“12–18 octubre. 3 Nefi 20–26: “Laa’ex ralal xk’ajol li sumwank,” ” Kim, Taaqehin—Choq’ re li Tzoleb’aal reheb’ li Kok’al: Lix Hu laj Mormon 2020 (2020)
“12–18 octubre. 3 Nefi 20–26,” Kim, Taaqehin—Choq’ re li Tzoleb’aal reheb’ li Kok’al: 2020
Xjalam-uuch li Kristo naq kixk’ut rib’ chiruheb’ laj Nefita xb’aan laj Andrew Bosley
12–18 octubre
3 Nefi 20–26
“Laa’ex ralal xk’ajol li sumwank”
Naq taawil ru 3 Nefi 20–26, “tz’il rix li k’a’aq re ru a’in chi yalb’il aaq’e” (3 Nefi 23:1) re xtawb’aleb’ li yaalalil li tatmusiq’aaq chixwotzb’al rik’ineb’ li kok’al re laa tzoleb’aal.
Xtz’iib’ankil li nakak’oxla
Xkanab’ankileb’ chi wotzok
Numsi jun xjalam-uuch li Kolonel sa’ xyanqeb’ li kok’al. Naq li junjunq chi kok’al tixchap li jalam-uuch, kanab’ chixwotzb’al k’a’ruhaq kixk’ut li Jesus malaj kixb’aanu naq kirula’ani li tenamit sa’ lix Hu laj Mormon. Naru neke’xwotz junaq na’leb’ xe’xtzol sa’ kab’l malaj sa’ li Tzoleb’aal reheb’ li Kok’al.
Xk’utb’al li tzol’leb’: Kok’al toj ka’ch’ineb’ xyu’am
Naru nintijok sa’ li waam.
Wi li kok’al sa’ laa tzoleb’aal xe’tzolok chirix li tijok chiru li xamaan xnume’, naru nakawoksi jun reheb’ li kok’ k’anjel a’in re xk’eeb’al chik xna’leb’eb’ chirix.
Kok’ k’anjel naru chi b’aanumank
-
Kanab’eb’ li kok’al chixk’utb’al chawu k’a’ru neke’xb’aanu naq neke’tijok. K’a’ru neke’xb’aanu rik’ineb’ li ruq’? rik’ineb’ lix jolom? rik’ineb’ xsa’ li ru? Ch’olob’ naq wan naq naqaj aatinak rik’in li qaChoxahil Yuwa’ a’b’an ink’a’ naru naqawiqib’ qib’ malaj naqamutz’ li qu. K’a’ru naru taqab’aanu? Yaab’asi li aatin a’in choq’ reheb’ li kok’al wan sa’ 3 Nefi 21:1: “[Li Jesus] kixtaqlaheb’ naq ink’a’ te’xkanab’ tijok sa’ xch’ooleb’.” Ye reheb’ li kok’al chan ru nakattijok laa’at sa’ laa ch’ool.
-
Yiib’ xjalam-uuch jun ehej ut jun aamej chiru li pizarron. Kanab’eb’ li kok’al chixk’utb’al chi ru’uj ruq’eb’ li ehej ut te’xye aawe junjunqeb’ k’a’aq re ru neke’xye naq neke’tijok. Chirix a’an kanab’eb’ chixk’utb’al chi ru’uj ruq’eb’ li aamej, ut ch’olob’ chiruheb’ naq naru ajwi’ neke’qaye li k’a’aq re ru a’an sa’ li qaam. Ch’olob’ xyaalal naq li qaChoxahil Yuwa’ naxnaw ru li qeek’ahom ut qak’oxlahom.
Xtojb’al li lajetqil naxk’am chaq li osob’tesihom.
Moko na’oyb’eniik ta naq te’xtoj li lajetqil li kok’al maji’ neke’k’ub’e xha’. A’b’anan, moko mas chi seeb’ ta re xk’utb’al chiruheb’ li na’leb’ ut li osob’tesihom nachal xb’aan li chaq’rab’ a’an.
Kok’ k’anjel naru chi b’aanumank
-
Wi sa’ li tzoleb’aal wan jun li ventaan, kanab’eb’ li kok’al chirilb’al. K’a’ru naru na’ok sa’ li tzoleb’aal naq teeto raj li ventaan? Yaab’asi 3 Nefi 24:10, ut ch’olob’ naq wi naqatoj li lajetqil, li “rilob’aal choxa” neke’tehe’ ut li osob’tesihom neke’wulak sa’ li qayu’am.
-
K’ut chiruheb’ li kok’al lajeeb’ chi kok’ tumin (malaj jalan chik kok’ k’a’aq re ru). Kanab’eb’ chirajlankil li kok’ tumin aawochb’een. Ch’olob’ xyaalal naq chixjunil li k’a’ru wan qe a’an rosob’tesihom li qaChoxahil Yuwa’. Isi jun li kok’ tumin ut ch’olob’ naq wi naqatoj li lajetqil, naqaq’ajsi re li qaChoxahil Yuwa’ lix lajetq raqal li naqak’ul. K’uteb’ jalam-uuch li neke’reetali chan ru neke’oksiman li lajetqil re rosob’tesinkil lix Iglees li Qaawa’ (jo’ xkab’lankileb’ li santil ochoch, xjultikankil li evangelio, ut wan chik xkomon; chi’ilmanq Libro de obras de arte del Evangelio, ajl 109–110, 118–119).
-
B’ichahomaq jun li b’ich chirix li lajetqil, jo’ “Nawaj xk’eeb’al lin lajetqil” (B’ichleb’aal choq’ reheb’ li Kok’al, 143). K’uteb’ li ch’ol aatin li neke’xk’ut k’a’ut naq naqatoj li lajetqil.
Li qaChoxahil Yuwa’ naraj naq tintzoloq chirixeb’ lin xe’toonil.
Jo’ naxye sa’eb’ li raqal a’an, laj Elias li profeet kixk’ojob’ wi’chik li laaw re li tz’ape’k sa’ junajil jo’ junkab’al choq’ re li junelik q’e kutan.
Kok’ k’anjel naru chi b’aanumank
-
Yaab’asu 3 Nefi 25:6 ut kanab’eb’ li kok’al chixk’eeb’al li ruq’eb’ sa’ xb’een li raameb’ rajlal sut naq te’rab’i li aatin “ch’ooleb’.” Ch’olob’ naq li qaChoxahil Yuwa’ naraj naq “eb’ li ralal”—chiqajunilo laa’o—tootzoloq chirixeb’ li “yuwa’b’ej”—eb’ li qana’ qayuwa’, qixa’an qamama’, ut xikin na’ xikin yuwa’—ut naq taqeek’a qarahom choq’ reheb’.
-
K’e xb’oqb’al xna’ xyuwa’ junaq reheb’ li kok’al chi aatinak chirixeb’ lix xe’toonil. Malaj, seraq’i reheb’ li kok’al junaq esil chirix junaq laa xe’toonil; wi naru, k’uteb’ xjalam-uuch. Ch’olob’ xyaalal naq li qaChoxahil Yuwa’ naraj naq wanqo rik’in li qajunkab’al chi junelik, ut xb’aan a’an naq naxk’e chaq qe li santil ochoch. B’ichahomaq sa’ komonil “Taaruuq toowanq aran saʼ choxa” (B’ichleb’aal choq’ reheb’ li Kok’al, 98).
Xk’utb’al li tzol’leb’: Kok’al ak ninqeb’
Naru nintz’il rixeb’ li loq’laj hu chi yalb’il inq’e.
Li Kolonel kixye reheb’ li k’iila kristiaan naq te’xtz’il rixeb’ li loq’laj hu, ut kiraj naq te’tz’iib’amanq li raatin li profeet (chi’ilmanq 3 Nefi 23:1,5–13; 26:2).
Kok’ k’anjel naru chi b’aanumank
-
Kanab’eb’ li kok’al chirilb’al ru 3 Nefi 23:1, 5 ut chixsik’b’al jun aatin natawman oxib’ sut. K’a’ru naraj naxye xtz’ilb’al rixeb’ li raatin li profeet? K’a’ru xjalanil li tz’ilok-ix ut ka’ajwi’ rilb’al ru? Ye reheb’ li kok’al chan ru nakatz’il rixeb’ li loq’laj hu laa’at ut k’a’ru nakataw.
-
K’e reheb’ li junjunq chi kok’al jun ch’ina hu malaj setb’il hu ut kanab’eb’ chixtz’iib’ankil jun raqal mas nawulak chiruheb’ sa’eb’ li loq’laj hu. (Wi na’ajman ru, tenq’aheb’.) Kanab’eb’ chixk’eeb’aleb’ xhoonal re xmuqb’al li ch’ina hu sa’ li tzoleb’aal naq eb’ lix komon te’xtz’ap li ruheb’. Kanab’eb’ li kok’al chixsik’b’al li ch’ina hu ut, naq te’xtaw, te’ril ru sa’ komonil. K’a’ru naqataw sa’ li raqal a’an reheb’ li loq’laj hu li aajel ru choq’ qe laa’o?
Xtojb’al li lajetqil naxte rilob’aal li choxa.
Naq nakatk’utuk chiruheb’ li kok’al chirix li lajetqil, nakakawresiheb’ re xk’ulb’al “jun osob’tesink toj reetal naq moko tz’aqalaq ta li na’ajej re xk’ulb’al” (3 Nefi 24:10).
Kok’ k’anjel naru chi b’aanumank
-
Chiru li pizarron, tz’iib’a Wi nintoj li lajetqil, li Qaawa’ . Kanab’eb’ li kok’al chirilb’al ru 3 Nefi 24:8–12, ut tenq’aheb’ chixtawb’aleb’ ch’ol aatin li te’xtz’aqob’resi ru li ch’ol aatin a’an. Wotz jun aanumsihom b’ar wi’ laa’at xat’osob’tesiik xb’aan xtojb’al li lajetqil.
-
Tz’iib’a junjunq xk’ihal li tumin chiru li pizarron ut tenq’aheb’ li kok’al chixtz’ilb’al rix jarub’ li lajetqil (lix lajetq raqal) tento taqak’e rik’ineb’ li tumin a’an. K’ut chiruheb’ chan ru xnujob’resinkil li hu re xtojb’al li lajetqil.
-
Tenq’aheb’ li kok’al chixtusb’aleb’ ru chiru li pizarron chan ru na’oksiman li lajetqil re rosob’tesinkil lix Iglees li Qaawa’ (re xkab’lankileb’ li santil ochoch, xjultikankil li evangelio, xpuktesinkileb’ li loq’laj hu, ut wankeb’ chik xkomon). Kanab’eb’ li kok’al chixyiib’ankil jalam-uuch (malaj te’xtaweb’ jalam-uuch sa’eb’ li hu re li Iglees) chirix chan ru naq li lajetqil narosob’tesi li Iglees.
Li qaChoxahil Yuwa’ naraj naq tintzoloq chirixeb’ lin xe’toonil.
K’oxla chan ru taamusiq’aheb’ li kok’al chixsik’b’aleb’ resil lix xe’toonileb’ re naq jo’q’e taawulaq xkutankil naq naru te’xik sa’ li santil ochoch, te’xb’aanu chaq li k’ojob’anb’il k’anjel choq’ reheb’ lix xe’toonil.
Kok’ k’anjel naru chi b’aanumank
-
Ye reheb’ li kok’al naq sa’ 3 Nefi 25:5–6 wan jun profeetil aatin chirix li k’a’ru taak’ulmanq sa’ roso’jikeb’ li kutan. Kanab’eb’ chirilb’aleb’ ru li raqal a’an re xsik’b’al k’a’ru a’an. Ch’olob’ xyaalal naq li profeetil aatin a’an ak xtz’aqob’resiman ru, ut kanab’eb’ li kok’al chirilb’al ru resil a’an sa’ Tzol’leb’ ut Sumwank 110:13–16 (chi’ilmanq ajwi’ Libro de obras de arte del Evangelio, ajl 95). Cholob’ naq wi nokotzolok chirixeb’ li qaxe’ qatoon ut naqab’aanu li k’anjel re li santil ochoch choq’ reheb’ a’an, li qaam yoo chi sutq’iik rik’ineb’ li qayuwa’.
-
Aatinan rik’ineb’ li kok’al chirix jun aaxe’ aatoon li kikam chi ink’a’ kub’sinb’il xha’. Wi naru, k’ut chiruheb’ jun xjalam-uuch. Wotz lix nawom aach’ool chirix naq li qaChoxahil Yuwa’ naxra li kristiaan a’an, xb’aan a’an naq kixkawresi jun li b’e re naq a’an tixk’ul li kub’iha’ rik’in li k’anjel nab’aanuman sa’ li santil ochoch. Kanab’eb’ li kok’al chixsik’b’al jun ch’ol aatin sa’ 3 Nefi 25:6 li naru naxch’olob’ li k’a’ru nakaweek’a laa’at chirix laa xe’ aatoon.
-
Tenq’aheb’ li kok’al chixtz’aqob’resinkil ru li resilal lix junkab’aleb’ rik’ineb’ xk’ab’a’ lix na’ xyuwa’eb’ ut eb’ li rixa’an ut xmama’eb’. Waklesi xch’ooleb’ chixpatz’b’al reheb’ lix na’ xyuwa’ naq te’tenq’anq chiroksinkileb’ xkomoneb’ li k’ab’a’ej.
Xb’oqb’aleb’ chi tzolok sa’ kab’l
K’e xb’oqb’aleb’ li kok’al chixpatz’b’al reheb’ lix na’ xyuwa’ malaj rixa’an ut xmama’eb’ naq te’xseraq’i esil chirixeb’ lix xe’tooneb’.
Xchaab’ilob’resinkil li qak’utum
Eb’ li kok’al neke’tzolok chi jalan jalanq ru. Eb’ li kok’al neke’xyal xsahil li tzolok rik’in jalan jalanq numsihom. Oksiheb’ kok’ k’anjel li te’tenq’anq reheb’ chireek’asinkileb’ rib’, chiroksinkileb’ chixjunil lix seeb’aleb’ ut chixyalb’al ak’il k’a’aq re ru. (Chi’ilmanq Li k’utuk jo’ li Kolonel, 25).