naq yalaq ani li nakub’e xha’ ut na’ok sa’ sumwank rik’in a’an, a’an ajwi’ xkomon li junkab’al laj Israel, “sa’ li sumwank,” maak’a’ naxye aniheb’ laa xe’toonil chi moko b’ar wankat sa’ li ruchich’och’. Sa’ jalan chik aatin, naq li Jesus na’aatinak chirix lix junkab’al laj Israel, a’an yoo chi aatinak chawix laa’at. Li taqlahom re rosob’tesinkileb’ “chixjunil li junkab’al re li ruchich’och’ ” wan choq’ aawe (3 Nefi 20:27). Li b’oqom, “ajen wi’chik, ut k’e chawix laa metz’ew” wan choq’ aawe (3 Nefi 20:36). Ut lix chaq’al ru yeechi’ihom, “lix chaab’ilal inch’ool moko taa’elq ta aawik’in, chi moko taa’isiiq chaq li sumwank re lin tuqtuukilal ,” wan choq’ aawe (3 Nefi 22:10).
Li na’leb’ re xtzolb’aleb’ li loq’laj hu aajunes
Sa’ roso’jikeb’ li kutan, li Dios tixk’anjela jun xnimal ru ut sachb’a-ch’oolejil k’anjel.
Li Kolonel kixk’e xninqal ru yeechi’ihom reheb’ li ch’utch’uukil tenamit ut ki’aatinak jo’ profeet chirix li taak’ulmanq moqon rik’in lix tenamit re li sumwank—ut okenaqat laa’at sa’ a’an. Jo’ kixye li Awa’b’ej Russell M. Nelson: “Xkomono lix tenamit li Qaawa’ re li sumwank. Wan qe li osob’tesink re tz’aqonk sa’ xtz’aqob’resinkileb’ ru li yeechi’ihom a’in. K’a’jo’ xchaab’ilal li kutan a’in!” (“El recogimiento del Israel disperso,” Liahona, noviembre 2006, 79).
Sik’eb’ li profeetil aatin chirix li roso’jikeb’ li kutan sa’ li raatin li Kolonel sa’ 3 Nefi 20–22. B’arwan reheb’ li profeetil aatin a’in mas nawulak chawu? K’a’ru naru taab’aanu re tenq’ank chixtz’aqob’resinkileb’ ru li profeetil aatin sa’eb’ li ch’ol a’in?
K’e reetal naq 3 Nefi 21:1–7 naxye naq lix k’utunik lix Hu laj Mormon (“li k’a’aq re ru a’in” sa’eb’ li raqal 2 ut 3) a’an jun reetalil naq ak ke’ok chi tz’aqob’resiik ruheb’ lix yeechi’ihom li Dios. K’a’ruheb’ li yeechi’ihom a’an, ut chan ru naq lix Hu laj Mormon natenq’an chixtz’aqob’resinkileb’ ru?
Chi’ilmanq ajwi’ Russell M. Nelson, “Juventud de Israel” (ch’utam choq’ reheb’ li saaj sa’ chixjunil li ruchich’och’, 3 junio, 2018), broadcasts.ChurchofJesusChrist.org.
Li Kolonel naraj naq tintz’ileb’ rix li raatineb’ li profeet.
Eb’ li raatin ut lix b’aanuhom li Jesus sa’eb’ li ch’ol a’in neke’xk’utb’esi chan ru nareek’a a’an chirixeb’ li loq’laj hu. K’a’ru nakatzol chirixeb’ li loq’laj hu sa’ 3 Nefi 20:10–12; 23; ut 26:1–12? K’a’ru nakataw sa’eb’ li raqal a’in li nakatxmusiq’a “chitz’ilb’al rix li k’a’aq re ru a’in chi yalb’il aaq’e”? (3 Nefi 23:1).
Li Dios naruxtaanaheb’ ru li ani neke’sutq’i rik’in.
Sa’ 3 Nefi 22 ut 24, li Kolonel naroksi li raatin laj Isaias ut laj Malakias, li nujenaq rik’in li utz’u’ujinb’il aatin ut li jaljookil ru aatin—lix b’onoleb’ li k’ojleb’aal pek, li ru xam, li plaat saqob’resinb’il ru, ut li rilob’aal choxa. Maare chaab’ilaq xtz’iib’ankileb’ chi tusb’il. K’a’ru naxk’ut li junjunq chawu chirix chan ru nak’anjelak li Dios rik’in lix tenamit? Qayehaq, 3 Nefi 22:4–8 naxjuntaq’eeta li Dios rik’in jun b’eelomej ut naxjuntaq’eeta lix tenamit rik’in jun ixaqilb’ej. Rilb’aleb’ ru li jaljookil ru aatin a’in maare tatxmusiq’a chi k’oxlak chirix chan ru naq wankat rik’in li Dios. Chan ru naq ak xe’tz’aqob’resiik ru li yeechi’ihom sa’eb’ li ch’ol a’in sa’ laa yu’am laa’at? (chi’ilmanq 3 Nefi 22:7–8, 10–17; 24:10–12, 17–18).
Tento naq taasutq’isiiq inch’ool rik’ineb’ lin xe’toonil.
Chiru k’iila mil chihab’, eb’ laj Judio sa’ chixjunil li ruchich’och’ yookeb’ chiroyb’eninkil naq taak’ulunq wi’chik laj Elias, jo’ yeechi’inb’il chaq najter. Eb’ laj Santil Paab’anel sa’ Roso’jikeb’ li Kutan neke’xnaw naw ak xk’ulun wi’chik laj Elias naq kixk’ut rib’ chiru laj Jose Smith sa’ li Santil Ochoch re Kirtland sa’ 1836 (chi’ilmanq Tzol’leb’ ut Sumwank 110:13–16). Li k’anjel re xsutq’isinkileb’ li ch’oolej rik’ineb’ li yuwa’b’ej—li k’anjel reheb’ li santil ochoch ut re resilal li junkab’al—ak yoo chi uxmank. K’a’ru xak’ul laa’at li xatxtenq’a chixsutq’isinkil aach’ool rik’ineb’ laa xe’toonil?
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
3 Nefi 22:2
Chirix rilb’al ru li raqal a’in, maare texruuq chixyiib’ankil jun muheb’aal t’ikr sa’ kab’l ut tex’aatinaq chirix chan ru naq li Iglees chanchan jun muheb’aal t’ikr sa’ li yamyookil ch’och’. K’a’ru naraj naxye “xtiqb’al roq lix k’aamal” ut “xk’eeb’al xkawub’ li roqechal”? Chan ru taqab’oqeb’ li qas qiitz’in chixtawb’al “xmuheb’aaleb’ ” sa’ li Iglees? (chi’ilmanq li video “Bienvenidos” sa’ ComeUntoChrist.org).
3 Nefi 23:6–13
Wi ta li Kolonel tixtz’il rixeb’ li tz’iib’anb’il esil k’uulanb’il xb’aan li qajunkab’al, k’a’ raj ru tixpatz’ qe chirixeb’? Ma wan k’a’ru xk’ulman malaj li musiq’ejil na’leb’ xqak’ul li tento raj taqatz’iib’a resil? Naru naq a’in jun chaab’il hoonal re xyiib’ankil jun resilal li junkab’al malaj xtiqb’al xkomon chik li esil chi sa’ wi ak wan, ut re xk’uub’ankil qana’leb’ sa’ komonil chirix li k’a’ru taqatz’iib’a chi sa’. Eb’ li komon sa’ li junkab’al toj saajeb’ maare taawulaq chiruheb’ rutz’u’ujinkil li tz’iib’anb’il esil rik’ineb’ li isinb’il jalam-uuch malaj eb’ li yiib’anb’il jalam-uuch. K’a’ut naq aajel ru xtz’iib’ankil resil li qamusiq’ejil numsihom jo’ junkab’al?
3 Nefi 24:7–18
Chan ru noko’osob’tesiik rik’in xtojb’al li lajetqil, jo’ yeechi’inb’il sa’eb’ li raqal a’in? Li raatin li David A. Bednar “Las ventanas de los cielos” (Liahona, noviembre 2013, 17–20) taaruuq tixtenq’aheb’ li komon sa’ li junkab’al chixk’eeb’al reetaleb’ li osob’tesink a’in.
3 Nefi 25:5–6
Chan ru taatenq’aheb’ li komon sa’ laa junkab’al chixsutq’isinkil lix ch’ooleb’ rik’ineb’ lix yuwa’eb’? Maare tatruuq chixk’eeb’al xk’anjeleb’ li komon sa’ li junkab’al chi tzolok chirix jun reheb’ lee xe’toonil, ut te’xwotz rik’in lix komoneb’ chik sa’ li junkab’al li k’a’ru xe’xtzol (chi’ilmanq FamilySearch.org). Malaj texruuq chi k’anjelak sa’ komonil re xtawb’al xk’ab’a’ jun lee xe’toon li naraj ruheb’ li k’ojob’anb’il k’anjel re li santil ochoch ut teek’uub’ jun lee xikik sa’ li santil ochoch re xb’aanunkileb’ li k’ojob’anb’il k’anjel a’an.
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Yu’ami lix nawom aach’ool. “Nakak’ut k’a’ruhat laa’at,” kixk’ut li Elder Neal A. Maxwell. “Chan ru wankat mas wi’chik taajultikamanq … chiru jun yaalil na’leb’ xak’ut sa’ jun li tzolok” (“But a Few Days” [aatin yeeb’il reheb’ laj k’utunel sa’ li Sistema Educativo de La Iglesia, 10 septiembre, 1982], 2). Wi taawaj xk’utb’al jun na’leb’ re li evangelio, b’aanu li jo’ k’ihal naru chawu re xyu’aminkil li na’leb’ a’an.
K’am chaq li esil, xb’aan laj Gary L. Kapp